Author: webrwanda

Hakizimana Muadjiri yatandukanye n’ikipe ya AlKholood FC ikina mu cyiciro cya kabiri muri Saudi Arabia, akaba yamaze gusinyira Police FC yahozemo.

Muri Nyakanga 2022 ni bwo Muhadjiri yerekeje muri iyi kipe, hari nyuma yo gusoza amasezerano muri Police FC.

Nyuma y’amezi 6 gusa akaba yamaze gusesa amasezerano n’iyi kipe kubera ikibazo cy’amikoro, yagarutse muri Police FC yahozemo.

Amakuru avuga ko uyu rutahizamu yamaze gusinya amezi 6 muri iyi kipe y’abashinzwe umutekano, ni mu gihe mu mpeshyi y’uyu mwaka ateganya gusubira gukina hanze y’u Rwanda.

Umwe mu nshuti z’uyu mukinnyi bavugana umunsi ku munsi akaba yabwiye ISIMBI ko byarangiye yamaze gusinyira Police FC.

Hari nyuma y’uko umunyamabanga wa Police FC, CIP Obed Bikorimana abwiye ISIMBI ko mu gice kibanza cya shampiyona bahuye n’imvune nyinshi ariko benshi bakaba barakize, yemeje ko kandi bari ku isoko ndetse bagomba no kongeramo amazina akomeye yirinze kuvuga ayo ari yo.

Hakizimana Muhadjiri yakiniye amakipe atandukanye arimo Kiyovu Sports, Mukura VS, AS Kigali, Etincelles, APR FC na Emirates Club yo muri Leta Zunze Ubumwe z’Abarabu.

Hakizimana Muhadjiri yasubiye muri Police FC

Inkuru benshi bibaza uko izarangira, ni iya rutahizamu Sumaila Moro, umunya-Ghana ukinira Etincelles urimo wifuzwa n’amakipe 2 akomeye mu Rwanda, AS Kigali na Rayon Sports.

Uyu rutahizamu yigaragaje mu mikino ibanza ya shampiyona ya 2022-23 aho mu mikino 15 yatsindiye Etincelles FC ibitego 9, byatumye aba imari ku isoko ry’abakinnyi mu Rwanda muri uku kwezi kwa Mbere 2023.

Rayon Sports ni yo yishyura amafaranga menshi kuri uyu rutahizamu aho yifuza kumutangaho miliyoni 23 z’amafaranga y’u Rwanda ariko zigatangwa mu byiciro kubera ko nta mafaranga iyi kipe ifite bitewe n’ideni rya miliyoni 45 bafitiye umutoza Jorge Paixao bategetswe na FIFA kubera kumwirukana binyuranyije n’amategeko.

Ku ikubitiro Rayon Sports irifuza gutanga miliyoni 15 andi akazashyurwa nyuma, gusa ntabwo uruhande rwa Moro rubikozwa. Uwahaye amakuru ISIMBI yagize ati 'ntabwo bifuza na bo kwisanga mu manza barimo baregana n’ikipe.'

Amakuru ISIMBI yamenye ni uko AS Kigali yamaze kumvikana na Etincelles kuba yagura uyu mukinnyi kuri miliyoni 20 ndetse n’amakuru adafitiwe gihamya ni uko banasinyanye imbanziriza masezerano.

Moro na Emmy Fire ushinzwe kumushakira isoko bivugwa ko bamaze kumvikana na AS Kigali ku kijyanye n’amasezerano y’uyu mukinnyi agomba kumugenga muri iyi kipe y’Abanyamujyi igisigaye ari ukwishyura amafaranga bumvikanye na Etincelles.

Byitezwe ko uyu munsi ari bwo bari bwicare bagafata icyemezo cy’aho umukinnyi agomba kwerekeza, mu gihe AS Kigali yaba yamaze kwishyura Etincelles, agomba kurara asinye.

Gusa andi makuru ISIMBI yamenye ni uko na none igice cya Rayon Sports bakigitekerezaho ndetse bakaba bashobora kwisanga bagifashe mu gihe AS Kigali yaba yananiwe kwishyura Etincelles aya mafaranga bumvikanye.

Ubwo twakoraga iyi nkuru, hari amakuru yavugaga ko ubuyobozi bwa Etincelles bwari butegereje aya mafaranga kuko AS Kigali yari yababwiye ko igomba kuyishyura uyu munsi.

Rayon Sports irimo gukora ibishoboka byose ngo yegukane uyu mukinnyi kuko nyuma yo gusinyisha Luvumbu, perezida wa Rayon Sports, Uwayezu Jean Fidele yavuze ko mu gihe FERWAFA itakongera umubare w’abakinnyi bakagera kuri 33 ahubwo ukaguma kuri 30 basigaranye umwanya umwe kandi bagomba gusinyisha rutahizamu nimero 9.

Sumaila Moro ashobora kwegukanwa na AS Kigali

Imirwano yo ku wa kabiri yasize umutwe wa M23 wigaruriye Nyamilima na Buramba muri Gurupema ya Binza mu birometero 20 uvuye mu Mujyi wa Kiwanja.

Ni Imijyi mito yagenzurwaga na Maimai ifatanyije n’umutwe w’iterabwoba wa FDLR bahungiye i Nyakakoma.

Uyu mutwe kandi wigaruriye ahitwa Tshabavu n’uduce byegeranye turi mu birometero icumi uvuye i Kisharo hasanzwe hari mu maboko y’abandwanyi bayobowe na Gen Sultan Emmanuel Makenga.

Muri kariya gace, FARDC n’ihuriro ry’imitwe bifatanyije bagerageje kwirwanaho no kwishyira hamwe ariko M23 ibarusha ingufu amaguru bayabangira ingata.

Bamwe mu basirikare ba Leta bafashwe na M23 bavuze ko barushijwe imbaraga bakisanga mu biganza byayo.

Basobanura ko boherejwe ku rugamba kurwanya uyu mutwe ngo woherejwe n’u Rwanda guhungabanya amahoro muri RD Congo.

Kuri uyu wa gatatu imirwano irakomeje aho umutwe wa M23 uri gusatira umupaka wa Ishasha mu mirwano itoroshye.

Amakuru yizewe vuga ko ibyo kuva mu duce M23 yafashe yisubiyeho nyuma yo kubona ko ari umukino w’ingabo za EAC na Leta ya Congo udateze kugera ku mahoro arambye.

Umutwe wa M23 usaba ko haba ibiganiro na Leta ya Congo kugira ngo hashyirwe akadomo kubyatumye begura intwaro.

Ni mu rubanza rwasomwe ku wa mbere aho yahamijwe ibyaha birimo 'Guhungabanya umutekano ku butaka bw’u Burundi no gukorana n’imitwe yitwaje intwaro.'

Yashinjwe gukusanya abarwanyi b’umutwe wa Red-Tabara ufatwa na Leta y’u Burundi nk’umutwe w’iterabwoba imbere mu gihugu no muri Kivu y’Amajyepfo ho muri Repubulika ya Demokarasi ya Congo aho ufite ibirindiro.

Mu isomwa ry’urubanza Irangabiye n’abunganizi be mu mategeko ntibari mu Rukiko gusa bahise bajurira kuko batishimiye iyo myanzuro.

Ku wa 16 Ukuboza 2022 nibwo Floriane Irangabiye wahoze akorana na Radiyo Igicaniro ikorera mu buhungiro yaburanye mu mizi, yahakanye ibyaha byose ashinjwa asaba gufungurwa.

Abunganizi be mu mategeko uko ari batatu barimo uwatumwe n’ishyirahamwe ry’abagore b’abanyamategeko bo mu Burundi bavuze ko ibyo ashinjwa ari ibihimbano basaba ko yarekurwa agasubira mu buzima busanzwe.

Floriane Irangabiye yatawe muri yombi ubwo yari i Bujumbura mu mpera za Kamena 2022, mu buryo bw’ibanga ku wa 28 Kamena yahise ajya gufungirwa ku biro bikuru by’iperereza mu Burundi.

Icyo gihe byavugwaga ko 'akorana n’imitwe yitwaje intwaro hamwe no gukorera iperereza ry’ikindi gihugu.'

Ubu afungiwe muri Gereza nkuru y’Intara ya Muyinga aho atabasha gusurwa n’abo mu muryango we n’inshuti.

Irangabiye ni umugore uzwiho kutarya umunwa kandi azwi nk’udatinya gutunga urutoki ku bibi bikorwa na Leta y’u Burundi mu bice bitandukanye.

Ubwo yajyaga i Burundi benshi bamusabye kubihagarika kubera amagambo yagiye atangaza mu bihe bitandukanye ndetse n’amafoto yifotozanyije n’abo u Burundi bwita abanzi b’igihugu.

Amashyirahamwe aharanira uburenganzira bwa muntu n’ay’abanyamakuru asaba ko ubutabera bwamurekura kuko ibyo ashinjwa ari ibihimbano.

Monica wamenyekanye nka Muni Boss Lady ku mbuga nkoranyambaga, ni we munyarwandakazi w’umunyamideli wigaruriye umutima wa Ally Niyonzima, umukinnyi w’ikipe y’igihugu Amavubi ukinira Bubamuru mu Burundi.

Uyu mukinnyi ukina mu kibuga hagati aheruka kwambika impeta y’urukundo uyu mubyeyi w’umwana umwe amusaba ko yazamubera umugore igihe basigaje ku Isi bakimarana.

Monica usanzwe uba muri New Zealand bitewe n’urukundo amukunda, yahise abyemeza atazuyaje.

Muri 2019 ni bwo aba bombi batangiye gukundana, gusa muri 2020 Muni Boss Lady ni we watangaje bwa mbere ko ari mu rukundo na Ally Niyonzima.

Monica yavukiye mu Rwanda, Intara y’Uburengerazuba mu Karere ka Rubavu, afite umwana umwe yabyaranye na Kapaya Christus bari barashakanye ariko akaza kwitaba Imana.

Urukundo rugeze aharyoshye hagati ya Muni Boss Lady na Ally Niyonzima

Mu itangazo Polisi ya Uganda yasohoye kuri uyu wa Mbere tariki 2 Mutarama 2023, yavuze ko abo Barundi bafashwe ku wa 29 Ukuboza 2022, bari mu modoka yabanje guhagarikwa na Polisi kubera kurenza umubare w’abagenzi yemerewe gutwara.

Polisi ivuga ko mu iperereza, yasanze abo Barundi baturutse mu ntara zitandukanye z’icyo gihugu bajyanywe no gukora imirimo iciriritse muri Uganda, aho buri muntu ngo yasabwaga kubanza kwishyura 300,000 Fbu.

Bafashe imodoka za Iteka service na Platinum, basohoka mu Burundi banyuze muri Tanzania, binjirira ku mupaka wa Mutukula uhuza Tanzania n’u Burundi. Ayo mafaranga ngo yagombaga kubavana mu Ngozi akabageza i Kampala.

Polisi yakomeje iti “Kubera ubwoba bwo gutinya gufatwa n’inzego z’umutekano ku mupaka wa Mutukula, bavuye mu modoka habura kilometero nk’eshatu ngo bagere ku mupaka. Abashoferi babahaye Umurundi baziranye, wabanyujije mu nzira zitemewe (panya) mu ishyamba riri hafi y’umupaka wa Mutukula.”

“Uwo mugabo w’Umurundi yabashyikirije abashoferi ba taxi yo muri Uganda ifite ibirango UBM 711K ngo ibajyane muri Wakiso — Kampala.”

Polisi yatagaje ko kugeza ubu aba Barundi 24 bacumbikiwe kuri sitasiyo ya Polisi ya Mpigi mu gihe iperereza rikomeje, naho Abanya-Uganda babiri barimo umushoferi n’umwunganira bo bakurikiranyweho ibyaha byo gucuruza abantu.

Polisi ivuga ko aba bantu binjizwa muri Uganda rwihishwa cyangwa bakoresheje viza zo gusura igihugu, cyangwa bakanyuzwa muri Uganda bajyanwe mu bindi bihugu.

Yakomeje iti “Iyo bahageze bakoreshwa imirimo itandukaye nko mu kabari, ababyinnyi muri za karaoke, uburaya n’ibindi.”

Polisi ya Uganda kandi yatangaje ko mu karere ka Pader yahafatiye undi murundi byatangajwe ko yitwa Nyomuro Jackson w’imyaka 18, wavugaga ko atazi aho hantu ndetse atabasha kuvuga ururimi rwaho, ahita ashyikirizwa inzego z’umutekano.

Inama y’abaminisitiri yateranye ku wa 11 Ugushyingo 2022 niyo yemeje ko amasaha y’akazi mu Rwanda agomba kuba umunani, kakazajya gatangira saa tatu za mu gitondo kagasozwa saa kumi n’imwe z’umugoroba.

Ni amabwiriza agomba gutangira kubahirizwa muri Mutarama 2023, akazagabanya amasaha y’akazi kuko katangiraga saa moya za mu gitondo nko mu nzego za leta ahandi kagatangira saa mbili, kagasozwa saa kumi n’imwe.

Mu itangazo Minisiteri y’Ubuzima yashyize hanze ku Cyumweru tariki 1 Mutarama mu 2023, yavuze ko abakora mu nzego z’ubuzima bo batarebwa n’iki cyemezo ko ahubwo bazakomeza gukurikiza gahunda yari isanzwe.

Nyuma y’iri tangazo abakora muri uru rwego bifashishije imbuga nkoranyambaga bagaragaje ko batanyuzwe nabyo ndetse basaba ubuyobozi bwa Minisiteri kongera kubanza kujya inama nabo kuko bakwiye kungukira kuri iyi gahunda ya Leta.

Umwe mu baganga b’abahanga u Rwanda rufite mu birebana no kubaga akaba n’Umuyobozi w’Ishami ry’abaganga babaga mu bitaro bya Kaminuza bya Kigali Prof. Faustin Ntirenganya, yagaragaje ko hari hakwiye kubaho kubagisha inama no koroherezwa mu kazi.

Ati 'Ntimwibagirwe kugisha inama abakora mu nzego z’ubuzima. Ni byiza gushaka uburyo bwiza. Dukeneye guhuza neza uburyo bwo kwita ku barwayi n’inshingano zo kwita ku muryango n’abana. Abakora mu nzego z’ubuzima nabo bafite abana bajyana ku mashuri.'

Ibitaro bya Gisirikare bya Kanombe ku wa 30 Ukuboza 2022 byakoze inama y’Ubuyobozi yigaga ku masaha y’akazi mashya n’igihe azatangirira gukurikizwa yemeza ko azatangira gukurikizwa ku wa 1 Mutarama 2023.

Yemeje ko ari amasaha umunani guhera saa mbili za mu gitondo kugera saa kumi n’imwe za nimugoroba. Muri iyi nama kandi abayobozi ba serivisi zitangirwa muri ibi bitaro basabwe gukora ku buryo zizajya ziboneka mu gihe cy’amasaha 24 kuri 24 iminsi yose.

Umuganga mu bitaro bya CHUK na we yagaragaje kutanyura n’iri tangazo ritavugwaho rumwe atanga n’inama y’icyakorwa.

Ati 'Iri tangazo rishya ku masaha y’akazi ku bakora mu nzego z’ubuzima rirababaje. Abakora muri uru rwego nabo bafite imiryango ikeneye kwitabwaho. Dukunda akazi kacu ariko ubufatanye burakenewe mu kuganya umuhangayiko.'

Yakomeje agaragaza ko hashobora gukorwa amatsinda rimwe rigatangira akazi saa tatu za mu gitondo rikageza saa moya z’umugoroba irindi rikagatangira saa moya z’umugoroba kugeza saa tatu za mu gitondo cyangwa bakajya basimburanwa saa mbili n’igice ni ukuvuga kuva 8:30-7:00 z’umugoroba no kuva saa 7:00 z’umugoroba kugera saa mbili n’igice.

Yagaraje ariko ko hari n’uburyo bashobora kongererwa umushahara, cyangwa bakishyurirwa amasaha bakoze arenga ku yagenwe n’ibindi bitandukanye.

Mu kiganiro Imboni cya Televiziyo y’u Rwanda, Umunyamabanga Uhoraho muri Minisiteri y’Abakozi ba Leta n’Umurimo, Musonera Gaspard, yavuze ko imirimo na serivisi zikenerwa cyane bitazahagarara ariko aho bishoboka abakozi bakoroherezwa.

Ati 'Nta gihindutse, ni ukuvuga ngo nshobora kuba ndi mu kazi ntabasha kwita ku muryango wanjye ariko ejo bikazashoboka bitewe n’icyo cyemezo cy’Inama y’abaminisitiri gihuza akazi dukora n’imibereho y’umunyarwanda.'

Nyuma y’impaka z’urudaca zakuruwe n’itangazo rya Minisiteri y’Ubuzima mu Rwanda, yahise itegura uburyo bwo gutangaza Umucyo kuri ibi nkuko byatangajwe n’Umuvugizi wayo, Niyingabira Mahoro Julien, mu kiganiro yagiranye na bagenzi bacu ba IGIHE.

Niyingabira yavuze ko bitarenze kuri uyu wa Gatatu tariki ya 4 Ukuboza 2022 abakora mu nzego z’ubuvuzi bazaba bamaze kumenya byinshi kuri iyi ngingo kuko Minisitiri w’Ubuzima agiye kubitangaho umucyo.

Ikipe ya Al Nassr ikina mu gihugu cya Saudi Arabia yamaze kugura kizigenza Cristiano Ronaldo, uyu munsi nibwo yamwerekanye ku mugaragaro ku kibuga cyayo cyari kiriho ibihumbi n’ibihumbi by’abafana ndetse n’abanyamakuru. 

Cristiano Ronaldo ubwo yari ari gutanga ikiganiro cya mbere ku banyamakuru bo muri Saudi Arabia, yatunguranye yitiranya izina ry’igihugu agiye gukinamo akita South Africa. Mu magambo ye yagize ati: “Kuri njye ntabwo naje gukina muri South Africa kubera ko urugendo rwanjye mu mupira w’amaguru rurangiye, iki nicyo nashakaga guhindura. Ntabwo ngirira ubwoba ibyo abantu bamvugaho”. 

Uyu mukinnyi yibeshye avuga South Africa mu mwanya wa South Arabia. Ibi bihugu byombi bifite inyuguti zisa, ariko ntibituruka no ku mugabane umwe.

Ubwo Cristiano Ronaldo yerekanwaga kuri sitade ya Al Nassr

Cristiano Ronaldo yasinye amasezerano y’imyaka 2.5 muri Al Nassr, akazajya ahembwa miliyoni 200 z’amayero ku mwaka. Uyu mukinnyi kugeza ubu niwe uhembwa amafaranga menshi, mu bakinnyi bakina umupira w’amaguru ku isi.