Author: webrwanda

Igitutu cy’umusaruro mucye gikomeje kwarika muri Rayon Sports ndetse umuntu yavuga ko bidafite aho bigana, mu gihe bari kwitegura umukino wahoze ukomeye muri shampiyona y’u Rwanda aho Rayon igomba gucakirana na APR FC, kuri iki cyumweru kuri sitade ya Huye.

Uyu ni umwaka wa kane Rayon Sports iri kubeshya abakunzi bayo ndetse ibibazo byatererwa hejuru abatoza bakabigenderamo kandi ubona ko ubuyobozi ari bwo bubitse urufunguzo rw’ibibazo iyi kipe ihorana.

N’ubwo ubuyobozi ari bwo butera ibibazo Rayon Sports irimo, ariko umutoza Haringingo nawe ari kwirasa amano kubera ibibazo yiteza ndetse bituma abakunzi ba Rayon Sports bamwota ijoro n’amanywa.

Abakinnyi ba Rayon Sports bahorana urwicyekwe umwe kuri umwe hibazwa uri bubanze mu kibuga 

Kuva mu Ukuboza 2022, Rayon Sports imaze gukina imikino 7 ya shampiyona, aho yatsinzemo imikino 2 inganya ibiri, itsindwa imikino 3. Iyi mibare ntabwo igendanye n’ibyo abafana ba Rayon Sports bari biteze ndetse by’umwihariko kuba ikipe iri kwitwara nabi uko shampiyona igenda igana ahakomeye.

Ntabwo Haringingo azi gukoresha abakinnyi afite

Rayon Sports yatangiye shampiyona ifite abakinnyi 28 harimo umubare w’abakinnyi batari bashoboye, ariko kuko nta bapfira gushira, n’abageragezaga Haringingo yananiwe kubakoresha. 

Ubwo igice cya mbere cya shampiyona cyarangiraga, Rayon Sports yongeyemo abakinnyi babiri, Luvumbu Nzinga na Joachiam Ojera. Iyo urebye uburyo aba bakinnyi bashya Rayon Sports yongeye mu ikipe bagiye mu kibuga, usanga harimo icyubahiro gike ndetse no kutamenya abakinnyi umutoza afite.

Luvumbu Nzinga ntabwo yakinnye umukino Rayon Sports yatsinzemo Musanze FC ibitego 4-1, kubera ko atari yakabonye ibyangombwa. Mu mukino wakurikiyeho, Haringingo yafashe Ndekwe Felix wari uhagaze neza mu kibuga hagati muri Rayon Sports mu mikino yatambutse, amushyira ku ntebe y’abasimbura, arangije yinjiza Luvumbu Nzinga utari ufite ubushobozi bwo gukina nibura iminota 30.

Ndekwe ageze muri Rayon Sports yazibye icyuho cya Nishimwe ndetse na Onana avunitse, ariko Haringingo arifata akamwicaza nk’umwana wishakisha

Umukinnyi ashobora kuba ari umuhanga ariko ibihe amazemo iminsi bikaba bitamwemerera kugira uruhare mu mukino ku buryo bwuzuye. 

Gufata Ndekwe Felix wari uhagaze neza muri Rayon Sports ukamwicaza nta kibazo yagize ni itesha gaciro ry’umuntu wari uri ku gufasha mu bihe bigoye urimo, ndetse bishobora gutuma agira urwicyekwe rwo kongera kukwitangira.

Haringingo Francis ntabwo yemera Musa Esenu

Musa Esenu ni we mukinnyi muri Rayon Sports ufite uruhare rw’ibitego byinshi muri uyu mwaka w’imikino inyuma ya Onana ufite imvune, ndetse kuva Rayon Sports yajya mu icuraburindi, bigaragara ko ari we mukinnyi mwiza iyi kipe yasinyishije akayigirira akamaro.

Musa Esenu ni umukinnyi ukunze guhusha ibitego, bituma abafana bavuga ko adashoboye, ndetse ko ntacyo amaze kuko ibitego atabimariramo, ariko bakibagirwa umusaruro we muri rusange.

Musa Esenu ashinjwa gutsindisha umutwe gusa, kandi uwo mutwe ni wo ufite ibitego byinshi mu myaka 2 itambutse muri Rayon Sports 

Musa Esenu ni we mukinnyi muri Rayon Sports ufite ikintu azwiho kandi ashoboye, (gutsindisha umutwe) byashobokaga ko Rayon Sports imwubakiraho ndetse akaba yatanga umusaruro byihuse. 

Abafana bashinja Musa Esenu gukinisha umutwe gusa, ngo amaguru ye amufasha kugenda gusa, ariko ntibagire icyo bavuga ku bandi bakinnyi bafite amaguru n’umutwe bidafite icyo bimariye ikipe. Ibyo byose rero Haringingo iyo amaze kubyumva, nawe abyakira uko ubundi akagendera mu kigare akima umwanya rutahizamu umwe rukumbi afite.

Urugero

Ku mukino Rayon Sports yanganyijemo na Kiyovu Sports, yafashe umukinnyi nka Joachiam Ojera utari ufite iyo avuye, amubanza mu kibuga arya umwaka wa Musa Esenu wari uherutse kwitwara neza ku mukino wa Musanze FC, ndetse uyu musore akaba yari amenyereye gukina na Kiyovu Sports.

Esenu hari n’igihe ajya mu kibuga mu mataha y’inka kandi ikipe itanatsinze 

Gufata umukinnyi nka Musa Esenu twavuga ko ari kuzuza umwaka we  wa mbere muri Rayon Sports akaba ayifitemo ibitego bisaga 14, ukamushyira ku ruhande, ukazana umukinnyi wakabirijwe, utakinaga, w’intizanyo y’amezi 5, ni iteshagaciro ku bandi bakinnyi by’umwihariko Musa Esenu uzwiho kwimwa amahirwe ariko agatabara aho byakomeye.

Haringingo abyutse ukamubaza umunyezamu wa mbere wa Rayon Sports, aho kugusubiza yakwiruka

Rayon Sports niyo kipe muri iyi shampiyona imaze gukoresha abanyezamu bose 4 ifite kandi bigakorwa atari ikibazo cy’imvune ahubwo bigakorwa kubera gushaka ibisubizo no guhimana.

Haringingo Francis umunsi umwe uzasanga yakoresheje Ramadhan, undi munsi akoreshe Adolphe, ubukurikiyeho akoreshe Bonheur asoreze kuri Amani, bose namara kubahetura azunguze umutwe yumirwe kuko bose azaba ababuriye igisubizo.  

Bibaho ko umunyezamu atsindwa igitego, ndetse yakora n’andi makosa, ariko igikangisho cy’umunyezamu si ukumwicaza.

Haringingo n’abatoza bamwungirije bari kwikoramo 

Rayon Sports yahuye n’imvune nyinshi zatumye amahitamo yo gushaka abakinnyi bajya mu kibuga kuri Haringingo yoroha, ariko tukaba twakibaza kuri uyu mutoza uhuzagurika mu bakinnyi uko byari kugenda iyo aba afite ikipe yose kandi ari nzima.

Haringingo yakaretse kwiteza ibibazo kuko n’ibyo ubuyobozi bumuteza ntabwo bimworoheye 

Ikipe itagira 11 iteza umwiryane mu bafana, abayobozi, n’abakinnyi hagati yabo

Source : https://inyarwanda.com/inkuru/125805/haringingo-akomeje-kwirasa-amano-125805.html

Urukiko rw'ibanze rwa Kagarama mu mujyi wa Kigali rwahanishije amande ya miliyoni y'amafranga y'U Rwanda umushoferi waregwaga kwica bitavuye ku bushake umunyamakuru John Williams Ntwali.

Umucamanza yavuze ko uyu mushoferi yaburanye yemera icyaha ndetse asaba imbabazi kubera impanuka yateje igahitana uyu munyamakuru.

Mu masaha y'umugoroba, uregwa ndetse n'ubushinjacyaha batari mu cyumba cy'urukiko, umucamanza yavuze ko Bwana Bagirishya Moise Emmanuel ahamwa n'ibyaha bibiri.

Icyo kwica umunyamakuru John Williams Ntwali ubwo yagongeshaga imodoka moto yari imuhetse.

Hari kandi n'icyaha cyo kubabaza umubiri wa Munyagakenke wari utwaye moto yariho Ntwali ariko yongeraho ko ibyaha byombi yabikoze bitavuye ku bushake.

Ubwo yagezwaga bwa mbere mu rukiko ku itariki ya 31 z'ukwezi gushize, Bwana Bagirishya ngo yemereye urukiko ko yishe umunyamakuru John Williams Ntwali agonze by'impanuka moto yari imutwaye.

Icyemezo cya muganga, nk'uko byavuzwe n'umucamanza, ngo kigaragaza ko Ntwali yapfuye nyuma yo kuva amaraso menshi.

Umucamanza yemeje ko uregwa ahamwa n'ibyaha byombi kuko abyiyemerera kandi bikaba binashimangirwa n'inyandiko yakozwe na muganga.

Uregwa ngo yavuze ko impanuka yatewe n'umuvuduko uri hejuru ndetse n'umunaniro.

Yamuhanishije kwishyura amafranga ibihumbi 500 kuri buri cyaha bivuze ko agomba kwishyura miliyoni y'amafranga y'U Rwanda ku byaha byombi.

Gusa umucamanza ntiyamuhaye igihano cy'igifungo nk'uko byari byasabwe n'ubushinjacyaha.

Umushinjacyaha yari yasabye ko Bagirishya ahabwa igifungo cy'imyaka 2 ndetse akanategekwa kwishyura Miliyoni ebyiri z'Amafranga ku byaha byombi.

Umucamanza ariko yavuze ko hariho igihe cy'iminsi 30 ntarengwa ngo utanyuzwe n'icyemezo abe yakijuririra.

Inkuru y'urupfu rwa John Williams Ntwari yamenyekanye ku buryo butunguranye ku itariki ya 18 z'ukwezi gushize ishyizwe hanze n'igipolisi.

Icyo gihe umuvugizi w'ishami rishinzwe umutekano wo mu muhanda yavuze ko Ntwari yahitanywe n'impanuka.

Gusa hari abagize impungenge ku buryo uyu munyamakuru yapfuyemo ndetse basaba ko habaho iperereza ryigenga ryo gusobanura ibyo bamwe babonye nk'urujijo muri uru rupfu.

John Williams wapfuye afite imyaka 43 yari umunyamakuru ubimazemo igihe aho yakunze gukora inkuru zigaragaramo akarengane.

Mu bihe bitandukanye yakunze gushyirwa mu majwi na bamwe mu bayobozi ba Leta bamurega gukora inkuru zihindanya isura y'igihugu.

BBC

Source : https://umuryango.rw/amakuru/mu-rwanda/ubutabera/article/uwishe-by-impanuka-umunyamakuru-ntwali-j-williams-yaciwe-miriyoni-imwe

Rayon Sports yahakanye amakuru yavugaga ko yateze umutoza wayo Haringingo Francis umukino wa APR FC ko naramuka awutsinzwe azirukanwa.

Aganira na IGIHE, Umuvugizi wa Rayon Sports, Nkurunziza Jean Paul yatangaje ko nk'ubuyobozi nta nyirantarengwa bigeze baha umutoza ndetse nta n'iyo bateganya kuko bakimufitiye icyizere.

Ati “Umutoza tumeranye neza nta kibazo na kimwe dufitanye, turi kwitegura umukino wa APR FC ku cyumweru, n'ibyabyutse bivugwa ko yahawe nyirantarengwa, Rayon Sports nta nyirantarengwa yigeze iha umutoza Haringingo nta n'iyo duteganya kumuha.''

“Turacyahanganiye igikombe, Ikipe ya mbere iraturusha amanota ane, ntabwo ayo manota ari menshi dufitanye kandi umukino na yo, gahunda dufite ni ukuwutsinda rwose ntabwo ubuyobozi bwigeze buha nyirantarengwa umutoza nta na gahunda ihari yo kuyimuha.''

Rayon Sports ni iya kane n'amanota 33, irushwa amanota ane na APR FC ya mbere zizahura ku Cyumweru.

Source : https://umuryango.rw/imyidagaduro/imikino/article/rayon-sports-yahakanye-amakuru-yavugaga-ku-mutoza-wayo

UMUHESHA W'INKIKO W'UMWUGA, ARAMENYESHA ABANTU BOSE KO AZAGURISHA MURI CYAMUNARA UMITUNGO UTIMUKANWA WA NSENGIYUMVA EMMANUEL NA NYIRANSABIMANA EMERTHE UGIZWE N'IKIBANZA CYUBATSEMO INZU IFITE UPI: 5/01/12/03/4423 IHEREREYE MU MU MUDUGUDU WA GISHORE, AKAGALI KA GISHORE,UMURENGE WA NYAKARIRO,AKARERE KA RWAMAGANA.

IPIGANWA MU CYAMUNARA KU NSHURO YA MBERE RIZATANGIRA TARIKI YA09/02/2023 SAA TANU Z'AMANYWA 11H:00 RIRANGIRE TARIKI YA 16/02/2023 SAA TANU Z'AMANYWA 11:00.

ICYO GIHE UMUTUNGO UBAYE UTAGUZWE IPIGANWA MU CYAMUNARA KU NSHURO YA KABIRI RIZATANGIRA TARIKI YA 18/02/2023 SAA TANU Z'AMANYWA 11H:00 RIRANGIRE TARIKI YA 25/02/2023 SAA TANU Z'AMANYWA 11:00.

ICYO GIHE UMUTUNGO UBAYE UTAGUZWE IPIGANWA MU CYAMUNARA KU NSHURO YA GATATU RIZATANGIRA TARIKI YA 27/02/2023 SAA TANU Z'AMANYWA 11H:00 RIRANGIRE TARIKI YA 06/03/2023 SAA TANU Z'AMANYWA 11:00.

WIFUZA IBINDI BISOBANURO YASOMA ITANGAZO RIRI HANO HASI CYANGWA SE AGAHAMAGARA KURI:+250788760719.

Source : https://umuryango.rw/amatangazo/article/itangazo-rya-cyamunara-y-umutungo-utimukanwa-uherereye-rwamagana

Umwana w'igitangaza yavukiye mu bikuta byasenyutse nyuma y'umutingito ukomeye wibasiye Turukiya na Siriya mu rukerera rwo kuwa Mbere w'iki cyumweru.

Uyu mwana w'umukobwa yavutse ari muzima muri Siriya ndetse akurwa munsi y'ibi bikuta amahoro gusa nyina umubyara we yari yapfuye.

Uyu mugore wari utwite bikekwa ko yaba yaragwiriwe nibi bikuta akabimara munsi umunsi wose mu majyaruguru ashyira Uburasirazuba bw'umujyi wa Jenderes.

Bivugwa ko uyu mugore yapfuye nyuma yo kubyara uwo mwana wari ukikijwe n'ibi bisigazwa by'amazu yasenywe.

Amafoto ababaje yafashwe yagaragaje umutabazi umwe afashe uyu mwana wari munsi y'ibikuta.

Uyu mwana yakuwe hagati y'amabeto ahita ajyanwa ahari umutekano hanyuma undi mugabo amuzanira uburingiti bwo kumufubika.

Uretse uyu mugore wapfuye amaze kubyara uyu mwana, na se ngo yahitanwe n'uyu mutingito wahitanye abarenga 5000.

Nyina w'uyu mwana ngo yari amaze amasaha 7 gusa ageze muri aka gace ka Jenderes,muri Siriya aho yari ahunze intambara.

Amakuru aravuga ko aya mashusho yafatiwe mu gace k'icyaro kegereye umujyi wa Aleppo gakorerwamo ubucuruzi,kibasiwe cyane n'uyu mutingito.

Nibura abantu 1,602 bamaze gupfa muri Syria mu gihe abandi 3,500 bakomeretse bitewe n'uyu mutingito wari ufite uburemere bwa 7.8 bwatikije ibi bihugu byombi.

Source : https://umuryango.rw/ubuzima-115/udushya/article/umwana-w-uruhinja-yarokotse-by-igitangaza-nyuma-yo-kuvukira-mu-nsi-y-ibikuta

Abahanzi b'Abanyamerika Quavo na Offset bafatanye mu mashati mu itangwa ry'ibihembo bya Grammy Awards byatanzwe mu mpera z'icyumweru gishize, bakomeje kwibazwaho, nyuma yuko bongeye kugaragaza ko bagifitanye inzigo mu gihe hakekwaga ko byarangiye.

Quavo na Offset barwanye mu bihembo bikomeye bizwi nka Grammy Awards byatanzwe kuri iki Cyumweru, bitungura benshi babonye iyi mirwano yabo.

Aba bombi bafatanye mu mashati ubwo Quavo yajyaga ku rubyiniro kuririmba indirimbo ye yitwa 'without you' mu rwego rwo kunamira mugenzi we Takeoff uheruka kwitaba Imana banabanaga mu itsinda rya Migos.

Ikinyamakuru TMZ gitangaza ko abategura ibihembo bya Grammy basabye Offset na Quavo kujyana ku rubyiniro mu rwego rwo kunamira mugenzi wabo Takeoff ariko Quavo akaba atarabikozwaga, ari na byo byatumye bafatana mu mashati.

Aba bahanzi bari basanzwe batajya imbizi kuko bahoraga bashondana, hari abakekaga ko inzigo yabo yarangiye ubu bakaba bariyunze, ariko berekanye ko umujinya hagati yabo ukiri mubizi

Offset yahoze mu itsinda rya Migos nubwo yaje kurivamo akajya gukora umuziki ku giti cye nyuma yo kuva muri iri tsinda ryahozemo nyakwigendera Takeoff.

Source : https://umuryango.rw/imyidagaduro/article/imirwano-ya-quavo-na-offset-ikomeje-guteza-urujijo

Mu gihe kuri uyu wa kabiri imirwano hagati y'ingabo za leta n'inyeshyamba za M23 yongeye kubura mu duce twa Masisi, n'imyigaragambyo mu mujyi wa Goma igakomeza, izi nyeshyamba zirashinja leta 'gukomeza guteza impagarara aho gushaka amahoro'.

Abigaragambya basaba ko ingabo z'ibihugu bya Africa y'iburasirazuba (EACRF) zijya gufasha ingabo za leta kurwana na M23 cyangwa zigataha, n'uyu munsi bakomeje gufunga imihanda henshi mu mujyi wa Goma, nk'uko Aimé Patrick Mungano utuye mu gace ka Majengo yabibwiye BBC.

Ni mu gihe abaturage bakomeje guhunga imirwano mu duce twa Karenga na Ruvunda hafi ya Sake, uduce turi mu burengerazuba uvuye i Goma ugana i Masisi.

Leta ishinja umutwe wa M23 – yita kandi ko ari igisirikare cy'u Rwanda – gutera ibirindiro by'ingabo zayo, kwica no gusahura abaturage, ndetse no kurasa ku ndege ya MONUSCO iherutse kurasirwa muri teritwari ya Nyiragongo hagapfa umusirikare wo muri South Africa.

Itangazo umuvugizi wa M23 yasohoye kuri uyu wa kabiri rivuga ko imyigaragambyo irimo kuba ari 'ingaruka zitaziguye z'amagambo Perezida Felix Tshisekedi yabwiye umugaba w'ingabo za EACRF mu nama y'i Bujumbura.'

Gusa, iyi myigaragambyo yari yatangiye kuwa gatanu ushize, irushaho gukomera ejo kuwa mbere.

Lawrence Kanyuka uvugira M23, yatangaje ko 'gukomeza kwica Abatutsi, gusenya no gusahura iby'Abatutsi birimo kuba i Goma uyu munsi ari ikimenyetso ntashidikanywaho ko ari leta ikomeje guteza impagarara aho gushaka amahoro'.

M23 ihakana kandi ibirego bya leta byo kurasa kuri iriya ndege ya MONUSCO ivuga ko yarasiwe mu karere itagenzura.

MONUSCO yo ntiratangaza uwarashe ku ndege yayo.

Leta ya Kinshasa ihakana ko hari ibikorwa by'ubwicanyi cyangwa kwibasira Abatutsi muri Kivu ya ruguru, igashinja M23 na leta y'u Rwanda gukoresha abo muri ubwo bwoko bavuga Ikinyarwanda nk'impamvu y'iyi ntambara.

Abanyecongo bavuga Ikinyarwanda, biganjemo Abatutsi, barenga 4,000 bamaze guhungira mu Rwanda kuva mu mpera z'umwaka ushize, nk'uko imiryango ifasha impunzi ibivuga.

Hagati aho, ingabo za EACRF ziri muri DR Congo ubu zigizwe ahanini n'izoherejwe na Kenya.

Inama y'i Bujumbura yategetse DR Congo gufasha ibihugu bya Uganda na Sudani y'Epfo kohereza ingabo zabyo muri EACRF.

BBC

Source : https://umuryango.rw/amakuru/mu-mahanga/umutekano/article/m23-irashinja-leta-ya-rdc-ko-ariyo-ikomeje-guteza-impagarara

Ku gicamunsi cyo kuri uyu wa kabiri nibwo abakinnyi b'abanyarwanda bahinduye amakipe bakiniraga berekeza mu yandi makipe mashya aho bose basinye amasezerano y'imyaka 2 buriwese.

Ku isonga ahagana Saa sita z'amanywa nibwo ubuyobozi bw'ikipe ya Police FC bwatangejo ko umukinnyi wayo Sibomana Patrick uzwi nka Papy yerekeje muri Mozambique mu ikipe ya Ferroviário da Beira yo mu kiciro cya mbere.

Uyu mukinnyi wari uherutse kongera amasezerano y'imyaka ibiri mu ikipe ya Police FC ayivuyemo ayisize ku mwanya wa karindwi n'amanota 27 ku rutonde rwa shampiyona rw'agateganyo nyuma y'iminsi 18 imaze gukinwa.

Uyu mukinnyi witegura kwerekeza muri Mozambique kuri uyu wa gatatu agiye gutangira gukinira iyi kipe yasinyiye amaezerano y'imyaka ibiri iri imbere.

Ku mugoroba wo kuri uyu wa kabiri kandi nibwo ubuyobozi bw'ikipe ya FK Jerv yo mu kiciro cya kabiri muri Norvège gatangaje ko yasinyishije umunyarwa Mutsinzi Ange Jimmy amasezerano y'imyaka ibiri.

Myugariro Ange Mutsinzi yerekeje muri Norvège nyuma yaho aheruka gutandukana na CR Trofense yo mu gihugu cya Portugal kubera kudahabwa ibyo bumvikanye ku gihe.

Mutsinzi w'imyaka 25 yerekeje mu kiciro cya kabiri nyuma yaho mu mwaka ushize w'imikino iyi kipe ye ya FK Jerv inaniwe kuguma mu kiciro cya mbere cyo muri Norvège.

The post Mutsinzi Ange Jimmy yasinyiye FK Jerv yo muri Norvège, Sibomana Patrick we yerekeje muri Mozambique appeared first on RUSHYASHYA.

Source : https://rushyashya.net/mutsinzi-ange-jimmy-yasinyiye-fk-jerv-yo-muri-norvege-sibomana-patrick-we-yerekeje-muri-mozambique/?utm_source=rss&utm_medium=rss&utm_campaign=mutsinzi-ange-jimmy-yasinyiye-fk-jerv-yo-muri-norvege-sibomana-patrick-we-yerekeje-muri-mozambique

1. Inyama zatunganyijwe ukundi

Muri ubu bwoko bw'inyama harimo sausage (saucisson), jambon na bacon, izi nyama ziba zongewemo ibinyabutabire bizirinda kwangirika bya sulfites n'ibindi, ibi akenshi bitera ububyimbirwe bw'uruhu, ndetse bikongerera cyane uruhu gusaza. Kubera kandi ko biba birimo umunyu mwinshi bituma ugaragara nk'ubyimbye.

2. Ibiryohera cyane

Isukari nyinshi ishobora gutera kubaho icyitwa glycation. Glycation ibaho mu gihe ufashe isukari nyinshi, iruta iyo umubiri wawe ukeneye, isukari irengaho yivanga na proteyine, nuko bigakora Advanced Glycation End products (ariyo izwi nka AGE). AGE yangiza bikomeye proteyine yo ku ruhu izwi nka collagen, ituma ruhorana itoto ndetse rugahora rukeye.

3. Ibiryo birimo umunyu mwinshi

Umunyu mwinshi tuvuga aha akenshi si wa wundi wo gutekesha, nubwo nawo ugomba kuwugabanya mu byo kurya. Akenshi umunyu w'inyongera uboneka mu biryo biza bifunze, kuko hongerwamo umunyu kugira ngo bibashe kubikika neza, ibi bishobora gutera umubiri kubika amazi menshi, nuko ukagaragara nk'ubyimbye.

4.Ibiryo bikaranze cyane kimwe n'ibyokeje

Guteka ibiryo ukoresheje ubushyuhe bwinshi nk'ubukoreshwa mu gihe botsa cg bakaranga mu mavuta, byongera cyane ibitera kubyimbirwa mu mubiri bizwi nka AGE (Advanced Glycation End products). Ibi bintu bitandukanye nibyo bituma usaza, bikongera ububyimbirwe no kugabanuka k'uturemangingo.

Iyo urugero rwa AGE ruri hejuru, ubushobozi bw'uturemangingo bwo kwiyuburura buragabanuka, uko dupfa ntitubashe gusimburwa, amagufa atangira kuvunguka ukibasirwa n'indwara ya osteoporosis, indwara zindi nka stroke, indwara z'umutima n'izindi ziterwa n'imyaka zikakwibasira cyane.

Nubwo izi AGE zibaho mu mubiri bisanzwe, ibiryo bitekeshejwe igipimo cy'ubushyuhe kiri hejuru byongera ubukana byazo.

Uburyo ushobora kubyirinda ni ugutekera ku gipimo cy'ubushyuhe kiri hasi, ukirinda ibyo kurya bicishwa mu mavuta cg byotswa cyane, ukabirya mu rugero.

5. Ibinyamasukari byahinduwe

Ibinyamasukari byakuwemo bimwe mu bibigize nk'amafufu, bikora nk'isukari yahinduwe mu mubiri. Iyo bitarimo izo fibres, zirinda ko isukari nyinshi yinjira mu maraso, ibi binyamasukari bijya kwangiza insulin, ndetse bikaba byatera umusemburo wa insulin kwinangira cg kunanirwa gukora neza uko bigenda biba byinshi.

Urugero rw'ibinyamasukari bihindurwa harimo umuceri wera n'umugati. Ushobora guhitamo kurya ibinyamasukari bitahinduwe nk'imbuto, imboga n'utubuto twuzuye nk'umuceri w'ikigina n'ibindi.

Source : https://umuryango.rw/ubuzima-115/article/dore-ibyo-kurya-utari-uzi-bishhobora-gutuma-umuntu-asaza-vuba

Umuhanzi w’icyamamare Chris Brown watashye amara masa mu bihembo bya Grammy Awards 2023, ntiyabyakiriye neza ndetse yahise anibasira umuhanzi Robert Glasper bari mu cyiciro kimwe, amubwira amagambo mabi akoresheje imbuga nkoranyambaga anavuga ko adasobanikiwe impamvu umuntu utazwi nka Robert Glasper yahabwa Grammy Award.

Chris Brown ntiyashimishijwe n’uko Robert Glasper yatwaye Grammy Award

Nyuma yaho hatanzwe igihembo cya Grammy Award ku muhanzi ufite album nziza y’umwaka yo mu njyana ya R&B cyigahabwa Robert Glasper kubera album aherutse gusohora yise ”Black Radio III’ byatumye Chris Brown bari mu cyiciro kimwe wari uniteze ko ariwe utwara iyi Grammy Award ahita amwibasira avuga ko ayitwaye atari ayikwiriye.

Chris Brown yavuze ko Robert Glasper ari umuhanzi utazwi utari ukwiriye Grammy Award

Mu magambo menshi Chris Brown yanditse kuri Instagram Stories yagize ati: ”Robert Glasper ninde untwaye Grammy? Ni hagire umbwira uriya muntu uwo ariwe kuko ntabwo azwi. Ni gute baha Grammy Award umuntu nk’uriya banciyeho? Umuntu nkawe ntakwiye kuyihabwa njyewe mpari. Robert utazwi bamuhaye Grammy birashoboka ko hari ikibyihishe inyuma ntazi”.

Robert Glasper watwaye Grammy Award bikarakaza Chris Brown bari mu kiciro kimwe

Chris Brown winiguye akananenga abategura Grammy Awards yahise asaba imbabazi Robert Glasper abinyujije mu butumwa yamwandikiye agira ati: ”Komerezaho muvandi, ndashaka kugusaba imbabazi niba warakajwe n’ibyo navuze nyuma ya Grammy’s. Ndabyumva nakubwiye nabi ko utari ubikwiriye. Maze gukora igenzura nsanze uri umuntu utangaje mu byo akora”.

Ubutumwa Chris Brown yandikiye Robert Glasper amusaba imbabazi

Yakomeje agira ati: ”Abategura ibi bihembo ntabwo bari guha twebwe abirabura ibyo dukwiye. Wowe nanjye ntitwagakwiye kujya mu cyiciro kimwe kuko tudakora ibintu bimwe”. 

Ibi byatumye benshi bashyigikira amagambo ya Chris Brown bavuga ko atari akwiriye gushyirwa hamwe na Robert Glasper ukora injyana ya Jazz mu gihe Chris akora injyana ya R&B.

Source : https://inyarwanda.com/inkuru/125804/chris-brown-yasabye-imbabazi-robert-glasper-yibasiye-nyuma-yo-gutwara-grammy-award-125804.html