Author: webrwanda

Amarushanwa ya iDebate ategurwa mu rwego rwo gufasha abanyeshuri kwagura ubumenyi mu kuvuga no kubatinyura bakagura ibitekerezo byabo ku bintu runaka. Ni irushanwa riterwa inkunga na Banki ya Kigali.

Umuyobozi wa iDebate Rwanda, Habineza Jean Michel, yavuze ko kuva Banki ya Kigali yatangira gutera inkunga iri rushanwa, byatumye n'abana bo mu bigo by'amashuri bitari mu Mujyi wa Kigali cyangwa ibidafite ubushobozi buhambaye nabyo byitabira.

Ati 'Turabigisha uko bashaka inkuru, uko bategura ibyo bashobora kuvuga bakabikora buri cyumweru ku ishuri. Twari dufite imbogamizi z'ibigo bya Leta aho usanga abanyeshuri batagera ku bikoresho by'ibanze bikenewe no gukoresha ururimi neza. BK rero yaduhaye amafaranga kugira ngo ayo mashuri nayo ashobore kubona ubwo buryo. Uyu munsi bafasha amashuri agera kuri 25 bakabishyurira buri kimwe kijyanye n'ibiganiro mpaka.'

Yakomeje avuga ko bibafasha gutsinda bwa bwoba kuko usanga bakora imenyereza mbere yo kuza mu marushanwa nk'aya aho baba bagiye guhangana n'ibigo bikomeye birimo n'ibiri ku rwego mpuzamahanga.

Ati 'BK yadufashije kugira ngo abo banyeshuri biga mu bigo bya Leta, bashobore kuza mu irushanwa tunabahe n'ibishoboka byose kugira ngo bagere ku rwego rumwe n'abandi. Ubu ubona ko nibura 60% by'amashuri dukorana ari aya Leta kandi ukabona ko nabo bashoboye kuko batsinda.'

Yagaragaje ko itegurwa ry'aya marushanwa rigamije kuzamura ubumenyi bw'abanyeshuri b'abanyarwanda ku buryo babasha guhangana ku ruhando mpuzamahanga mu bijyanye no gutambutsa ibitekerezo binyuze mu biganiro mpaka.

Ni amarushanwa ategurwa hagendewe ku nsanganyamatsiko runaka abana bakayunguranaho ibitekerezo. Kuri iyi nshuro yari afite insanganyamatsiko igaruka ku imihingagurikire y'ibihe.

Abanyeshuri bitabiriye aya marushanwa bagaragaza ko abafasha kwagura ubumenyi bwabo binyuze mu gutambutsa ibitekerezo.

Nyagatare Gift wiga muri Kagarama Secondary School yabigarutseho yagize ati 'Kenshi tuza aha kugira ngo tuvuge ku bintu runaka byugarije Isi tukabitangaho ibitekerezo nk'abato kuko nitwe b'ahazaza. Bivuze ko aritwe tuzaba dufata ibyemezo mu gihe cyizaza bityo dukwiye gutangira uyu munsi . Binyuze muri ibi biganiro mpaka bidufasha gufata ibyemezo bitwubakamo umwuka n'icyizere cyo kuba abayobozi beza bifuzwa.'

Muri aya marushanwa ibigo byitabiriye bisaga 35 birimo n'ibigo Mpuzamahanga aho ibigo bine bya mbere byabaye Kagarama Secondary School, Gs Remera Rukoma, Riviera High School na Petit séminaire Zaza.

Hahembwe kandi n'abanyeshuri 20 barushije abandi kuba intyoza mu kuvuga barimo batandatu biga muri Maranyundo Girls School. Buri munyeshuri yahawe igihembo kimufasha gukomeza kuzamura impano ye giherekejwe n'impano zitangwa na Banki ya Kigali.

Umunyeshuri wahize abandi yiga muri Gs Remera Rukoma yabaye iya kabiri muri aya marushanwa, Umubyeyi Ineza Lisa yavuze ko ibikorwa nk'ibi bibatinyura nk'abakobwa bakumva ko bashoboye.

Ati 'Amarushanwa nk'aya aratwigisha, gufunguka no kwaguka mu bitekerezo. Atwigisha gutekereza vuba kandi twunguka ubumenyi bwinshi. Kuba ndi umwana w'umukobwa ni ikigaragaza ko natwe dushoboye. Si abiga mu bigo by'i Kigali gusa cyangwa abahungu batsinda amarushanwa nk'aya kuko twese turashoboye.'

Kuva amarushanwa ya iDebate Rwanda yatangizwa yatanze umusaruro ugaragara kuko abanyeshuri b'u Rwanda bakunze kwitwara neza mu marushanwa nk'aya ku ruhando mpuzamahanga.

Aba banyeshuri bagaragaza ko kurushanwa bibubakamo imbaraga

Aba banyeshuri bagaragaza ko bibungura ubwenge bwo kuvugira mu ruhame

Abagize akanama nkemurampaka baba bandika amanota

Abanyeshuri ba Kagarama Secondary School bishimira igikombe begukanye

Abanyeshuri ba Petit Seminaire Zaza uyu munsi ntibahiriwe

Aya marushanwa yabereye muri Riviera High School

Buri munyeshuri yabaga afite ingingo ashingiraho

Bwiza Irene wiga muri Maranyundo ari mu bahembwe

Byari ibyishimo bisendereye muri iki gikorwa

Ni amarushanwa yitabiriwe n’abanyeshuri batandukanye

Umubyeyi Ineza Lisa wahize abandi yavuze ko ibikorwa nk'ibi bibatinyura nk'abakobwa bakumva ko bashoboye

Umwe mu Bana ba Kagarama Secondary School asobanura ingingo ye

Victor Emmaneul wiga muri Kagarama Secondary School niwe wabaye uwa kabiri

Amafoto: Nezerwa Salomo

Ibi byabaye mu gitondo cyo ku wa Gatanu tariki ya 10 Gashyantare 2023.

Abaturage babwiye IGIHE, ko babangamiwe cyane n'uburyo abanyerondo bo mu Biryogo bakunda guhohotera abaturage, bagasaba inzego zibishinzwe gukurikirana iki kibazo.

Bavuga ko uyu muturage yagiranye ikibazo n'aba banyerondo bananirwa kumvikana bahita batangira kumukubita barangije bamuta mu muhanda barigendera.

Ntwari Hamza yagize ati ' Twe twabonye bamukubita gusa turatabara dutangiye kubabaza bahita bamuta aho barigendera kandi si ubwa mbere abanyerondo b'aha bagira urugomo.'

Uwineza Rose we yagize ati 'Ntituzi igihe iki kibazo cy'abanyerondo bahohotera abaturage kizarangirira pe nonese koko bemerewe gukubita umuntu gutya bakamuvuna imbavu ku buryo ananirwa kugenda? dore uko amaguru bayahinduye ibisebe.'
Umunyamaabnga Nshingwabikorwa w'Umurenge wa Nyarugenge, Murekatete Patricie, yabwiye IGIHE ko uyu muturage wahohotewe ari kwa muganga ndetse abamukubise bagiye kuri Polisi.

Ati 'Bagiye kuri Polisi kugira ngo hamenyekane ukuri kw'ibi bintu.'

Si ubwa mbere abanyerondo bavugwaho guhohotera abaturage mu bihe bitandukanye ku buryo no mu minsi ishize Umuyobozi w'Umuryango urwanya ruswa n'akarengane mu Rwanda (TI-RW), Ingabire Marie Immaculée, yatunze urutoki urugomo n'amahano bikorwa n'abanyerondo, asaba inzego zose kubihagurukira kuko bihangayikishije Abanyarwanda.

Abaturage bo mu Biryogo barasaba ko uyu muturage wakubiswe n'abanyerondo ahabwa ubutabera

Bizakorwa binyuze mu masezerano Kaminuza y'u Rwanda (UR) yasinyanye na IVI ku wa 9 Gashyantare 20, akubiyemo ibizakorwa mu kongera ubushobozi mu bijyanye no gukora, kugenzura, kugerageza no gukoresha neza inkingo.

Mu ntangiriro za 2020 ubwo Covid-19 yari yayogoje ibice bitandukanye by'Isi, igisubizo nta handi cyagombaga gushakirwa uretse ku nganda zikora inkingo.

Afurika ni yo yabonwaga nk'izazahazwa n'iki cyorezo mu buryo bw'umwihariko, aho ubu ifite ubushobozi bwo kwikorera 1% by'ikigo zose ikenera.

Binyuze muri gahunda zitadukanye, uyu mugabane wihaye intego ko kugeza mu 2040 izaba igeze ku rwego rwo kwikorera 60 ku ijana by'inkingo ikenera.

Kongera ubumenyi ni ingezi, by'umwihariko ku Rwanda nk'igihugu kirimo kubakwamo uruganda rw'inkigo rwa BioNTech, ndetse rwahawe icyicaro cy'Ikigo nyafurika gishizwe ibijyanye n'imiti, AMA.

Ibi nibyo IVI yahereyeho kugira ngo ifashe mu kubaka ubushobozi mu bushakashatsi ku bijyanye n'ikorwa ry'imiti n'inkingo, kuzigeza ku bazikeneye no kuzikora ku rugero zibonwa na bose.

Umuyobozi Mukuru wa IVI, Dr Jerome Kim, yavuze ko bagamije gufasha no guhugura abo muri uru rwego kugira ngo ibibazo nk'ibyabaye mu bihe bya Covid-19 bitazasubira mu bihe bizaza.

Ati “Niyo mpamvu twiteze byinshi kuri ubu bufatanye, kuko bizadufasha mu kubaka ubushobozi ndetse no kugera vuba ku ntego twihaye yo kurengera ubuzima bw'abantu binyuze mu gutanga inkingo.”

Mu gushyira mu bikorwa intego zayo, IVI yifashisha ibigo bitandukanye byaba ibikora inkingo, za kaminuza zitandukanye zigira uruhare mu bushakashatsi ndetse n'ibihugu bifasha mu kugenzura ko ishyirwa mu bikorwa ry'izo gahunda rigenda neza.

Dr Kim akavuga ko bijyanye n'ubushake u Rwanda rufite mu guteza imbere ubuzima binyuze mu gukora inkingo, no kuba ari urugero rwiza rw'ibishoboka muri Afurika, bahisemo gukorana na rwo cyane ko bahuje intego.

Bizakorwa hibandwa mu guhugura abanyeshuri ndetse n'abandi bo mu rwego rw'ubuzima.

Biteganyijwe ko abanyeshuri ba mbere mu bijyanye n'aya masezerano bazatangira guhugurwa muri Kamena uyu mwaka, bikazakurikirwa n'imishinga ihuriweho y'ubushakashatsi.

Aya masezerano aje mu gihe UR ari yo ibarizwamo Ikigo cy'akarere ka Afurika y'Iburasirazuba gifasha mu bijyanye n'inkingo, ikingira no gukwirakwiza inkingo, EAC RCE-VIHSCM.

Umuyobozi Mukuru wa UR, Dr Kayihura Muganga Didas, avuga ko nubwo bari bahawe ayo mahirwe nta bushobozi buhagije bwari buhari haba mu Rwanda yewe no muri EAC, akemeza ko hari hakanewe andi maboko ari yo mpamvu y'aya masezerano.

Ati “Aya masezerano tugiranye na IVI ni amahirwe tugize kuko bo babifitemo uburambe buhagije, ndetse intego zabo zihura n'izacu. Tugiye kubona ingufu zisumbuye kugira ngo tuzamure ubumenyi mu bijyanye n'inkingo mu buryo bwa kinyamwuga.”

Yavuze ko ayo masezerano azamara igihe kirekire kuko kugeza ubu umwe mu bayobozi bakuru ba IVI yamaze kwemererwa kuba umwarimu muri UR.

Afurika yiyemeje guteza imbere ubushakashatsi no gutanga ubumenyi mu rwego rw'ubuzima, ku buryo mu 2040 wihaye intego yo kuba ufite abantu bazobereye mu by'inkingo bagera ku 12,500.

Mu gufatanya kugera kuri iyi ntego, UR ibinyujije muri EAC RCE-VIHSCM imaze gutanga amasomo y'igihe gito ku bagera ku 1442 ku bijyane n'uruhererekane rw'inkingo ku bantu bo muri EAC basanzwe bari muri uru rwego.

Hahuguwe kandi abashobora gufata imyanzuro byibuze bize kugera ku cyiciro cya gatatu cya kaminuza (Masters) mu by'ubuzima, bagera kuri 94 barimo abarangije n'abacyiga.

Kugeza ubu hamaze gutangwa amasomo yo mu bwoko butanu yose ateza imbere itangwa ry'inkingo.

Umuyobozi ushinzwe amahugurwa mu Kigo cy'akarere ka Afurika y'Iburasirazuba gishizwe iby'inkingo, Dr Nyandwi Jean Baptiste, yavuze ko amasomo bakurikijeho ari ajyanye n'ikorwa ry'inkingo, umuntu akaba yamenya ingano y'urukingo akora, niba rutaragira ingaruka k'uwaruhawe n'ibindi.

Ati 'Tuzabifatanya no gutangiza andi masomo mashya y'impamyabumenyi y'icyiciro cya gatatu cya kaminuza (Masters) tutari dufite, bikanajyana no gusura inganda zikomeye zikora inkingo, abiga bakajya babyiga ariko banabikora.'

Yemeza ko bafite intego yo kongerera ubushobozi bene aba bafata ibyemezo bagera kuri 210 kugeza mu 2024, bikajyana no kwigisha abo muri Master's bakarenga 300 mu gihe cy'imyaka ine.

Biziyongera kandi ku gutanga amasomo ku banyeshuri basanzwe 160 mu myaka ine, basanga 194 bamaze guhugurwa.

Ku wa 03 Kamena 2022 ni bwo Ambasaderi w'u Rwanda muri Repubulika ya Korea, Yasmin D. Amri Sued, yazamuye ibendera ry'u Rwanda ku cyicaro cya IVI nk'umunyamuryango w'iki kigo.

U Rwanda rwinjiye muri IVI rwiyongera ku bindi bihugu 38 n'Ishami ry'Umuryango w'Abibumbye ryita ku Buzima, OMS ubu rukaba rufite uruhagarariye mu nama y'ubutegetsi ureberera inyungu zarwo, ari we Dr Leon Mutesa watangiye imirimo ye kuwa 28 Gicurasi 2022.

Dr Kayihura yashimye bufatanye bushya na IVI

Dr Nyandwi yagaragaje ko bafite intego yo guhugura abantu benshi mu bijyanye n’inkingo

Dr Kim yavuze ko bagamije gufasha no guhugura abakora mu bijyanye n’inkigo kugira ngo ibibazo nk'ibyabaye mu bihe bya Covid-19 bitazasubira

UR na IVI byasinye amasezerano y’ubufatanye

Abayobozi bafashe ifoto y’urwibutso nyuma y’uyu muhango

Mu ngamba zafashwe mu rwego rwo kugabanya ubukana bw'iki cyorezo harimo kugabanya urujya n'uruza rw'abantu ari nabyo byatumye ubukungu mu nguni zose buhunganana.

Ubwo iki cyorezo cyari gitangiye kugenza make, Guverinoma y'u Rwanda yashyize miliyoni zisaga 350$ mu Kigega Nzahurabukungu mu rwego rwo gufasha abahombejwe na COVID-19.

Munyaneza Zephanie wo mu Murenge wa Musasa, ni umwe mu bikorera bo mu Karere ka Rutsiro bahawe inguzanyo mu Kigega Nzahurabungu. Avuga ko kubera icyorezo cya COVID-19, igishoro cye cyari cyaragabanyutseho 70%.

Ati 'Mu gihe cya COVID-19 nari ngiye gufunga ubucuruzi kubera kubura abakiliya, ariko nyuma y'aho Leta itugobokeye ikaduha iriya nkunga ubucuruzi bwarongeye burazahuka ubu nta kibazo. Yego ntabwo biraza neza nka mbere ariko uko biri ubu biratanga icyizere”.

Mugenzi we utashatse ko amazina ye ajya mu itangazamakuru yavuze ko yari afite inguzanyo ya banki bimubera ikibazo kuyishyura kubera ko muri COVID-19 ubucuruzi bwe butagenze neza.

Ati “Badusabye gukora imishinga nk'abantu bahombejwe na COVID-19 ndawukora barawemera, mu kwezi wa 11 umwaka ushize nibwo bampaye miliyoni 5Frw nongera igishoro cyanjye ubu ubucuruzi buragenda neza nta kibazo, n'inguzanyo ndi hafi kurangiza kuyishyura”.

Mu karere ka Rutsiro abakoze imishinga basaba guhabwa amafaranga yo kuzahura ubukungu bwabo bwashegeshwe na COVID-19 bagera 163. Imishinga 132 niyo itsinda ribishinzwe ryasanze yujuje ibisabwa, ariko muri yo 43 niyo gusa yashobora kubonerwa amafaranga.

Ntaganira Jean Paul ucururiza mu Murenge wa Boneza, avuga ko ubuyobozi bwabasabye gukora imishinga barayikora barayohereza ariko ko ababonye amafaranga abo mu mirenge itatu.

Ati “Umuturage iyo akoze umushinga w'ubucuruzi, hari inkunga yaje ntimugereho aba yataye igihe. Turasaba ko natwe iyo nkunga yatugeraho kuko natwe ubucuruzi bwacu bwasubiye inyuma kubera icyorezo”.

Umuyobozi wungirije w'Akarere ka Rutsiro ushinzwe iterambere ry'ubukungu Havugimana Etienne avuga ko miliyoni 350Frw arizo zimaze guhabwa abaturage bahombejwe na COVID-19.

Ati “Icyakora hari abacikanywe n'ayo mahirwe kubera ko igihe cyabagereyeho bakinoza imishinga, ariko haracyari amahirwe, tuzakora ibishoboka byose ku buryo mu gihe uyu mushinga uzaba usubukuwe abaturage bacu izo nyungu igihugu cyabageneye zabageraho”.

Mu Karere ka Rutsiro habarurwa abacuruzi barenga 14,000, barimo 153 batanga TVA kuko bafite ibikorwa byinjiza arenze miliyoni 20 Frw ku mwaka.

Abacuruzi bo mu Karere ka Rutsiro bahombejwe na COVID-19 bamaze guhabwa arenga miliyoni 350Frw yo kuzahura ubucuruzi bwabo

Cyabitangaje ku wa 10 Gashyantare 2023, ubwo cyemezaga ko bitarenze Werurwe, kizaba cyanateye amatako mu bihugu bya Sierra Leone na Uganda, mu buryo bwo guhangana n'iyangirika ry'ikirere riteje impagarara muri iyi minsi.

Muri Nyakanga 2022, iki kigo cyatangiranjye moto zigera ku 2000 muri Benin ndetse ngo kugeza ubu izindi nk'izo zirategerejwe kuko zamaze gutumizwa.

Ni umushinga iki kigo gifite muri Afurika, kuko ihumana ry'ikirere ari irya kabiri mu bihitana abantu benshi kuri uyu mugabane, kubera ko rifitanye isano ya hafi n'indwara zitandura zirimo kanseri y'ibihaha, iz'umutima, stroke, n'izindi.

Nk'urugero, mu 2019 abana barenga miliyoni bishwe n'indwara zifite aho zihurira n'iyangirika ry'ikirere muri Afurika, bangana na kimwe cya gatandatu by'abicwa n'izo ndwara ku Isi ku mwaka.

Umuyobozi Mukuru wa M Auto, Shegun Bakari yavuze ko kubera izo ngaruka zose, abantu bafatanyije bahangana n'iki kibazo kuko ari inshingano za buri wese gutabara ubuzima bw'abantu.

Ati 'Ni ikibazo gihangayikishije cyane, noneho iyo bigeze ku batwara moto zikoresha ibikomoka kuri peteroli izi ndwara zisya zitanzitse.'

Yavuze ko bazakora uko bashoboye kose ngo izo moto zikoresha ibikomoka kuri peteroli zisimbuzwe iz'amashanyarazi, nka bumwe mu buryo bwihuse bwo kurengera ubuzima bw'abantu.

Iyo umuriro ushize muri batiri moto ikoresha uyitwara aba agomba kujya kuri sitasiyo iki kigo kiba cyarashyize mu mijyi itandukanye, akishyura iyuzuye cyane ko batiri itarenza ibilometero 100.

The Guardian ivuga mu bihugu iki kigo kizaba kiri gukoreramo, kizashyiraho za sitasiyo nyinshi zizifashishwa mu kongera umuriro muri batiri, ndetse kikazakorana na za leta mu kubaka inganda zitanga umuriro ukomoka ku mirasire y'izuba nka bumwe mu buryo bwo kubona umuriro uhagije.

Ikigega gitera imishinga igamije kurwanya iyangirika ry'ikirere kigaragaza ko mu myaka 18 iri imbere, ikiguzi cyo guhangana n'iyangirika ry'ikirere mu mijyi rya Afurika kizagera kuri 600% mu gihe nta cyaba gikozwe.

U Rwanda rwabihagurukiye rugikubita, kuko hashize imyaka irenga 10 rushyize imbaraga mu kubaka uburyo bw'ubwikorezi bw'abantu buteye imbere bunubahiriza ingamba zo guteza imbere ibidukikije no kurengera ikirere.

Bijyana n'uko ubushakashatsi bwasohowe mu 2018 ku ihumanywa ry'ikirere, bwagaragaje ko imyuka yanduza ikirere n'umwuka byo muri Kigali, ahanini ituruka ku binyabiziga, kuko 95,2% by'imodoka zikorera ku butaka bwo mu Rwanda zimaze nibura imyaka 10 zivuye mu ruganda.

Iyi niyo mpamvu muri iyi politike nshya u Rwanda rwihaye intego y'uko bizagera mu 2030, 20% by'imodoka zitwara abagenzi (buses) zikoresha amashanyarazi, bigakorwa horoherezwa abashoramari no kongera amafaranga afasha iyi mishinga.

Minisiteri y'Ibidukikije igaragaza ko gahunda Leta y'u Rwanda yihaye yo gutangira gukoresha imodoka z'amashanyarazi izarusaba nibura gushora agera kuri miliyoni 900$ (Miliyari 900 Frw).

Ugereranyije n'ibinyabiziga bisanzwe bikoresha lisansi cyangwa mazutu, ibikoresha amashanyarazi ntabwo bigoranye mu kubyitaho, ntibihumanya ikirere kandi bigira uruhare mu kugabanya ibikomoka kuri peteroli bitumizwa hanze ku kigero cya 15%.

Izi moto zitezweho umusanzu mu kurwanya ihumana ry’ikirere

Ni ibintu byagaragaje ko hakenewe imbaraga nyinshi mu bukangurambaga bwo gufasha imiryago kubyara abo ishoboye kurera.

Ni ikibazo gikomeje gushakirwa umuti urambye, kuko usanga umubare w'abaturage udahwanye n'ubushobozi bw'ibikorwaremezo biri mu karere, dore ko bamwe usanga badafite amikoro yo kwiyubakira amacumbi yo kubamo, bamwe bagatega amaboko ku buyobozi.

Kuri ubu Akarere kamaze kubaka imidugudu ine y'icyitegerezo y'abatishoboye, ndetse hari kubakwa undi mudugudu mu Murenge wa Kaniga.

Bamwe mu bakozi bo mu ishami rishinzwe kuboneza urubyaro mu Bitaro bikuru bya Byumba, bavuga ko abagabo bitabira serivisi zo kuboneza urubyaro bakiri hasi cyane, kuko batarenze 5%.

Ni mu gihe abagore bitabira iyi gahunda bageze kuri 56%, bigatuma abana bavuka batarateguwe baba benshi.

Hari abavuga ko imbogamizi zituruka ku makuru make abagabo bafite, bamwe bagatinya kuboneza urubyaro kuko aho bahuriye ngo bene uwo mugabo bamwita 'inkone'.

Hari no kumva ko abagore aribo batwita ndetse bakanabyara, bityo abagabo bamwe bakumva ko kuboneza urubyaro ari inshingano z'abagore gusa.

Nyamara hari abamaze kwifungisha bamaze kumva neza akamaro ko kubyara abana runaka bigendanye n'ubushobozi bafite.

Mu kiganiro Depite Ndoriyobijya Emmanuel aherutse kugirana n'abatuye mu Murenge wa Nyamiyaga muri aka karere, mu mpera za Mutarama 2023, yabajije abagabo niba muri bo hari utekereza igenamigambi ry'urugo rwe, cyangwa bakagira uruhare mu kuboneza urubyaro.

Uwitwa Ngendahayo yagize ati 'Nta mugabo upfa kubyumva ko yajya kwifungisha ngo yemere ko azongera gutera akabariro, twe aha duturiye n'iyo bumvishe ko hari uwaboneje urubyaro, no mu kabari ntashobora kwicarana n'abandi, usanga bamuhaye akato, ibyo byatumye tubiharira abagore bacu.'

Undi mugore yasubije ati 'Yewe nta kundi twabigenza! Umugabo aguherekeza kwa muganga iyo mugiye kubyara abana gusa, iyo ari ukuboneza urubyaro akoherezayo wenyine, ntabwo yahatunguka'.

Kuboneza urubyaro bikorwa mu buryo butandukanye, harimo ubwa kamere ku bwumvikane hagati y'abashakanye, gukoresha agakingirizo, agapira ku bagore ndetse no guhabwa ibinini, bigakorwa n'inzobere z'abaganga.

Ku bagabo habaho gufunga imiyoborantanga, kandi ubikorewe ugasanga nta ngaruka mbi n'imwe bimugizeho.

Ni mu gihe abaganga bagerageza kubasobanurira ko kuboneza urubyaro ari ku bushake, ndetse bikaba uburenganzira bw'umuntu ku giti cye, ariko akabikora hagamijwe inyungu z'umuryango we n'igihugu muri rusange.

Umuyobozi w'Akarere wungirije ushinzwe imibereho myiza, Mbonyintwari Jean Marie Vianney, asaba abaturage kurushaho kumva ko kuboneza urubyaro bituma babasha kubyara abo bazarera, kandi bagatunga abana babo neza.

Yasabye ubufatanye bw'abajyanama b'ubuzima, abaganga, inzego z'ibanze, amadini n'amatorero, mu gufatanya kwigisha abaturage ibyiza byo kuboneza uruyaro haba mu ngo zabo ndetse no ku gihugu.

Mu karere ka Gicumbi habarizwa abaturage basaga ibihumbi 460, bibumbiye mu ngo ibihumbi 107.

Gahunda yo kuboneza urubyaro ntirumvikana neza mu babago muri Gicumbi

Niba hari urugendo rugoranye, ni urwa Huye – Kigali rwo ku mugoroba wo kuri iki Cyumweru tariki ya 12 Gashyantare 2023 aho bamwe babigendeyemo bagaterwa amabuye nk’imodoka imwe yari itwaye abafana ba APR FC yamenwe ibirahure.

Ni nyuma y’umukino w’umunsi wa 19 wa shampiyona 2022-23 wahuje Rayon Sports na APR FC ubera kuri Stade Huye aho Rayon Sports yayitsinze 1-0.

Ubwo benshi mu bafana yaba aba APR FC na Rayon Sports bari batashye, basanze abantu ku muhanda bashungereye cyane cyane muri Nyanza.

Benshi bari biganjemo abana n’urubyiruko bari bafite ibiti n’amabuye, bakubitaga buri modoka itambutse.

Aba bafana utamenya ngo ni ab’ikipe runaka, iyo bateraga amabuye ku bw’ibyago hari bamwe yafataga.

Abafana ba APR FC bibumbiye muri Zone 1, bahuye n’iki kibazo aho imodoka ya Ritco bari barimo yateweho amabuye menshi ndetse ibuye rimwe rifata umukobwa umwe riramukomeretsa biba ngombwa ko ihagarara.

Bamukuyemo babanza kumuha ubutabazi bw’ibanze ni na ko iyi modoka yari igeze muri Rusatira yahisemo guhita ijya ku Murenge wa Rusatira kugira ngo barebe ko bafashwa kumenya abamennye ibirahure iyi imodoka.

Si bo gusa kuko n’izindi modoka z’abafana yagiye ziterwaho amabuye nk’imodoka ya “Visit Rwanda” yarimo Online Fan Club.

Zone1 ni yo yateweho amabuye

Ritco ibirahure babimennye

Mu muhanda hari huzuye abantu benshi ari na bo bateye amabuye

Umuyobozi wa Rayon Sports, Uwayezu Jean Fidele avuga ko gutsinda APR FC ari ibyishimo kuri bo ariko nubwo bari bamaze igihe batayitsinda ari ikipe nk’izindi.

Uyu munsi APR FC yari yakiriye Rayon Sports mu mukino w’umunsi wa 19 wa shampiyona ya 2022-23, ni umukino wabereye kuri Stade Mpuzamahanga ya Huye kuri iki Cyumweru tariki ya 12 Gashyantare 2023.

Ni umukino APR FC yagiye gukina mu mikino 7 iheruka guhuza aya makipe yaratsinzemo 5 banganya 2.

Rayon Sports yaherukaga gutsinda APR FC tariki ya 20 Mata 2019 muri shampiyona ya 2018-19 ari na bwo iheruka kwegukana igikombe cya shampiyona.

Igitego kimwe rukumbi cya Ngendahimana Eric cyo ku munota wa 32 ni cyo cyafashije Rayon Sports gutsinda uyu mukino ikuraho agahigo kari kamaze imyaka 4.

Perezida wa Rayon Sports, Uwayezu Jean Fidele yabwiye ISIMBI ko ari umukino bawuteguye bashaka amanota bakaba bayabonye.

Ati “Ni umukino wa shampiyona, twashakaga amanota 3, twawuteguye nk’iy’indi, turashima Imana ko tuyabonye, turi mu rugamba rw’igikombe ubu.”

Yakomeje avuga ko nubwo batsinze APR FC nyuma y’igihe kinini ari ibyishimo gusa ngo na none ni ikipe nk’izindi.

Ati “APR FC ni ikipe dukunze guhangana, kuba tuyitsinze twari tumaze igihe tutayitsinda ni ibyishimo ariko ni ikipe nk’izindi.”

Nyuma yo gutsinda uyu mukino APR FC n’ubundi yagumye ku mwanya wa mbere n’amanota 37, Rayon Sports ni iya 4 n’amanota 36 inganya na Gasogi United ya 2 AS Kigali ya kabiri.

Perezida wa Rayon Sports, Uwayezu Jean Fidele ibyishimo byari byose, avuga ko APR FC ari ikipe nk’izindi

Rayon Sports yaherukaga gutsinda APR FC muri 2019, yayitsinze 1-0 cya Ngendahimana Eric.

Imikino yari ishize ari 7 Rayon Sports itabasha gutsinda APR FC. APR FC yatsinzemo 7 banganya 2. Rayon Sports iheruka gutsinda APR FC tariki ya 20 Mata 2019, hari muri shampiyona ya 2018-19 ari na bwo iheruka igikombe cya shampiyona.

Ibirometero 125.1, Kigali-Huye ni byo umuntu wifuzaga kureba umukino w’abakeba mu Rwanda uhuza APR FC na Rayon Sports yagombaga gukora.

Saa 9h02′ ni bwo imodoka yari itwaye umunyamakuru wa ISIMBI yerekeza i Huye kuri uyu mukino wabereye kuri Stade Mpuzamahanga ya Huye yari ihagurutse i Kigali.

Byari ku Cyumweru, ariko mu nzira nta ndirimbo nka “Tuje Iwawe Nyiringoma” zumvikanaga, ahubwo humvikanaga amajwi menshi y’abafana b’aya makipe bari berekeje i Huye bamwe bati “Nyamukandagira mu kibuga kirasa imitutu” abandi bati “Bakunda Rayon na yo ikabakunda”.

Imodoka utabara umubare z’abafana ni zo zahagurutse i Kigali zerekeza i Huye gushyigikira aya makipe harimo n’imodoka imwe izwi nka “Visit Rwanda” ya Kigali Tours imenyerewe kuzengurutsa abantu umujyi wa Kigali, itsinda rya bafana ba APR FC rya “Online Fan Club” ryemeye ryishyura ibihumbi 800 by’amafaranga y’u Rwanda bayitwara i Huye.

Kuva Kigali kugera Huye, ku muhanda hari huzuye abantu bari baje gutera ingabo mu bitugu abafana bagenzi ba bo nubwo bo batabashije kwerekeza i Huye.

Saa 12h 42′ ni bwo imodoka yari isesekaye mu Mujyi wa Huye, morale yari yose, umujyi wari washyuhijwe n’abafana b’aya makipe.

Nubwo umukino utari wabereye i Kigali ahazwi ko ari ho aya makipe agira abafana benshi, gusa Stade Mpuzamahanga ya Huye yari yuzuye, gusa APR FC yagaragazaga kuba ari yo ifite abafana benshi.

Wari umukino w’umunsi wa 19 wa shampiyona y’icyiciro cya mbere mu Rwanda umwaka w’imikino 2022-23, Rayon Sports yari yagaruye muri 11 abakinnyi 3 bari bamaze iminsi mu mvune ari bo; Kapiteni Rwatubyaye Abdul, Mbirizi Eric na Onana Léandre.

APR FC umutoza Ben Moussa yari yahisemo kubanza mu kibuga Manishimwe Djabel, kapiteni we wari umaze igihe asimbura ndetse yari yanagaruye Buregeya Prince utarakinnye umukino wa Sunrise FC kubera imvune.

Umukino watinze gutangira iminota 2 kubera ko izamu ritari rimeze neza. Saa 15h02′ ni bwo Ruzindana Nsoro yatangije umukino.

Ku munota wa 6, Niyibizi Ramadhan yagerageje uburyo bwa mbere ariko umupira unyura hanze y’izamu rya Rayon Sports ryari ririnzwe na Hakizimana Adolphe. Ku munota wa 10 Ramadhan yongeye kugerageza andi mahirwe ariko na bwo unyura hanze y’izamu.

Mbirizi Eric yahawe ikarita y’umuhondo ku munota wa 11 ku ikosa yakoreye Ruboneka Jean Bosco.

Bizimana Yannick yahushije uburyo bwabazwe ku munota wa 20 ku mupira wari uhinduwe na Manishimwe Djabel ariko ashyizeho umutwe unyura hejuru y’izamu.

Rayon Sports yabonye amahirwe ya mbere ku munota wa 23 ku mupira Luvumbu yacomekeye Esenu ariko ateye unyura hanze ya ryo.

Nyuma yo guhererekanya neza ku bakinnyi ba Rayon Sports, Onana Léandre yagerageje ishoti ku munota wa 26 ariko umunyezamu Ishimwe Pierre arawufata.

Hakizimana Adolphe yarokoye Rayon Sports ku munota wa 27 nyuma y’ishoti yari aterewe na Bizimana Yannick inyuma y’urubuga rw’amahina ariko awohereza muri koruneri itagize icyo itanga.

Byiringiro Lague yagerageje ishoti yatereye inyuma y’urubuga rw’amahina ku munota wa 29 ariko rinyura hanze y’izamu.

Ruboneka Jean Bosco yahawe ikarita ya mbere y’umuhondo ku ruhande rwa APR FC ku munota wa 30, ni ku ikosa yari akoreye Onana.

Iri kosa ryaje kuvamo igitego cya Rayon Sports Sports aho Luvumbu yayiteye maze Eric Ngendahimana atera mu izamu Ishimwe Pierre awukuramo ariko Nsoro avuga ko wari warenze umurongo.

Byiringiro Lague yahawe ikarita y’umuhondo ku munota wa 42 ku ikosa yakoreye Ojera Joackiam. Amakipe yagiye kuruhuka ari 1 cya Rayon Sports ku busa bwa APR FC.

APR FC yatangiye igice cya kabiri ikora impinduka, Manishimwe Djabel na Byiringiro Lague bahaye umwanya Ishimwe Anicet na Ishimwe Fiston.

Ni impinduka zitagize icyo zifasha cyane APR FC kubera ko mu minota ya mbere y’igice cya kabiri Rayon Sports yari iyiri hejuru.

Ngendahimana Eric yahawe ikarita y’umuhondo ku munota wa 60 ku ikosa yakoreye Ishimwe Fiston.

APR FC yongeye gukora izindi mpinduka 2 ku munota wa 67, Niyibizi Ramadhan na Bizimana Yannick bahaye umwanya Nshuti Innocent na Mugunga Yves.

Umutoza wa Rayon Sports, Haringingo Francis yakoze impinduka za mbere ku munota wa 76, Luvumbu, Onana na Mbirizi bahaye ukwanya Ndekwe, Hadji na Kanamugire Roger. APR FC yakoze iminduka za nyuma ku munota wa 83 Ishimwe Fiston wagize ikibazo yahaye umwanya Mugisha Gilbert.

Ku munota wa nyuma APR FC yahushije igitego ku mupira Claude yahinduye, Nshuti Innocent agashyiraho umutwe Adolphe akawukuramo, Mugunga yasonzemo nabwo bawukuramo. Umukino warangiye ari 1-0.

Gutsinda uyu mukino kwa Rayon Sports bivuze ko isoje umunsi wa 19 ari iya 4 n’amanota 36 inganya na Gasogi United ya 3 na AS Kigali ya 2 mu gihe APR FC ikiyoboye urutonde n’amanota 37.

Guts

11 babanjemo ku mpande zombi

APR FC: Ishimwe Pierre, Omborenga Fitina, Niyomugabo Claude, Buregeya Prince, Niyigena Clement, Ruboneka Jean Bosco, Mugisha Bonheur, Manishimwe Djabel, Niyibizi Ramadhan, Byiringiro Lague na Bizimana Yannick

Rayon Sports: Hakizimana Adolphe, Ganijuru Elie, Mucyo Junior Didier, Rwatubyaye Abdul, Mitima Isaac, Ngendahimana Eric, Mbirizi Eric, Onana Léandre, Ojera Joackiam, Luvumbu Heritier na Musa Esenu