Author: webrwanda

Ugiye kubara abakinnyi u Rwanda rwegereye bafite inkomoko mu Rwanda baba cyangwa bakina i Burayi ngo babe baza gukinira ikipe y’igihugu y’u Rwanda, ni benshi gusa abemeye ni mbarwa.

Ugiye gukora urutonde rw’abakinnyi bafite inkomoko mu Rwanda bakina i Burayi rwo ntiwaruvamo, ahanini biba bishingiye ku mateka y’igihugu cyacu.

Hari kandi abakinnyi benshi begerewe ngo baze gukinira ikipe y’igihugu babitera utwatsi hari n’abakirimo kwingingwa magaingo aya barimo Mike Tresor umaze igihe aseta ibirenge, George Lewis Igaba-Ishimwe Maniraguha wa Arsenal na Emeran Noam wa Manchester United akaba umuhungu wa Emeran Flitz Nkusi wakiniye Amavubi benshi bavuga ko byakabaye binoroshye kuko se yakiniye Amavubi, nyina akaba ari umunyarwandakazi ariko ntabwo birakunda ndetse bikavugwa ko hakiri n’inzira ndende.

Si aba gusa kuko hari n’abandi bagiye begerwa ariko ntibikunde ko baza gukinira u Rwanda.

Habimana Chrysostome wahoze akina umupira w’amaguru akaba na se wa Habimana Glen ukinira FC Victoria Rosport muri Luxembourg we wemeye gukinira Amavubi, yavuze ko impamvu ya byo ari uko abakinnyi benshi baba baravukiye hanze, nta byinshi bazi ku Rwanda rimwe na rimwe gusanga ababyeyi babo ntacyo babaganiriza ku gihugu cyabo, bikaba bisaba gukomeza kubaganiriza.

Ati “ni abana bavukiye iriya hirya, ntabwo aragera mu Rwanda, ntahazi wenda n’ababyeyi ntibamusobanurira ngo bamubwire ukuntu ibintu bimeze, ni umuntu ugomba kwicarana na we, ukamubwira na we ubwe akaza kwirebera yakumva abishimye akabikomeza, atabishima akagenda kuko ntabwo wahatira umuntu ikintu ariko waganiriye na we, wamweretse umushinga ufite akabona ashobora kuwujyamo ngo awugiremo uruhare, mbona nta cyamubuza kuza.”

Habimana Jean Chrysostome kandi yahishuye ko umutoza w’ikipe y’igihugu Amavubi, Carlos Alós Ferrer kuva umwaka ushize yamuhaye akazi ko kumushakira abana bakina i Burayi bafite inkomoko mu Rwanda akaba yabumvisha kuza gukinira Amavubi.

Habimana Jean Chrysostome avuga ko aba bakinnyi biba bisaba kubaganiriza bihoraho kubera ko nta byinshi baba bazi ku Rwanda

Source : http://isimbi.rw/siporo/article/inzitizi-ku-bakinnyi-b-i-burayi-ku-kuba-baza-gukinira-amavubi

Ibyabaye ku munsi w’ejo hashize ku wa Gatatu ubwo abakinnyi b’u Rwanda bayirwaniraga, byatumye benshi bibaza amahitamo ya mbere y’umutoza ku gutera penaliti.

Hari ku mukino wo gushaka itike y’igikombe cy’Afurika cya 2023 ubwo Amavubi yari yakiriye Benin kuri Kigali Pelé Stadium ejo hashize ku wa Gatatu tariki ya 29 Werurwe 2023.

Ubusanzwe mu ikipe iyo ari yo yose usanga harimo uba ari we mahitamo ya mbere y’umutoza mu gutera penaliti.

Mu Mavubi hagaragaye igisa no kuyirwanira ku munota wa 17 ubwo Amavubi yari ayibonye nyuma y’uko Cedric Yannick yari akoreye umupira mu rubuga rw’amahina.

Mugisha Gilbert ni we wageze ku mupira bwa mbere asa nubwira bagenzi be ko bamureka akayitera, nyuma haje na Muhire Kevin ndetse na Rafael York bahise bamugeraho bayishaka.

Byaje kurangira Rafael York ari we uyiteye ndetse n’umunyezamu ayikuramo.

Umutoza w’ikipe y’igihugu Amavubi, nyuma y’umukino yavuze ko ubusanzwe Muhire Kevin na Rafael York ari bo mahitamo ya mbere kuri penaliti.

Ati “ubwo twiteguraga umukino penaliti byari Muhire na York, ubwo twageruga imipira y’imiterekano twanzuye ko penaliti ari Muhire na York.”

Yavuze ko uyu musore atarimirwaho itaka kubera ko yayihushije kuko penaliti uwo ari we wese yayihusha.

Mugisha Gilbert ni we wageze ku mupira mbere ashaka gutera penaliti

Hahise haba inama bishakamo uyitera

York yarayiteye arayihusha

Source : http://isimbi.rw/siporo/article/ubundi-ni-inde-mukinnyi-utera-penaliti-z-amavubi

Ikipe ya Benin yatangaje ko yareze u Rwanda nyuma y'umukino wo ku wa Gatatu,tariki 29 Werurwe 2023,ibi bihugu byombi byanganyijemo igitego 1-1 mu gushaka itike yo kwerekeza mu gikombe cy'Afurika kizabera muri Cote d'Ivoire umwaka utaha.

Umutoza wa Bénin, Gernot Rohr, yabwiye abanyamakuru ko Ikipe ye yamaze gutanga ikirego muri CAF kubera Muhire Kevin wakinnye afite amakarita abiri y'umuhondo bitemewe.

Yagize ati “Reka ndebe kuko mfite [hano impapuro], hari nimero 11, Kevin Muhire wabonye ikarita y'umuhondo mu mukino ubanza ku munota wa 68, uwo mukinnyi kandi yayibonye ku munota 74 bakina na Sénégal.'

'Ni ukuvuga ngo CAF yaratuvanze cyane mbere y'uyu mukino, itujyana hirya no hino, ariko twabonye ko uyu mukinnyi wari ufite amakarita abiri y'umuhondo atigeze ahagarikwa.'

'Twamweretse Komiseri w'umukino, ndatekereza ko ubutabera bwa siporo bugena ko ahanwa. Muzi ibihano.'

Ku ruhande rw'Ikipe y'Igihugu Amavubi bavuga ko mbere yo guhura na Bénin mu mukino wo kwishyura i Kigali,CAF yabamenyesheje ko nta mukinnyi w'u Rwanda n'umwe ufite ikibazo uretse Hakim Sahabo wari wabonye ikarita itukura.

Team Manager w'Ikipe y'Igihugu, Rutayisire Jackson, yabwiye IGIHE ko ikarita ivugwa kuri Muhire Kevin yaherewe i Cotonou itamwanditseho.

Yagize ati “Natwe twabyibajijeho ariko nyuma twaje gusanga Muhire Kevin n'ubwo yahawe ikarita y'umuhondo hamwe na Mugisha Gilbert, Muhire we ntiyamwanditsweho ahubwo yanditswe kuri Mugisha gusa.''

“Yaba raporo y'umusifuzi n'iya Komiseri w'umukino zombi zirahura. Birashoboka ko nyuma basanze baribeshye ku ikarita bahaye Muhire Kevin bakayimuhanaguraho. Ibyo ni nabyo CAF yatwoherereje tariki 25 Werurwe iminsi ibiri mbere y'umukino batwereka ko nta mukinnyi wacu n'umwe ufite umuziro watuma adakina.''

Ukuri guhari n'uko Muhire Kevin yabonye amakarita abiri y'umuhondo koko ariko raporo komiseri yatanze nyuma y'umukino ubanza wa Benin, yerekana ko uwo bayanditseho ari Mugisha Gilbert.

Mbere y'umukino wo kuri uyu wa Gatatu, CAF ntabwo yigeze imenyesha FERWAFA ko Muhire atemerewe gukina kandi ubusanzwe igomba kubikora.

Haracyategerejwe igisubizo cya CAF kuri iki kibazo.

Mu itsinda L,U Rwanda ruri ku mwanya wa gatatu n'amanota atatu rukurikiye Sénégal ya mbere n'amanota 12 yanamaze kubona itike y'Igikombe cya Afurika na Mozambique ya kabiri n'amanota ane mu gihe Bénin yagumye ku mwanya wa nyuma n'amanota abiri.

Source : https://umuryango.rw/imyidagaduro/imikino/article/habonetse-umucyo-ku-ikarita-ebyiri-z-umuhondo-zivugwa-kuri-muhire-kevin

Papa Francis afite indwara (infection) mu buhumekero izatuma amara iminsi mu bitaro i Roma, nk'uko byatangajwe na Vatican.

Uyu mugabo w'imyaka 86 yagize ibibazo byo guhumeka mu minsi ishize ariko nta Covid afite, nk'uko itangazo ribivuga.

Rivuga ko akeneye 'indi minsi micye yo kwitabwaho bikwiye mu bitaro'.

Ryongeraho ko 'Papa Francis yakozwe ku mutima n'ubutumwa bwinshi bwakiriwe kandi ashimira kumuba hafi no kumusabira'.

Abakozi be ba hafi, barimo abashinzwe umutekano, byitezwe ko baguma ku bitaro bya Gemelli Hospital, nk'uko umwe mu babizi neza yabibwiye BBC.

Ibi bibaye mu gihe iki ari cyo gihe cy'umwaka kirimo akazi kenshi kuri Papa Francis, aho hateganyijwe byinshi agomba gukora muri weekend ya Pasika.

Misa ya Mashami itegerejwe ku cyumweru, hakurikireho icyumweru gitagatifu n'ibirori bya Pasika.

Ateganya kandi gusura igihugu cya Hongrie mu mpera z'ukwezi gutaha kwa Mata.

Kuwa gatatu mu gitondo yakiriye anumva abantu, igikorwa akora buri rimwe mu cyumweru ku rubuga rwa Mutagatifu Petero.

Hano yabonetse nk'ufite intege, ariko nyuma aboneka ahina isura nk'urimo kubabara ubwo yariho afashwa kwinjira mu modoka ye.

Mbere Vatican yari yavuze ko yajyanywe kwa muganga gusuzumwa, ariko ibinyamakuru mu Butaliyani byashidikanyije ibi nyuma y'uko ikiganiro yari afite kuri televiziyo gihagaritswe ku munota wa nyuma.

Asubiza ku nkuru yo gushyirwa mu bitaro kwa Papa, Perezida Biden yasabye abantu 'isengesho riruseho' ku gukira kwa Papa.

Biden, perezida wa Amerika wa kabiri gusa w'umugatolika, yigeze kuvuga ko Papa Francis ari umwe mu bantu 'bajya gusa na Kristu' yahuye nabo.

Abantu bo mu mujyi w'iwabo i Buenos Aires muri Argentina, babwiye ibiro ntaramakuru Reuters ibitekerezo byabo kuri iyi nkuru.

Daniel Saco yavuze ko Papa 'agomba kwibaza ubwe niba agishoboye gukomeza'.

Victoria Veira ukomoka muri Brazil ati: 'Birababaje cyane kuko, nk'uwo muri Amerika y'Epfo, numva mpagarariwe na Papa, umuntu ufungutse cyane.'

Madamu Anibal Pizelle, wahuye na Papa ubwo yasuraga Buenos Aires, yavuze ko yizeye ko azakira kuko 'akomeye ku mubiri no mu mutwe' kandi ari 'umuntu w'ukwizera gukomeye'.

Hashize amezi Papa agendera mu igare ry'ab'intege nke kubera uburwayi bw'ivi.

Mu 2021 yabazwe amara, ariko muri Mutarama(1) uyu mwaka yavuze ko ubwo burwayi bwagarutse.

Nubwo afite intege nke, Papa yakomeje gukora ndetse no gusura amahanga. Muri Gashyantare(2) yasuye DR Congo na Sudani y'Epfo.

Muri Mutarama, yayoboye imihango yo gushyingura uwo yasimbuye Papa Benedict XVI — wabaye Papa wa mbere weguye nyuma y'ibinyejana byinshi. Yavuze ko yeguye kubera amagara ye yari ameze nabi.

Papa Francis yigeze kuvuga ko nawe ashobora kuatera intambwe nk'iya Benedict mu gihe amagara ye yarushaho kumera nabi.

BBC

Source : https://umuryango.rw/ubuzima-115/iyobokamana/article/papa-francis-ari-mu-bitaro-kubera-indwara-y-ubuhumekero

Nyuma y'imyaka ibiri afungiye mu Rwanda, Paul Rusesabagina yageze muri Leta zunze ubumwe za Amerika, nk'uko abategetsi baho n'umukobwa we babitangaje.

Carine Kanimba, umukobwa we wayoboye ibikorwa byo guhirimbanira ko arekurwa, yishimira kuhagera kwa se yatangaje kuri Twitter ati: 'Uyu munsi amaherezo umuryango wacu wongeye guhura'.

Jake Sullivan umujyanama mu by'umutekano muri White House we yanditse kuri Twitter ati: 'Twishimiye kuba agarutse ku butaka bwa Amerika.' Yongeyeho ati 'Rusesabagina yongeye guhura n'umuryango we n'inshuti ze bari bategereje cyane uyu munsi.'

Uyu muyobozi yashimiye abagize uruhare muri uku kurekurwa kwa Rusesabagina ku bufatanye na Guverinoma y'u Rwanda.

Ibiro ntaramakuru by'Abongereza, AP, byatangaje ko Rusesabagina indege yamuzanye imaze kumugeza i Houston yoherejwe mu bitaro bya gisirikare biri i San Antonio 'kuganira izindi nteguro'.

Rusesabagina yarekuwe nyuma y'ibiganiro hagati y'u Rwanda na Amerika bahujwe na Qatar, nyuma yo gufatwa mu 2020 agakatirwa gufungwa imyaka 25 ku byaha by'iterabwoba.

Mu ibaruwa yatangajwe na minisiteri y'ubutabera ku wa gatanu igaragazwa ko yasinywe na Rusesabagina asaba imbabazi Perezida Kagame ngo amurekure, yanditsemo ko yicuza 'ihuriro iryo ariryo ryose n'ibikorwa by'urugomo bya FLN' kandi ko narekurwa 'nzasiga inyuma yanjye ibya politike yo mu Rwanda'.

Uruhande rwe ntacyo ruravuga kuri iyo baruwa.

Mu 2005, Rusesabagina yahawe 'US Presidential Medal of Freedom' na Perezida George W Bush kubera ubutwari bwe bwo kurokora abantu muri Jenoside bukinwa muri film yamamaye ya Hollywood yiswe Hotel Rwanda. Ubwo butwari ntibuvugwaho rumwe mu Rwanda.

Source : https://umuryango.rw/amakuru/mu-rwanda/politiki/article/amerika-yemeje-amakuru-y-uko-rusesabagina-yageze-mu-muryango-we

Hitezwe ko umubare w'abapfuye ukomeza kwiyongera nyuma y'aho indege ebyiri za gisirikare zigonganiye hafi y'ikigo cya Fort Campbell,abantu icyenda bagahita bahasiga ubuzima.

Indege ebyiri za HH60 Blackhawks zo muri 101st Airborne Division (Air Assault) zagonganye ubwo zakoraga imyitozo ahagana mu ma saa yine z'ijoro ryo kuri uyu wa gatatu (29 Werurwe) ahitwa Trigg, Kentucky muri Amerika.

Nk'uko byatangajwe na Brendalyn Carpenter-Player, ushinzwe ibikorwa rusange muri Fort Campbell, ngo abahamagawe bwa mbere berekeje i Fort Campbell muri Kentucky vuba na bwangu, kugira ngo barebe uko byagenze.

Guverineri Andy Beshear,yavuze ko hari amakuru mabi cyane aturuka Fort Campbell aho indege ebyiri za gisirikare zagonganye ndetse ko haratangazwa abapfuye benshi.

Amakuru avuga ko kubera iyi mpanuka abantu benshi bapfuye ndetse hari abarembeye mu bitaro nabo bashobora kutarokoka.

Source : https://umuryango.rw/amakuru/mu-mahanga/umutekano/article/indege-ebyiri-za-gisirikare-zagonganiye-mu-kirere-benshi-bahasiga-ubuzima

Izi sosiyete zivuga ko iri tegeko rihana abaryamana n'abo bahuje igitsina rya Uganda rishyizwe mu bikorwa rishobora kuzatuma umuvuduko w'ishoramari muri iki gihugu ugabanuka ndetse rikanakumira ba mukurerarugendo.

Zivuga ko iri tegeko rizahungabanya ubushobozi bwa sosiyete mu kubona abakozi batandukanye kandi bafite impano.

Umwe mu bayobozi waganiriye na VOA Africa, Yvonne Muthoni, yavuze ko iri tegeko rizahungabanya umutekano w'abakozi ndetse rikabangamira uburenganzira bw'abakozi bakorera ku rwego mpuzamahanga.

Ati 'Barica itegeko rya Uganda cyangwa bahangane n'amabwiriza agenga sosiyete mpuzamahanga n'amategeko agenga uburenganzira bwa muntu mu bihugu birimo ibyicaro bikuru by'ayamasosiyete.'

Sosiyete mpuzamahanga zikorera muri Uganda zirimo Google, MasterCard, Unilever, Standard Chartered, PwC n'izindi.

Mu minsi ishize ibihugu nka Leta Zunze Ubumwe za Amerika, u Bwongereza n'Umuryango w'Abibumbye byagaragaje ko iri tegeko rihana abaryamana n'abo bahuje igitsina rishobora gutuma hafatwa ibyemezo bikakaye ku bukungu bwa Uganda.

Inteko Ishinga Amategeko muri Uganda yatoye itegeko ry'igihano ku baryamana n'abo bahuje igitsina aho umuntu wiyemerera ko ari umwe muri bo ahanisha igihano cy'igifungo cy'imyaka 10. Uwafashwe ari mu gikorwa cy'imibonano mpuzabitsina na mugenzi we bahuje igitsina ahanishwa igifungo cya burundu.

Iri tegeko ritegerejwe gushyirwaho umukono na Perezida Yoweri Museveni nyuma yo kuryigaho byibuze iminsi 60 cyangwa rigasubizwa Inteko kugira ngo rivugururwe.

Source : https://umuryango.rw/amakuru/mu-mahanga/article/google-na-microsoft-byiyogereye-kubamaganira-itegeko-rihana-abatiganyi-muri

Perezida wa leta zunze ubumwe z'Amerika, Joe Biden, yaraye atangije inama ku nshuro ye ya kabiri , igamije kwiga ikibazo cya demokarasi ku isi.

Yemeye ko leta zunze ubumwe za Amerika izokoresha imiriyoni 690 z'amadorari mu mwaka utaha hagamijwe gutiza imbaraga gahunda zishyigikira ubwisanzure ku isi.

Ibiro by'umukuru w'igihugu muri Amerika , White House, byatangaje ko Amerika yifuza ko ikorana buhanga rikoreshwa mu guteza imbere demokarasi.

Muri iyo nama,Aba minisiteri b'intebe mu bihugu 8 by'Uburayi basinye ku nyandiko igenewe abakuru b'ibigo bifite imbuga nkoranya mbaga kujya bihutira guhagarika ubutumwa bwose bw'ibinyoma.

Abategetsi basinye iyo nyandiko ni abo muri Ukraine, Moldaviya, Polonye, Repuburika ya Cekoslovakiya, Estoniya, Latviya, Lituwaniya, na Slovakiya.

Iyi nama yo guhagurukira demokarasi yateguwe n'Amerika, ibaye mu gihe za reta Amerika ivuga ko ziyoboza igitugu ariko zigahabwa zigahabwa urubuga rwo kwigisha imigambi yazo.
Itanga urugero ku Burusiya bumaze amezi 13 bwarateye Ukraine, ndetse n'Ubushinwa bafitanye umubano wihariye.

Perezidanse y'Amerika yavuze ko mu gihe ayo mafaranga yakemerwa n'inteko ishinga amategeko ,azokoreshwa muri porogaramu zishyigikira ubwigenge bw'ibitangazamakuru.

Azokoreshwa kandi no mu kurwanya ruswa , guharanira uburenganzira bw'ikiremwa muntu, guteza imbere ikorana buhanga riteza imbere demokarasi no gushyigikira amatora atagira abo akumira.

(VOA News)

Source : https://umuryango.rw/amakuru/mu-mahanga/politiki/article/amerika-yemeye-akayabo-k-amafaranga-ngo-ikomeze-icyo-yise-demokarasi-ku-isi

Ibi uyu muhanzi yabigarutseho mu kiganiro cyihariye yagiranye na Shene ya YouTube yitwa 'One on one', aho yari abajijwe ku bijyanye n'ibyamubayeho ubwo yegukanaga Primus Guma Guma Super Star yabaga ku nshuro ya mbere.

Tom Close uhamya ko yatwaye PGGSS1 ayikwiye, yavuze ko yabishingiraga ku byo barebagaho birimo uko umuhanzi yitwaye ku rubyiniro, ahamya ko icyo yari umwe mu bitwaye neza bishoboka.

Agaruka ku bahanzi abona bari kuba baramutwaye iki gihembo, Tom Close yagize ati 'Abahanzi bashoboraga guhangana nanjye ntabwo bari muri PGGSS. Navuga nka Kitoko, Rafiki ryari izina rinini ariko ryatangiye kumanuka, abo twari guhangana bakaba banayintwara ni Meddy na The Ben batari bahari, undi navuga wari kutubiza icyuya yari Miss Jojo utarayitabiriye.'

Ku rundi ruhande, Tom Close ntahakana ko yatwaye PGGSS izina rye ritangiye kumanuka, ahubwo ahamya ko byorohejwe n'uko abo yari ahatanye barimo barushaho kugira igikundiro.

Ati 'Ba Jay Polly bari bakirimo baza. Icyo gihe ntiyari arengeje indirimbo eshanu ze ku giti cye nk'umuhanzi. King James yari umuhanzi mwiza ariko aribwo ari kwamamara cyane.'

Tom Close yavuze ko ubwo bamaraga gutangaza abahanzi 10 bari bagiye guhatana yahise abona ko ari igihembo agiye gutwara ndetse abitegera na Dr Claude.

Ati 'Bakivuga abahanzi icumi, turi kumwe n'abandi uwitwa Dr Claude avuga ko azayitwara ndamubwira nti iyi ni iyanjye nushaka dushyireho amafaranga.'

Tom Close yongeyeho ko ibi yanabigaragaje mu bitaramo byose bakoze bizenguruka igihugu kuko iyo yabaga atabaye uwa mbere wasangaga abaye uwa kabiri cyangwa uwa gatatu.

Uyu muhanzi watwaye igikombe agaterwa amabuye, yavuze ko asanga ari ibintu byari byateguwe n'abo bari bahatanye.

Ati 'Ririya joro njye ndabizi neza ko ari ibintu byateguwe n'abo twari duhanganye kuko izina Tom Close ry'icyo gihe umuhanzi cyangwa abahanzi bashoboraga guhangana naryo, ntabwo bari muri PGGSS.'

Ikindi Tom Close ashingiraho ko yatwaye igihembo agikwiye ni uko yitwaye mu gitaramo cya Sean Kingston cyane ko icyo gihe yagiye ku rubyiniro bamukomera, aruvaho akomerwa amashyi.

Ni umuhanzi udatinya guhamya ko PGGSS yegukanye yahombeje abahanzi benshi kubera gushora amafaranga mu kwitoresha, ibi we akaba yarabimenye nyuma ariwe akara n'umwe mu bariteguraga wamuburiye nyuma y'ijonjora ry'ibanze.

Aha abishingira ku kuba abahanzi bagenzi be bari biyizeye bikomeye ntibitoreshe barimo Mani Martin, Dr Claude, Faycal (Kode) basezerewe we asigaramo ku bw'amahirwe.

Nyuma yo kurokoka iri jonjora, Tom Close wari umaze kumenya ko gutwara iki gihembo byasabaga amajwi, na we yamenye ubwenge ahindura umuvuno.

Ati 'Nanjye nahise nkora ku ikipe yanjye, nkajya muri gare zitandukanye mu isoko abantu bakazana telefone tukabafasha gutora. Icyo gihe umuvuno wari amajwi menshi bituma ndangiza irushanwa nkubye hafi kabiri uwari unkurikiye.'

Icyakora nubwo ahamya ko amajwi yamufashije, Tom Close ahamya ko icyamufashije kwitwara neza harimo no kuba yari afite izina rikomeye.

Kuba Tom Close yari azi ko atwaye igikombe kubera izina rye n'akazi yakoze, ahamya ko aribyo byatumye adacika intege cyane ko abifata nk'uko umukinnyi ava muri stade agakubita umukinnyi, ati 'Ni ibintu bisanzwe.'

Source : https://umuryango.rw/imyidagaduro/article/tom-close-yavuze-abahanzi-bazamusimbura-ku-gikombe-cya-pggss-muri-2011

Inzu za Dubai i Kinyinya zari mu mihigo y'icyari Akarere ka Gasabo ku ngoma ya Hon Kaboneka na Rwamurangwa !

Raporo ya RHA yasabaga ko zihagarikwa kubakwa, ariko zarakomeje nyuma zigurishwa abo ziri kugwaho ubu!

Ese iki kibazo ubu cyabazwa nde? Hagati Aho muri Kigali harabarurwa izindi zirenga ibihumbi 35 zuzuye mu kajagali nta byangombwa.
Ese zizasenywa?!

Source : https://umuryango.rw/amakuru/mu-rwanda/ubukungu/article/iby-inzu-za-dubayi-byabazwa-hon-kaboneka-na-rwamurangwa-rha-yahagaritse-ko