Kuri uyu wa Gatanu tariki 21 Mata 2023, mu Rwanda ndetse no ku Isi yose, abayoboke b'idini rya Islam bazoje igisibo cya Ramadhan maze basangira amafunguro n'inshuti, abaranye ndetse n'abavandimwe.
Umugore wa Tom Close witwa Ingabire Tricia, yatangaje ko kuri uyu munsi yari yahinduye izina, yafashe iry'abayisilamu iryitwa 'Shamima'.
Abinyujije kuri rukuta rwe rwa Instagram, Tricia yasangije abamukurikira kuri uru rubuga amafoto amugaragaza yambaye ikanzu nziza cyane maze akurikizaho amagambo agira ati 'Uyu munsi amazina yari Shamima, bisobanuye impumuro nziza.'
Abarokotse Jenoside yakorewe abatutsi bo mu cyahoze ari Komini Rutobwe mu cyahoze ari Perefegitura Gitarama, ubu ni mu Murenge wa Kayumbu, Akarere ka Kamonyi, ubwo kuri uyu wa 21 Mata 2023 bibukaga ku nshuro ya 29 Jenoside yakorewe Abatutsi, bongeye gusaba Ubuyobozi ko abicanyi bakoze Jenoside bakidegembya hirya no hino, aho bamwe banahinduye imyirondoro yabo bashakishwa bakaryozwa urupfu rw'abatutsi bishe.
Perezida w'umuryango uharanira inyungu z'Abarokotse Jenoside(IBUKA) mu karere ka Kamonyi, Zakariya Mwenedata avuga ko iki ari ikibazo gikomeye gikwiye kwiganwa ubushishozi kuko hari abo inkiko zahaye ibihano bagacika ubutabera kugeza ubu bakaba bakidegembya hirya no hino.
Musomayire Daphrose, avuga ko bamwe muri aba bakoze Jenoside bagerageza kugoreka amateka barangiza bakanabatsindagiramo ubuhezanguni bwabo butuma hari abakigaragara bavuga amagambo mabi ku barokotse ndetse ukanabona ko bagifite ingengabitekerezo ya Jenoside inashingiye ku moko.
Dr Nahayo Sylvere/Meya Kamonyi.
Meya w'Akarere ka Kamonyi, Dr Nahayo Sylvere avuga ko nubwo bahindura amazina, bakihisha igihe kizagera ubutabera bukabafata bukabaryoza ibyaha bakoze ubwo bicaga abatutsi. Akomeza avuga ko abo bakwiye kuba intwari, bakishyikiriza ubutabera bakarangiza ibihano bahawe kuko kwihisha atari umuti uzaramba kuri bo.
Dr Nahayo Sylvere, akomeza asaba ababyeyi bagifite ingengabitekerezo ya Jenoside ko bakwiye kutaroga abana babo, ahubwo ko bakwiye kubabwiza ukuri kuko urubyiruko runyotewe, baba ababiciyemo cg abakoze Jenoside. Yibutsa ko umwana atagakwiye kubyumvana abandi kandi ababyeyi bazi neza ukuri. Asaba kandi abarokotse ko bakwiye gukomeza guharanira kwiyubaka kuko n'ibindi bibazo bafite bizagenda bikemuka uko ubushobozi buzagenda buboneka.
Imibiri 57 niyo bagiye gushyingurwa i Bunyonga muri Karama.
Kuri uyu munsi muri uyu Murenge wa Kayumbu, ubwo bibukaga ku nshuro ya 29 Jenoside yakorewe Abatutsi, himuwe imibiri 57 aho yashyinguwe mu rwibutso rw'umurenge wa Karama(i Bunyonga), kikaba igikorwa cyabanjirijwe no gushyira indabo ku kimenyetso cy'Amateka ya Jenoside yakorewe abatutsi, ahari ibyobo byakuwemo imibiri 180 ahazwi nko mu Cyakabiri. Gusa na none, hari indi mibiri 480 iri mu mva rusange ya Kayumbu ikaba izimurwa mu mwaka utaha wa 2024.
Abakoresha imbuga nkoranyambaga bari kubona amashusho n'amafoto atandukanye n'abantu bari kurya amafunguro agiye atandukanye gusa yiganjemo ipirawu.
Ni ukubera umunsi wo gusoza igifungo ku bayisilamu, gusa hari amashusho yaciye ibintu ku mbuga nkoranyambaga agaragaza abantu bari kurya ipirawu byanyabyo.
Umuyobozi Ushinzwe ibikorwa mu byo kurengera umutungo bwite mu bw'ubwenge, Ruhimba Mbaraga Blaise wo mu Ikigo cy'Igihugu Gishinzwe Iterambere (RDB), yatangaje ko nta gihe kinini gishize bakiriye umuntu wababwiraga ko ariwe nyiri ikirango 'Eleêeh' gikoreshwa na Producer Element, asaba ko bakimwandikaho akakigiraho uburenganzira.
Uyu muyobozi yavuze ko bakiriye uwo muntu gusa ntiyigeze amutangaza amazina ye bwite.
Yavuze ko yaje asaba kwiyandikishaho icyo kirango gusa bamusabye kuzana icyemeza ko ari icye.
Ibi bije nyuma y'iminsi mike ishize ishize, Noopja atangaje ko Element wahoze ari umukozi we ko natamwegera ngo baganire azamwaka izina yamuhaye.
Kuri uyu wa Gatanu tariki 21 nibwo mu Rwanda ndetse n'Isi yose hizihijwe umunsi wo gusoza igifungo ku bayisilamu bose aho basangiye amafunguro n'inshuti n'abavandimwe.
Miss Uwase Muyango we yari yasuye Mc Buryohe bakorana ku Isibo TV maze basangira ipirawu, kugeza ubwo Muyango bamuhaye n'imbampa ataha arira mu modoka.
Leta y'Uburusiya yemereye Repubulika Iharanira Demokarasi ya Congo ubufasha bw,intwaro zo kurwanya imitwe y'iterabwoba by'umwihariko uwa M23.
Ni ibyatangajwe kuwa 20 Mata 2023 na Ambasaderi w'Uburusiya muri Congo,Alexey Sentebov,ubwo yagiranaga ikiganiro ba Minisitiri w'Intebe wungirije, ushinzwe n'umutekano,Jean Pierre Bemba.
Yagize ati 'U Burusiya bwiteguye gutanga inkunga ishoboka yose kuri RDC mu rugamba rwo kurwanya imitwe yitwaje intwaro. Twifuza kubona ibikorwa by'inyeshyamba bihagarara mu BUrasirazuba bwa Congo kugira ngo amahoro yongere kugaruka hariya.'
Uyu Ambasaderi yavuze ko igihugu cye kigiye kugirana amasezerano y'ubufatanye mu bya gisirikare na RDC kugira ngo amahoro yongere agaruke mu Burasirazuba bw'igihugu.
Kugeza ubu muri Congo hari agahenge k'imirwano hagati ya FARDC na M23.
Icyakora nyuma yaho Perezida Felix Antoine Tshisekedi atangaje ko nta gahunda ihari yo kuganira na M23, uyu mutwe nawo waciye amarenga ko isaha iyo ariyo yose imirwano yakubura.
M23 Yakomeje gushinja Leta ya Congo n'igisirikare kutubahiriza ibyemezo by'inama y'abakuru b'ibibihugu byafatiwe iNairobi, bisaba impande zihanganye guhagarika imirwano .
Ni mu gihe Leta ya Congo yo yakomeje gushinja uyu mutwe guhungabanya umutekano w'iki gihugu, ufashijwe n'u Rwanda, ibintu impande zombi zakomeje kwamaganira kure.
Alexey Sentebov yibukije ko hashize umwaka u Burusiya butera inkunga RDC mu by'imbunda n'amasasu FARDC ikoresha muri iki gihe cyane cyane mu ntambara irwana n'imitwe yitwaje intwaro.
Hifashishijwe amatara, mu masaha y'ijoro ryo kuri uyu wa Gatanu,mu Murenge wa Kinazi mu karere ka Huye hakomeje igikorwa cyo gushakisha abantu 6 baguye mu kirombe cy'ubucukuzi bw'amabuye y'agaciro bumaze imyaka 4 bukorwa bitubahirije amategeko.
Ikigo gishinzwe mine, peteroli na gaz mu Rwanda kivuga kitaramenya umuntu wakoreraga ubucukuzi mu kirombe cyaguyemo abantu 6 mu Karere ka Huye.
Uyu ni umunsi wa gatatu ushize aba bantu baguye muri iki kirombe giherereye mu Murenge wa Kinazi mu Karere ka Huye. Inzego zinyuranye ziri gukora ibishoboka byose ngo aba bantu bashakishwe ariko kugeza ubu ntibaraboneka.
Ikigo gishinzwe ubucukuzi bw'amabuye y'agaciro, cyabwiye RBA dukesha iyi nkuru ko nyiri iki kirombe ataramenyekana. Gusa kivuga ko uwari gapita wahembaga abacukuzi yamaze gutoroka.
Ku wa Gatatu w'iki cyumweru ni bwo iri sanganya ryamenyekanye. Bukeye bwaho ni bwo imirimo yo gushakisha abo bantu 6 barimo n'abanyeshuri 3 bigaga mu mashuri yisumbuye, yatangiye.
Kugeza ubu imashini zisanzwe 2 zikora imihanda ni zo ziri kwifashishwa, aho zikora ijoro n'amanywa. Ni igikorwa bigaragara ko kigoye, kuko abaturage muri aka gace bavuga ko uburebure bw'umwobo abo bantu baguyemo ufite metero 100 z'ubujyakuzimu, ikintu gishobora gukomerera abari gushakisha abo bantu.
Kugeza ubu nta rwego na rumwe rurerura ngo rutangaza nyiri iki kirombe ndetse n'ubwoko bw'amabuye y'agaciro yahacukurwaga. Abaturage bo bavuga ko ubu bucukuzi butemewe n'amategeko bumaze imyaka 4, ndetse n'inzego z'ibanze muri aka gace zisanzwe zibuzi.
Ku mugoroba wo kuri uyu wa Gatanu imashini ebyiri ziracyagerageza gushaka inzira yazigeza ku mwobo winjiriwemo n'abo baturage ubwo baheragamo kuwa Gatatu nimugoroba.
Abaturage na bo ni benshi mu mirima ikikije iki kirombe ndetse ngo hari icyizere ko bakurikije aho imirimo igeze aba bantu bagwiriwe n'ikirombe bashobora kuza kuboneka.
