Author: webrwanda

Ni ingingo Minisitiri Qin Gang yagarutseho ubwo yatangizaga inama izwi nka 'Lanting Forum' yiga kuri politike y'u Bushinwa n'iyo ku rwego rw'Isi muri rusange.

Ni inama yitabiriwe n'abanyacyubahiro batandukanye barimo Dilma Vana Rousseff wabaye Perezida wa Brésil, Minisitiri w'Ububanyi n'Amahanga wa Gambia, Dr. Mamadou Tangara n'abandi ba dipolomate bahagarariye ibihugu byabo mu Bushinwa.

Abateraniye muri iyi nama yabereye i Shanghai bareberaga hamwe ibijyanye 'n'iterambere ry'u Bushinwa n'iry'Isi muri rusange'.

Minisitiri w'Ububanyi n'Amahanga w'u Bushinwa, Qin Gang yagaragaje ko 'iterambere igihugu cye kimaze kugeraho ritavuye mu kirere, ahubwo ryavuye mu rugendo rw'intambwe ku yindi ariko rufite intego no gukora cyane kw'abaturage b'iki gihugu barangajwe imbere n'ubuyobozi bwa Perezida Xi Jinping n'ubw'ishyaka ry'aba-communiste muri iki gihugu.'

Yavuze ko iterambere ry'u Bushinwa 'ryaturutse mu bisubizo iki gihugu cyagiye cyishakamo biturutse mu mateka yacyo n'inyota y'iterambere abaturage b'iki gihugu bari bamaranye igihe.'

Minisitiri Qin Gang yashimangiye ko iterambere u Bushinwa bumaze kugeraho bwiteguye kurisangiza Isi no gufatanya n'ibihugu bikiri mu nzira y'amajyambere, ariko yihanangiriza amahanga akomeje kwivanga mu kibazo cya Taiwan.

Yavuze ko u Bushinwa bufite inshingano zo kurinda ubusugire n'ubuso bwabwo burimo na Taiwan ndetse ashimangira ko igihugu cye kitazigera cyihanganira ushaka kurogoya uyu mugambi.

Taiwan ni ikirwa giherereye mu bilometero 160 uvuye ku nkombe z'u Bushinwa ahagana mu majyepfo ashyira uburasirazuba.

Mbere ya 1949 ibi bice byombi byari igihugu kimwe, Taiwan ifatwa nk'intara y'u Bushinwa.

Mbere yo gucikamo ibice, mu Bushinwa hadutse intambara ya gisivile yahanganishije aba-Communist bari bayobowe na Mao Zedong n'abandi batemeraga amahame y'iri shyaka.

Uku kutumvikana kwateje intambara birangira aba-communist bigaruriye Beijing mu 1949.

Abari mu Ishyaka ry'Aba-nationalist bayobowe na Chiang Kai-shek bahise bahungira muri Taiwan ndetse bamara imyaka myinshi bayoboye iki kirwa.

Kugeza ubu u Bushinwa bubona Taiwan nk'intara yabwo buzongera kwigarurira neza igihe kimwe, mu gihe abo muri Taiwan bo bavuga ko ari igihugu cyigenga ndetse kigendera ku mahame ya demokarasi.

Leta Zunze Ubumwe za Amerika ni kimwe mu bihugu bidashyigikiye ko u Bushinwa bwigarurira Taiwan kuko byagira ingaruka kuri politiki mpuzamahanga y'iki gihugu.

Abasesenguzi mu by'umutekano bavuga ko kuba u Bushinwa bwakwigarurira Taiwan byateza ibibazo Amerika kuko buhafite ibikorwa bya gisirikare bituma ibasha gucunga umutekano muri Guam na Hawaii.

Source : https://umuryango.rw/amakuru/mu-mahanga/umutekano/article/u-bushinwa-bwabiye-abashaka-kububuza-taiwan-ko-bari-gukina-n-umuriro

Umunyamakuru Canary Mugume wa NBS TV yatangaje ko Gen. Kainerugaba araza mu Rwanda kuri uyu wa 22 Mata 2023 muri gahunda y'ibirori by'isabukuru ye yateguriwe na Perezida Paul Kagame.

Muri uru ruzinduko, Gen. Kainerugaba ngo araherekezwa n'abaminisitiri, bamwe mu bagize inteko ishinga amategeko ya Uganda ndetse n'abashoramari.

Gen. Kainerugaba yizihirije isabukuru y'umwaka ushize mu biro bya Perezida Museveni. Icyo gihe Perezida Kagame yari ahari nk'umushyitsi mukuru.

Uyu musirikare ugiye kuzuza imyaka 49 y'amavuko araza mu Rwanda nyuma yo guhuriza hamwe Abanyarwanda n'abanya-Uganda i Kabale tariki ya 19 Mata 2023, mu gitaramo cyo kwishimira ifungurwa ry'imipaka y'ibihugu byombi ryabaye mu 2022.

Source : https://umuryango.rw/amakuru/mu-rwanda/politiki/article/gen-kainerugaba-ategerejwe-i-kigali-muri-iyi-week-end-mu-birori-by-isabukuru-ye

Minisiteri y'Ubucuruzi n'Inganda yatangaje ko abacuruzi 20 baciwe amande kubera kutubahiriza ibiciro ntarengwa byashyizweho kuri bimwe mu biribwa bimo umuceri, ibirayi n'ifu y'ibigori.

Mu butumwa bwanyujije ku rukuta rwayo rwa Twitter, MINICOM yavuze ko ku mugoroba wo kuri uyu wa Gatanu tariki ya 21 Mata 2023 itsinda riturutse muri Minisiteri y'Ubucuruzi n'Inganda, Minisiteri y'Ubuhinzi n'Ubworozi, ikigo gishinzwe uburenganzira bw'umuguzi n'ihiganwa mu bacuruzi ndetse na Polisi y'Igihugu bakoze ubugenzuzi ku bijyanye n'uko ibi biciro bishya biri kubahirizwa ku masoko.

Yavuze ko hari abacuruzi 20 baciwe amande kubera kutubahiriza ibiciro bishya byashyizweho.

Yagize iti'Abacuruzi 20 baciwe amande kubera kutubahiriza ibiciro ntarengwa byashyizweho ku muceri, ibirayi n'ifu y'ibigori (Kawunga) cyangwa kudashyira ahagaragara ibiciro by'ibicuruzwa nk'uko bigenwa n'itegeko.'

Mu gusoza MINICOM yagize iti “Ubugenzuzi buzakomeza hirya no hino mu gihugu.Minisiteri y'Ubucuruzi n'Inganda irashimira abacuruzi batangiye gushyira mu bikorwa ibiciro byagenwe, ikanasaba abakinangiye kubikurikiza mbere y'uko bafatwa ngo babihanirwe.

Kuri wa Gatatu tariki ya 19 Mata 2023,nibwo Guverinoma y'u Rwanda yakuyeho umusoro ku nyongeragaciro ku ifu y'ibigori n'umuceli, ishyiraho ibiciro ntarengwa byabyo hamwe n'iby'ibirayi, nyuma y'uko byari bikomeje gutumbagira ku masoko hirya no hino mu gihugu.

Mu biciro bishya byashyizweho, ikilo cya kawunga ntikigomba kurenga 800 Frw, ikilo cy'umuceli wa kigori ni 820 Frw, umuceri w'intete ndende 850 Frw naho bisimati ni 1455 Frw mu gihe ikilo cy'ibirayi bya kinigi kitagomba kurenza 460 Frw.

Ibi biciro byaribivuye ku 1200 Frw ku kilo cya Kawunga, umuceri mugufi wari 1500Frw naho umuceri muremure wari ugeze ku 2000 Frw ku kilo.

Nyuma y'uko ibi biciro bishyizweho, abacuruzi hirya no hino ntabwo bahise bahindura ibyari bisanzwe kuko bamwe bavugaga ko baranguye bahenzwe bityo ko bari bakwiye guhabwa iminsi mike yo kubicuruza.

Amakuru avuga ko amande aba bacuruzi baciwe ari hagati y'ibihumbi 20 Frw na 100 Frw bitewe ahanini n'ikosa ryakozwe ndetse n'icyiciro cy'umucuruzi abarizwamo.

Abacuruzi benshi bagaragaje ko hari abari baramaze kurangura ibicuruzwa ku giciro kiri hejuru y'icyo bari gusabwa gucururizaho uyu munsi, ikaba intandaro yo kuba batarashyira mu bikorwa icyemezo cya Minicom.

Kuri iyi ngingo ariko Ikigo cy'Igihugu cy'Imisoro n'Amahoro RRA, kigaragaza ko abacuruzi bakwiye gushyira ku biciro bisanzwe hanyuma bakazasubizwa umusoro ku nyungu bishyuye aho gukomeza kwinangira.

Source : https://umuryango.rw/amakuru/mu-rwanda/ubukungu/article/minicom-yaciye-amande-abacuruzi-20-binangiye-bakanga-kubahiriza-ibiciro-bushya

Polisi yo muri Nigeria yataye muri yombi umunyamategeko w'imyaka 36, ​​Abasiesebanga Ikoiwak, n'abandi batanu bakekwaho kwica umugabo we w'imyaka 41, Barrister Godwin Ikoiwak.

Amakuru avuga ko nyakwigendera Ikoiwak, wavukiye mu gace ka Eket gaherereye muri Leta ya Akwa Ibom muri Nigeria,yapfuye nyuma y'iminsi mike abwiye inshuti ye ndetse bahoze bigana, Barrister Sunny Anyanwu mu kiganiro kuri telefoni ko afitanye ibibazo n'umugore we kubera kumuca inyuma.

Avuga uko nyakwigendera yapfuye mu rukiko rwisumbuye rwa Uyo, Anyanwu yavuze ko nyakwigendera yamenye amakuru y'uko uyu mugore we yamuciye inyuma abimenyesha umuryango w'umugore we wari wamutumiye mu nama yabereye i Nung Udoe Itak, mu gace ka Ikono, ariko ko atagarutse mu rugo ari muzima.

Anyanwu wari umutangabuhamya wa 7 w'ubushinjacyaha muri iki kirego, yavuze kandi ko nyakwigendera yamubwiye ko umugore we yajyaga aryamana n'uwahoze ari umuyobozi we,mu mwuga w'amategeko, Barrister, C.I. Odoh.

Yavuze ko nyakwigendera yamubwiye ko umugore we yaryamanye n'umupadiri, witwa Maurice Mbeke amutera inda ubwo yamukoreraga iwe kandi bafitanye umwana ubu ufite imyaka 19 yitiriye sekuru.

Nk'uko umutangabuhamya w'ubushinjacyaha abitangaza, nyakwigendera Barrister ntabwo yari azi ko umuhungu bamaze imyaka myinshi babana mu nzu ye, yari umuhungu w'umugore we, kubera ko umugore yari yaramubwiye ko ari murumuna we.

Yavuze ko nyakwigendera yamubwiye ko igihe cyose umugore we yavugaga ko atwite, atamubonaga, kugeza nyuma yo kubyara amwereka umwana akavuga ko ari uwe.

Uyu yavuze ko uyu mugabo yishwe kubera ko yari amaze kuvumbura ko uyu mugore we amuca inyuma akanabyarana n'abandi bagabo.

Itsinda ry'ubushinjacyaha riyobowe n'umuyobozi w'ubushinjacyaha, muri Leta ya Akwa Ibom, Barr. Joseph Umoren yacuranze amajwi mu ruhame yafashwe uyu mugore.

Kugeza ku rupfu rwe, Barrister Ikoiwak yari umunyamabanga muri Minisiteri y'Ubutabera ya Akwa Ibom.

Source : https://umuryango.rw/ubuzima-115/udushya/article/umugore-yishe-umugabo-we-nyuma-yo-kuvumbura-ko-yabyaye-hanze

Umupasiteri w'umubeshyi wo muri Ghana, Kelvin Abeka, yatawe muri yombi azira kwiyitirira intumwa y'Umuhanuzi uzwi cyane muri icyo gihugu Emmanuel Aboagye uzwi nka Ogyaba.

Abeka yamenyekanye nyuma yo guhamagara umugore utwite akamuhatira kumwoza mu myanya ndangagitsina ye n'amazi arimo umunyu.

Uyu mupasiteri w'ikinyoma washinze urusengero rwitwa Divine Fire Ministry ahitwa Kofordua yatakarijwe icyizere nyuma y'icyo gikorwa kigayitse.

Ibi byamenyekanye nyuma y'uko umuhanuzi Ogyaba, washinze kandi akaba n'umuyobozi w'itorero rya Holiness of Christ Zion Ministry,ahase ibibazo uyu Abeka mu biro bye.

Muri videwo yashyizwe hanze na Oman Channel, Abeka yemeye ko yigize pasiteri muto w'umuhanuzi Ogyaba kugira ngo yigarurire imitima y'abantu batamuzi.

Umuhanuzi Ogyaba yagize ati “Yagiye kureba uyu mugore iwe amutera ubwoba ko najya kubyara azapfa ndetse ko ashaka kumuha imbaraga z'umwuka zamufasha ntibizabeho.

Yaramufashe umujyana mu bwogero bwe hanyuma amwoza mu myanya y'ibanga akoresheje amazi arimo umunyu.”

Uyu mugore wari utwite cyane wagizweho ingaruka n'ibikorwa bya Abeka nawe yari muri ibyo biro ubwo uyu yahatwaga ibibazo.

Abeka yagerageje gushyigikira ibikorwa bye, avuga ko yakoraga ku itegeko ry'Imana.

Ntabwo hagaragajwe igihe ibi byabereye.

Source : https://umuryango.rw/ubuzima-115/udushya/article/umupasiteri-yafunzwe-azira-koza-imyanya-y-ibanga-y-umugore-akoresheje-amazi

Umusore w'imyaka 26 uzwi ku izina rya Naison Kamwendo yafatiwe ahitwa Ntcheu muri Malawi azira guca ikiganza cy'umugore nyuma yuko uwo mugore yanze icyifuzo cye cyo kumushyingira umukobwa we w'imyaka 19.

Umuvugizi wa Polisi ya Ntcheu, Rabecca Ndiwate, avuga ko Kamwendo yakoze iki cyaha ku wa kane w'iki cyumweru.

Ndiwate avuga ko uyu mukobwa wabaye nyirabayazana, ari umunyeshuri mu mashuri yisumbuye ariko Kamwendo yashakaga kumurongora

Nyina w'uyu mukobwa Charity Chailosi yanze icyo cyifuzo avuga ko umwana we agomba kwibanda ku ishuri gusa.

Ku wa kane, uyu mukobwa yagiye ku ishuri ahitwa Masasa gusa uyu Kamwendo ngo ntiyishimiye ko ajyayo badashyingiranwe.

Ndiwate avuga ko Kamwendo yagiye kwa Chailosi afite umupanga,amutema ukuboko kw'ibumoso.

Ati: 'Abagiraneza barokoye Chailosi bahamagara Polisi imujyana ku kigo nderabuzima cya Masasa. Nyuma yaje koherezwa mu bitaro by'akarere ka Dedza aho ari kwivuriza '.

Abapolisi bo mu ishami rya polisi rya Lizulu bataye muri yombi Kamwendo kubera icyo cyaha yakoze.

Source : https://umuryango.rw/ubuzima-115/udushya/article/umusore-yaciye-ikiganza-umugore-amuhora-ko-yanze-kumushyingira-umukobwa-we

Umugabo ufite imyaka 34 y'amavuko ukomoka ahitwa Binga mu ntara ya Matabeleland y'Amajyaruguru,muri Zimbabwe, bivugwa ko yishe nyina w'imyaka 67 nyuma yo kumushinja ko yaroze ubugabo bwe ntibukore neza

Amakuru ko mubwo nyina yari yicaye mu gikoni hamwe n'abandi bagize umuryango, Juma yinjiye iwabo mu rugo afite ishoka.

Uyu ngo yahise atangira gushinja nyina ko ari umurozi ndetse ngo yaroze igitsina cye kikaba kibura mu minota mike hanyuma kikongera kugaruka.

Yahise amutema n'ishoka inshuro nyinshi bimuviramo urupfu.

Nyuma yo gukora icyo cyaha,uyu Juma ngo yagerageje guhunga ariko abagize umuryango n'abaturanyi babo baramukurikirana babasha kumufata.

Bamuhambiriye umugozi bamujyana kuri sitasiyo ya Polisi ya Kamativi aho yashinjwe icyaha cy'ubwicanyi.

Sumayili Jumaukomoka mu Mudugudu wa Kalima ntabwo yasabwe kwiregura ubwo yitabaga umucamanza wa Binga Urgent Vundla.

Yongeye gufungwa by'agateganyo kugeza ku ya 21 Mata maze agirwa inama yo gusaba gufungurwa atanze ingwate mu Rukiko Rukuru.

Uyu Juma avuga ko yagiye kwivuza k'umuhanuzi amuhishurira ko nyina Josephine Njinjwe ariwe wamuroze gutuma igitsina kikajya kibura.

Source : https://umuryango.rw/ubuzima-115/udushya/article/umugabo-yishe-nyina-amushinja-kumuroga-igitsina-cye-ntigikore

Kuri uyu wa Gatandatu,tariki ya 22 Mata 2023, ibikorwa byo gushakisha abantu batandatu bagwiriwe n'ikirombe gicukurwamo amabuye y'agaciro mu Murenge wa Kinazi mu Karere ka Huye byakomeje.

RBA ivuga ko kugeza ubu imashini ebyiri zikora imihanda zitabajwe zimaze gucukura metero zisaga 20, gusa kugeza ubu nta muntu n'umwe mu bagwiriwe n'icyo kirombe uraboneka.

Izi mashini zikora ijoro n'amanywa zishaka aba bantu barimo n'abanyeshuri.

Ni igikorwa bigaragara ko kigoye, kuko abaturage muri aka gace bavuga ko uburebure bw'umwobo abo bantu baguyemo ufite metero 100 z'ubujyakuzimu, ikintu gishobora gukomerera abari gushakisha abo bantu.

Kugeza ubu nta rwego na rumwe rurerura ngo rutangaze nyiri iki kirombe ndetse n'ubwoko bw'amabuye y'agaciro yahacukurwaga. Abaturage bo bavuga ko ubu bucukuzi butemewe n'amategeko bumaze imyaka 4, ndetse n'inzego z'ibanze muri aka gace zisanzwe zibuzi.

Izi mashini ebyiri ziracyagerageza gushaka inzira yazigeza ku mwobo winjiriwemo n'abo baturage ubwo baheragamo kuwa Gatatu nimugoroba.

Abaturage bo mu murenge wa Kinazi ahegereye iki kirombe cyagwiriye aba bantu batandatu, bavuga ko batumva ukuntu ubuyobozi buvuga ko iby'icyo kirombe bitari bizwi nyamara n'umuturage ushatse kubaka nta cyangombwa amakuru ye bahita bayamenya.

Ikigo gishinzwe mine, peteroli na gaz mu Rwanda kivuga ko kitaramenya umuntu wakoreraga ubucukuzi muri iki kirombe.

Source : https://umuryango.rw/amakuru/mu-rwanda/umutekano/article/huye-imashini-zabuze-ba-bantu-bagwiriwe-n-ikirombe-nyuma-yo-gucukura-metero-20

Aba barangirije amasomo yabo muri iyi kaminuza, ni abigaba mu cyiciro cya mbere cya kaminuza, icyiciro cya kabiri cya kaminuza na Postgraduate Diploma, bose bakaba bigaba mu mashami atandukanye agera kuri 13.

Bahawe impamyabumenyi zabo mu muhango wabaye kuri uyu wa 21 Mata 2023, ubera kuri Stade ya Muhanga.

Witabiriwe na Dr. Theoneste Ndikubwimana wahagarariye Inama Nkuru y'amashuri makuru na Kaminuza (HEC) ndetse Minisiteri y'Uburezi (MINEDUC), Umushumba wa Diyosezi ya Kabgayi, Smaragde Mbonyintege, Umuyobozi Mukuru wa ICK, Padiri Dr. Ntivuguruzwa Barthazar n'abahagarariye za kaminuza zifatanyije na ICK muri uyu muhango.

Uyu muhango kandi witabitiwe n'Umuyobozi w'Akarere ka Muhanga Wungirije Ushinzwe Imibereho Myiza y'Abaturage, Mugabo Gilbert, abarimu n'abandi bakozi ba ICK, abahagarariye abafatanyabikorwa b'iyi kaminuza, abahawe impamyabumenyi ndetse n'abaje kwifatanya na bo mu byinshimo byabo.

Abasoje amasomo yabo mu byiciro bitandukanye batangarije IGIHE umunezero bafite kuri uyu munsi, ndetse bashimira buri wese wagize uruhare mu rugendo rwabo rw'amasomo.

Imurere Honorine ati ''Uyu munsi rero ni ibyishimo cyane kuri twebwe, kuko hari benshi baba batarabashije kubigeraho, hari n'abo tuba twaratangiranye tutarangizanyije''.

Umunyeshuri wavuze ijambo mu izina ry'abasoje amasomo bose, Habimana Félicien urangije Postgraduate Diploma, yashimiye ubuyobozi bwiza bw'igihugu bukomeje kubakira ubukungu ku burezi bufite ireme.

Ati ''Mumfashe dushimire ubuyobozi bukuru bw'iki guhugu burangajwe imbere n'intore izirusha intambwe Nyakubahwa Perezida wa Repubulika Paul Kagame, budahwema guteza imbere uburezi mu nzego zose''.

Umuyobozi Mukuru wa ICK, Padiri Dr. Ntivuguruzwa Barthazar, yasabye abarangije amasomo muri iyi kaminuza kutagira ubwoba bw'akazi bakora nyuma yo kurangiza amasomo, kuko uko iterambere ryihuta ari na ko haboneka ibyo gukora bishya.

Ati '' Burya imirimo nayo ihora ihangwa. Uko ubuzima bugenda butera imbere, hari akazi gashya kavuka, hari imirimo mishya ivuka, icyo nabwira abarangije yaba abarangije hano muri ICK no mu zindi kaminuza, ni ukumva y'uko guhanga imirimo bitajya birangira''.

Dr. Ntivuguruzwa yibukije abarangije amasomo yabo ko imikorere y'akazi bazakora kose nyuma yo gusoza ayo masomo, bazabifashwamo no kugira ubufatanye yaba hagati yabo ndetse n'abandi.

Dr. Theoneste Ndikubwimana wahagarariye Inama Nkuru y'amashuri makuru na Kaminuza (HEC) ndetse Minisiteri y'Uburezi (MINEDUC), yashimiye uruhare rwa ICK mu gutanga uburezi bufite ireme, yizeza iyi kaminuza ko inzego yahagarariye zizakomeza kuyiba hafi.

Ati ''Nka HEC ndetse na Minisiteri y'Uburezi, turabizeza gukomeza gufatanya namwe mu gushimangira ireme ry'uburezi, ndetse no kubafasha kugera ku ntego zimwe na zimwe mufite nk'izo kongera amashami''.

Dr. Ndikubwimana yanagaragaje ko iyi kaminuza yagiye igira uruhare mu kubaka ubuzima bw'igihugu binyuze mu burezi abayigamo bayivomamo, ndetse n'indagagaciro bahakura binyuze mu nyigisho za Kiliziya Gatolika.

Yanashimiye kandi uburyo iyi kaminuza irizikana guha uburezi bufite ireme abari mu byiciro byose barimo n'abafite amikoro make, bafashwa kwiga binyuze mu kubaha buruse.

Umushumba wa Diyosezi ya Kabgayi, Smaragde Mbonyintege, yashimiye abasoje amasomo muri iyi kaminuza mu mwaka wa 2021/2022 ku muhate bagaragaje mu myigire yabo, abifuriza ishya n'ihirwe mu bundi buzima bazabamo nyuma yo kurangiza amasomo yabo.

Yanakomoje ku kuba ICK ari umushinga wa Diyosezi ya Kabgayi ashimira abayitangije n'umurongo bayihaye, ari na wo abakomeje kuyiyobora bakomeje bakabihuza n'uko ibihe bisimburana.

Ishuri Rikuru Gatolika rya Kabgayi(ICK) rimaze imyaka isaga 20 ritanga uburezi bufite ireme ku banyarwanda ndetse n'abanyamahanga babyifuza.

Ryatangiye rifite amashami abiri rikomeza kwaguka ubu ageze kuri 13 ari nayo abanyeshuri basoje amasomo uyu munsi bigagamo mu byiciro bitandukanye, rikaba rinateganya gukomeza kwaguka ryongera amashami arimo n'ay'ubuvuzi.

Byari ibihe byo kwishimira intsinzi ku barangije amasomo mu byiciro bitandukanye muri ICK

Byari ibihe by’umunezero ku barangije amasomo mu byiciro bitandukanye muri ICK

Abahawe impamyabumenyi basabwe n’abayobozi batandukanye, kwifashisha ubumenyi bavomye bakubaka igihugu

Umushumba wa Diyosezi ya Kabgayi, Smaragde Mbonyintege, yavuze ko ICK ari umushinga w’iyi diyosezi, ashimira uburezi n’uburere iyi kaminuza ikomeje gutanga

Umuyobozi Mukuru wa ICK, Padiri Dr. Ntivuguruzwa Barthazar avuga ko uko Isi itera imbere hahangwa imirimo mishya, bityo ko abarangije badakwiye guhangayikishwa n’ibyo gukora

Habimana Félicien urangije Postgraduate Diploma, yashimiye uko u Rwanda rukomeje guteza imbere uburezi bufite ireme

Abayobozi bitabiriye uyu muhango ni bo bagize uruhare mu gushyikiriza ibihembo abanyeshuri bahize abandi

Visi Meya wa Muhanga, Mugabo Gilbert, yahaye umukoro abarangije muri iyi kaminuza, abasaba gukoresha ubwo bumenyi biteza imbere banateza imbere igihugu

---

Source : http://igihe.com/amakuru/u-rwanda/article/ick-yahaye-impamyabumenyi-abasaga-320-bayisorejemo-amasomo

Kuri uyu wa Gatanu tariki ya 21 Mata 2023 nibwo abakozi, abayobozi ba REG na WASAC n'imiryango ikomoka ku bahoze bakorera ikigo cya Electrogaz bifatanyije mu gikorwa cyo kwibuka abishwe muri Jenoside yakorewe Abatutsi.

Imibare igaragaza ko abari abakozi ba Electrogaz bishwe muri Jenoside yakorewe Abatutsi barenga 130 ndetse muri iki gikorwa cyo kwibuka hanashyizwe indabo ku rwibutso ruriho amazina yabo mu kubaha icyubahiro no kubazirikana.

Umuyobozi Mukuru wa WASAC, Umuhumuza Gisèle, yagagaragaje ko kwibuka abari abakozi ba Electrogaz bigamije gushimangira uburyo Jenoside yakozwe igatwara n'abantu banyuranye kandi abenshi ugasanga baricwaga n'abo bakorana.

Umuhumuza yavuze ko ibi bigo bizakomeza kujya byunamira abari abakozi ba Electrogaz bikomokaho ndetse ko biteguye kuba hafi imiryango ikomoka ku bari abakozi bayo bishwe bazira uko bavutse.

Ati 'Tuzahora tubibuka nk'abakoraga muri Electrogaz, kandi tuzahora tubibukira hamwe. Tubibuka ko bari ab'ingirakamaro nubwo hari kenshi batashimirwaga ibyo bakora. Turabahumuriza tubabwira ko turi kumwe ko tubibuka kandi tutazigera duta igiti.'

Yasabye abakozi b'ibi bigo kwifashisha inzira zose bagahangana n'ipfobya rya Jenoside yakorewe Abatutsi by'umwihariko bifashishije ikoranabuhanga bagaragaza ukuri ku mateka.

Ati 'Muri uyu mwanya turabasezeranya ko ari ubuyobozi n'abakozi bacu ntabwo tuzatatira iki gihango, urugendo ni rurerure ariko ari ingufu, ubwenge n'ibikoresho tuzabishaka kugira ngo ibyabaye ntibizongere kubaho ukundi bihereye mu bigo byacu no mu mibanire yacu.'

Yaragaragaje ko umushinga wari uhari wo gukusanya amakuru no kubika amateka kuri aba bakozi ugiye gusubukurwa mu kwirinda ko bazibagirana.

Minisitiri w'Ibikorwaremezo, Dr Nsabimana Erneste, yagaragaje ko Leta y'u Rwanda izakomeza kuba hafi imiryango yasigaye mu guharanira ko imibereho yabo iba myiza kurushaho.

Ati 'Mu izina rya Minisiteri y'Ibikorwaremezo tuzakomeza kubaba hafi mu bijyanye n'imibereho yanyu ndetse n'izindi gahunda zishobora gutuma mwiteza imbere mukava muri ibyo bikomere nubwo kwibagirwa ibihe bikomeye umuntu yaciyemo bitoroshye. Leta izakomeza gukora ibishoboka byose ngo abarokotse Jenoside yakorewe Abatutsi babeho neza.'

Umwe mu bakoze muri Electrogaz, Me Ntivuguruzwa Emmanuel, yasangije abitabiriye uyu muhango ubuzima bushaririye banyuzemo mbere ya Jenoside nuko batotezwaga n'abo bakorana mu kigo kimwe.

Yagaragaje ko nubwo abagize umuryango we bishwe muri Jenoside ariko kuri ubu ashima cyane FPR Inkotanyi yayihagaritse ndetse asaba abanyarwanda muri rusange kurushaho gukunda igihugu.

Basabwe uruhare rwabo mu kurwanya ingengabitekerezo ya Jenoside

Umunyamategeko watanze ikiganiro cyagarutswe ku mateka, Ndabirora Kalinda Jean Damascene, yagaragaje ko kuri ubu abapfobya Jenoside yakorewe Abatutsi bakomeje kwiyongera asaba aba bakozi b'ibigo byombi gutanga uruhare rwabo mu kurwanya ihakana n'ipfobya ryayo.

Yavuze ko nubwo gupfobya ari kimwe mu byiciro by'abategura Jenoside bakanayishyira mu bikorwa ariko bikwiye ko abanyarwanda bagaragaza ukuri gushingiye ku mateka mpamo y'ibyabaye n'ibimenyetso bifatika.

Ku rundi ruhande Umunyamabanga Mukuru muri IBUKA, Niyitanga Irene yavuze ko Kwibuka bikwiye kuba umwanya mwiza wo kuzirikana, guha icyubahiro no kwibuka abishwe bazira uko bavutse.

Yagaragaje ko urugamba ruhari rukomeye ariko rusaba kugirwamo uruhare na buri wese ari urwo guhangana n'ibikorwa by'ipfobya n'ihakana rya Jenoside yakorewe Abatutsi.

Niyitanga yavuze ko kuba mu cyumweru cy'Icyunamo RIB yaratangaje ko habonetse ibirego 63 bigendanye n'ingengabitekerezo ya Jenoside muri icyo cyumweru gusa, ari ibintu bishimangira ko nyuma y'imyaka 29 Jenoside ihagaritswe abayipfobya bagihari no mu miryango.

Yashimye uruhare rw'ibigo byombi kugeza ubu, agaragaza ko REG yagize uruhare mu Kubaka ikigo cya Aheza Healing and Career Centre mu Bugesera kandi ifasha mu kwita ku batari bake.

Nyuma yo gushyira indabo ku rwibutso ry'abahoze ari abakozi ba Electrogaz, bakoze urugendo rwo kwibuka rwaturutse mu Mujyi rwagati rugana ku rwibutso rwa Jenoside rwa Kigali ndetse bagira n'umwanya wo kuganirizwa ku mateka yagejeje kuri Jenoside.

Abakozi ba REG na WASAC basabwe kugira uruhare mu kurwanya ingengabitekerezo ya Jenoside yakorewe Abatutsi

Hakozwe urugendo rwo kwibuka Jenoside yakorewe Abatutsi mu 1994

Bunamiye abashyinguye mu rwibutso rwa Jenoside yakorewe Abatutsi rwa Kigali

Hacanwe urumuri rw’icyizere

Abakozi ba WASAC na REG bahaye icyubahiro abasaga ibihumbi 250 bashyinguye mu rwibutso rwa Kigali

Me Ntivuguruzwa Emmanuel yasangije abandi ubuzima bushaririye yanyuzemo muri Jenoside

Minisitiri w’Ibikorwaremezo, Dr Nsabimana Ernest yagaragaje ko Leta izakomeza kuba hafi abakomoka ku bahoze ari abakozi bishwe muri jenoside

Umunyamabanga Mukuru wa IBUKA, Niyitanga Irene yagaragaje ko kwibuka ari inshingano ya buri wese

Umunyamategeko Ndabirora Kalinda yatanze ikigano cyibanze ku mateka ya Jenoside yakorewe Abatutsi

Me Ntivuguruzwa Emmanuel yunamira abazize Jenoside yakorewe Abatutsi

Umuyobozi w’Urwibutso rwa Kigali, Nagiriwubuntu Dieudonné yahaye ikaze abakozi ba WASAC na REG

Umuyobozi Mukuru wa WASAC Umuhumuza yunamiye abari abakozi ba Electrogaz bazize Jenoside yakorewe Abatutsi

Umuyobozi wa EDCL Felix Gakuba yagaragaje ko ibi bigo bikwiye guhora bizirikana abari abakozi babyo bishwe muri Jenoside

Umuyobozi Mukuru wa WASAC Umuhumuza yavuze ko ibi bigo bizakomeza gufatanya kwibuka abari abakozi babyo bifatanyije

Amafoto: Igirubuntu Darcy

---

Source : http://igihe.com/amakuru/u-rwanda/article/abakozi-ba-wasac-na-reg-bibutse-abari-abakozi-ba-electrogaz-bishwe-muri