Author: webrwanda

Mu 2018 ni bwo hatangiye umushinga wo kuvugurura iyi nyubako ikoreramo RRA, Urwego rw'Ubugenzuzi Bukuru bw'Imari ya Leta [OAG] ndetse na Komisiyo y'Igihugu y'Amatora [NEC].

Inyigo yari yakozwe icyo gihe yagaragaje ko umushinga wose wagombaga gutwara arenga miliyari 3 Frw [3.399.229,250 Frw], ukaba waragombaga kumara imyaka ine [2018-2024].

Mu mwaka w'ingengo y'imari wa 2022/23, hateganyijwe gukoreshwa miliyoni 508,9 Frw gusa, Minecofin igaragaza ko kugeza ku wa 30 Mata 2023, hari hamaze gukoreshwa miliyoni 220,5 Frw.

Mu gitondo cyo ku wa Gatatu, tariki 10 Gicurasi 2023, abayobozi ba Minecofin bitabye Komisiyo y'Ingengo y'Imari n'Umutungo by'Igihugu mu Nteko Ishinga Amategeko, Umutwe w'Abadepite.

Bagiranye ibiganiro byagarutse ku gipimo cy'ikoreshwa ry'ingengo y'imari yo muri uyu mwaka, ibikorwa byari biteganyijwe aho bigeze n'amafaranga ateganyijwe kuzakoreshwa mu 2023/24.

Mu byagarutsweho nk'ibyari biteganyijwe muri uyu mwaka w'ingengo y'imari harimo iyi nyubako kuri ubu itakirimo kubakwa kandi yakabaye izarangira mu 2024.

Umuyobozi Mukuru ushinzwe Ingengo y'Imari muri Minecofin, Rehema Namutebi, yavuze ko kugeza ubu umushinga wahagaritswe ari umaze kugera ku kigero cya 43%.

Ku rundi ruhande ariko, Namutebi yavuze ko mu Ukuboza 2022, Minisiteri y'Ibikorwaremezo yategetse ko ibikorwa bihagarikwa hakongera gukorwa inyigo isobanutse.

Ati 'Amasezerano yo gukomeza kuvugurura iyi nyubako yarahagaritswe kubera ko umwaka ushize, Mininfra yasabye ko hakorwa izindi nyingo zimbitse kugira ngo inzu isanwe neza.'

Inyubako ikoreramo RRA n’ibindi bigo ishobora kuzasenywa ikongera ikubakwa bundi bushya

Abadepite bumiwe

Depite Munyangeyo Théogène yavuze ko ibikorwa byo kuvugurura iyi nyubako bimaze igihe bitangiye ariko bitumvikana impamvu byahagaritswe.

Ati 'Ukabona inzu imaze imyaka itanu irenga, igenda isanwa none tugejeje mu mwaka wa nyuma bati ayo mafaranga mumaze gusohora imyaka yose nimuhagarikire aho ngaho noneho tugiye gutangira inyigo.'

Yakomeje ati 'Ni bo bantu tugomba kugenderaho bakagira inama ibindi bigo na za minisiteri, inyigo ubundi ni yo ibanza. Ubwo bagiye gukora inyigo nyuma y'igihe kingana iki? Cya kintu cyo kurondereza, gukoresha neza bike dufite, nta kigaragara rwose.'

Depite Munyangeyo yavuze ko ibi bigo ari byo byagakwiye guhora bikora neza kugira ngo n'abandi barebereho.

Depite Munyangeyo Théogène ntiyumva ukuntu Minecofin yagira ibibazo mu mikoreshereze y’imari ya Leta kandi ari yo ishinzwe kugira inama ibindi bigo ku buryo ibya rubanda bikoreshwa

Depite Bakundufite Christine yavuze ko mu igenzura ryakozwe n'Umugenzuzi Mukuru w'Imari ya Leta, iki kibazo cyagarutsweho ariko kugeza ubu hakaba hataraboneka umuti.

Ati 'Bakora igenzura n'ubundi twasanze mu bibazo bari bafite, harimo ko aba bantu badafite aho bakorera hagaragara, ni hato ugereranyije n'abakozi bakoreramo.

'Natangaje ko bashyizemo miliyari 1,8 Frw none bakoresheje miliyoni 509 Frw ngo hanyuma barabihagaritse. Mu by'ukuri kumva iyi nteruro ari Minecofin iri kubitubwira ntibyumvikana neza mu matwi, aya mafaranga miliyoni 509 Frw, ntitwabura kuvuga ko […] nko ku bwanjye yagombye kuba atari ngombwa.''

Depite Bakundufite yavuze ko bitumvikana uburyo Minecofin ifite mu nshingano ingengo y'imari ariyo ikora ibikorwa byo kuyisesagura.

Ati 'Cyane ko Minecofin ntabwo ariyo yasohora amafaranga ngo itubwire ngo twageze hagati turabihagarika, ari byo twavugaga ngo uwashyizeho miliyari 1,8 Frw yari agendeye kuki? Iyi nyigo se izarangira ryari kugira ngo ibi bibazo birangire?'

Minecofin yisobanuye

Umunyamabanga wa Leta muri Minisiteri y'Imari n'Igenamigambi Ushinzwe Imari ya Leta, Tusabe Richard, yavuze ko ibyagaragajwe n'inyigo ya mbere byahindutse kubera ko hari ibindi bijyanye no kwangirika gukabije kw'iyi nyubako byabonetse nyuma yayo.

Ati 'Navuga ko inyigo yakozwe ariko icyo gihe ikorwa yagaragazaga ko tugiye gukora gusana byoroheje, twarabitangiye, ingengo y'imari igenda iboneka mu bice. Uwo twahaye akazi, uko yagendaga akora imirimo yo gusana haje kugaragara ko inyubako yari yarangiritse bikabije.''

Kuri ubu ngo Ikigo cy'Igihugu Gishinzwe Imyubakire [gikorera munsi ya Mininfra] cyatangiye gushaka ibigo bifite abahanga mu gukora inyigo z'inyubako kugira ngo harebwe ko yakorerwa inshya.

Ati 'Aho tugeze ni uko RHA […] barimo gukorana kugira ngo badukorere inyigo yimbitse, ariko nabwo irakorwa nande? Mu bushobozi bwo kugenda twiyubaka, turimo gukorana na Mininfra barimo gushaka ibigo bifite ubushobozi buhanitse gukora inyingo zashoboka mu gusana iriya nyubako yose, bitabujije ko dushobora no kuyishyira hasi, bitewe n'ibyo inyigo izagaragaza […] muduhe umwanya dukore ibintu biramba.'

Minisitiri Tusabe yavuze ko mu byo babonye nyuma yo gukora inyigo ya mbere ari uko umutingito wo mu 2017, wayihungabanyije.

Akomeza ati “Ni ikibazo gikomeye ariko icyo numva twaratinze ariko tugiye kubona igisubizo kirambye. Mutwihanganire tubanze dukore iyo nyigo.'

Yavuze ko hamaze kuboneka aho abakozi ba RRA bazaba bimukiye ahubwo igisigaye ari ukumenya aho abandi bazimukira ku buryo mu gihe cya vuba n'inyigo izaba yamaze kuboneka.

Ati 'Bitarenze ukwezi kwa Gatandatu aba bantu bagomba kuzaba bimutse bavuye hariya, iyo nyigo icyo izagaragaza cyose ntabwo abo bantu baguma hariya.'

Ingengo y'imari iteganyijwe kwifashishwa muri uyu mushinga ishobora kuzahinduka ikiyongera cyangwa ikagabanuka bitewe n'ibizagaragazwa n'inyigo nshya.

Umunyamabanga wa Leta muri Minisiteri y'Imari n'Igenamigambi Ushinzwe Imari ya Leta, Tusabe Richard, yavuze ko ibyagaragajwe n'inyigo ya mbere byahindutse kubera ko hari ibijyanye no kwangirika byabonetse nyuma

Aba baturage bavuga ko bavomaga kure kandi bakavoma amazi mabi mu gishanga, aho bakoreshaga hagati y'isaha n'igice n'amasaha abiri. Imvura iyo iguye amazi bavoma ahinduka ibiziba.

Umuryango Mpuzamahanga wa Gikirisitu, World Vision, ufatanyije n'Ikigo cy'Igihugu gishinzwe Amazi, Isuku n'Isukura (WASAC), kuri uyu wa Kabiri bashyikirije abaturage bo mu Murenge wa Kageyo, amavomo bubakiwe.

Abaturage bo mu Murenge wa Kageyo bavuga ko baruhutse ingendo bakoraga bajya kuvoma mu mibande amazi mabi.

Twagirayezu Jean Damascène avuga ko baruhutse kumanuka imisozi no kugenda amasaha y'igicuku bajya kuvoma mu tubande kuko bagendaga bikanga umutekano muke bagirira mu mashyamba banyuragamo bajya gushaka amazi.

Ati 'Ikibazo cyo kubona amazi meza turashima ko cyamaze gukemuka nta wuzongera kutuvugaho umwanda. Nta zindi mpungenge zo kugenda amasaha twikanga amajoro tujya gushaka amazi, nta n'indwara zikomoka ku nzoka zizongera kugaragara mu bana bacu.”

Mu 2019 abatuye imirenge y'Akarere ka Gicumbi bari bafite amazi meza ku kigero cya 9% aho bakoraga ingendo zirenze ibilometero bajya gushaka amazi meza, kuri ubu bageze ku kigero cya 95% aho bajya kuvoma ahatarengeje metero 500.

Umuyobozi Mukuru w'Agateganyo wa WASAC, Umuhumuza Gisèle, yasabye abaturage gufata neza ibikorwaremezo baba begerejwe.

Umuyobozi Mukuru wa World Vision, Edgar Sandoval, yashimye ko u Rwanda rwashyize imbere gahunda zo kwegereza abaturage amazi meza, yizeza ko umuryango ayobora uzashyigikira igihugu muri iki cyerekezo.

Ati 'Tuzasohoza amasezerano yo kugeza ku baturage amazi meza bagera kuri miliyoni mu Rwanda, nifuje kuba hano ngo ndebe ibyagezweho ndetse n'ingaruka nziza byagize ku baturage. U Rwanda rwerekana ko iterambere rishoboka iyo abantu bakoreye hamwe kabone n'iyo haba hari imbogamizi.'

Yashimye imikoranire n'ubufatanye bwa World Vision na Leta y'u Rwanda.

Umuyobozi w'Akarere ka Gicumbi, Nzabonimpa Emmanuel, yashimiye abafatanyabikorwa, World Vision Rwanda, bubatse amavuriro y'ibanze mu Mirenge ya Nyankenke, Kageyo na Rutare, amarerero y'icyitegererezo ndetse no kubaka ubushobozi mu nzego z'ubuzima.

Ingo 95.030 zo mu Karere ka Gicumbi zimaze kugezwamo amazi meza na World Vision, mu mushinga watwaye miliyari zisaga 2 Frw aho Akarere ka Gicumbi katanzemo 40% angana na miliyari isaga 1 Frw.

Uyu muryango umaze kugeza amazi meza ku baturage miliyoni mu turere 15 tw'igihugu.

Amazi yashyikirijwe abaturage azatuma batongera gukora ingendo ndende

Ingo zirenga ibihumbi 95 zimaze kugezwaho amazi meza ku bufatanye na World Vision

Umuyobozi Mukuru wa World Vision, Edgar Sandoval, yashimye ko u Rwanda rwashyize imbere gahunda zo kwegereza abaturage amazi meza

Amafoto: Igirubuntu Darcy

Iri tsinda riri mu Rwanda ryitabiriye Inama ya mbere ya Komisiyo ihuriweho n'ibihugu byombi yashyizweho ngo ikurikirane ishyirwa mu bikorwa ry'amasezerano yasinywe mu nzego zitandukanye.

Ayo masezerano arimo ajyanye n'ibikorwa by'ingendo zo mu kirere hagati y'ibihugu byombi, iterambere n'umutekano w'ishoramari, ubufatanye mu ikoranabuhanga, gukuriraho abadipolomate ikiguzi cya visa n'abafite pasiporo za serivisi hamwe n'ajyanye no gushyiraho komisiyo ihuriweho n'ibihugu byombi.

Muri iyo nama yabaye kuri uyu wa 10 Gicurasi, hasinywe amasezerano yiyongera ku yari asanzwe mu nzego zirimo ubuhinzi, ubukerarugendo n'amahugurwa mu bya dipolomasi.

Ibiro by'Umukuru w'Igihugu byatangaje ko Minisitiri w'Ububanyi n'Amahanga wa Djibouti uyoboye izi ntumwa, Mahmoudi Ali Youssouf, yashyikirije Perezida Kagame indamutso ya mugenzi we wa Djibouti, Ismaïl Omar Guelleh.

Ibiganiro byabo byibanze ku mutekano mu Karere k'Ihembe rya Afurika ndetse barebera hamwe imiterere y'ubufatanye bw'ibihugu byombi mu nzego zifitiye inyungu abaturage babyo by'umwihariko ubucuruzi.

Mu nama ya Komisiyo zihuriweho n'ibihugu byombi, Mahmoudi yavuze ko Djibouti n'u Rwanda ari ibihugu bisangiye icyerekezo cyo kwimakaza umutekano n'ituze mu turere biherereyemo.

Buri gihugu cyahaye ikindi ubutaka bwo gukoreraho ishoramari ndetse mu nama yabaye mu gitondo cyo kuri uyu wa Gatatu byemeranyijwe kwihutisha gahunda zo kububyaza umusaruro.

Perezida Kagame yakiriye Intumwa za mugenzi we wa Djibouti ziyobowe na Minisitiri w’Ububanyi n’Amahanga, Mahmoudi Ali Youssouf

U Rwanda rufite hegitari zigera kuri 60 z'ubutaka rwahawe na Djibouti uhereye mu 2013 na ho Djibouti ikagira ubwo yahawe n'u Rwanda mu gice cyagenewe inganda, mu 2016 ubwo Perezida Ismaïl Omar Guelleh yarugiriragamo uruzinduko.

Mu nama ya Komisiyo ihuriweho n'ibihugu byombi yo ku rwego rw'abaminisitiri, yateranye bwa mbere i Kigali kuri uyu wa 10 Gicurasi, ikibazo cy'ubwo butaka kugeza ubu butaratangira kubyazwa umusaruro kiri mu byaganiriweho.

Minisitiri Dr Biruta yavuze ko ababishinzwe bagiye basura ubwo butaka ku mpande zombi hakaba hagiye kwihutishwa inyigo zijyanye n'ishoramari rizabukorerwaho.

Ati 'U Rwanda koko rufite ubutaka bwahawe na Djibouti na yo ikagira ubwo yahawe n'u Rwanda. Icyo twumvikanyeho muri iyi nama ni uko hakorwa inyigo zikarangira vuba kugira ngo bubashe gukorerwaho ishoramari nk'uko byari biteganyijwe.'

Mu ruzinduko Perezida Kagame yagiriye muri Djibouti muri Mata 2017, ibihugu byombi byasinye amasezerano arimo ajyanye n'ibikorwa by'ingendo zo mu kirere, iterambere n'umutekano w'ishoramari, ubufatanye mu ikoranabuhanga, gukuriraho abadipolomate ikiguzi cya visa ndetse n'abafite pasiporo za serivisi hamwe n'ajyanye no gushyiraho komisiyo ihuriweho.

Ayo masezerano yari atarashyirwa mu bikorwa kubera imbogamizi zatewe na Covid-19 nk'uko Dr Biruta yabisobanuye.

Iyi komisiyo ihuriweho yateranye ku nshuro yayo ya mbere ni yo yahawe inshingano n'abakuru b'ibihugu byombi ngo ikurikirane ishyirwa mu bikorwa ry'ayo masezerano yose.

Muri iyi nama hanasinywe amasezerano mashya arimo ay'ubufatanye mu by'amahugurwa yo ku rwego rw'abadipolomate, mu buhinzi no guteza imbere ubukerarugendo.

Dr Biruta yasobanuye ko impande zombi zanemeranyijwe ko ingendo z'indege hagati y'ibihugu byombi zikenewe kugira ngo mu gihe cya vuba bizashoboke guteza imbere ubukerarugendo, ubucuruzi n'ubuhahirane buhuriweho.

Yakomeje avuga ko u Rwanda rwishimira intambwe umubano warwo na Djibouti ugezeho haba hagati y'ibihugu byombi no ku rwego mpuzamahanga kandi ko rwiteguye kurushaho kuwubumbatira.

Minisitiri w'Ububanyi n'Amahanga wa Djibouti, Mahamoud Ali Youssouf, yavuze ko politiki y'Ububanyi n'Amahanga y'iki gihugu ishingiye ku kureshya ishoramari n'ubucuruzi ku buryo kiganwa n'abaturutse impande zose z'Isi ndetse hubatswe ibikorwaremezo by'ingenzi muri urwo rwego.

Yavuze ko hifuzwa ko Djibouti yaba izingiro ry'ubucuruzi n'ibikorwa by'ikoranabuhanga ndetse ko itagamije guhaza isoko ry'ibihugu bituranyi gusa ahubwo ari irya Afurika muri rusange.

Yongeyeho ko Djibouti n'u Rwanda ari ibihugu bisangiye icyerekezo cyo kwimakaza umutekano n'ituze mu turere biherereyemo nubwo hatabura imbogamizi zishingiye ku mutekano muke mu turere biherereyemo.

Minisitiri w’Ububanyi n’Amahanga n’Ubutwererane Mpuzamahanga, Dr Vincent Biruta, yavuze ko u Rwanda ruzakora ibishoboka ngo amasezerano rwagiranye na Djibouti ashyirwe mu bikorwa

Minisitiri w'Ububanyi n'Amahanga wa Djibouti, Mahamoud Ali Youssouf, yavuze ko igihugu cye gisangiye icyerekezo n’u Rwanda cyo kwimakaza umutekano n’ituze mu turere biherereyemo

Iyi nama ni iya mbere yahuje Komisiyo ihuriweho hagati ya Djibouti n’u Rwanda ikaba igamije gukurikirana ishyirwa mu bikorwa ry’ibyo ibihugu byombi byemeranyijweho

Umuyobozi Mukuru w’Urwego rw’Igihugu rw’Iterambere (RDB), Clare Akamanzi na mugenzi we wa Djibouti bashyira umukono ku masezerano y’ubufatanye mu byo guteza imbere ubukerarugendo

Minisitiri w’Ububanyi n’Amahanga n’Ubutwererane Mpuzamahanga, Dr Vincent Biruta, ku ruhande rw’u Rwanda (ibumoso) na mugenzi we wa Djibouti, Mahamoud Ali Youssouf, bahererekanya inyandiko z’amasezerano

Abitabiriye Inama ya Mbere ya Komisiyo ihuriweho yo ku rwego rw’Abaminisitiri hagati ya Djibouti n’u Rwanda

Amafoto: Igirubuntu Darcy

Perezida Kagame yahisemo izina ryo ku rwego rwo hejuru kuri uyu mwanya w'ingenzi cyane, hagamijwe gukaza umurego mu mubano w'ibihugu byombi cyane mu rwego rw'umutekano.

Ambasaderi mushya w'u Rwanda i Luanda, Gen Maj Karamba, yakoze inshingano zikomeye mu Gisirikare cy'u Rwanda zirimo no kuba Umugaba w'Ingabo zirwanira mu Kirere. Asimbuye kuri uyu mwanya Wellars Gasamagera, uherutse gutorerwa kuba Umunyamabanga Mukuru w'Umuryango FPR-Inkotanyi.

Gen Charles Karamba azaba afite inshingano zo guteza imbere umubano w'u Rwanda na Angola ushingiye ku nzego zitandukanye. Ize azazitangira nyuma yo kwemeza bidasubirwaho amasezerano ibihugu byombi byagiranye mu bijyanye no guhererekanya no kunganira abanyabyaha.

Muri aya masezerano y'ubufatanye yemerera ibihugu byombi gufatanya mu gukumira ibyaha, gukora iperereza, gukurikirana ndetse no mu gushinja ibyaha mu manza zitandukanye.

Aya masezerano yemerera kohereza abantu bakatiwe igifungo kirenze imyaka ibiri, bisabwe n'ubuyobozi bwa kimwe mu bihugu byombi. Yasinyiwe i Kigali na Minisitiri w'Ubutabera wa Angola, Francisco Queiroz na mugenzi we w'u Rwanda, Dr Emmanuel Ugirashebuja.

Aya masezerano afite icyo avuze kinini ku Rwanda. Arafungura inzira yo gukomeza gukurikirana abakekwaho Jenoside yakorewe Abatutsi mu 1994. Amasezerano nk'aya u Rwanda rwayagiranye n'ibindi bihugu nka Mozambique, Uganda, Maroc, Kenya.

Hari ibindi bihugu kandi rwayaganiriyeho na byo nka Centrafrique, Zambie na Congo.

Umubano w'u Rwanda na Angola mu by'umutekano ni ikintu gikomeye mu mubano w'ibihugu byombi nyuma y'uwo mu rwego rw'ubucukuzi bw'amabuye y'agaciro n'imigenderanire aho ibihugu byombi byakuriranyeho visa ku baturage babyo.

Mu 2018 Kompanyi itwara abantu n'ibintu mu ndege ya Angola, 'TAAG Angola Airlines', yahawe uburenganzira buyemerera gutangira gukorera ingendo ku bibuga by'indege by'u Rwanda no kuba yahafata abagenzi ikabajyana mu bindi bihugu.

Kuva yajya ku butegetsi mu 2017, Perezida Lourenço, yagiranye amasezerano menshi n'u Rwanda, arimo n'ay'ubufatanye mu by'umutekano n'ubutwererane.

Mu bijyanye na dipolomasi, mu 2019 Angola yashyizeho Ambasaderi wa mbere mu Rwanda, Eduardo Filomeno Bárber Leiro Octávio, wahoze akuriye ubutasi.

Angola ni igihugu gifite ijambo ku Mugabane wa Afurika kuko ari umuhuza w'Umuryango wa Afurika Yunze Ubumwe (AU) mu kibazo cy'u Rwanda na Repubulika Iharanira Demokarasi ya Congo (RDC) irushinja gufasha Umutwe wa M23, nubwo rudahwema kubihakana.

U Rwanda na Angola bifitanye umubano mu by'ubucuruzi ndetse impande zombi zikomeje gushaka uko yashyirwa mu bikorwa aho habaye inama ebyiri zigahuza Ikigo gishinzwe Ishoramari muri Angola cyitwa 'Agência de Investimento Privado e Promoção das Exportações de Angola (AIPEX) n'Urwego rw'Igihugu rw'Iterambere (RDB) muri Gicurasi 2021 i Kigali, indi ibera ku ikoranabuhanga mu Ukwakira 2020.

Perezida João Lourenço na Paul Kagame bakomeje gushimangira umubano mwiza w’ibihugu bayoboye