Author: webrwanda

Inzego zishinzwe kurengera ibidukikije zigaragaza ko imyuka ihumanya ikirere yoherezwa n'ibinyabiziga bikoresha lisansi na mazutu ifite uruhare mu mihindagurikire y'ibihe Isi iri kunyuramo.

Leta y'u Rwanda yatangiye politiki yo kugabanya imyuka ihumanya ikirere hazanwa ibinyabiziga bikoresha umuriro w'amashanyarazi.

Mu mwaka wa 2019, Perezida Kagame yavuze ko mu gihe cya vuba moto zikoresha lisansi zizasimbuzwa izikoresha amashanyarazi.

Abakora umwuga wo gutwara abantu kuri moto bazwi nk'abamotari batwara izi moto bavuga ko basa n'abazirikiwe mu Mujyi wa Kigali, kubera kutabasha gutwara abagenzi kuko nta sitasiyo z'ibi binyabiziga ziri hanze.

Dusengimana Jean Bosco utwara izi moto yabwiye IGIHE ko atabasha gutwara umugenzi ujya mu ntara iyo ari yo yose kuko nta hantu yabona yongereramo umuriro uramutse umushiranye.

Ati 'Hari sitasiyo nyinshi mu Mujyi wa Kigali ariko mu ntara nta n'imwe wahabona kandi atari uko moto zacu zitashobora kuhakorera. Ibyo bitudindiriza akazi, kuko njyewe iyi moto ntwara iyo irimo umuriro wuzuye igenda hagati y'ibilometero 35 na 40.'

Simpunga Jérémie na we utwara abagenzi kuri izi moto yabwiye IGIHE ko moto atwara iyo yuzuye umuriro igenda ibilometero hagati ya 50 na 80 bitewe n'umuhanda yanyuzemo. Yavuze kandi ko ari imbogamizi kuko atabasha gutembera mu ntara na moto ye yisanzuye.

Ati 'Imbogamizi duhura na zo ni uko nta sitasiyo ziri mu ntara, rero hari aho ngomba kutarenga kuko umuriro unshiriyeho byaba bibi. Turasaba inzego zibishinzwe ko zadufasha tukabona sitasiyo mu ntara.'

Ubuyobozi bwa sosiyete zigurisha moto zikoresha amashanyarazi ari na zo zifite amasitasiyo yongera umuriro muri izo moto bavuga ko hari umugambi wo kwagurira ibikorwa mu mijyi yunganira Kigali mu 2024.

Umuyobozi wa Sosiyete ya REM, icuruza izi moto ikanagira sitasiyo zizongerera umuriro mu Rwanda Kabanda Donald, yabwiye IGIHE ko batinze kujya gushyira ibyo bikorwa remezo mu ntara zitandukanye kubera ikibazo cy'amikoro.

Ati 'Turateganya gutangiza sitasiyo mu mijyi yunganira Kigali muri Werurwe umwaka utaha wa 2024. Twatinze kuzitangiza kuko kuyitangiza bisaba amafaranga menshi, ubwo abamotari bazaba bihanganye kugeza icyo gihe.'

Kuri ubu REM ifite sitasiyo enye mu Mujyi wa Kigali zongera umuriro muri moto 300 ku munsi.

Moto zikoresha amashanyarazi zatangiye kugeragerezwa mu Rwanda mu 2018. Zitezweho gutuma umumotari uzikoresha abasha kwizigama amadolari ya Amerika 900 (asaga 1.008.450 Frw) ku mwaka ugereranyije n'igihe yaba akoresha lisansi.

Abamotari bakoresha moto z'amashanyarazi bagorwa no kurenga Umujyi wa Kigali

---

Source : http://igihe.com/amakuru/u-rwanda/article/impungenge-z-abamotari-bakoresha-moto-z-amashanyarazi-bagorwa-no-kurenga-kigali

Mu nama yabereye i Génève mu Busuwisi kuri uyu wa mbere tariki 15 Gicurasi 2023, igahuza intumwa z'uRwanda, iza Kongo n'iz'Ishami ry'Umuryango w'Abibumbye ryita ku Mpunzi, HCR, impande uko ari eshatu zashyize umukono ku masezerano yo gucyura impunzi 'ku bushake', zaba iz'Abanyekongo ziri mu Rwanda, zaba n'iz'Abanyarwanda ziri muri Kongo.

Aho ikibazo kiri rero, ni uko amasezerano nk'aya atari ubwa mbere asinywe, kuko no mu nama zabereye i Goma n'i Kigali mu mwaka wa 2010, izo mpande zari ziyemeje gufasha impunzi gutaha ku bushake. Ubusesenguzi bugaragaza ko uRwanda rwubahirije ibyo rwari rwiyemeje, Kongo igakomeza guterera agati mu ryinyo, aho kwita ku kibazo cy' abaturage bayo bahungiye mu Rwanda.

Ikigaragaza ko uRwanda rwashyize mu bikorwa amasezerano yo muw'2010, ni uko kuva icyo gihe hatahutse ababarirwa mu bihumbi, ubu bakaba baranafashijwe gusubira mu buzima busanzwe. Magingo aya ndetse haracyataha abandi, bakaza batanga ubuhamya ko batinze guhunguka kuko bari baragizwe ingwate n'abahisemo gufata intwaro, cyane cyane abibumbiye mu mutwe w'abajenosideri wa FDLR.

Abategetsi ba Kongo uko bagiye basimburana ku ngoma, aho gukemura ikibazo cy'umutekano muke ari nacyo abo bantu bahunze, ahubwo imitwe yitwaje intwaro yariyongereye, harimo n'iyashinzwe cyangwa ishyigikiwe na Leta. Si ibyo gusa, kuko itotezwa rishingiye ku bwoko ryatumye Abanyekongo b'Abatutsi bakomeza guhunga, iki kibazo kikaba ari na kimwe mu byatumye havuka umutwe wa M23, uvuga ko urwanira cyane cyane uburenganzira bw' Abanyekongo bavuga ikinyarwanda.

HCR ivuga ko mu Rwanda hari impunzi z'Abanyekongo zisaga bihumbi mirongo irindwi na bitanu(75.000), zihamaze imyaka irenga 20, hakiyongeraho izibarirwa mu bihumbi birindwi(7.000) zaje kuva intambara yakubura muri Kivu y'Amajyaruguru. Uyu mubare kandi ukomeza kwiyongera kubera intambara n'ubushyamirane byabaye akarande mu burasirazuba bwa Kongo.

Leta y'u Rwanda ivuga ko itazakumira impunzi ziruhungiraho. Ikongeraho ariko ko uRwanda rudakwiye gukomeza kwikorezwa umuzigo w'impunzi z'Abanyekongo, mu gihe igihugu cyabo kidaha agaciro iki kibazo uko bikwiye, ndetse bamwe mu Banyekongo, barimo n'abategetsi, bakabita 'Abanyarwanda basubiye mu gihugu cyabo'.

Nk'uko bisanzwe rero Kongo yongeye gusinya amasezerano izi neza ko itazayashyira mu bikorwa. Ikimenyetso ni uko kimwe mu by'ibanze bisabwa ngo impunzi zitahe, ari uko umutekano ubanza kugaruka aho abo bantu bari batuye, nyamara mu bice byinshi bya Kivu y'Amajyaruguru intambara iraca ibintu, imitwe y'abagizi ba nabi ntisiba kuvuka, kandi Leta nta mbaraga cyangwa ubushake igaragaza bwo kubihagarika.

Umwe mu mitwe ibuza amahwemo Abanyekongo ni FDLR igizwe n'abicanyi bagize uruhare muri Jenoside yakorewe Abatutsi, ukaba waranabibye ingengabitekerezo ya jenoside mu duce igenzura. Raporo nyinshi cyanye, zirimo iza Loni, zagaragaje ko FDLR ikorana n'ubutegetsi bwa Kongo, ikaba yarahawe rugari ngo yice inakize uwo ishaka.

Niba se n'abahanyanyaje bakaguma muri Kongo badasinzira kubera FDLR ibica, ikabasahura, igasambanya abagore ku ngufu, abahunze batinyuka bate gusubira muri uko kuzimu? Abarwanyi b'iyo FDLR kandi nibo ba Ingabire Victoire bita'impunzi' zikwiye kugirana imishyikirano na Leta y'uRwanda, zikagira ibyo zemererwa kugirango zibone gutaha. Ese iyo umuntu yafashe intwaro, akiyemeza kugaba ibitero ku gihugu yaturutsemo, nk'uko FDLR ihora ibikora, uwo muntu aba agifatwa nk'impunzi? Leta y'uRwanda ntihwema gushishikariza Abanyarwana bakiri impunzi gutaha, kuko Igihugu gihora kibategeye yombi.

Twibukiranya ko 'guca burundu ikitwa ubuhunzi' biri mu mahame ya RPFF-Inkotanyi ifite ijambo mu buyobozi bw'uru Rwanda. Abadataha bafite impamvu zabo bwite, ariko biganjemo abasize bakoze ibyaha mu Rwanda, bakaba batinya ubutabera. Abo nabo ntibahejwe mu gihugu cyabo, kuko 'ibyaye ikiboze irakirigata'.

Amasezerano avuguruye yo gucyura impunzi amaze gushyirirwaho umukono i Génève, ateganya ko mu kwezi kumwe abarebwa n'ayo masezerano bazahurira i Naïrobi muri Kenya, bakareba uko yatangira gushyirwa mu bikorwa. Ese Kongo izaba yashoboye gukemura ikibazo cy'umutekano, mu gihe ahubwo ababikurikiranitra habi bavuga ko bafite ubwoba ko uruvangitirane rw'ingabo z'amahanga, abacancuro n'imitwe yitwaje intwaro, rushobora gutuma ibintu birushaho kuba bibi mu burasirazuba bwa Kongo?

Mu by'ukuri gucyura impunzi muri ibi bihe birasa n'ibidashoboka. Ku ruhande rw'u Rwanda ayo masezerano yashyizweho umukono na Minisitiri ufite impunzi mu nshingano, Marie Solange Kayisire. Kongo yari ihagarariwe na Minisiriri w'Ububanyi n'Amahanga, Christophe Lutundula, naho ku ruhande rwa HCR hari Umuyobozi wayo,Filippo Grandi, ari nawe watumije iyi nama.

The post Leta ya Kongo yongeye gusinya amasezerano yo gucyura impunzi zayo ziri mu Rwanda, ibizi neza itazayashyira mu bikorwa. appeared first on RUSHYASHYA.

Source : https://rushyashya.net/leta-ya-kongo-yongeye-gusinya-amasezerano-yo-gucyura-impunzi-zayo-ziri-mu-rwanda-ibizi-neza-itazayashyira-mu-bikorwa/?utm_source=rss&utm_medium=rss&utm_campaign=leta-ya-kongo-yongeye-gusinya-amasezerano-yo-gucyura-impunzi-zayo-ziri-mu-rwanda-ibizi-neza-itazayashyira-mu-bikorwa

Ndayikengurukiye Fleury, umugabo wa Bahavu Usanase Jeannette yateye utwatsi ibyo kuba yaba akubitwa n’umugore we.

Mu minsi ishize nibwo ku mbuga nkoranyambaga haje inkuru y’uko Bahavu umaze kwandika izina muri Sinema nyarwanda yaba akubita umugabo we Fleury bafatanya kwandika no gutegura filime zirimo iy’uruhererekane igezweho ya Impanga Series.

Ibi byavuzwe cyane ubwo yarimo yishyuza imodoka ye yahawe mu bihembo bya RIMA ariko ntahite ayibona bitewe n’uko hari ibyo atumvikanagaho n’abateguye irushanwa harimo ko bashakaga ko ajya ayigendamo iriho ibirango by’umuterankunga ariko we akabyanga ngo kuko bitari mu masezerano.

Aha niho hahise hazamukira inkuru z’uko adashobotse, ari umuntu ugorana ndetse ajya anakubita umugabo we.

Mu kiganiro bashyize kuri channel yabo ya YouTube, Fleury yarimo aganira n’umuhanzi w’umurundi uririmba indirimbo zo kuramya no guhimbaza Imana akaba n’inshuti ye, Christophe Ndayishimiye, yahakanye aya makuru.

Uyu mugabo yamwinginze bishoboka ariko undi amubera ibamba amubwira ko ari ibihuha, ndetse yibaza ukuntu n’iyo byaba biba ko bibera mu rugo rwabo ari amabanga y’urugo uko byaba byaragiye hanze.

Ndayikengurukiye wavuze ko n’iwabo babimubajije, yemeje ko adakubitwa ndetse ko nta n’umugore wamukubita bitewe n’imiterere ye uko yiyizi.

Ati “Nta mugore wankubita. Njyewe Tmtubana mu rugo? Eeeh eeeh. Ukuntu meze, ukuntu unzi ntabwo umugore yankubita.'

Yunzemo ati “Ntabwo umugore yankubita na we arabizi'

Fleury yakomeje avuga ko bitamutungura cyangwa ngo bimutangaze kuko hari inkuru nyinshi cyane cyane mu myidagaduro zijya zijya hanze kandi nta n’ibimenyetso abazitanze bafite, ari ugutwika gusa.

Ibi yahise abihuza n’ibyavuzwe nabyo mu minsi ishize ko umuhanzi Meddy akubitwa n’umugore we Mimi.

Fleury yahakanye ibyo gukubitwa na Bahavu

Source : http://isimbi.rw/imyidagaduro/article/fleury-yavuze-ku-byo-kuba-akubitwa-n-umugore-we-bahavu-video

Ibiro by'Umukuru w'Igihugu byatangaje ko ibiganiro byabo byibanze ku kurebera hamwe akamaro k'ingufu za Atomike ku hazaza ha Afurika n'ishoramari rikenewe mu kubaka ubushobozi bwo kubyaza umusaruro ikoranabuhanga rigenda ryaduka muri uru rwego.

Lassina Zerbo ni Umunya-Burkina Faso w'Umunyepolitiki n'umushakashatsi wabaye Minisitiri w'Intebe wa Burkina Faso kuva mu 2021 kugeza 2022.

Mbere y'izi nshingano yabaye Umunyamabanga Nshingwabikorwa w'Umuryango Mpuzamahanga ugamije gukumira igeragezwa ry'intwaro za kirimbuzi aho ari ho hose ku Isi. Ku wa 24 Mutarama 2022, yakuwe ku butegetsi akorewe Coup d'etat.

Inama y'Abaminisitiri yateranye ku wa 13 Ukwakira 2021, ni yo yemeje abagize Inama y'Ubutegetsi y'Ikigo Gishinzwe Ingufu za Atomike mu Rwanda barimo, Dr Lassina Zerbo n'Igikomangomakazi cya Jordanie, Sumaya bint El Hassan.

Ikigo Gishinzwe Ingufu za Atomike mu Rwanda cyashinzwe mu 2021 kikaba gifite inshingano zo guhuza ibikorwa by'ubushakashatsi mu by'ingufu za nucléaire mu Rwanda.

Minisitiri w'Ibikorwaremezo, Dr. Ernest Nsabimana muri Nyakanga umwaka ushize yatangaje ko Abanyarwanda barenga 100 bari hafi gusoza amasomo ajyanye no gukoresha ingufu za nucléaire bakurikiranaga mu bihugu birimo n'u Burusiya.

Icyo gihe mu Rwanda hari hatangijwe inama ihuriza hamwe abanyamuryango b'Umuryango Nyafurika ushinzwe guteza imbere ubushakashatsi n'ubumenyi ku ngufu za nucléaire, AFRA n'intumwa zihagarariye Ikigo Mpuzamahanga mu by'Ingufu za Atomike (IAEA).

Ibi biri mu mbuto zitangiye gusarurwa nyuma y'uko u Rwanda n'u Burusiya bisinye amasezerano y'ubufatanye yo gutangiza ikigo cy'ubushakashatsi n'ikoranabuhanga mu bumenyi bujyanye n'ikoreshwa ry'ingufu za nucléaire mu 2018.

Perezida Kagame yakiriye Umuyobozi Nshingwabikorwa w'Umuryango witwa Packet Clearing House (PCH), Bill Woodcock bagirana ibiganiro ku guteza imbere ibikorwaremezo byo gukwirakwiza internet.

Minisitiri w’Ibikorwaremezo, Dr Nsabimana Erneste (Ibumoso), Perezida Kagame, Dr. Lassina Zerbo na Dr. Fidel Ndahayo na

Perezida Kagame yagiranye ibiganiro na Bill Woodcock (wa kabiri ibumoso) hamwe n’abandi bayobozi

---

Source : http://igihe.com/amakuru/u-rwanda/article/perezida-kagame-yagiranye-ibiganiro-n-abayobozi-b-ikigo-gishinzwe-ingufu-za

Umusore yashikuje telefone mu modoka yirukatse ngo acike indi imuca hejuru, aho yahise agagara.

Mu isantere ya Byangabo mu Murenge wa Busogo, Akarere ka Musanze, haravugwa urupfu rw'umusore w'imyaka 18 witwa Tuyambaze, wagonzwe n'imodoka agapfa.

Uyu musore yagonzwe ubwo yirukaga agerageza gutorokana telefoni yari amaze kwambura umuntu ayimushikuje.

Hari saa moya z'umugoroba wo ku wa Mbere tariki 15 Gicurasi 2023, ubwo umugenzi yari muri taxi muri Gare yo mu isantere ya Byangabo, akibwa telefone ye.

Ngo uwo musore yamucunze ikirahure cy'imodoka gifunguye, anyuzamo ukuboko ashikuza uwo mugenzi telefone ariruka

Ubwo uyu yambukaga umuhanda agwa mu mudoka yavaga i Musanze yerekeza i Nyabihu, ahasiga ubuzima nk'uko Umunyamabanga Nshingwabikorwa w'Umurenge wa Busogo, Ndayambaje Karima Augustin, yabitangarije Kigali Today dukesha iyi nkuru.

 

Source : https://yegob.rw/musanze-habaye-impanuka-yimodoka-yanyuze-hejuru-yumusore-wari-umaze-gushikuza-terefone-mu-modoka-yari-iri-muri-gare/

Umukobwa wabaye ikimenyabose ubwo yitabiraga imikino y'ikirombe cy'Isi cya 2022 cyabereye muri Qatar, Miss Ivana Knoll ari gutanga akazi ku bantu bazi kwifotoza.

Abinyujije ku rukuta rwe rwa Instagram, ahazwi nko kuri story, uyu mukobwa ukomoka muri Croatia, yatanze itangazo avuga ko akeneye abanyamideri bazi kwifotoza.

Yagize ati 'Ndashaka abanyamideri bo kwifotoza ku wa Gatatu muri Miami. Nkeneye abanyamideri b'abagore n'ababagabo, abana b'abahungu bafite imyaka iri hagati 2-4 y'amavuko ndetse n'abana b'abakobwa bafite imyaka hagati 6-8 y'amavuko.' Arenzaho ko ibindi bisobanuro ni ukumwandikira byihariye.

Source : https://yegob.rw/miss-ivana-knoll-wabaye-ikimenyabose-mu-gikombe-cyisi-cya-2022-ari-gutanga-akazi-ku-bantu-bazi-kwifotoza/

Ikipe ya FC Barcelona iherutse kwegukana igikombe cya shampiyona y'igihugu cya Espane habura imikino 4 ngo irangire ikomeje gutakaza bamwe mu bantu b'inkingi za mwamba.

Jordi Cruyff umuyobozi w'ikipe ya FC Barcelona yatangaje inkuru itari nziza y'uko azava muri iyi kipe mu mpera ziki gihebwe cy'imikino nyuma y'uko Mateu Alemany nawe avuye muri iyi kipe akaba agomba kwinjira mu ikipe ya Aston Villa yo mu gihugu cy'u Bwongereza.

Umuyobozi w'ikipe ya FC Barcelona Jordie Cruyff yatangaje ibi uyu munsi tariki 16 Gicurasi 2023 mu nama aho yasobanuriye Perezida Joan Laporta ko nyuma y'imyaka ibiri ari kumwanya w'ubuyobozi ubu nawe agiye mu bikorwa bye ndetse no guhangana n'ibibazo bishya.

Ubu ikipe ya FC Barcelona ikomeje kugenda itakaza abayobozi bayo gusa irimo gusoza amasezerano yogushyiraho Deco nk'umuyobozi mushya kandi yamaze kwakira 90% by'amakuru arambuye hasigaye gukemura ikibazo n'ikigo cye.

 

Source : https://yegob.rw/ibyishimo-byayo-birimo-byaje-agatotsi-ikipe-ya-fc-barcelona-ikomeje-gutakaza-abantu-bingenzi/

Mu karere ka Gatsibo mu murenge wa Ngarama, haravugwa inkuru y'umugabo witwa Mukunzi Daniel w'imyaka 25, wakubiswe n'abaturage kugeza apfuye nyuma yo gukekwaho kwiba ibitoki.

Mu ijoro rya tariki 12 Gicurasi 2023, nibwo abagabo 2 basanzwe barinda urutoki ruherereye mu mudugudu wa Rukiri, akagari ka Bukomane, bafatanye ibitoki 6 uyu Daniel.

Ubwo bahise batabaza Mudugudu ndetse na Mutekano ariko ntibabatabara bituma bafata icyemezo cyo kwihanira, bakubita uyu mugabo bimuviramo urupfu.

Umurambo w'uyu nyakwigendera wahise ujyanwa mu Bitaro bya Ngarama kugira ngo ukorerwe isuzuma, gusa aba bagabo babiri bikekwa gukubita nyakwigendera bahise batabwa muri yombi, hatangira gukorwa iperereza.

Source : https://yegob.rw/ibisambo-akabyo-kashobotse-gatsibo-umugabo-ukekwaho-kwiba-yapfuye-urupfu-rubi/

Umugabo yabafe abajura bamwibye maze abafungirana mu nzu aho bamukubitiyemo bahita batorokera mu mabati bajya no gufunga umuhanda w'abaturage.

Ibi byabereye mu karere ka Gasabo mu murenge wa Jali ahazwi nko mu Gashyushya aho abasore babiri bafashwe bibye televiziyo ni uko nyiri kwibwa akabafungirana mu nzu ye aho bamukubitiyemo, bakicira mu mabati bakajya gufunga umuhanda.

Ubwo aba basore basohokaga muri iyo nzo batangiye kwigaragambya maze bafunga umuhanda ari nako bamenaguraga amacupa bakuye mu kabari kari hafi aho.

Nyuma yo gukomeza guteza umutekano muke, Polisi y'umurenge wa Jalo yaje kubafata ibajyana kubafunga.

Umunyamabanga Nshingwabikorwa w'agateganyo w'Umurenge wa Jali, Olive yemereye B Plus dukesha iyi nkuru ko izi nsoresore zatawe muri yombi.

Source : https://yegob.rw/kigali-umugabo-yabafe-abajura-bamwibye-maze-abafungirana-mu-nzu-aho-bamukubitiyemo-bahita-batorokera-mu-mabati-bajya-no-gufunga-umuhanda-wabaturage/

Ibaze kwibwa moto ugasubizwa inyuma, abajura batatu bibye moto maze bayigira inyuma kugira ngo bazayigurishe nta muntu ubirabutswe

Polisi y'u Rwanda ku bufatanye n'izindi nzego z'umutekano n'abaturage mu Karere ka Musanze, yafashe abagabo batatu bacyekwaho kwiba no gusenya moto bagamije kugurisha ibyuma byayo.

Bafatanywe ibyuma bya moto ifite nimero RE 466 X mu gitondo cyo ku Cyumweru tariki ya 14 Gicurasi, mu mudugudu wa Nyamuremure, akagari ka Kigombe mu murenge wa Muhoza.

Superintendent of Police (SP) Alex Ndayisenga ushinzwe guhuza ibikorwa bya Polisi n'abaturage mu Ntara y'Amajyaruguru, yavuze ko kugira ngo bafatwe byaturutse ku makuru yatanzwe n'uwibwe moto.

Mu iperereza ryakozwe haje gufatwa abagabo batatu, mu gitondo cyo ku Cyumweru, nyuma y'uko abapolisi babasatse bakabasangana umufuka wari ubitsemo ibyuma bya moto yibwe.

Bamaze gufatwa biyemereye ko ari bo bayibye babifashijwemo n'umwe muri bo, wari usanzwe ari umuzamu wo mu rugo rwibwemo iyo moto.

Abafashwe uko ari batatu bashyikirijwe Urwego rw'Ubugenzacyaha (RIB) kuri sitasiyo ya Muhoza kugira ngo hakomeze iperereza, moto isubizwa nyirayo.

Source : https://yegob.rw/ibaze-kwibwa-moto-ugasubizwa-inyuma-abajura-batatu-bibye-moto-maze-bayigira-inyuma-kugira-ngo-bazayigurishe-nta-muntu-ubirabutswe/