Author: webrwanda

Abatazi abagome Gervais Condo na Céléstin Nsengiyumva nibo bibeshya ko hari ikizima cyabakomokaho. Aba bombi bari abadipolomate bakomeye ba Leta y'abatabazi mu gihe Jenoside yakorewe Abatutsi yari irimbanyije, ndetse banayikorera ubuvugizi cyane mu Muryango w'Ubumwe bw'Afrika(OUA), mu itangazamakuru no mu yindi miryango mpuzamahanga, bagerageza gutagatifuza abo bicanyi.

Abo bavugizi b'abajenosideri, ubu nibo bishyize hamwe n'izindi nkorabusa, zirimo Eugène Richard Gasana,Charles Kambanda uhakana Jenoside yakorewe Abatutsi, Mr Bean w'inyigaguhuma muri politiki, Thabita Gwiza witereye umutwe kuva musaza we Ben Rutabana yakwicishwa na Kayumba Nyamwasa,n'izindi nzererezi, maze bashinga ikiryabarezi ngo ni'OPOZISIYO NYARWANDA', babitewemo inkunga na Perezida Tshisekedi wa Kongo.

Nyamara amateka ya vuba atwereka ko imigambi y' ingirwa-banyapotiki zibasira ubuyobozi bw'u Rwanda, ipfira mu igi, ba nyirayo bagakorwa n'ikimwaro.

Ingero ni nyinshi:
RNC ya Kayumba Nyamwasa n'abandi basumbwe n'inda nka Gervais Condo, Théogène Ŕudasingwa, Gahima Gerald, n'abandi batekamutwe, ubu isigaye ku izina.

Abo mu ngirwa-shyaka 'Ishema' rya Padiri Nahimana barenda kumarana bapfa ibisabano(Uwitwa Jean Paul Ntagara aravumira Nahimana ku gahera).

Icyiswe 'Rwanda Bridge Builders' nticyamaze n'umwaka umwe, abakirimo bashinjanya ivangura rishingiye ku bwoko, dore ko hari hagaragayemo benshi bacyihishemo, mu by'ukuri ari Interahamwe mu zindi.

Abo muri MRCD/FLN yo kwa Faustin Twagiramungu na Paul Rusesabagina imbwa zabirwaniyemo, cyane cyane aho Rusisibiranya n'abambari be baterewe muri yombi, bagashyikirizwa inkiko mu Rwanda. Abasigayeyo ubu barabundabunda, kuko bazi ko iminsi yabo ibaze.

Abo muri FDU-INKINGI ya Ingabire Victoire barateranya ingemu yo kumwoherereza, n'amadolari 500 akuzura zahize, none ngo bazakuraho ubutegetsi mu Rwanda.

Babivuze ukuri ngo'umusazi arasara akagwa ku ijambo'. umuriganya(escroc politique) Gasana Anastase aherutse kwandika kuri Facebook ati' UHITWA NTAFATA URUKA', ashaka kuvuga ko ari Tshisekedi, ari nabo arimo gufasha, bose bari mu manegeka. Uwo Tshisekedi ntiyibereyeho kubera ibibazo by'inzitane, none ngo arafasha indindagire zarengeje igihe(expired).

Erega kurwanya umugabo ufite ibikorwa bimuvugira si ubonetse wese. Ni kimwe no kurwanya Ubuyobozi bw'u Rwanda witwaje gusa iturufu y'ubwoko n'ibirego by'ibipapirano. N'abatari izi mburamumaro bakozeho intoki zirashya. Abiyita ibihangange barabigerageje, imigambi mibisha ifata ubusa.
Agati kateretswe n'Imana ntigahuhwa n'umuyaga!

The post Abisunga ibigarasha n'abajenosideri ngo bararwanya u Rwanda bazakomeza gukama ikimasa. appeared first on RUSHYASHYA.

Source : https://rushyashya.net/abisunga-ibigarasha-nabajenosideri-ngo-bararwanya-u-rwanda-bazakomeza-gukama-ikimasa/?utm_source=rss&utm_medium=rss&utm_campaign=abisunga-ibigarasha-nabajenosideri-ngo-bararwanya-u-rwanda-bazakomeza-gukama-ikimasa

Abinyujije ku rubuga rwa Twitter, Umuvugizi wa leta y'u Rwanda Yolande Makolo yaravuga ko amagambo y'umukuru wa USAID yirengagiza imvano nyakuri y'umutekano muke n'ingaruka zawo.

Ni nyuma y'amagambo umuyobozi mukuru w' Ikigo cya Leta Zunze Ubumwe z'Amerika Gishinzwe Iterambere Mpuzamahanga (USAID), Samantha Power, mu itangazo asohoye rivuga ko atewe impungenge n'umubare wiyongera buri munsi w'abana n'abagore bakorerwa ihohoterwa rishingiye ku gitsina muri Repubulika ya demokarasi ya Kongo.

Avuga ko nkuko bitangazwa n'umuryango w'abaganga batagira umupaka, intambara hagati ya Leta ya Kongo n'Abarwanyi ba M23 imaze gukura mu byabo abagera kuri miliyoni imwe kuva mu kwa gatatu umwaka ushize.
Avuga ko kandi abagore n'abana babarirwa mu bihumbi bakorerwa ihohoterwa rishingiye ku gitsina, abandi bakagurishwa nk'indaya n'abantu bivugwa ko bafitanye isano na guverinoma ya Kongo.

Muri iri tangazo kandi avuga ko intambara ya M23 yatumye ibintu birushaho kuzamba mu burasirazuba bwa Kongo, cyane cyane mu ntara ya Ituri yibasiwe n'indi mitwe yitwaje intwaro irimo CODECO na ADF izwi nk'ishami ry'abarwanyi ba Kisilamu.

Samantha Power muri iryo tangazo avuga ko ari ngombwa ko u Rwanda ruhagarika gushyigikira umutwe w'abarwanyi ba M23 urwanya ubutegetsi bwa Repubulika ya Demokarasi ya Kongo. Ariko agasaba na leta ya Kongo gushyiramo agatege ikarengera abaturage bayo.

Yolande Makolo uvugira leta y'u Rwanda yatangaje ko imvugo nk'iyi ica ku ruhande imvano nyakuri y'umutekano muke n'ingaruka zawo harimo ihohoterwa rishingiye ku gitsina n'indonke zibishingiyeho.

Yavuze ko ibyo Samantha Power yavuze byerekeza ikibazo ku ruhande akabaza ati 'Kuki atavuga imvugo ibiba urwango n'amacakubiri bikorwa n'abanyapolitike ba Kongo n'imiryango itagengwa na leta? Kuki atavuga ibitero biteye ubwoba bigabwa ku Banyekongo bo mu bwoko bw'Abatutsi babica bakica n'inka zabo?

Leta y'u Rwanda ivuga ko hari Abanyekongo bambuka umupaka buri munsi bahungira mu Rwanda bahunga ingo zabo, ariko guverinema ya Kongo iterera agati mu ryinyo kuri iki kibazo.

Ikibazo cy'umutekano muke mu burasirazuba bwa Kongo ni kimwe mu bimaze igihe kirekire bitabonerwa umuti urambye. Nubwo ibihugu by'amahanga bidahwema kukivugaho abahanga mu bya politike bavuga ko inyungu n'uruhare rw'ibindi bihugu muri iki kibazo biri mu bituma gikomeza kuba ingorabahizi.

Source : https://umuryango.rw/amakuru/mu-rwanda/politiki/article/u-rwanda-rwavuze-icyo-rutekereza-ku-birego-by-amerika-irushinja-m23

Ni umwanzuro uzatuma Igihugu cyUburundi cyohereza umubare mu nini w'Abarundi bajya kuvoma ubumenyi mu gihugu cy'igihanganjye nk''Uburusiya , bizanakomeza umubano ibihugu byombi bifitanye mu byiciro bitandukanye by'iterambere.

Ibi bihugu byombi kandi byasinyanye amasezerano y'ubufatanye ku kubaka ingomero zitanga ingufu z'amashanyarazi n'ikoreshwa rya ” nucléaire”.

Lavrov na mugenzi we Albert Shingiro w'Uburundi basabye ONU kubahiriza ubwigenge bwa buri gihugu.

Uburusiya buri kugendera ibihugu byo mu karere ka Afurika y'Uburasirazuba na Afurika y'Epfo mu rwego rwo gutira imbaraga no gusaba amajwi ashyigikira Uburusiya mu ntambara bwasoje kuri Ukraine ikaba imaze Umaka urenga ntawe urayitsinda mu bahanganye.

Source : https://umuryango.rw/amakuru/mu-mahanga/politiki/article/uburusiya-buzongera-buruse-ku-banyeshure-b-abarundi-umusaruro-w-ubufatanye

Mu cyumeru gishize, Senateri Lindsey Graham yari i Kiev. Nyuma y'ikiganiro yagiranye na Perezida Volodymyr Zelenskyy, perezidanse ya Ukraine yasohoye amashusho ya videwo aberekana bombi bari kumwe, na Graham avuga ngo 'Abarusiya barimo barapfa. Inkunga ya gisirikare Amerika iha Ukraine ni yo mafaranga meza dukoresheje kuva twabaho.'

Byarakaje cyane Uburusiya. Dmitry Peskov, umuvugizi wa Perezida Vladimir Putin, ati: 'Ni agahinda katavugika kubona Amerika ifite umusenateri nka Graham.' Urwego rw'Uburusiya rw'ubugenzacyaha bwafunguye anketi. Naho minisiteri y'ubutegetsi bw'igihugu yatangaje kuri uyu wa mbere ko yashyize Lindsey Graham ku rutonde rw'abanyabyaha bashakishwa. Ariko ntivuga ibyaha Uburusiya bumushinja.

Amaze kubyumva, Graham yanditse kuri Twitter, ati: 'Kumenya ko kwitangira Ukraine byarakaje Uburusiya umuranduranzuzi binteye umunezero utagira urugero. Sinzahwema guharanira ubwigenge bwa Ukraine kugera igihe buri musirikare wese w'Uburusiya azaba yirukanywe ku butaka bwa Ukraine.

Nakiriye nk'Umudari w'Icyubahiro impapuro zo kunta muri yombi z'ingoma ya Putin yamunzwe na ruswa kandi idafite umuco n'ubupfura.'

Lindsey Graham ni uwo mu ishyaka ry'Abarepubulikani. Kuva mu 2003, ni umwe mu basenateri babiri bahagarariye leta ya South Carolina, iri mu majyepfo y'uburasirazuba bwa Leta zunze ubumwe z'Amerika, mu nteko ishinga amategeko y'igihugu-Congress. Yungirije kandi umuyobozi wa Komite ya Sena igenzura inzego z'ubutabera.

Ni umwe mu Banyamerika 500, barimo na Perezida Barack Obama, abanyapolitiki n'abanyamakuru, Uburusiya bwashyize mu minsi ishize ku rutonde rw'abo budashaka ko babukandagirira ku butaka.

AP

Source : https://umuryango.rw/amakuru/mu-mahanga/politiki/article/uburusiya-bwashyize-senateri-lindsey-graham-w-amerika-ku-rutonde-rw

Babigarutseho kuri uyu wa 28 Gicurasi 2023, mu gikorwa cyo kwibuka ku nshuro ya 29, abari abakozi b'ibi bitaro bishwe muri Jenoside yakorewe abatutsi.

Umwe mu bari abana mugihe cya Genocide Mukangoga Emelithe yavuze ko uwari Burugumestre wa komine Gitesi yatanze itegeko ko abana biciwe ababyeyi bajyanwa kubitaro bya Kibuye mu kigo cy'imfubyi ariko ari umugambi wo kubiciramo

Ati , hano mu bitaro habereye ibintu bikomeye cyane bafataga abana bakabakubita ku bikuta , abandi bakabatera ibyuma n'abandi bakabatema , bikozwe na bamwe mu abaganga n' Interahamwe bakajya kubata mu cyobo cyari hariya kuri Onapo ndashima inkotanyi zahagaritse Genocide hakimakazwa umuco w' ubumwe n'ubwiyunge.

Dr Ayingeneye Violeta yagaye abaganga bijanditse muri Genocide kubera ko batatiye indahiro turahira, yo kutavangura abo twakira tugendeye ku idini uruhu, ubwoko cyangwa n'ibindi

Ku rundi ruhande, yashima abaganga bitwaye neza nka Hitimana Leonard wagize uruhare mu kurwana kubana bari hano mu bitaro . ariko kandi agaya byeruye abitwaye nabi bagatuma imbaga y'Abatutsi bari bahungiye hano itikira, barimo Charle Twagira na bamwe mu baganga na bakozi bakoranaga bakambura ubuzima abantu kandi mu nshingano bafite harimo kubungabunga ubuzima.

President wa I buka mu karere ka Karongi Ngarambe Vedaste yavuze ko ibitaro bya Kibuye bifite umwihariko, kuko byiciwemo abana benshi bikozwe n'abari bashinzwe kubabungabunga nka Dr charle Twagira na bandi ndetse abacitse kwicumu bakaba bagishengurwa n'uko hari abakidegembya .

Ati 'hari abagize uruhare mu Genocide hano bakidegembya ni ibintu bigishengura abacitse ku icumu. turasaba ko hagira igikorwa bagafatwa bakaryozwa ibyaha by' indenga kamere bakoze.

Genocide yakorewe abatutsi mu 1994 yahitanye abarenga million ndetse hakaba hari imibiri ikomeje kuboneka.


Sylvain Ngoboka

Source : https://umuryango.rw/kwibuka/article/bitaro-bya-kibuye-byibutse-ku-ncuro-ya-29-abana-barenga-400-b-abatutsi-biciwemo

Tombola yabereye ku Cyicaro cy'Impuzamashyirahamwe y'Umupira w'Amaguru muri Afurika (CAF) i Cairo mu Misiri kuri uyu wa Kabiri, tariki ya 30 Gicurasi 2023, ni yo yanzuye ko u Rwanda ruzahura na Uganda mu ijonjora rya mbere.

Ikipe y'Igihugu ya Uganda ni yo izakira umukino ubanza uzabera i Kampala mbere y'uko amakipe yombi ahurira mu wo kwishyura uzabera mu Rwanda.

Iyo mikino yombi izaba hagati ya tariki ya 10 n'iya 18 Nyakanga 2023, ikipe izatsinda izakomeza mu Ijonjora rya Kabiri aho izahura na Cameroun.

Cameroun n'ibindi bihugu bitandatu ntibizakina ijonjora rya mbere. Ibyo birimo Afurika y'Epfo ifite Igikombe cya Afurika, Maroc, Zambia, Nigeria, Botswana na Tunisia.

Mu gihe Amavubi y'Abagore aheruka gukina muri CECAFA yabereye i Kampala muri Kamena 2022, Ikipe ya Uganda yo iheruka gukina muri Nyakanga uwo mwaka aho yitwaye nabi uwari Umutoza wayo, George Lutalo, agahita yirukanwa ndetse akaba nta musimbura afite.

Uko tombola yose y'ijonjora rya mbere yagenze

Guinée Bissau VS Bénin
Guinée VS Ghana
Burkina Faso VS Mali
Côte d'Ivoire VS Sierra Leone
Uganda VS Rwanda
Namibia VS Equatorial Guinea
Ethiopia VS Chad
Congo VS Tanzania
Mozambique VS RDC

Source : https://umuryango.rw/imyidagaduro/imikino/article/amavubi-y-abagore-azahura-na-uganda-mu-gushaka-itike-y-imikino-olempike

Ya nkuru y'uko umwana wa Platin yasanze atari uwe bimaze kumenyekana ko ari ikinyoma cyambaye ubusa.

Mu mezi yashize nibwo ku mbuga nkoranyambaga zigiye zitandukanye hasakaye amakuru ko Platin yatandukanye n'umugore we.

Amakuru yavugaga ko batandukanye bapfuye ko Platin yasanze umwana atari uwe.

Byavuzwe ko Platin yagiye gupimisha niba umwana ari uwe aho yasanze atari uwe.

Kuri ubu ubu amakuru ahari mashya ni uko Platin P atigeze ajya gupimisha umwana ngo arebe niba ari uwe.

Umuyobozi Umuyobozi wa Rwanda Forensic Laboratory (RFL), Dr Karangwa Charles amaze kubwira abanyamakuru ko ibyavuzwe ku muhanzi Platini ko umwana atari uwe ari ibinyoma.

 

Source : https://yegob.rw/igihuha-cyubahwe-ya-nkuru-yuko-umwana-wa-platin-yasanze-atari-uwe-bimaze-kumenyekana-ko-ari-ikinyoma-cyambaye-ubusa/

Nyegera unyegekeho umubyimba,
Imitima ihure ishire agahinda,
Nkumare intimba uhore undirimba,
Dushinge imishinga itajya ihomba,
Tubyaze ifaranga ubuhanga,
Nsubire guhanga ari wowe mpanga.

Nguhange ngutake ntabeshya,
Ngukunde nkurinde ababeshya,
Nkwereke abo bose bishunga,
Ko bafite ubwiza nta na Mba,
Bakugirire ishyari bahige,
Nkurinde ntihagire ugukora.

Source : https://yegob.rw/nyegera-unyegekeho-umubyimba-imitima-ihure-ishire-agahinda-soma-uyu-mutoma-uwumutere/

Umwe muribo yahaye ubuhamya itangazmakuru avuga ko anejejwe no kubaho mu buzima butifashisha imashini mu kuyungurura amaraso ye.

Mu cyumweru gishize ni bwo mu bitaro byitiriwe umwami Fayisali habaye igikorwa cyo gusimbuza impyiko, ku barwayi zangiritse.

Ni igikorwa kibaye bwa mbere mu Rwanda ndetse no mu karere duherereyemo.

Iki gikorwa kandi cyakozwe n'abaganga b'abanyarwanda, kubufatanye n'abaganga baturutse muri Leta zunze ubumwe z'Amerika, muri kaminuza ya Michigan.

Abaganga bemeza ko nubwo abahawe impyiko byagenze neza, ndetse bamwe bakaba baramaze gutaha, basabwa kujya baza kwa muganga kenshi gukurikiranwa.

Urugero kujya mu Buhinde byasabaga umurwayi amadorali 20,000 ni ukuvuga agera kuri miliyoni 23 mu mafaranga y' u Rwanda. Aya yabaga ari ikiguzi cy'ubuvuzi gusa hatarimo itike y'indege n'ibizatunga umurwayi n'umurwaza.

Ku bitaro bya Fayisali ho ikiguzi kizagenda ku wasimburijwe impyiko ndetse no kumukurikirana ni amadorali 15,000 ni ukuvuga agera kuri miliyoni 17 mu mafaranga y'u Rwanda.

Ministeri y'ubuzima itangaza ko iri mu biganiro n'ibigo by'ubwishingizi, ku buryo bizajya byishyurira umurwayi amafaranga asabwa.

Iyi ministeri ivuga ko mu myaka irindwi ishize, u Rwanda rwohereje abarwayi b'impyiko 67 mu bihugu byo hanze cyane cyane mu Buhinde, bituma Leta yishyura amafranga agera kuri miliyoni 900.

Source : https://umuryango.rw/amakuru/mu-mahanga/ubuzima/article/gusimbuza-impyiko-n-igikorwa-cy-indashyikirwa-u-rwanda-rumaze-kugeraho

Inkuru ye itangira wumva iteye ubwuzu. Yagize ubumuga bwo kutabona afite imyaka ibiri. Mu 2019 yari afite imyaka 19 y'amavuko, bivuzeko ubu amaze kugeza imyaka 23. Yizihiza isabukuru ku itariki 25 Gicurasi. 

Mu mpera za 2019 ni bwo Murindahabi Irene yakiriye Bosco Niyo mu kiganiro yakoraga ku Isango Star (Tv). Icyo gihe Bosco Niyo (niko yavuze abajijwe uko yitwa), batangira ikiganiro yabwiye Murindahabi ati: 'Ubu inzozi zanjye zabaye impamo kuba twahuye nari naraguhamagaye ntazi uko nzakubona.'

Iki gihe yacuranze indirimbo za Adrien Misigaro yanifuzaga guhura nawe. Undi muhanzi yifuzaga guhura na we ni Aline Gahongayire. Ntibyatinze kuko Gahongayire yaje guhura na Niyo Bosco banafatanya kuririmba zimwe mu ndirimbo ze. Iki kiganiro ni na cyo cyabaye inzira yo kuzamura izina n'impano ya Niyo Bosco. 

Baje kuba inshuti magara ku buryo muri iyi minsi Aline Gahongayire akoresha Niyo Bosco mu kwandika no kuyobora indirimbo mu ifatwa ry'amajwi (hari indirimbo y'umuhanzi wo muri Canada yafatanyije na Aline Gahongayire byose byakozwe na Niyo Bosco aranayiyobora mu ifatwa ry'amajwi yayo, nisohoka muzayumva dore ko yakozwe na Santana).

Niyo Bosco ntiyari azi umuziki agomba gukora kubera amikoro yari hafi ya ntayo

Muri iki kiganiro yagiranye na Murindahabi yamubajije ubwoko bw'umuziki akora undi ati: 'Ntabwo ndamenya career yanjye kuko iyo umuntu akiri muto ntaba azi ibyo yakora'.

Indirimbo yari afite zari izo kuramya no guhimbaza Imana zisaba abantu kugira ubumuntu. Ati: 'Ubutumwa bwiza si ubwo muri church gusa, ikintu cyose gituma udakora ikibi uba uri kwigisha gospel, jye mvuga ko naririmba gospel kuko sinaririmba indirimbo z'isi. Sinari nagira abafana ariko abantu babashije kunkunda muri aka kanya yamfasha”. 

Yanatanze nimero za telefoni kuri televiziyo kuko yari akeneye ubufasha pe, “0784409039 uwashaka kumfasha yahamagara iyi nimero”. Yari anafite channel ariko zitazwi yarazivuze muri icyo kiganiro cyamaze iminota 25.

Wa mwana ufite ubumuga bwo kutabona yaje kwamamara izina rye urikoresheje akajya ku meza akirirwa yihaganyura yatereye agati mu ryinyo. Muri kiriya kiganiro Murindahabi yasabye Niyo Bosco kugira ijambo rya nyuma abwira abafana. Undi ati: 'Nta bafana mfite'. Murindahabi aramuhumuriza amurema agatima, ati: “Humura uzabagira kandi si kera'.

Ibi byaje kuba impamo. Hari ku itariki 7 Mutarama yo mu 2020 ubwo Niyo Bosco yashyiraga hanze indirimbo “Ubigenza Ute”. Mu myaka itatu ishize iyi ndirimbo yarebwe na miliyoni 3,300 . Iyo uyiteye buri wese arakwikiriza, bivuze ko yabaye ikimenyabose (ariko abakurikira umuziki nyarwanda nibo mvuga).

Kuri Spotify niyo ndirimbo ye yumviswe cyane ariko ntiri kuri konti ye ahubwo iyitwa “Ishyano” niyo yumviswe na 1016,945 (listeners) ku kwezi yumvwa n'abasaga 2,956.

Niyokwizerwa Bosco wabonye izuba mu 2000, yaje kwinjira mu mubare w'abanditsi b'indirimbo beza umuziki nyarwanda ufite

Yaje mu kibuga cyarimo abahanga mu gushishimura indirimbo nka Danny Vumbi, Mico The Best, Issa Noel Kalinijabo, Nelson Mucyo n'abandi. Kubera yari mu biganza byiza, yahise yiharira isoko aba ariwe uhangwa amaso na buri wese kuko yandikaga indirimbo ukumva ifite umwihariko. 

Ubwo Vestine na Dorcas bamurikaga umuzingo wabo wa mbere bise “Nahawe Ijambo”, bashimiye Niyo Bosco ku ruhare yagize mu kwandika ziriya ndirimbo zabo. Abahanzi nka Bwiza, Bruce Melodie, Aline Gahongayire nibo bazi neza imyandikire ya Niyo Bosco.

Iyo urebye kuri Spotify usangaho indirimbo ze ko ziri mu zumvwa cyane nubwo bigaragara ko atahashyira imbaraga ku bwo kutamenya agaciro kayo. Benshi mu bahanzi bo mu Rwanda no muri Tanzania bizerera kuri YouTube kurusha izindi mbuga (tuzagaruka kuri iyi nkuru ubutaha).

Urugero kuri shene ye ya YouTube hariho indirimbo zisaga 16 nyamara kuri Spotify hariho indirimbo icyenda zonyine. Bivuze ko atahashyira imbaraga.

Ese Niyo Bosco yaba yaragiye kwangara?

Akiri kumwe na Murindahabi bene utu dutwiko ntitwari dukenewe

Uyu mugani, bawuca iyo bumvise umuntu yikuye mu bususuruke (ahantu heza) akajya guhobagizwa n'akaga (kumera nabi abyiteye) imihanda yose; ni bwo bavuga, ngo 'Yagiye kwangara!' 

Wakomotse kuri Nyiramataza muka Rukali; ahasaga umwaka wa 1400. Yikuye mu bususuruke yicyura kwa Ngara, amaze kugerayo hamuhindukira inka y'inkungu (hamumerera nabi cyane); atangira guhobagizwa n'umuruho (kubaho nabi).

Hari ku itariki 22 Ukwakira mu 2022 ubwo inkuru yasakaraga i musozi ko Murindahabi na Niyokwizerwa zabyaye amahari.

Mu ibaruwa Niyo Bosco yandikiye MI Empire asezera, yatanze impamvu ebyiri zatumye ahitamo gusezera kuri Mulindahabi Irene bari bamaze imyaka itatu bakorana ari n'inshuti z'akadasohoka.

Mbese bamwe ba ‘soma mbike’. Yari yaramutonesheje birenze urugero. N'iyo baganiraga barasetsanyaga agati kagaturika akandi kakamera. Nubwo nta byera ngo de!

Niyo Bosco akeneye ucuruza izina rye bakagabana inyungu

Kimwe mu byo Niyo Bosco ashinja MI Empire ni ukuba batamukorera ibihangano nk'uko biri mu masezerano. Ikindi avuga ni uko kuva batangira gukorana atarahabwa 30% by'amafaranga aturuka ku mbuga nkoranyambaga zirimo na Youtube.

Niyo Bosco yasezeye muri MI Empire nyuma y'inyandiko yari yabanje gusohora agaragaza ko atishimiye gukorana n'iyi sosiyete bigatera urujijo ariko ukuri kwabyo ntiguhite kumenyekana.

Muri ubu butumwa Niyo Bosco yari yagize ati 'Ntabwo ndi gukunda uwo ndi kuba we, ntabwo byumvikana nk'ibisanzwe ariko nkumbuye ahahise hanjye kuruta ejo hazaza. Ndumva nacitse intege cyane.' Yakomeje agira ati: 'Ndambiwe no kwirengagiza uwo ndiwe nita ku kugaburira ibifu by'abandi, nyamara icyanjye cyishwe n'inzara.'

'Ndifuza ko ibintu byose abantu bita ko nagezeho byakwibagirana nkarwanira ishema ryanjye ntashingiye ku muntu ushaka gutera imbere huti huti naho njye ndimo gusubira hasi. Sinshaka kugira uwo nshinja, gusa uwo mbwira ariyizi.'

Niyo Bosco na Sunday Entertainment bahimbye ikinyoma ko basinye amasezerano kandi ari agatwiko

Tariki ya 1 Mutarama 2023 ni bwo Niyo Bosco yasinyanye na Sunday Entertainment Group Management amazezerano yo kureberera inyungu ze nk'umuhanzi bamukorera buri kimwe kugira ngo umuziki we ugere ku rwego mpuzamahanga. Ni ukuvuga ko itariki 13 Gashyantare bari bamaze gusesa ariya masezerano ya baringa. Ni iminsi 43 bamaze mu cyuka cyo kubeshya ko bakorana.

Nyuma y'umwuka mubi wavugwaga hagati y'impande zombi, Sunday Entertainment yatunguranye ivuga ko yamaze gutandukana n'uyu muhanzi. Nkibimenya nari nzi ko ari amayeri barimo agamije gutwika nk’uko bimenyerewe kuko nta masezerano yari yabayeho.

Mu itangazo yasohoye yagize iti “Umuhanzi Niyokwizera Bosco uzwi nka Niyo Bosco, ntabwo akiri mu barebererwa inyungu na Sunday Entertainment Group Management.''

Niyo Bosco akeneye uwo bakorana wujuje ibiki?

Amezi 10 arirenze nta gihangano gishya asohora. Nubwo hari izo yagiye akorana n'abandi zigapfuba ntizigere aho izo yari asanzwe akora zageze. Afite imishinga myinshi muri studio ndetse aranateganya gukora umuzingo.

Ariko rero akeneye umureberera inyungu uzi neza ibijyanye no gushaka amasoko, uziranye n'abahanzi ku buryo azakomeza kumuhuza n'abakeneye umwanditsi ndetse n'umufasha kwamamaza ibikorwa bye. Ku giti cye ibi byose ntiyabyishoborera. 

Icyakora nanone ntakeneye uwo atunga akikungahaza nyamara Niyo Bosco akiyicira isazi mu maso. Nibura Niyo Bosco akeneye uwo bagirana amasezerano yo kugabana umusaruro ku kigero cya 50% kuko we ubwe yamaze kugira izina (brand). 

Igikenewe ni ugucuruza ririya zina kuko usibye na we na ba Wizikid bafite abashinzwe kubagurisha (Brand manager). Kuba Wizkid yarabaye icyamamare amahanga atangarira, abikesha Jada Pollock.

Uyu afatwa nka rwiyemezamirimo uzi neza gucuruza impano z'ibyamamare (Talent manager). Yacuruje amazina y'abarimo Chris Brown, Akon, Didier Drogba, Pia Mia n'abandi.

Diamond Platnumz afite abajyanama basaga batanu bose ntibaryama ngo basinzire batarabonera akazi Chibu Dangote. Barimo Jorge Mendez wiyita Sallam Sk, Mkubwa Fella, Ricardo Momo, Makamwe Fumbwe na Babu Tale. 

Niba umuhanzi afite abamushakira akazi batanu kandi nawe ubwe ari igifi kinini mu nyanja, Niyo Bosco yaba ari nde wo gutashya, akavoma, agateka akiyarurira akaniyicarana ku meza? Bivuze ko Niyo Bosco akwiriye gushaka umucuruza mu buryo bwo gusaranganya inyungu (win win situation).

Ndetse bibaye byiza yanashaka ushinzwe imbuga nkoranyambaga ze kuko iyo urebye usanga zikora biguru ntege. Ndetse na telefoni ye ni kenshi iba izimije bivuze ko uwashaka kumuha ikiraka kumufatisha byasaba kumurangisha cyangwa ukanyura ku nshuti n'abaturanyi.

Mu gusubiza kiriya kibazo uwavuga ko Niyo Bosco ari mu butengamare ntiyaba ari kure y'ukuri kuko amafaranga yose akoreye ntawe bayagabana. Uwakenera kumuha impano nta muntu ayinyuzaho. Ikirenze kuri ibyo ubu ubuzima bwe buri mu biganza bye ku buryo ibyo yitaga ko bimubangamiye yabishyize ku iherezo. 

Icyakora akwiriye kwinjira neza mu bucuruzi bushingiye ku masezerano akabyaza umuziki we amafaranga nawe mu minsi ya vuba tukazaba tubona inzu zigeretse yasaruye mu muziki n'imodoka nziza agendamo ndetse n'umuziki we uri gucurangwa hose nk’uko byahoze.

Reba Buriyana aheruka gusohora mu mezi 10 ashize

Source : https://inyarwanda.com/inkuru/129962/niyo-bosco-yamaze-imyaka-itatu-mu-biganza-bya-murindahabi-iminsi-43-muri-sunday-entertainm-129962.html