APR FC yerekanye umukinnyi w’umugande ukina mu kibuga hagati, Taddeo Lwanga yasinyishije imyaka 2.}}
Ni nyuma y’uko mu ijoro ryakeye yatangaje isinya ry’umurundi, Nshimirimana Ismaïl Pitchou wakiniraga Kiyovu Sports.
Abakunzi ba APR FC amatsiko akaba ari menshi cyane yo kumenya abakinnyi bose b’abanyamahanga iyi kipe yaguze, ni nyuma y’imyaka irenga 10 ikinisha abanyarwanda gusa.
Mu gitondo cyo kuri uyu wa Gatandatu tariki ya 8 Nyakanga 2023, iyi kipe y’Ingabo z’Igihugu ikaba yatangaje ko yasinyishije uyu mukinnyi ukina mu kibuga hagati uje kubafasha kugera mu matsinda y’imikino Nyafurika.
Taddeo Lwanga w’imyaka 29, akaba yasinyiye iyi kipe amasezerano y’imyaka 2 yambara umukara n’umweru.
Taddeo Lwanga ni umukinnyi uhoraho mu ikipe y’igihugu ya Uganda (Uganda Cranes) yigeze no kubera kapiteni.
Yakiniye amakipe atandukanye muri Uganda arimo Express FC, SC Villa na Vipers, akazi yagakomereje muri Simba SC yo muri Tanzania 2020-22 bakaba barageranye mu mikino Nyafurika.
Aje muri APR FC avuye mu ikipe ya AS Arta Solar7 yo muri Djibouti aho yari amaze umwaka umwe.
Aba bakinnyi kimwe n’abandi APR FC itaratangaza baje gufasha iyi kipe kongera kwicara ku meza y’amakipe akomeye mu ruhando rwa Afurika aho uyu mwaka izakina CAF Champions League nyuma yo kwegukana igikombe cya shampiyona.
Source : http://isimbi.rw/siporo/article/apr-fc-yerekanye-taddeo-lwanga-amafoto
Ibi biheruka kwemezwa na LT Gen Mubaraka Muganga wari Chairman wayo, aho yemeje ko iyi kipe nitsindira guhagararira u Rwanda mu mu mikino mpuzamahanga bazagarura abanyamahanga.
Nyuma yaho APR FC itwariye Shampiyona ya 2022-2023 ikaba izakina imikino Nyafurika, yahise ishyira mu ngiro gusinyisha abanyamahanga ihereye ku murundi Nshimirimana Ismael Pitchou.
Pitchou aje muri APR FC nyuma yo gusoza amasezerano y'imyaka ibiri muri Kiyovu SC yagezemo mu mwaka w'imikino wa 2021-2022 avuye i Burundi. 
Nk'uko byanditswe n'urubuga rwa AP FC, Pitchou ni umukinnyi witezweho kuza gukora ikinyuranyo, ku buryo usibye gufasha APR F.C kugera ku ntego zayo mu marushanwa mpuzamahanga, azanafasha abakinnyi b'Abanyarwanda kuzamura urwego rwabo.
APR FC yatwaye Shampiyona ikaba izakina imikino ya CAF Champions League, iritegura kongeramo abandi bakinnyi b'abanyamahanga aho bivugwa ko muri rusange izaba ifite abakinnyi 7 bakomoka hanze y'u Rwanda. 
