Author: webrwanda

Iminsi 4 igiye gushira mu Rwanda – Kigali habera inama igaruka ku ruhare rw'umugore. Tugiye kubagezaho amateka ya Jill Sheffield uri mu batangije uru rugendo rwa Women Deliver.

Nubwo imyaka ya Sheffield itemezwa neza ariko bivugwa ko afite 83. Yabonye impamyabumenyi y'icyiciro cya kabiri cya Kaminuza mu Burezi yakuye muri Kaminuza Glassboro mu 1961, aza kubona iy'icyiciro cya gatatu mu burezi mpuzamahanga mu 1963 yakuye muri Kaminuza ya Columbia.

Yatangiye gukora nk'umukorebushake mu birebana no kuboneza urubyaro mu bitaro bya Pumwami muri Kenya, akaba ari ho hantu hambere yakoreye muri Afurika y'Uburasirazuba.

Muri icyo gihe byari bigoye ko abagore bemererwa kuboneza urubyaro batari kumwe n'abagabo babo, gusa yabyitwayemo neza asoje inshingano ze asubira gukorera i New York aho yari ashinzwe uburezi mpuzamahanga muri Carnegie Corporation.

Mu 1987 ni bwo yari mu batangije Umuryango wita ku iterambere ry'ikiremwamuntu wa 'Family Care International' wibanda ahanini ku bihugu bikiri mu nzira y'amajyambere, awubera Umuyobozi Mukuru mu gihe kingana n'imyaka 20.

Uyu muryango ni wo wa mbere washyize imbere ibirebana no kurwanya impfu z'ababyeyi bapfa babyara. Mu mwaka wa 2007 ni bwo yatangije Women Deliver inama mpuzamahanga yiga ku ruhare rw'umugore mu iterambere.

Iyi nama yatangiye kuba umuyoboro ukomeye w'ibisubizo by'ibibazo by'abagore ku isi, itangira kuba kandi isoko y'ubushobozi bw'ishyirwa mu bikorwa ry'imishinga mito n'iminini y'abari n'abategarugori.

Uyu mubyeyi yaje kujya mu kiruhuko cy'izabukuru mu mwaka wa 2016, ariko ibikorwa bya Women Deliver birakomeza.

Indi mirimo Sheffield yakoze!

Mu 2011 yari muri ba Komiseri 30 b'Umuryango w'Abibumbye bashinzwe gukusanya amakuru no kureba uko yabyazwa umusaruro ku buzima bw'umugore n'umwana.

Myinshi mu mirimo yagiye akora, yabaga ifite aho ihuriye n'ubuzima bw'umwana n'umugore aho yabaga ari Umuyobozi Mukuru w'Imiryango yigenga ndetse n’umujyanama.

Yanahawe ibihembo bitandukanye mpuzamahanga birimo icyo yahawe n'Umuryango w'Abanyamerika wa Public Health cya Life Achievement Award, hari muri 2008.

Muri uwo mwaka kandi igihembo cy'Umuryango w'Abibumbye cyahawe Family Care International yashinzwe n’abarimo Sheffield, ku bw'uruhare rwayo mu guteza imbere ubuzima bw'imyororokere.

Kaminuza ya Columbia yizemo, yamuhaye igihembo cy'umunyeshuri w'agatangaza yigeze igira. Melinda Gate, Ikigo Mpuzamahanga ku bushakashatsi ku buzima bw'umugore, bahawe igihembo cya 'Lifetime Achievement Award'.

Jill Sheffield watangije Women Deliver

Umutoza w’umufaransa, Thierry Froger watoje amakipe arimo Lille ni we mutoza mushya wa APR FC ugomba gusimbura Ben Moussa wasoje amasezerano ye.

Ikinyamakuru Fine FM cyatangaje ko uyu mutoza ufite ibyangombwa by’ubutoza by’ikirenga bya UEFA Pro ari we wamaze kumvikana n’iyi kipe y’ingabo z’igihugu kuyizamo kuyitoza.

Ni umutoza benshi bibuka muri 2018 ubwo yari amaze kugirwa umutoza wa USM Alger yo muri Algeria yahise yirukana umunyarwanda, Emery Bayisenge wari umaze iminsi mike asinyiye iyi kipe aho yavuze ko atari ku rwego rwayo.

Ubwo yari yaje mu Rwanda gukina na Rayon Sports mu matsinda ya CAF Confederation Cup, icyo yagize ati 'Nageze mu ikipe baramaze kugura abakinnyi benshi, ariko bampa uburenganzira bwo kuba nagira abakinnyi ntoranya bakahaguma, hakagira n’abandi bakinnyi natanga uburengazira bakigendera, ni muri urwo rwego n’umukinnyi Emery nabwiye ikipe ko yamureka akigendera.'

Thierry Froger ni umutoza w’umufaransa w’imyaka 60 aho yakiniye Lille, Grenobles na Le Mans zo mu Bufaransa.

Yatoje amakipe menshi atandukanye nka Le Mans, Châteauroux, Lille, Reims, Nîmes zo mu Bufaransa, ku mugabane wa Afurika yatoje amakipe nka TP Mazempe, USM Alger na Arta/Solar7 aherukamo. Yanatoje ikipe y’igihugu ya Togo.

Umutoza mushya wa APR FC, Thierry Froger

Umunya-Tunisia, Yamen Zelfani ‘Alfani’ yageze mu Rwanda aho aje gutoza ikipe ya Rayon Sports, akaba yavuze ko abizi neza ko bafite akazi gakomeye ko gukora uhereye kuri Super Cup.

Ni nyuma y’uko ageze mu Rwanda mu gitondo cyo kuri uyu wa Kabiri tariki ya 18 Nyakanga 2023 aje gutoza Rayon Sports mu gihe cy’umwaka umwe.

Zelfani w’imyaka 43 akigera ku Kibuga Mpuzamahanga cy’Indege cya Kigali i Kanombe, yavuze ko abizi neza ko aje mu gihe hari akazi kenshi kandi gakomeye ko gukora uhereye kuri Super Cup bazahuramo na APR FC (izaba tariki ya 12 Kanama 2023).

Ati 'Ndifuza kubikorera abafana, ikipe ndetse n’umuryango mugari wa Rayon Sports, ndabizi ko mfite akazi gakomeye ko gukora tugomba gutangirira kuri Super Cup nyuma tukajya mu mikino Nyafurika.'

Yasabye abafana kumushyigikira ndetse n’ikipe muri rusange. Ati 'Abafana bose banshyingikire, bashyigikire ikipe, bashyigire abakinnyi.'

Yamen Zelfani yavutse tariki 4 Nzeri 1979, avukira muri Tunisia. Yigiye gutoza mu makipe y’abato b’ikipe ya Stade Tunisien y’iwabo. Nyuma yayibereye umutoza wungirije mbere yo kwerekeza muri Saudi Arabia.

Muri Saudi Arabia yatangiriye ubuzima muri Abha Club yo mu cyiciro cya mbere 'Saudi Pro League’ ari umutoza wungirije nyuma akayitoza ari umutoza mukuru hagati ya 2012-2015.

2015 yagarutse muri Afurika atoza Nouadhibou yo muri Mauritanie ayitoza umwaka umwe mbere yo kwerekeza muri Al-Merrikh yo muri Sudan, aho yatwaye igikombe cya Shampiyona 'Sudan Premier League 2018-19 n’igikombe cy’igihugu 'Sudan Cup 2018′.

Mu 2019 yerekeje muri Dhofar FC yo muri Oman ayihesha Super Cup y’icyo gihugu 2019. Mu 2020 yagarutse muri Afurika atoza JS Kabylie yo muri Algeria aho yayifashije kurangiriza ku mwanya wa 3 muri Shampiyona ya Algeria anasohokera iki gihugu muri CAF Confederation Cup.

Mu 2021 yasubiye iwabo muri Tunisia atoza AS Soliman mbere yo gusubira muri Saudi Arabia aho yatoje Al-Kawkab yo mu cyiciro cya kabiri. Ubu aje mu Rwanda aturutse Al-Talaba yo muri Iraq yatozaga umwaka ushize w’imikino.

Iyi kipe kandi ikaba yaraye yakiriye Umutoza ushinzwe kongerera ingufu abakinnyi, Umunya-Afurika y’Epfo Ayabonga Lebitsa ‘Smash’ wageze i Kigali ku wa Mbere saa Tatu z’ijoro aho byitezwe ko bombi bakoresha imyitozo yo kuri uyu wa Kabiri.

Umutoza ushinzwe kongerera abakinnyi Ayabonga Lebitsa yageze mu Rwanda

Yamen Zelfani ‘Alfani’ umutoza mushya wa Rayon Sports yageze mu Rwanda