Author: webrwanda

Taylor Swift umwe mu bahanzikazi bahetse injyana ya Pop ku rwego mpuzamahanga, yongeye kwandika amateka mashya aho yabaye umugore wa kabiri ufite alubumu nyinshi zaje ku mwanya wa mbere ku rutonde rwerekana imizingo y’indirimbo ikunze ku isi yose. Uru ni urutonde rwa Billboard Hot 200.

Alubumu nshya ya Taylor Swift yise ‘Speak Now II (Taylor’s Version) yasohotse mu ntangiriro z’uku kwezi. Iyi alubumu imaze iminsi ibarika ku ntoki yaciye agahigo iba iya mbere kuri Billboard Hot 200, ihita inaba alubumu ya 12 y’uyu muhanzikazi igiye ku mwanya wa mbere.

Alubumu nshya ya Taylor Swift yaje ku mwanya wa mbere kuri Billboard Hot 200, iba iya 12 ye ije kuri uyu mwanya

Taylor Swift ubaye umuhanzikazi wa kabiri ku isi uciye aka gahigo, ubusanzwe kari gafitwe na Barbra Streisand wari usanzwe afite alubumu 11 zimaze kuza ku mwanya wa mbere kuri uru rutonde rwifuzwa kujyaho naburi muhanzi.

Aka gahigo kandi Taylor Swift agahuje n’umuraperi kabuhariwe Jay Z wabaye umuraperi wa mbere ufite alubumu zigera kuri 14 zabaye iza mbere kuri Billboard Hot 200. Itsinda rya The Beatles naryo niryo rimaze kugira imizingo myinshi igera kuri 19 mu gihe umuraperi Drake afite imizingo 12 yabaye iya mbere kuri Billboard Hot 200.

Aka gahigo Taylor Swift yaciye gasanzwe gafitwe n’ibyamamare birimo Jay Z

Taylor Swift acuye aka gahigo nyuma yaho mu Kwakira yabaye umuhanzi wa mbere wigeze gufata icyarimwe imyanya 10 yose ku rutonde rw’indirimbo zikunzwe muri Amerika, nyuma yaho yaramaze kumurika alubumu ye yise ‘Midnights’.

Miliyoni 200 z’amayero nizo zaguzwe abakinnyi bashya iyi kipe y’Abarashi yasinyishije aribo Declan Rice yakuye muri West Ham ,Jurrien Timber yakuye muri Ajax ndetse na Kai Havertz bakuye muri Chelsea.

Kugura aba bakinnyi uko ari 3 no kuba bari bamaze kongerera Bukayo Saka amasezerano nibyo byatumye Arsenal itumbagira ihita igira abakinnyi bahenze kurusha andi makipe ku Isi aho bafite agaciro ka Miliyari 1 na miliyoni 51 z’amayero.

Ku rutonde rw’amakipe ahenze ku Isi rwakozwe n’ikinyamakuru The Sun ku mwanya wa 2 hariho ikipe ya Manchester City aho ifite agaciro kangana na miliyari 1 na miliyoni 34 z’Amayero. 

Ku mwanya wa 3 hazaho ikipe yo mu Bufaransa ya Paris Saint-Germain,ifite agaciro ka miliyoni 886 z’Amayero. Nyuma yayo hakurikiraho Real Madrid yo muri Espagne ifite agaciro ka miliyoni 861 z’amayero nayo igarukirwa na Bayern Munich ifite agaciro ka miliyoni 829 z’amayero.

Kuba Declan Rice yarinjiye mu ikipe ya Arsenal aguzwe amafaranga menshi nabyo biri muri  bimwe byatumye iyi kipe ihenda.

Kuri uru rutonde rw’amakipe 10  yiganjemo nayo mu Bwongereza kuko ku mwanya wa 6 hahita haza ikipe ya Chelsea y’umutoza mushya Mauricio Pauchetino uri kugenda agerageza kugabanya abakinnyi,ifite agaciro ka miliyoni 755 z’amayero.

Ku mwanya wa 7 hahita haza ikipe ifite igikombe cya shampiyona ya Espagne giheruka ya FC Barcelona aho ifite agaciro ka miliyoni 735 z’amayero. Nyuma yaho haza ikipe itozwa na Jurgen Klopp ya Liverpool, abakinnyi bayo bafite agaciro ka miliyoni 735 z’amayero.

Ikipe iza ku mwanya wa 9 ubanziriza uwa nyuma ni Manchester United ifite agaciro ka miliyoni 726 z’amayero, niyongeramo umuzamu Andre Onana nk’uko biteganyijwe agaciro kaziyongera. Ku mwanya wanyuma ariwo wa 10 ni Tottenham ifite agaciro ka miliyoni 672 z’amayero.

Uko amakipe akurikirana mu kugira abakinnyi bahenze

Kai Havertz nawe ari mu batumye Arsenal ariyo iba iya 1 ku Isi mu kugura agaciro gahenze

Abatoza 2 b’amakipe afite abakinnyi bahenze ku Isi 

Ku wa Gatatu w’iki cyumweru nibwo byamenyekanye ko rurangiranwa muri sinema no mu gutera urwenya Kevin Darnell Hart ari mu Rwanda hamwe n’umuryango we. Uyu mugabo yageze i Kigali mu ijoro ryo kuri uyu wa Kabiri tariki 18 Nyakanga 2023.

Byatangajwe ko icyazanye Kevin Hart n’umuryango we ari gutembera u Rwanda, no gusura ingagi mu Birunga. Uyu munyarwenya w’icyamamare ku rwego mpuzamahanga waherekejwe n’umugore we w’umunyamideli ,Eniko Hart bamaze imyaka 8 barushinze bari muri couples z’ibyamamare zikunze kugarukwaho cyane.

Uretse kuba bombi bafite amazina akomeye mu myidagaduro yo muri Leta Zunze Ubumwe za  Amerika bikaba aribyo bituma akenshi bakunda kugarukwaho, banakunze kuvugwa cyane bitewe n’ubuzima bwabo busanzwe babayemo.

Byumwihariko urugo rwabo rwigeze kuba igitaramo ubwo byamenyekanaga ko Kevin Hart yaciye inyuma Eniko Hart.

Urugo rwa Kevin Hart na Eniko Hart rwari rugiye gusenyerwa n’ubuhehesi bw’uyu munyarwenya

Urugo rwabo kandi rwanashyizwe ku rutonde rw’ibyamamare byari bigiye gusenyerwa n’ubuhehesi hakabura gato. Kevin Hart yenze gusigwa n'umugore we Eniko Hart nyuma y’uko  amashusho amuca inyuma  n’inkumi akwirakwiriye ku mbuga nkoranyambaga mu 2017. 

Ni amashusho yerekanaga uyu munyarwenya ari kwishimishanya n'inkumi mu cyumba cya hoteli n’andi yamwerekanye bari gusomanira mu modoka. Ibi byatumye Kevin Hart ahita ashyira andi mashusho kuri Instagram asaba imbabazi umugore we n'umuryango we avuga ko ibyo yakoze ari amakosa byumwihariko yasabye imbabazi umugore we dore ko ibi byabaye ubwo yari atwite umwana wabo wa mbere.

Iki gihe muri 2017 Kevin Hart yakoze ibishoboka ngo yiyunge n'umugore we ndetse yanishyuye umuraperi J. Cole akora indirimbo yitwa ‘Kevin’s Heart’ imusabira imbabazi ku mugore we yaciye inyuma Isi yose ikabimenya ndetse itangazamakuru rikibasira umuryango wabo.

Eniko Hart yasabye umugabo we gushaka ahandi hantu ho kuba nyuma yo kumuca inyuma

Mu 2018 Kevin Hart yaje gutanga ubuhamya bw’uko byari bimeze ubwo amashusho aryamanye n’indi nkumi yajyaga hanze. Iki gihe yavuze ko umugore we yamusabye kuba atari mu nzu yabo agashaka ahandi aba agiye kuba mu gihe batariyunga. Kevin yavuze ko yamaze amezi 3 atarara iwe kubera ko umugore yari yaramurakariye bigatuma ashaka indi nzu yo kubamo.

Ibyo kuba yaragiye gusenyerwa n’ubuhehesi, Kevin Hart yakunze kubigarukaho cyane mu bitaramo by’urwenya dore ko n’ubundi akenshi usanga ibyo avuga mu rwenya rwe ari ibyamubayeho. Mu rwenya rwe rwanyuze kuri Netflix mu 2019 yise ‘Irresponsible’ yagarutse ku kuba imyitwarire ye yari imusenyeye.

Yagize ati: ”Ntabwo ndibumere nk’abandi bagabo ngo mvuge ko inzoga arizo zatumye nca inyuma umugore wanjye cyangwa ko umubiri ariwo wanshutse. Ntabwo ndibubeshyere inshuti zanjye ko arizo zancutse ahubwo ndemera ko njyewe arinjye wafashe umwanzuro nakwita uw’ikigoryi nkaryamana n’inkumi twahuriye mu kabyiniro”.

Kevin Hart yakunze no gutera urwenya ku byamubayeho nyuma y’uko amashusho aryamanye n’inkumi agiye hanze

Abivuga aseka Kevin Hart yabihinduye urwenya ati: ”Ese ubwo mwaratunguwe mubonye ariya mashusho? Wasanga mwaravuze ko mbatengushye kandi musanzwe mubizi ko ndi ikigoryi. Iyo nza kuba ntari ikigoryi simba narabikoze. Imbabazi umugore wanjye yazimpaye kuko nawe abizi ko ndi ikigoryi ntakundi yabigenza”.

Nk’uko undi musitari wese uzi ubwenge abigenza akabyaza umusaruro ‘Scandal’ cyangwa se ibintu bibi byamubayeho, niko Kevin Hart nawe yabigenjeje ubwo benshi bari kumwota ku mbuga nkoranyambaga bamugayira ko yaciye inyuma umugore we inkuru ikaba kimomo.

Iki gihe we yahise asinyanya amasezerano na Netflix imwishyura miliyoni 30 z’amadolari maze ikora filime mbarankuru y’uruhererekane (Documentary) igaruka ku byabaye mu rugo rwe ubwo byamenyekanaga ko yaciye inyuma umugore we.

Aba bombi bakoze filime mbarankuru igaruka ku byabaye ubwo Kevin Hart yacaga inyuma Eniko

Iyi filime mbarankuru ifite ibice 6 aho kuva ku gice cya mbere kugeza ku gice cya 3 Kevin Hart n’umugore we Eniko Hart bavuga urugendo rwabo rwo kwiyunga kuba mu 2017 hasohoka amashusho aryamanye n’umukobwa, byumwihariko umugore we yagarutse ku ngaruka byamugizeho zirimo nko kuba yari yafashe umwanzuro wo kwaka gatanya Kevin Hart.

Muri iyi filime iri mu zarebwe cyane kuri Netflix mu 2019, Kevin Hart n’umugore we bavuze ko kwiyunga kwabo babifashijwemo n’umuryango wabo gusa bakanasobanura ko bitabiriye ‘Couples Therapy’ mu gihe cy’amezi 8 aho baganirizwaga n’umuganga mu byimitekerereze no kunga abashakanye bafitanye ibibazo.

Kevin Hart n’umugore we babashije kwiyunga basubira kubana neza

Nyuma y’ibyo byose banyuzemo, urugo rwa Kevin Hart na Eniko Hart rwabashije kubinyuramo rwemye ndetse bombi bongera kubaka bundi bushya. Kugeza ubu babanye neza aho bamaze no kubyarana abana babiri n’abandi babiri Kevin yabyaranye n’umugore we wa mbere. Uyu muryango we w’abana bane n’umugore kugeza ubu baryohewe n’ibiruhuko barimo mu Rwanda.

Umunyarwenya Kevin Hart yasuye iduka rya Made In Rwanda mu nzu ihanga imideli ya Haute Base

Umuryango wa Kevin Hart waje mu Rwanda mu biruhuko

Kevin Hart n’umukobwa we Heaven Hart baguze imyambaro n’imitako ya Kinyarwanda

Umutoza mushya w’umufaransa, Thierry Froger watoje amakipe arimo Lille yageze mu Rwanda aho aje gutoza ikipe ya APR FC.

Uyu mugabo uje gusimbura Ben Moussa wasoje amasezerano ye, yageze mu Rwanda mu gitondo cyo kuri uyu wa Kane tariki ya 20 Nyakanga 2023.

Thierry Froger ufite ibyangombwa by’ubutoza by’ikirenga bya UEFA Pro, akaba yazanye n’umwungiriza we Khouda Karim bakoranye muri USM Alger.

Ubwo bari bageze ku kibuga cy’indege mpuzamahanga cya Kigali i Kanombe, yakiriwe n’umunyamabanga w’iyi kipe, Masabo Michel ndetse na Team Manager, Rtd Cpt Eric Ntazinda.

Thierry Froger ni umutoza w’umufaransa w’imyaka 60 yakiniye Lille, Grenobles na Le Mans zo mu Bufaransa.

Yatoje amakipe menshi atandukanye nka Le Mans, Châteauroux, Lille, Reims, Nîmes zo mu Bufaransa, ku mugabane wa Afurika yatoje amakipe nka TP Mazempe, USM Alger na Arta/Solar7 aherukamo. Yanatoje ikipe y’igihugu ya Togo.

Thierry Froger yazanye n’umwungiriza we Khouda Karim

Umwana wakirije ururabo Thierry Froger

Rtd Cpt Eric Ntazinda ni umwe mu bakiriye umutoza Thierry Froger

Umunyamabanga wa APR FC, Masabo Michel yakiriye umutoza mushya

Umukobwa wa Perezida Paul Kagame, Ange Ingabire Kagame bwa yahishuriye abamukurikira amazina y’abana be babiri b’abakobwa.

Ni butumwa yanyujije ku rukuta rwe rwa Twitter yishimira ko we n’umugabo Ndengeyingoma Bertrand abana babo bagize isabukuru y’amavuko.

Ange Kagame wakoze ubukwe na Ndengeyingoma Bertrand muri Nyakanga 2019, mu butumwa yanyujije kuri Twitter yavuze ko aba bana be ari impano idasanzwe yahawe n’Imana.

Ni abana bavukiye ukwezi kumwe n’itariki imwe ariko mu myaka itandukanye.

Umukuru yitwa Anaya Abe Ndengeyingoma yavutse tariki ya 19 Nyakanga 2020 akaba yujuje imyaka 3 y’amavuko.

Amalia Agwize Ndengeyingoma ni we buheta bwa Ange Kagame na Ndengeyingoma Bertrand akaba we ejo hashize yarujuje umwaka umwe kuko yavutse tariki ya 19 Nyakanga 2022.

07.19.20 – Anaya Abe Ndengeyingoma

07.19.22- Amalia Agwize Ndengeyingoma

My baby girls turned 3 and 1🩷 Grateful to God for the most precious gifts🙏🏾

— AIKN (@AngeKagame) July 19, 2023

Ange Kagame na Ndengeyingoma Bertrand bahishuye amazina y’abana babo

Ishyirahamwe rya mabanki mu Rwanda (Rwanda) ryateguye irushanwa rihuza banki zitandukanye mu mikino itandukanye rizaba guhera mu ntangiriro z’ukwezi gutaha.

Ni irushanwa ngaruka mwaka rizaba riba ku nshuro ya 4 aho kuri iyi nshuro rizitabirwa n’amabanki 12 mu mikino 4 (Football, Basketball, Volleyball na Swimming).

Iyi mikino ikaba izabera ku bibuga bya Mumena na Kigali Pelé Stadium (Football), Ecole des Anges (muri Volleyball), Kimironko Basketball Courts (Basketball) na Green Hills Academy (Swimming).

Ishyirahamwe ry’amabanki mu Rwanda (RBA) mu kiganiro n’itangazamakuru cyabaye ejo hashize tariki ya 19 Nyakanga 2023, bavuze ko irushanwa rizatangira tariki ya 5 Kanama rigeze tariki ya 2 Nzeri 2023, rikazajya rikinwa ku wa Gatandatu no ku Cyumweru.

Ni rushanwa umuyobozi wa RBA, Mr Tony Francis Ntore yavuze ko rizatwara arenga gato miliyoni 30 z’amafaranga y’u Rwanda.

Hazahembwa abakinnyi bitwaye neza ku giti cyabo n’amakipe aho ikipe ya mbere izahabwa igikombe n’imidali ya Zahabu (Gold), iya kabiri ihabwe imidali ya Feza (Silver) ni mu gihe iya gatatu izahabwa imidali y’Umuringa (Bronze), ibi bihembo byose nta mafaranga azabiherekeza.

Hanabaye tombola y’uko amakipe azaba ahagaze mu matsinda mu mikino itandukanye.

Volleyball

Muri Volleyball hazitabira amakipe 4 gusa, bahise batombola uko azahura, BPR izahura na BK n’aho Cogebank izahure na Ecobank izitsinze zihurire ku mukino wa nyuma.

Basketball

Atsinda A: Bank of Kigali (yatwaye igikombe), Cogebank, Access Bank na BPR

Itsinda B: Equity, Ecobank, I&M Bank na NCBA

Football

Itsinda A: Equity, Access Bank na BPR

Itsinda B: BK, Cogebank , I&M Bank, GT Bank

Tony Francis Ntore umuyobozi wa RBA

Natacha Haguma ukuriye iri rushanwa

Abanyamakuru bahawe umwanya babaza ibibazo