Author: webrwanda

Umugaba mukuru w’Ingabo z’u Rwanda, Lt Gen Mubarakh Muganga yakiriye abatoza bashya ba APR FC ku munsi w’ejo nyuma y’uko bari bageze mu Rwanda.

Mu gitondo cy’ejo hashize ku wa Kane nibwo umutoza mukuru wa APR FC w’Umufaransa, Thierry Froger yageze mu Rwanda ari kumwe n’umwungiriza we Khouda Karim baje gutangira akazi muri iyi kipe y’ingabo z’igihugu.

Nyuma yo kwakirwa n’abarimo umunyamabanga Michel Masabo na Team Manager, Rtd Cpt Eric Ntazinda ku kibuga cy’Indege, babonanye n’umugaba mukuru w’Ingabo z’u Rwanda wanahoze ayobora iyi kipe, Lt Gen Mubarakh Muganga.

Barangajwe imbere na Chairman w’iyi kipe, Lt Col Richard Karasira, mbere yo gutangira akazi bakaba barabonanye n’Umugaba Mukuru w’Ingabo z’u Rwanda, Lt Gen Mubarakh Muganga.

Nyuma yo kubonana na we bakaba bagomba guhita batangira akazi aho inshingano nyamukuru bafite ari ukugeza iyi kipe y’ingabo z’igihugu mu matsinda y’imikino Nyafurika ya CAF Champions League.

Uyu munsi ni nabwo APR FC iri burare imenye ikipe bazahura mu ijonjora ry’ibanze ry’imikino Nyafurika ya CAF Champions League 2023-24.

Lt Gen Mubarakh yakiriye abatoza ba APR FC

N:B Nta mafoto yo mu nkuru hagati turibukoreshe kugira ngo hatagira uvuga ko ariwe twavugaga

Harabura ukwezi kumwe nta gihindutse ngo umwaka w’imikino mu mupira w’amaguru 20223-24, utangire mu Rwanda, aho uzaba umwaka uhabanye n’indi yabayeho mu myaka 11 itambutse.

Tugiye kubona shampiyona itarimo impuhwe, shampiyona irimo ubusabane buke, Shampiyona buri muntu amenya ibye, shampiyona umuntu azataka abure umutabara, arire ahogore nabura uko agira ashake uwo abyegekaho.

Abana, abagabo, abagore, abatoza, abakinnyi, abayobozi b’amakipe, abanyamakuru, buri wese ategerezanyije amatsiko y’uburyo umunsi wa mbere wa Shampiyona uzaba umeze, dore ko ari nawo munsi uzatangira agahinda n’ibyishimo ku makipe 16 azakina iyi shampiyona.

Ikipe ya As Kigali niyo ibura ngo ibintu bitangire gufata irangi ku mugaragaro, dore ko kugera ubu ariyo kipe itazi uko ibintu bizagenda, ndetse ikaba ariyo kipe itarabona umutoza kugeza ubu. Tugiye kugaruka kuri bimwe mu bihe bizaranga uyu mwaka w’imikino uteye ubwoba bigendanye n’uburyo amakipe hafi ya yose yakaniye ashaka kwiyubaka.

Iyi shampiyona bamwe bazarira amarira yange gukama

Iburasirazuba, Iburengerazuba, Amajyepfo, Amajyaruguru n’Umujyi wa Kigali amarira azaba menshi mu minsi ya nyuma ya shampiyona bigendanye n’ikipe izaba yaratangiye ibintu yabigize urwenya.

Hari abo muri kubona bari kugura abakinnyi bivuye inyuma abandi abatoza babakozeho ku mpande zose, ariko ikosa rizaba rimwe ibintu byose bihinduke ipfabusa amarira atembe ikibuga cyose.

Hari umutoza utazarya Noheli

Usibye ko nta muntu wakwanga akazi, ariko hari abatoza bishoye ku makipe babizi ko bafite ubushobozi buke, ndetse amakipe bagiyemo nayo akaba ntacyo yitaho, bizarangira ku munsi wa kane gusa umutoza wa mbere azaba yatezwe imikino ishobora gusiga Noheli azayumva ari umushomeri byeruye.

Hari abatoza bashaka gufata uyu mwaka w’imikino bakawukoresha nk’uko bari basanzwe babigenza, aho hari abahabwa ikipe, batangira kugura abakinnyi bagendeye kubo bakuramo amafaranga, ariko kuri iyi nshuro bishobora kuzarohamisha ikipe izabijyamo kuko andi makipe azaba yaguze yadanangiye.

Hari ikipe zizifuza gusubiza iminsi inyuma bitagishobotse

Uku mureba ikipe ziri kugura, ikipe ebyiri zizamanuka mu cyiciro cya kabiri birahari kandi ziriturije, iminsi niyo izazitwereka.

Hari amakipe yigize ngo shampiyona turayimenyereye n’uko ikinwa turakuzi, nakandagizamo akarenge akubitwe n’inkuba yifuze ko iminsi y’igura n’igurisha yagaruka kandi bitagikunze, ikipe ibeho ihangayitse nihabaho imbabazi z’Imana abe arizo ziyitabara.

Hari ikipe zagendeye ku muvuduko w’amakipe makuru yabo uko ikipe iguze nayo ikagura ndetse hari n’izaguze zitazi n’abakinnyi zikeneye abo aribo, ariko ubwo shampiyona izatangira zizumirwa zisanze nta bakinnyi zifite.

Hari ikipe izatsindwa ibitego itigeze itekereza mu mutwe wayo

Nyuma y’uko ikipe ya APR FC igarutse ku bakinnyi b’abanyamahanga ndetse na Rayon Sports ikagura abakinnyi bavuzwe cyane, dushobora kongera kubona ibitego byinshi nk’ibyigize kubaho ubwo APR FC yatsindaga Mukungwa FC, ndetse tukongera kubona ikipe izinjira mu mukino kuwusoza bikaba induru kubera guteshwa umutwe n’ibitego.

Hari ikipe zizahugira kuvugwa mu itangazamakuru, nizigera mu kibuga bihabane

Ubu itangazamakuru riri hejuru cyane ku isoko ry’igura n’igurisha, ariko hari ikipe zizagendera mu munyenga wo kuvugwa, zibagirwe gukoresha ubusesenguzi bwimbitse bw’uburyo shampiyona izakinwa,nibikoza mu kibuga ivumbi ribatumukane.

Ikipe izatanga amanota izarinda imanuka ikiyibuka

Shampiyona y’u Rwanda ikunze kubamo umubano ukomeye aho haba hari amakipe y’inshuti z’akazasohoka, zirwaniranira ishyuka, bituma n’umusaruro nyakuri urigita.

Bigendanye n’ukuntu ikipe hafi ya zose ziyubatse hari ikipe izakinisha gutanga amanota nk’uko byahozeho, yikoreho ku buryo izarinda imanuka mu cyiciro cya kabiri izi neza icyo izize, ndetse n’ amanota yatanze.

Harabura iminsi mike igikombe cy’Afurika cy’Abagore mu mukino wa Basketball '2023 Afrobasket Women' kigatangira aho kizabera mu Rwanda, amakipe y’ibihugu akaba yatangiye kuhagaera.

Ni igikombe kizakinwa n’amakipe y’ibihugu 12, ku ikubitiro Mozambique ikaba yamaze kugera mu Rwanda aho yaje mu ijoro ryakeye ryo ku wa Kane rishyira ku wa Gatanu.

Ibaye igihugu cya mbere kihageze aho kihasanze u Rwanda ruzakira iri rushanwa rukaba rukomeje imyiteguro aho imyitozo irimbanyije.

Ni igikombe kizabera muri BK Arenga kuhera tariki ya 28 Nyakanga ni mu gihe kizasozwa ku Cyumweru tariki 6 Kanama 2023.

Ibihugu bigabanyijwe mu matsinda 4 aho buri tsinda rigizwe n’amakipe 3. Itsinda rya A ririmo u Rwanda rwakiriye irushanwa, Angola na Côte d’Ivoire.

Itsinda B ririmo Cameroon, Guinea na Mozambique. Itsinda C rigizwe na Mali, Senegal na Uganda ni mu gihe itsinda D ririmo Nigeria, Egypt na DR Congo.

Ni ku nshuro ya 3 u Rwanda ruzaba rugiye gukina imikino y’Igikombe cy’Afurika mu bagore 'FIBA AfroBasket Women' ni nyuma y’icyabereye Madagascar 2009 na Mali muri 2011.

Ikipe y’igihugu ikomeje imyitozo yitegura irushanwa

APR FC yumvikanye ku isoko ry’abanyamahanga cyane, umukinnyi w’umunyarwanda wa mbere uvugwamo igomba kuzana ni umukinnyi ukiri muto wakiniraga ikipe ya Mukura VS, Iradukunda Elie Tatou.

Kuza kwe ikaba ari imwe mu ngingo zigeze amasezerano Mukura VS na APR FC zumvikanye kugira ngo iyi kipe y’ingabo z’igihugu itize Mukura abakinnyi babiri.

Amakuru ikinyamakuru ISIMBI cyamenye ni uko APR FC yamaze kwemerera Mukura VS kuyitiza abakinnyi babiri, rutahizamu Mugunga Yves ndetse na Ishimwe Anicet ukina asatira (idafite mu mibare ya 2023-24).

Andi makuru akaba avuga ko nta gihindutse iyi kipe ya Mukura VS ku wa Mbere w’icyumweru gitaha tariki ya 24 Nyakanga 2023 ari bwo izerekana aba bakinnyi bashya yatijwe n’ikipe ya APR FC.

Kugira ngo bikunde ariko ni uko bagombaga kubisikana na Iradukunda Elie Tatou wakiniraga Mukura VS, ko yagombaga kumurekura akerekeza muri APR FC.

Nubwo iyi kipe yabanje kunangira umutima yanga kumurekura, amakuru avuga ko nyuma yaje kuva ku izima ikemera kumurekura ubu akaba ashobora kwerekeza muri APR FC.

Elie Tatou w’imyaka 17, ni umukinnyi wigaragaje mu mwaka w’imikino wa 2022-23, mu minsi ishize byanavugwaga ko ashobora kwerekeza muri Sport-Club Paderborn izwi nka SC Paderborn yo mu Budage ikina mu cyiciro cya kabiri aho yari yashimye impano ye ariko aza kugira ikibazo cyo gutinda kubona ibyangombwa.

Iradukunda Elie Tatou, ni umukinnyi wakuriye mu bato ba Mukura VS, mbere y’uko umwaka w’imikino 2022-23 utangira akaba yarazamuwe mu ikipe nkuru akaba yarakinaga umwaka we wa mbere mu cyiciro cya mbere.

Elie Tatou mu muryango winjira muri APR FC

Mugunga Yves azaba ayoboye ubusatirizi bwa Mukura VS umwaka utaha

Ishimwe Anicet na we bivugwa ko APR FC yamaze kumutiza