Author: webrwanda

Shampiyona y’icyiciro cya mbere mu Rwanda umwaka w’imikino wa 2023-24 yari yakomeje hakinwa umunsi wa 3, APR FC nta nkuru yatsinze Etoile del’Est 1-0.

APR FC yari yasuye Etoile del’Est i Ngoma aho iyi kipe yagowe no kubona igitego biyisaba gutegereza iminota 75.

Kwitonda Alain Bacca yaje gutsindira APR FC igitego cya mbere ku mupira yari ahawe na Niyomugabo Claude. Umukino warangiye ari 1-0.

Ikipe yahuye n’uruva gusenya ni Kiyovu Sports yanyagiriwe mu Bugesera na Bugesera FC ibitego 4-0.

Umukino wabereye kuri Kigali Pelé Stadium, Gasogi United yatsinze AS Kigali ibitego 2-1 ni mu gihe Sunrise FC yatsindiwe na Musanze FC i Musanze 2-1 n’aho Marines FC yatsinze Etincelles FC 1-0.

Undi mukino w’umunsi wa 3 wabaye ejo hashize, Rayon Sports yanganyije na Amagaju FC 1-1.

Ejo Police FC izakira Mukura VS n’aho Muhazi United izakire Gorilla FC.

Kiyovu Sports yanyagiwe na Bugesera FC

Mu ijambo rye, umuyobozi wa RDB, Clare Akamanzi yashimiye byimazeyo abashyitsi bose bitabiriye umuhango wo Kwita Izina barangajwe imbere na Nyakubahwa Madamu Jeannette Kagame.

Ati: “Uyu munsi twahaye izina, ikirango, ejo hazaza abana b'ingagi bavutse uyu mwaka, bitandukanye n'uko byahoze mu myaka ishize. Ndashimira mwe mwese mwasize inshingano zanyu zikomeye mukaza kwita ingagi amazina.''

Claire kandi yanaboneyeho abasaba kuba nk'ababyeyi bakajya baza kenshi gusura abana b'ingagi bise amazina kandi bakanatanga umusanzu wabo mu kuzirera neza.

Umuyobozi wa RDB kandi yabwiye abaturaye bo mu Kinigi baturiye Ibirunga bacyira igikorwa nk'iki buri mwaka ko ari imbaraga z'igihugu, kandi ari abarinzi beza b'ibidukikije ndetse ko kuba ari abaturanyi beza ba Pariki y'ibirunga ariyo mpamvu bahuye bakishimira ibyagezweho.

Aho yagize ati: ''Turabashimira cyane uburyo muhora mushyigikira ibikorwa by'ubukerarugendo. Ni mwebwe dukesha ibyiza twishimira uyu munsi mu bukerarugendo no kubungabunga Pariki.''

Umuyobozi wa RDB, Clare Akamanzi yasezeranije abaturiye Pariki ko inyungu z’ubukerarugendo zizakomeza kubageraho

Yakomeje avuga ko muri uyu mwaka urwego rw'ubukerarugendo ruhagaze neza kuko rwazamutseho 56%, ndetse ko n'uruhare rwari rusanzwe ku 10% rugenerwa abaturage rwiyongereye. Asezeranya abaturage ko RDB izakomeza guharanira ko inyungu z'ubukerarugendo zibageraho.

Ati: ''Ndabibutsa ko ubu Kwita Izina byabaye igikorwa mpuzamahanga. Isi yose ibona ibyo mukora mu kubangabunga Pariki kandi irabishima, mukomereze aho.''

Madamu Clare yakomeje abwira abashyitsi ko gushora mu kubungabunga ibidukikije ari ugushora 'muri twe ubwacu' kubera ko ibidukikije ari isoko y'ubukungu, ashimangira ko ariyo mpamvu u Rwanda rushora cyane mu bukerarugendo bubyara inyungu haba ku banyarwanda no ku mugabane muri rusange.

Ati: ''Ubukerarugendo bushingiye ku bidukikije bwatubereye inking ya mwamba mu kongera kwiyubaka nyuma ya Covid 19. Nejejwe no kubabwira ko twiteguye kurenza amafaranga twinjizaga mbere y'icyorezo, muri uyu mwaka wa 2023. Ndashimira buri wese ubarizwa mu bukerarugendo ku bw'ishyaka ryabo mu gushyira mu bikorwa intego za 'Visit Rwanda'.''

Yavuze ko kandi amafaranga yinjiye mu bukerarugendo mu gihe cy'amezi atandatu uyu mwaka yiyongereyeho 60% ugereranije n'ayinjiye mu gihe kingana n'icyo umwaka ushize. 

Ashimangira ko urugendo rukomeje cyane ko baherutse no kwacyira umushoramari mushya FC Bayern Munich biyongera ku makipe nka Arsenal na PSG, aboneraho ahamagarira abari aho gushora imari muri gahunda y'ubukerarugendo mu Rwanda, cyane ko ubukungo bw'u Rwanda burushaho kwiyongera umunsi ku wundi.

Umuyobozi wa RDB kandi yatangaje ko umuhango wo Kwita Izina ku nshuro ya 20 uzaba ugaragaza ibinyacumi bibiri uyu muhango umaze utangijwe mu Rwanda. Ashimira Madamu Jeannette Kagame wemeye kuzahaboneka, ndetse anatangaza ko abise ingagi amazina mu myaka 19 ihise bose bazagaruka umwaka utaha.

Clare Akamanzi yashimiye Madamu Jeannette Kagame ndetse na Perezida Paul Kagame kubwo gutangiza iki gikorwa mu myaka 19 ishize aho bise abana b'impanga b'ingagi Byishimo na Mpano, ubu bakaba bayoboye izindi ngagi muri Pariki, kandi bikaba byarakanguriye n'abandi gukomeza iki gikorwa cyo Kwita Izina. 

Reba hano ijambo rirambuye umuyobozi mukuru wa RDB Clare Akamanzi yagejeje ku bitabiriye Kwita Izina ku nshuro ya 19

“>

Uyu muhango wo Kwita Izina ubaye ku nshuro ya 19, witabiriwe n'Abanyacyubahiro barimo abanyarwanda ndetse n'abanyamahanga baturutse mu ngeri zinyuranye harimo abahanzi, abavanga imiziki, abakinnyi ba filime, n'abandi by'umwihariko abaturage baturiye Pariki y'ibirunga iherereye mu Kinigi.

Muri uwo muhango ngarukamwaka uwari umushyitsi mukuru Nyakubahwa Jeannette Kagame yashimiye abantu bose bitabiriye umuhango wo Kwita Izina agaruka ku kamaro ingagi zifitiye igihugu ndetse anasaba buri wese kwita ku ruhare rwe mu kubungabunga urusobe rw'ibinyabuzima.

Nyakubahwa Madamu Jeannette Kagame, umushyitsi mukuru mu muhango wo Kwita Izina ku nshuro ya 19

Yagize ati: ‘'Ibidukikije ni indorerwamo iduha urugero rwiza rwerekana akaga isi yahura nako mu gihe tutitaye ku rusobe rw'ibinyabuzima, nk'uko bikwiriye. Nk'abantu, mu mibereho yacu dukeneye ibidukikije ku buryo bw'umwihariko. Bityo rero dusabwa kubana neza nabyo kuko ubuzima bwacu ari magirirane.''

Nyakubahwa Jeannette Kagame yasabye buri wese kugira uruhare mu kubungabunga urusobe rw’ibinyabuzima kuko ari ingenzi ku buzima bwa muntu

Nyakubahwa Jeannette Kagame yakomeje avuga ko hari byinshi mu myitwarire n'imibanire ingagi zihuriyeho n'abantu nko kuba nazo zibaho mu muryango, buri muryango ukagira umuyobozi ushinzwe kuwitaho no kuwurinda. 

Yongeyeho ko kuba ingagi zifite uruhare mu kuzamura ubukungu bw'igihugu nayo ari impamvu ikomeye yo kubungabunga ubuzima bw'ingagi.

Madamu Jeannette Kagame yacyirwa mu Kinigi

Si abanyarwanda gusa babwirwaga, ahubwo yasabye n'abanyamahanga kurushaho kubungabunga urusobe rw'ibinyabuzima kuko bifitiye akamaro kanini ubuzima bwa muntu muri rusange. Ati: ‘'Urusobe rw'ibinyabuzima rwabaho rutadufite, ariko twe ntitwabaho rudahari.''

Jeannette Kagame yavuze ko u Rwanda rutazigera ruhitamo ubukungu ngo rusige kwita ku bidukikije kandi ruzakomeza gukora rushyizeho umwete kugira ngo rugere ku ntsinzi y'iterambere n'amahoro arambye.

Madamu Jeannette Kagame yavuze ko yakozwe ku mutima n’uko abaturage b’i Musanze bacyiriye abashyitsi n’uko bita ku ngagi abasaba kudacogora

Yavuze ko kandi yishimiye by'umwihariko uko bacyiriwe n'abasanzwe baturiye aho ingagi ziba muri Pariki y'ibirunga, anagira ubutumwa bwihariye ajyenera abanyamusanze by’umwihariko urubyiruko rwari aho.

Ati: ‘'Ntawe bitanezeza kuba mugira uruhare mu kubungabunga ibidukikije. Uruhare rwanyu rugaragarira mbere na mbere mu kubangabunga ibidukikije harimo n'izi ngagi, kwakira neza abagana ndetse n'abahanga imirimo itandukanye ishingiye ku bukerarugendo kandi inyungu zitugeraho twese nk'abanyarwanda n'abaturarwanda. Umurimo mukora ni uwo gushimwa, muri ishema ry'igihugu cyacu ntimuzadohoke''

Nyakubahwa Jeannette Kagame yasoje avuga ko ingagi zifite agaciro ku banyarwanda karenze cyane kuba ari isoko y'ubukerarugendo n'imyidagaduro, ahubwo ari abarinzi b'ibidukikije 'dukunda.'

Reba hano ijambo ryose rya Madamu Jeannette Kagame mu muhango wo Kwita Izina ku nshuro ya 19

“>

Abakinnyi babiri bari bahamagawe mu Ikipe y’Igihugu Amavubi bakina muri Libya, Mugisha Bonheur [Casemiro] na Manzi Thierry ntabwo bakitabiriye ubutumire bwÁmavubi.

Myugariro Manzi Thierry na Mugisha Bonheur bakinira Al Ahli Tripoli yo muri Libyam bari ku rutonde rw’abakinnyi 25 umutoza w’Ikipe y’Igihugu w’agateganyo Gerard Buschier yahamagaye azitabaza ku mukino usoza itsinda L mu gushaka itike y’Igikombe cy’Afurika u Rwanda ruzakiramo Senegal tariki ya 9 Nzeri 2023 i Huye, akaba ari n’umukino udafite icyo uvuze kuko Amavubi yamaze gusezererwa.

Amakuru ISIMBI yamenye ni uko Manzi Thierry na Mugisha Bohneur batakitabiriye ubu butumire kubera ko bananiwe kumvikana na FERWAFA ku ndege izabazana.

Bivugwa FERWAFA yifuzaga gutegera indege aba bakinnyi ishobora kumara igihe kinini mu nzira (ishobora kuba ari yo ihendutse) aho yagombaga kunyura muri Ethiopia ikahamara amasaha 12.

Manzi Thierry we akaba yabwiye Team Manager w’Ikipe y’Igihugu, Emery Kamanzi ko babategera indege idatinda mu nzira ishobora kugera i Kigali vuba, aho we yifuzaga ko banyura Istanbul muri Turikiya kuko ari bwo bahita bagera mu Rwanda vuba.

Bivugwa ko ubwo yari ategereje icyo FERWAFA isubiza, bagiye mu myitozo basiga telefoni, maze FERWAFA irabashaka irababura, bagarutse bahise bakubitana n’ubutumwa bubabwira ko kuza babyihorera kuko bamaze kubasimbuza.

Manzi thierry yasimbujwe Mitima Isaac wa Rayon Sports mu gihe Mugisha Bohneur Casemiro yasimbujwe Niyonzima Olivier Seif wa Kiyovu Sports.

Si aba bakinnyi gusa kuko bivugwa hari abandi bahakaniye Amavubi bakibabwira ko bifuza kubahamagara barimo Rafael York na Rubanguka Steve wababwiye ko ataramenyera mu ikipe nshya baba bamuretse.

Manzi Thierry na Mugisha Bonheur Casemiro ntibakitabiriye ubutumire bw’Amavubi

Seif yasimbuye Casemiro

Mitima Isaac yasimbuye Manzi Thierry

Uyu mukozi w’Imana yahamije isezerano ry'aba bombi ku mugoroba wo kuri uyu wa Gatanu tariki 1 Nzeri 2023 mu muhango wabereye mu busitani bwa Intare Conference Arena.

Rev. Alain Numva yavuze ko buri wese afite kamere ye n’uko yumva ibintu, bityo buri wese akwiriye kubirenga ahubwo agaharanira kurwubaka na mugenzi we.

Yisunze imibanire yo ha mbere, Rev. Alain Numa yavuze ko ababyeyi ‘bacu’ batigeza basenya ingo cyangwa ngo bagaragare babunga amarira mu maso, kuko buri umwe yabagaho ubuzima bwitangira mugenzi we, kandi agashimangira urukundo.

Rev. Alain Numa yavuze ko ‘kurambana ni ukwihaganirana’. Ati “Nta kindi cyarengaho aho ngaho.”

Yavuze ko muri uku kwihanganira, kimwe mu bintu azi neza bazahura nabyo ‘ni abantu’ bakora ibishoboka bagamije gutanya abakundana.

Rev. Alain yabwiye Prince Kid na Miss Elsa ko ‘ubasekera wese si uko ari umujama (inshuti)'. Ati “Useka wese si uko ari umubyeyi wawe. Useka wese si uko agukunda. Useka wese si uko akwifuriza ibyiza.”

Pasiteri Alain yavuze ko hari igihe abageni bajya mu kwezi kwa buki (Honey Moon),’ hagashira igihe umugore ataragaragaza ko yasamye inda.

Avuga ko mu miryango imwe n’imwe, usanga hari umubyeyi wifata nk’aho ari mukuru ku buryo atangira kubaza umukazana icyabuze ngo atwite, cyangwa se ugasanga aragenda abaza abandi icyo umuhungu wabo abura ngo atangira kwagura umuryango.

Rev. Numa usanzwe ari Umukozi muri sosiyete y'Itumanaho ya MTN ati “Ukwezi kwa Gatanu akagaruka, agakandakanda nkukanda umukene ati ariko rero uzarebe neza.”

Yabwiye Prince Kid na Miss Elsa ko kurushinga bitavuze ko bahita babyara abana. Kandi ko buri gihe iyo abageni barushinze, Satani nawe aba ari hafi aho anyura mu bantu babahozaho igitutu.

Yavuze ko Imana ari yo yahuje aba bombi, kandi ko umugambi wayo ari mwiza kuri bo. Uyu mukozi w’Imana yabwiye Prince Kid na Miss Elsa guhora bategereje amasezerano y’Imana no kuyakira mu rugo rwabo.

Yabasabye kujya basengera hamwe buri munsi. Ati “Dushobozwa byose na Kristu uduha imbaraga”.

Yisunze ijambo riboneka Itangiriro 2:24 hagira hati “Ni cyo gituma umuntu azasiga se na nyina, akabana n’umugore we akaramata, bombi bakaba umubiri umwe', Rev. Alain yabwiye abo mu miryango yombi guha umwanya Prince Kid na Miss Elsa bakubaka neza urugo rwabo rugakomera.

Ati “Babyeyi murajya he? Ko ijambo ritubwira ngo yasize Se na Nyina ajya guhura n’umugore we.”

Yisunze kandi ijambo riboneka mu Gutegeka kwa kabiri 24:5 hagira hati 'Umugabo naba arongoye vuba ntazatabare kandi ntazakoreshwe umurimo wose, amare umwaka iwe aruhutse anezeze umugore.”

Rev. Alain yavuze ati “None azanezeza umugore we abo kwa Nyina wabo, ab’i Gikongoro bose bamanutse, abo twabanye […] Mubahe agahenge, bakundane, baryoshye, ahasigaye bazaduha uburenganzira.”

Rev. Alain Numa kandi yisunze icyanditswe kiboneka mu Abefeso 5: 22 hagira hati “Abagore bagandukire abagabo babo nk'uko bagandukira Umwami,” abwira Miss Elsa kuzubaha Prince Kid mu buzima bwe bwose, kandi bikaba uko no kuri Prince Kid.

Yabwiye Prince Kid ko muri Afurika gukunda umugore abantu benshi babyitiranyije. Avuga ko atari ukumuha ibyo kurya no kunywa, kumutembereza, ahubwo bisaba guhora umwibutsa ko ‘umukunda’.

Yanabwiye Prince Kid gutega amatwi Miss Elsa kuko ‘abagore bagira amakuru’.  Ati “Ushobora kuburara rimwe kabiri cyangwa gatatu kubera ko utamwumva.”  

Kuganduka ‘kubaha’, ni ikintu gikomeye cyane muri Bibliya. Na mbere y’aho icyaha cyinjira mu isi, hariho ihame ry’ubuyobozi (1 Timoteyo 2:13). Adamu yaremwe mbere, Eva akurikiraho ngo amubere ‘umufasha’ (Soma mu Intangiriro 2:18-20).

Kuganduka ni igikorwa kiva mu busabane burimo urukundo. Iyo umugabo akunda umugore we nk'uko Kristo yakunze itorero (Abefeso 5:25-33), kuba umugore yamugandukira ni ibintu byizana.

Ijambo ryo mu Kigereki rikoreshwa muri Bibiliya risobanura ‘kuganduka’ ni ‘Hupotasso’. Rikoreshwa havugwa guhora wubaha Imana, ubuyobozi ndetse n’umugabo.

Rev. Alain yavuze ko muri ibi bihe Isi igezemo, umugabo akora imirimo yose mu rugo, kandi ‘ntibimubuza kuba umutware w’urugo’. Yavuze ko aho hari ubwumvikane mu rugo, Satani atsindwa urugo rukaganzamo Imana. 

Rev. Alain Numa wo mu Itorero Shiloh Prayer Mountain Church yasabye Prince Kid na Miss Elsa guhora basengera hamwe, kandi asaba imiryango kubaha umwanya bakubaka urugo rwabo neza 

Miss Iradukunda Elsa yasabwe guhora agakundira umugabo we, kandi Prince Kid akamufasha muri buri kimwe kuko bitamubuza kuba umutware w'urugo

Prince Kid na Miss Elsa babwiwe kudashyirwaho igitutu n'imiryango, ahubwo bakumvira ijwi ry'Imana 

Prince Kid na Miss Elsa basezeraniye mu busitani buherereye mu Intare Conference Arena

Rev. Alain Numa wahaye umugisha isezerano ryabo imbere y'Imana kuri uyu wa Gatanu tariki 1 Nzeri 2023 mu muhango wabereye mu Busitani bwa Intare Conference Arena, yahaye umwanya buri wese abwira mugenzi we amagambo amuri ku mutima ashingiye ku isezerano yumva rikomeye ryo guha umukunzi we.

Miss Iradukunda Elsa yisunze isezerano rye yari ryanditse muri telefoni riri mu rurimi rw'Icyongereza.

Uyu mugore yasezeranyije umugabo we ‘kuzagukunda’ no kubana nawe mu bihe byiza n’ibibi'. Elsa yavuze ko Imana yonyine ariyo izi uburyo Prince Kid yamuhariye umutima we.

Yavuze ko yiteguye 'guhagararana nawe', kumwubaha no kumushyigikira ‘n’ubwo Isi yose yaba yaguteye umugongo’.

Miss Elsa yavuze ko azi neza ko urukundo rwe na Prince Kid rwiteguye guhangana no gutsinda buri kimwe banyuramo.

Yabwiye Prince Kid ati “Niteguye kuba inshuti yawe nziza”. Yanamwijeje ko yiteguye ‘kuba umubyeyi w’abana be’. Elsa yabwiye kandi Prince Kid ko yiteguye ‘kumwubaha no kubana nawe ubuzima bwanjye bwose'.

Elsa yanabwiye Prince Kid ko yiteguye kumushimisha 'n’ubwo byansaba kurebana nawe umupira w’amaguru ndetse na filime z’imirwano (abari mu bukwe bwasetse).'

Uyu mugore yavuze ko akunda cyane Prince Kid ku buryo ‘ntabasha kwibaza uko ubuzima bwaba bumeze utaburimo’. Yavuze ko Prince Kid ari umujyanama we, inshuti ye yihariye, intwari ye kandi ‘niteguye kuzamarana ubuzima bwanjye bwose nawe’.

Miss Elsa yasabye Imana kuzabana n’abo mu rugo no mu rugendo rw’urukundo. Ashima Prince Kid kumukunda no mu buzima bugoye. Yavuze ko “sinigeze nshidikanya ku rukundo rwe'.

Yashimye Kid ‘ku bwo ku nkundira umuryango nk’uko ukunda umuryango wawe’. Yabwiye Prince Kid ko ‘kuva uyu munsi kugeza ku mpera y’Isi ngusezeranije kubana nawe’. Ati “Ndagukunda cyane.”

Umwanya wa Prince Kid! Uyu mugabo yafashwe n'ikiniga, kuvuga biranga mu gihe cy'umunota urenga, amarira azenga mu maso bimusaba kubanza gutuza.

Ijambo rye yarikubiye mu kumvikanisha ibihe yanyuranyemo na Miss Iradukunda Elsa kugeza ku bihe bya vuba bari gucanamo ndetse n'amasezerano amufitiye.

Mu ijwi rituje cyane, Prince Kid yabwiye Miss Elsa ko ‘sinari mfite icyizere cyo kuzakubona gutya’.

Uyu mugabo yagiye afata umwanya wo gutuza ubundi akishakamo imbaraga zimukomeza. Yabwiye Miss Elsa ati “Ndagukunda, ndagukunda, kandi nzagukunda”.

Yabwiye Miss Elsa 'sinagukunze, kubera ko wankunze, nagukunze kubera ko ngomba kugukunda.'

Prince Kid yemereye Miss Elsa kuzamubera umufasha, “kuko kuba umugabo nabihawe na Nyagasani”

Kid yavuze ko adafite gushidikanya muri we ko ‘unkunda’, abwira Miss Elsa ‘ariko njye nkukunda kurushaho’.

Yabwiye Miss Elsa ko amukunda cyane, kandi yishimira uburyo ‘ukunda umuryango wanjye’. Yavuze ko afite icyizere cy’uko bazagira umuryango mwiza ‘nk’uko twabyifuje’.

Kid yabwiye Elsa ko urugendo bagendanye arufata nk’ideni ku buryo atazigera yoroherwa no kuryishyura. Ati “Ariko nzarwana naryo kugeza ku mpera y’ubuzima bwanjye’.

Ati “Ndagukunda. Abanjye baragukunda. Kandi tuzagukundira umuryango. Kuko tuzi ko ari cyo kintu cy’agaciro ugira mu buzima bwawe.”

Yisunze Bibiliya yavuze ko ntacyo yarenzaho kirenze urukundo Imana yabahaye. Yizeje Miss Elsa kuzamukunda, kumwubaha no kumukundwakaza.

Yabwiye umugore we ko ‘abana Imana izaduha tuzabakira’. Kid yanabwiye Elsa ko azamukunda uko bucyeye n’uko bwije, kandi azajya arushaho. Ati “Urakoze.”

Elsa yabwiye Kid ko yiteguye kubana nawe mu bihe byiza n'ibibi 'n'ubwo Isi yose yakuvaho'
 

Elsa yabwiye Kid yanyuzwe n'urukundo yamuhaye, kandi yiteguye kurusigasira

 

Miss Elsa yabwiye Prince Kid ko yiteguye kumushimisha n'ubwo byamusaba kurebana nawe umupira cyangwa se filime 

Kid yabwiye Miss Elsa 'sinagukunze, kubera ko wankunze, nagukunze kubera ko ngomba ku gukunda'

Kid yabwiye Elsa ko urugendo bagendanye arufata nk’ideni, kandi bizamugora kuryishyura

Prince Kid yabwiye Miss Elsa ko yishimira uburyo ‘ukunda umuryango wanjye’

KANDA HANO UREBE INCAMAKE Y’UBUKWE BWA PRINCE KID NA MISS ELSA

“>

Umukinnyi wa filime Nyarwanda, Nyakubyara Chantal wamamaye cyane muri Seburikoko nka Nyiramana, yitabye Imana azize uburwayi.

Mu gitondo cyo kuri uyu wa Gatandatu tariki ya 2 Nzeri 2023 nibwo iyi nkuru y’incamugongo muri Sinema Nyarwanda yamenyekanye.

Umwe mu nshuti z’uyu mubyeyi banakinanaga muri filime, yabwiye ISIMBI ko yazize uburwayi ndetse yari amaze iminsi avuye mu bitaro.

Ati” Yazize uburwayi. Yari amaze iminsi mike avuye kwa muganga, yaguye iwe mu rugo.”

Amakuru avuga ko Nyiramana yari amaze igihe arwaye, ngo yarwaye Diyabeti (Diabets) ariko abimenya atinze, nyuma haje kuziramo n’umuvuduko w’amaraso.

Akaba yari amaze iminsi arwariye mu Bitaro by’Akarere ka Nyarugenge ariko yari amaze iminsi 3 bamusezereye yaragiye kurwarira mu rugo.

Nyiramana yakinnye filime zitandukanye ariko yamenyekanye cyane muri filime y’uruhererekane itambuka kuri Televiziyo y’u Rwanda, Seburikoko akinamo adafite umugabo aho abagabo benshi bo muri Gatoto baba bamutereta.

Nyiramana yitabye Imana

Umufaransa Christophe Pinna wegukanye Shampiyona y’Isi mu 2000, ari mu Rwanda aho arimo guhugura abakina uyu mukino mu mahugurwa y’iminsi itatu.

Ni amahugurwa yateguwe na Japan Karate Association Rwanda (JKA-Rwanda) akaba arimo kubera muri Lycée de Kigali guhera ku wa Gatanu, tariki ya 1 Nzeri 2023, aho ubu barimo guhurwa bibanda kuri tekiniki zo kurwana muri Karate “Kumite”.

Christophe Pinna aheruka mu Rwanda muri Mata 2022 nabwo guhugura abakina Karate mu Rwanda kuko yahaherukaga muri Mata 2022.

Perezida wa JKA Rwanda, Rurangayire Guy, yavuze ko impamvu bateguye aya mahugurwa ari ukugira ngo bafashe abakina Karate mu Rwanda cyane abakiri bato kuzamura urwego.

Ati 'Ni igikorwa cyo kwiga tekinike zo kurwana, cyane cyane zikoreshwa mu marushanwa ya Karate. Ni inshuti yacu, agarutse ku nshuro ya kabiri gutanga ubumenyi bwe ku bakinnyi bacu bakiri bato kugira ngo turebe ko hari icyo bazageraho mu gihe kiri imbere. Amahugurwa yacu arafunguye, ni igikorwa cyateguwe na JKA Rwanda dufatanyije n’abafatanyabikorwa bacu, twafunguriye buri muntu akishyura ibihumbi 25 Frw yo kwiyandikisha, akitabira iminsi itatu.'

'Ubushize dutangira gukorana [na Christophe Pinna] byahinduye imikinire y’abakinnyi bacu, abana babashije gukurikira amahugurwa ye bagiye mu marushanwa ya 'Zone’, imidali yose yari ihari barayitwaye, ubu bavuye muri Shampiyona Nyafurika, baragerageje bitwara neza [u Rwanda ruba urwa gatanu], hari umukobwa wabonye umudali wa Bronze, ni icyizere. Iyo abana batoya batangiye kubona uwatwaye Shampiyona y’Isi uyu munsi, ni amahirwe akomeye. Turifuza kuzana n’abandi batwaye Shampiyona y’Isi ku buryo abana babona aho barebera.'

Rurangayire Guy yavuze ko kuzana Christiphe Pinna i Kigali bitabahenze kubera ko aza kubera ubucuti bafitanye.

Nkuranyabahizi Noël, umutoza w’Ikipe y’Igihugu ya Karate uri mu bahuguwe yavuze ko ari amahirwe adasanzwe yongeye kugirwa n’abakina uyu mukino mu Rwanda.

Ati 'Ni iby’agaciro kuba dufite umutoza nka Christophe Pinna, mu gihe cyacu twebwe tugikina, twamurebaga kuri za 'videos’, tukamwigiraho ariko ku bw’ubufatanye bwa JKA Rwanda n’izindi nzego, ageze hano ku nshuro ya kabiri. Ni amahirwe akomeye kubona uwatwaye Shampiyona y’Isi cyangwa iy’u Burayi aza kutwigisha, ni ibintu bikomeye cyane.'

Yakomeje ko avuga ibyo bahakuye bizabafasha nabo kuba babigeza ku bandi bagera ku ijana na mirongo itanu.

Kuri uyu wa Gatandatu, tariki ya 2 Nzeri, abana barahugurwa hagati ya saa Tatu na saa Yine n’iminota 15 naho abakuru bakore hagati ya saa Yine n’Igice na saa Sita z’amanywa ni mu gihe ejo bakoreye hamwe.

Guhera saa Cyenda kugeza saa Moya z’umugoroba ni bwo haba amarushanwa yitabirwa n’abari hejuru y’imyaka 18.

Ku Cyumweru, tariki ya 3 Nzeri, hazaba amahugurwa y’abana n’abakuru nk’uko bizaba byagenze ku wa Gatandatu, guhera saa Kumi n’imwe kugeza saa Kumi n’ebyiri n’Igice habe imikino ya nyuma ya Kumite ku bari hejuru y’imyaka 18 gusa.

Hahuguwe n’abana

Christophe Pinna ari mu Rwanda yaje guhugura abakina karate

Niyongabo Damien perezida w’Ishyirahamwe rya Karate mu Rwanda na we yitabiriye uyu muhango

Rurangayire Guy perezida wa JKA Rwanda yateguye aya mahugurwa

Imikandara na gants byambarwa n’abakina karate

Ku mbuga nkoranyambaga zose zaba izikoreshwa n’abantu ku giti cyabo cyangwa se iz’ibigo runaka by’itangazamakuru, hari gucicikana amafoto ndetse n’amashusho by’uwahoze ategura irushanwa rya Nyampinga w’u Rwanda, Ishimwe Kagame Dieudonne ndetse n’uwabaye Nyampinga w’u Rwanda mu 2017 Iradukunda Elsa, bagaragaza ko bishimiye ko aba bombi bagiye kubaka umuryango wabo bombi nk’umugabo n’umugore.

Biragoye kumanuka kuri telefone cyangwa mudasobwa yawe utarabona amafoto n’amashusho y’ubukwe bwabo, kandi ni mu gihe urukundo rwabo rwanyuze muri byinshi bigoranye ndetse ruza no gutsinda. Ni ibintu byasigiye isomo abashaka kwinjira mu rukundo ndetse byashimishije abanyarwanda benshi muri rusange.

Mu gihe mu Rwanda bimenyerewe ko umusore ariwe utera iya mbere akabwira umukobwa ko yamwihebeye amukunda cyane, bakavuga ko biba atari byiza cyangwa bitagaragara neza iyo ari umukobwa uteye iya mbere, Elsa Iradukunda we ngo ntabwo ibyo abikozwa icya mbere ni urukundo, ibindi biza nyuma kandi nta mpamvu yo kuniganwa n’ijambo (buriya ngo wanigwa n’uwo uribwiye).

Amakuru inyaRwanda yamenye ni uko Miss Elsa Iradukunda ari we wateye intambwe ya mbere abwira Ishimwe Kagame Dieudonne wamenyekanye nka Prince Kid mu myidagaduro nyarwanda, ko amukunda cyane, nuko Prince Kid nawe abyumva vuba abiha agaciro kanini.

Gusa ariko n’ubwo Miss Elsa ariwe wavuze ijambo rikomeye mbere ya Prince Kid, uyu musore niwe wateye intambwe ya mbere mu gutangira kumuganiriza byihariye, nuko umubano udasanzwe uba uvutse ubwo kugeza aho tubonye ibirori bidasanzwe muri izi ntangiriro za Nzeri 2023.

Urukundo rwabo rwatanze isomo rikomeye

Ikindi cyamenyekanye ni iyo aba bombi bagiranye utubazo dutuma batumvikana, Elsa Iradukunda niwe utera intambwe ya mbere mu kwiyunga na Prince Kid. Ku rundi ruhande ariko Elsa Iradukunda ni wa muntu ukomeza cyangwa se uremereza ibibazo baba bagiranye.

Guhera tariki ya 1 Nzeri 2023, aba bombi babaye umugore n’umugabo byeruye, nyuma yo kuva mu bihe bigoranye byarangiye urukundo rutsinze cyane ko rufite imbaraga zidasanzwe.

Elsa Iradukunda niwe wibwiriye Prince Kid ko amukunda bwa mbere

Byari ibirori by’umwaka kandi bishimishije

Ku mugoroba wo kuri uyu wa Gatanu tariki 01 Nzeri 2023, mu ihema rya Camp Kigali, abakiristu babarirwa mu bihumbi baturutse imihanda yose barambuye amaboko baramya Imana mu gitaramo 'Amateka Live Concert' cy'umuramyi Emmy Vox.

Kuva saa 06:08 PM z'Umugoroba itsinda ry'abaramyi rizwi nka 'True Promises' ryazamuye amarangamutima ya benshi mu ndirimbo ziganjemo izo mu bitabo, izabo bwite n'iz'abandi baramyi.

Umukinnyi wa Filime Usanase Bahavu Jeannette yafunguye iki gitaramo ashimira abakiristu bigomwe umwanya wo gukora indi mirimo, bakitabira ndetse ashimira ibyamamare byazindutse bigafata imyanya y'imbere.

Uyu mubyeyi yahise yakira umuramyi wa mbere Bosco Nshuti ahagurutsa benshi mu ndirimbo zirimo 'Ni muri Yesu', 'Yanyuzeho', Rukundo', 'Niyo Yadukunze', Hellelujah' n'izindi. Uyu muramyi yanejeje cyane abitabiriye iki gitaramo.

Nyuma ya Bosco Nshuti, abitabiriye 'Amateka Live Concert' bamurikiwe icyegeranyo kigaruka ku buzima butoroshye Emmy Vox yanyuzemo burimo kuvukira muri Gereza, agaca mu bikomeye we n'umuryango we ariko akanga agakorera Imana.

Muri iki cyegeranyo hahishuwe ko uyu musore n'umuryango we banyuze mu buzima burimo kubwirirwa no kuburara iminsi irenga itanu ubwo bari bakiri muri Gereza, kubura amazi yo koga, gukubitwa n'ibindi bigeragezo bitandukanye.

Umushyushyarugamba Bahavu Jeannette yahise yakira Emmy Vox wateguye iki gitaramo, afasha abakiristu kuguma mu mwuka wo guhimbaza no kuramya Imana abinyujije mu ndirimbo zitandukanye zirimo 'Amateka' yitiriwe iki gitaramo.

Uyu muramyi wari wuzuye ibyishimo yanyujijemo izindi ndirimbo zirimo 'Impundu', n'izindi zigize alubumu 'Amateka' yashyize hanze mu 2020. Abarimo Umuhanzikazi Peace Hozy uri kwigaragaza mu muziki wo kuramya no guhimbaza, bari mu bafashije cyane Emmy Vox.

Nyuma yo gusogongeza abitabiriye iki gitaramo, Bahavu yahaye umwanya umuvugabutumwa yigisha icyigisho kigaruka ku buryo abantu badakwiye kwiheba mu gihe bakiriho. Nyuma y'icyo cyigisho umuramyi Alex Dusabe uri mu barambye muri uyu murimo, yatunguranye ku ruhimbi asaba abantu kuzitabira igitaramo cye kibera kuri Kigali Pele Stadium kuri uyu wa gatandatu tariki 02 Nzeri 2023.

Umuramyi Israel Mbonyi yongeye gushimangira igikundiro yubatse mu bantu, agitangira kuririmba benshi bamwakirije akaruru ko kumwereka ko bagiye gufatanya kuramya. Uyu muhanzi yatangiriye ku ndirimbo yashyize hanze mu bihe bitandukanye zikigarurira imitima ya benshi.

Uyu muramyi yifashishije indirimbo zirimo 'Karame', 'Icyambu', 'Number 1' 'Ndiho', Umusirikare n'izindi zatumye abantu banga kumurekura ngo ajye kuruhuka. Yahise yakira umuramyi Emmy Vox wateguye iki gitaramo bafatanya gusezera abantu mu ndirimbo zitandukanye.

Emmy Vox yashimiye Israel Mbonyi wemeye kuza kumushyigikira mu gitaramo cya mbere akoze kuva yatangaira gukora umuziki kinyamwuga. Bahise bafatanya kuririmba zimwe mu ndirimbo zakunzwe za Emmy Vox. 

Emmy Vox yakoze igitaramo 'Amateka Live Concert' cyitabiriwe ku rwego rushimishije

Emmy Vox yatanze ubuhamya bw'uburyo yavukiye muri Gereza

Vox yashimiye Israel Mbonyi waje kumushyigikira

Emmy Vox yaririmbye indirimbo zirimo ‘Amateka’ 

Israel Mbonyi yaririmbye indirimbo zakunzwe zirimo 'Icyambu', 'Umusirikare', n'izindi

Israel Mbonyi yeretswe urukundo n'abitabiriye iki gitaramo

Mbonyi yahagurukije abarenga 1,000 bitabiriye 'Amateka Live Concert'

Umuramyi Bosco Nshuti niwe wabanjije ku ruhimbi, afasha abitabiriye kuramya


Bosco Nshuti yaririmbye indirimbo zirimo 'Heleluyah' yakunzwe na benshi

Itsinda rya True Promises ni ryo ryafunguye iki gitaramo cyateguwe na Emmy Vox

True Promises baririmbye indirimbo z'abaramyi batandukanye

Abitabiriye banyuzwe n'indirimbo z'abaramyi

Bahavu Jeannette uzwi muri Sinema nyarwanda niwe wayoboye iki gitaramo

Fleury Legend umugabo wa Bahavu Jeannette yashimiye itangazamakuru ryabafashije kwamamaza iki gitaramo


Peace Hozy uri kuzamuka neza mu muziki ari mu bafashije cyane abaramyi gutaramira abitabiriye iki gitaramo 

Emmy Vox yashimiye Bahavu Jeannette n’umugabo we Fleury Legend bagize uruhare mu gutegura iki gitaramo cy

Emmy Vox yashimiye umubyeyi we warwanye intambara ikomeye ngo we n’abavandimwe bakure 

Josh Ishimwe yaje gushyigikira Emmy Vox 

Umunyarwenya Clapton Kibonke yitabiriye igitaramo ‘Amateka Live Concert’ 

Emmy Vox yakiriye Ben na Chance bazwi muri Gospel bafatanya guhimbaza Imana

KANDA HANO UREBE AMAFOTO YARANZE IGITARAMO ‘AMATEKA LIVE CONCERT’

AMAFOTO: Freddy Rwigema – INYARWANDA