Author: webrwanda

Iherekejwe na bamwe mu byamamare, ISIMBI TV yatashye inzu yubakiye umuturage utishoboye wo mu Karere ka Kamonyi mu Magepfo y’u Rwanda.

Ni nyuma y’uko muri Werurwe uyu mwaka uyu muyoboro wa YouTube wa ISIMBI TV wujuje miliyoni y’aba-Subscribers, umuyobozi wa yo Murungi Sabin yaje guhitamo guhigura umuhigo Pastor Niyonshuti Théogène witabye Imana muri Kamena 2023 adahiguye. Yari yarahize kuzubakira Nyirasenge.

Umuhango wo gutaha iyi nzu wabaye ejo hashize ku wa Gatatu tariki ya 17 Mata 2024, abashyikirijwe inzu ni umuryango wa Iyarakaremye Emmanuel na Benurugo Venancia akaba nyirasenge wa Pastor Théogène uheruka kwitaba Imana, yubatswe mu Murenge wa Rukomo, mu Mudugudu wa Nyarusange mu Karere ka Kamonyi.

Umunyana Assia akaba umugore wa nyakwigendera Pastor Théogène, yashimiye Imana ko iyi nzu yuzuye kuko ubwo umugabo we yitabaga Imana nta cyizere yari afite ko izubakwa kubera inshingano nyinshi yari asigaranye.

Ati 'iki gikorwa numvaga kitazashoboka kuko nari nsigaranye abana benshi bo kurera, nsigaranye n’abo twebwe twari twarabyaye, byari bigoye, ntabwo niyumvishaga ko natunga urugo rurimo abana bangana kuriya ngo nze no kubaka hano, numvaga ari ibintu bitashoboka ariko Imana ikorera muri Sabin icyo cyifuzo akingezaho ko ashaka kumwubakira, ndamubwira ngo nta kibazo.'

Murungi Sabin akaba umuyobozi wa ISIMBI TV yavuze ko hari mu rwego rwo guhigura umuhigo Pasiteri Niyonshuti Théogène yapfuye adahiguye, aho yari yarihaye inshingano zo kuzubakira Nyirasenge Benurugo Venancia cyane ko nta bushobozi yari afite bwo kubyikorera.

Ati 'Ni igitekerezo cyazanywe na Pastor Théogène, twaraganiraga rimwe twarazanye dukorera ikiganiro muri iyi mbuga hari akazu katari keza, arambwira ngo nifuza ko mbere y’uko mpfa Nyagasani yazampa ubushobozi nkubakira masenge inzu, Pastor Théogène nyuma y’amezi 2 yahise apfa.'

Yakomeje avuga ko atifuzaga kuba yakubakira Nyirasenge wa Pastor Théogène ariko akaba yaragiye mu turere twa Rwamagana muri Nyarubuye na Ruhango ariko abura umuturage wujuje ibyo yifuzaga, ahitamo kubakira Nyirasenge wa Pastor Théogène cyane ko yari asigaye wenyine kandi nta bushobozi, gusa ahamya ko nabona ubushobozi azubakira n’abandi.

Ati 'Mu by’ukuri ntabwo nifuzaga kuba nahita nubakira nyirasenge wa Théogène inzu, numvaga nabikorera undi muturage tutigeze tugaragaza na rimwe, udafite ubushobozi, udafute uko yiyubakira, nzenguruka Ruhango, njya Nyarubuye gushaka umuntu waba yarabuze uko yubaka kandi koko byumvikana, muri utwo turere twombi nasanze nta muturage urimo guhamanya n’ibyo nshaka.'

'Nageze aho ndatekereza nti ariko kuki umuntu atakubakira nyirasenge wa Pastor Théogène? Nyuma y’uko yasigaranye imbaraga nke, nyuma y’uko arokotse nkamwubakira inzu noneho niba nteganya kubakira abandi na bo nkazabageraho, mba ari we mpitamo gutyo, nta kindi nagendeyeho ariko n’abandi nyagasani nampa ubuzima, nampa ubushobozi nzabubakira.'

Benurugo Venancia yagaragaje ko yishimiye cyane Imana n’ubuyobozi bwa ISIMBI TV bwabashije kumwubakira inzu bukamukura aho yari ari.

Ati 'nubwo Théogène yitahiye ariko yasize umuryango, asiga inshuti n’abavandimwe, ntabwo nari nzi ko ubwo yavugaga ko ashaka kunyubakira yari afite abantu bangana gutya babiri inyuma, Sabin Imana izaguhe ubugingo, kubeshya ni icyaha sinigeze mba ahantu nk’aha. Mbonye intebe shahu, mwarebye? Ariko Mana nshimye Imana namwe mwese mwitanze, Uwiteka azabahe ubugingo, nukora neza uzahembwa n’Imana ihoraho.'

Umugabo we Iyakaremye Emmanuel mu mvugo irimo amarangamutima menshi, yagize ati 'Ndabona Imana inkoreye ibyiza, ndayishimye namwe ndabashimye, mvutse bwa kabiri. Imana yabashyizemo urukundo ngo mufatikanye mudukorere igikorwa nk’iki ndayishimye, muri abantu bagomba kurenganura abandi koko.'

Bamwe mu byamamare bari baje gushyigikira ISIMBI, Junior Giti usanzwe ukora umwuga wo gusobanura filime, yavuze ko yaje muri iki gikorwa kugira ngo abe umuhamya w’ibyagezweho.

Ati 'twaje hano kugira ngo tube abahamya b’ibyagezweho, kugira ngo bihe umukoro n’abafite ubushobozi bwo gufasha yabikora, tunamagane abarwanya ibyiza umuntu aba yakoze.'

Mugenzi we bakora umwuga umwe wo gusobanura filime, Rocky Kimomo yagize ati 'Sabin aduhaye umukoro, aduhaye umukoro nk’abantu bakora ibintu byenda kumera nk’ibye cyangwa no mu bundi buzima, ni umkoro mwiza aba aduhaye.'

Ni igikorwa ISIMBI TV yakoze mu rwego rwo kwishimira ko yujuje miliyoni y’abantu biyandikishishije (1M subscribers) kujya bakurikira ibiganiro umunsi ku munsi bitambuka kuri uyu muyoboro.

Uyu muhango ukaba wari witabiriwe na bamwe mu byamamare, uretse umugore wa Pastor Théogène, Umunyana Assia, hari Pastor Mutesi, abasobanuzi ba filime Uwizeye Marc [Rocky Kimomo], Junior Giti, abanyamakuru Lucky Murekezi, Ndahiro Valens Papy na Niyitegeka Jules William [Chita], abakinnyi ba filime Killaman, Dogiteri Nsabi, umuhanzi akaba n’umushoramari Marchal Ujeku.

Lucky Murekezi yari ahabaye

Umunyamakuru Ndahiro Valens Papy na Rocky Kimomo

Junior Giti n’umugore we bari baje kwifatanya na ISIMBI TV

Byari ibyishimo bikomeye

Dogiteri Nsabi

Pastor Mutesi na Umunyana Assia umugore wa Pastor Theogene

Inzu ISIMBI yubakiye Nyirasenge wa Pastor Theogene

Iyamuremye na Benurugo byari byabarenze

Aba bajyana boroje iyi miryango inka zihaka, zapimwe ubuzima bwazo bwose mbere yo guhabwa iyo miryango, byose bikaba byarakozwe ku bushobozi bw'abagize inama Njyanama y'Akarere ka Rulindo mu cyumweru cyagenewe Umujyanama.

Perezida w'Inama Njyanama y'Akarere ka Rulindo, Dusabirane Aimable, yavuze ko muri gahunda y'icyumweru cy'umujyanama bazegera abaturage bakumva ibibazo n'ibitekerezo byabo kandi ko bazakomeza kwifatanya nabo mu iterambere.

Yagize ati “Ni igikorwa dutegura kugira ngo twegerane n'abaturage, tubagaragarize ibyo dukora ndetse nabo batwereke uko bafata ibyo dukora banatugire n'inama y'ibyo dukwiye kunoza. Twifatanyije nabo turaganira twumva ibibazo byabo n'ibitekerezo byabo ndetse turemera n'imiryango y'abatishoboye kandi tuzakomeza kwifatanya n'abaturage mu iterambere ryabo.”

Bamwe mu baturage borojwe izo nka, bavuga ko bari babayeho mu bukene ariko kuba bafashijwe nagiye kuzitaho bakiteza imbere kandi ko bazoroza n'abandi bakiri mu bukene.

Hakizamungu Elias umwe muri bo, yagize ati “Nabaga mu bukene kuko nahingaga sineze kubera kudafumbira. Ubu mpawe inka ngiye kuyifata neza igiye kumpa ifumbire neze. Yenda kubyara nzabona amata umuryango wanjye n'abaturanyi bayanywe andi nyagurishe kandi nanjye nzoroza n'abandi, ubu iterambere ndaritangiye.”

Birimwabagabo Edouard na we yagize ati “Ndashimira cyane aba bajyanama batworoje, inka ni umugisha kuko igiye kunyungura ndetse n'abandi batishoboye nzaboroza twese tubone amata, ifumbire n'inka zizayikomokaho zizaba nyinshi.'

Umuyobozi w'Intara y'Amajyaruguru, Mugabowagahunde Maurice, yashimiye aba bajyanama, abasaba gukomeza kwegera abaturage bagafatanyiriza hamwe gukemura ibibazo bikibangamiye abaturage hagendewe ku igenamigambi rihamye no kurushaho guharanira ubumwe n'ubudaheranwa n'iterambere.

Yagize ati “Iki gikorwa cy'aba bajyanama ni icyo gushimirwa cyane kuko kigendanye neza n'intego yo gushyira umuturage ku isonga, humvwa ibibazo bye no gufatanya kubikemura hakiyongeraho kumuteza imbere.”

“Abajyanama rero turabasaba ko bakomeza kwegera aba baturage baba barabagiriye icyizere ngo mubahagararire, mubumve murebe ibyifuzo byabo bishyirwe mu igenamigambi bikemurwe tugire umuturage ugira uruhare mu bimukorerwa ndetse no kubirinda dukomeze iterambere ryifuzwa.”

Mu cyumweru cy'umujyanama mu Karere ka Rulindo kuzarangirana n'uku kwezi kwa Mata, abajyanama bazegera abaturage babasobanurire ibyo bakora, numve ibitekerezo byabo ndetse bakire n'ibibazo byabo bishakirwe ibisubizo.

Abajyanama baremeye imiryango itishoboye ihabwa inka nziza zo korora

Imiryango yahawe Inka yahize kwikura mu bukene

Abajyanama basezeranyije abaturage ko bazakomeza gufatanya

Mu 2002, ubwo Jenoside yakorewe Abatutsi yari imaze imyaka umunani ibaye, mu Rwanda hashyizweho Inkiko Gacaca. Mu 2005, ni ukuvuga nyuma y'imyaka 11, nibwo izi nkiko zatangiye imirimo yazo zitangira gucira imanza abakekwagaho uruhare muri ayo mahano.

Bellefroid yagize ati 'Ndabyibuka neza mu 2005 abo mu Burengerazuba banenze u Rwanda bati kubera iki ubutabera, kubera iki mutashyira ingufu mu bwiyunge?'

Yakomeje agira ati 'Ndabyibuka nanone ko icyo gihe Abanyarwanda bavuze ko icya mbere bigenga ikindi kandi bavuze ko bazi neza igikwiriye gukorerwa abantu babo.'

Yavuze ko icyo gihe amahitamo y'Abanyarwanda yari ugutanga ubutabera mbere y'ubwiyunge, 'Kuko batagira ubumwe mbere y'ubutabera.'

Ibi uyu mwanditsi yabigarutseho kuri uyu wa Kabiri ku ya 16 Mata 2024, ubwo herekanwaga filime mbaramakuru yakoze akayita 'Rwanda, les collines parlent', ugenekereje mu Kinyarwanda ni 'U Rwanda, Imisozi ivuga'.

Bellefroid, avuga ko nyuma ya Jenoside yakorewe Abatutsi, abantu benshi batakundaga kuyivugaho cyane, bahoraga bacecetse kuko biyumvishaga ko ari amateka ashaririye bagomba kubana nayo.

Ati 'Ku bwanjye nabonye Gacaca nk'icyatumye abantu babohoka mu mitima bakavuga byinshi. Ni naho hakomotse izina ry'iyi filime.'

Iyi filime yakozwe mu 2005, yerekanwa bwa mbere mu Rwanda mu 2006. Ishingiye ku nkuru mpamo kuko yafatwaga mu bihe imanza za Gacaca zabaga ziri gucibwa. Igaruka cyane ku buryo imirimo ya Gacaca yagendaga umunsi ku munsi, impamvu zayo n'akamaro yagize kubutabera bw'u Rwanda.

Agaruka ku mpamvu zo kwerekana iyi filime nanone, Bellefroid, yavuze ko 'Hari filime nke zakozwe kuri Gacaca, iyi rero yaba ingirakamaro ku bantu bashaka gukomeza kuyikoraho ubushakashatsi no ku banyamateka.'

Ati 'U Rwanda rwatanze isomo rikomeye ku kiremwamuntu, bashatse umuti w'ikibazo kandi bagikemura mu buryo buboneye. Abashakashatsi bazakomeze bayigeho ariko ni ikintu kitarigera kibaho akandi ku Isi. Ubu nyuma y'imyaka 30 igihugu cyose kiremye, byose kubera Gacaca.'

Umushakashatsi ku mateka, Hélène Dumas, wakunze gukurikirana cyane imirimo ya Gacaca, yavuze ko ubu buryo bwatumye ubutabera butangwa mu buryo bwihuse kubera ubudasa bwabwo.

Ati 'Ikirenze kuri ibyo Gacaca yasize amakuru menshi kandi y'agaciro kanini cyane ashobora kwifashishwa n'uwo ariwe wese wakenera gukora ubushakashatsi kuri Jenoside yakorewe Abatutsi.'

Mu mwaka wa 2012 nibwo Inkiko Gacaca zasoje imirimo zisiga imanza hafi miliyoni ebyiri ziciwe. Izo manza zasize inyandiko zisaga miliyoni 63. Izi manza zose zakoresheje ingengo y'imari igera kuri milioni 52 z'amadolari ya Amerika.

Izirenga miliyoni 48 muri zo zikaba zaramaze kubikwa mu buryo bw'ikoranabuhanga.

Imibare igaragaza ko imanza zirenga miliyoni 1,3 zari zishingiye ku mitungo yangijwe mu gihe cya Jenoside mu gihe izisaga ibihumbi 638 zari zishingiye ku byaha byakorewe abantu muri Jenoside yakorewe Abatutsi mu 1994.

Mu Nkiko Gacaca, imanza zabaga ziyobowe n’abatoranyijwe nk’inyangamugayo

Mu mwaka wa 2012 nibwo Inkiko Gacaca zasoje imirimo zisiga imanza hafi miliyoni ebyiri ziciwe

Mu bitabiriye iki gikorwa benshi bari biganjemo ni urubyiruko

Filime ya ‘Rwanda, les collines parlent' yerekaniwe kuri Mundi Center

Iyi filime yafatwaga mu gihe Imanza za Gacaca zabaga ziri kuba

Ambasaderi w'u Bufaransa mu Rwanda, Antoine Anfré, ni umwe mu bari bitabiriye igikorwa cyo kwerekana filime ‘Rwanda, les collines parlent'

Abari bitabiriye iki gikorwa, babanje kuganirizwaho gato ku nkomoko y’iyi filime

Umubiligi uyobora filimi akaba n'umwanditsi wazo Bernard Bellefroid, yagaragaje ko gahunda ya Gacaca mu Rwanda yashyiriweho gutanga ubutabera, nta handi haraba ikimeze nka yo ku Isi

Umushakashatsi ku mateka, Hélène Dumas, wakunze gukurikirana cyane imirimo ya Gacaca, yavuze ko ubu buryo bwatumye ubutabera butangwa mu buryo bwihuse kubera ubudasa bwabwo

Mu mpera z’iki cyumweru ni bwo mu mukino wa Basketball hazatangira irushanwa ryo Kwibuka Jenoside yakorewe Abatutsi mu 1994, Ishyirahamwe ry’uyu mukino mu Rwanda rikaba rivuga ko buri kipe yemerewe gutira abakinnyi ishaka ariko basanzwe bakina muri shampiyona.

Ni irushanwa riteganyijwe tariki ya 19 na 20 Mata rikazabera muri Kigali.

Iri rushanwa ryo kwibuka abakinnyi, abayobozi n’abakunzi ba Basketball bazize Jenoside yakorewe Abatutsi mu 1994 rikaba rizitabirwa n’amakipe 4 mu bagabo n’ane mu bagore, yatoranyijwe hagendewe ku makipe iri imbere ku rutonde rwa shampiyona.

Mu bagabo ni; Patriots BBC, APR BBC, REG BBC na Tigers BBC. Mu bagore ni; APR WBBC, REG WBBC, GS Marie Reine Rwaza na Kepler WBBC.

Gusa benshi batunguwe no kutabona ikipe ya Espoir BBC kandi ari yo yatangije iri rushanwa mu 1996, aho ryatangiye ari irushanwa ryo kwibuka uwari umukinnyi wa yo Ntarugera Emmanuel “Gisembe”, baryita Gisembe Memorial Tournament (GMT).

Gusa kuva muri 2013 ku bufatanye n’Ishyirahamwe ry’Umukino wa Basketball mu Rwanda (FERWABA), iri rushanwa ryaje guhindurirwa izina ryitwa ‘Genocide Memorial Tournament’ (GMT).

Mu kiganiro n’itangazamakuru cyabaye ejo hashize, Ubuyobozi bwa FERWABA bwavuze ko iri rushanwa ari ryo kwibuka abakinnyi, abakunzi n’abahoze ari abayobozi b’amakipe bose n’anasiporutifu muri rusange bazize Jenoside yakorewe Abatutsi mu 1994 hakaba rero harimo n’aba Espoir BBC, uburyo bahisemo amakipe basanze ari bwo bwiza, gusa ngo begereye ikipe ya Espoir BBC barayiganiriza irabyumva.

Ikindi ni uko iri rushanwa rizaba rifunguye, amakipe yemerewe gutira ariko agatira abakinnyi basanzwe bakina muri shampiyona, ntabyo kuzana abakinnyi bashya batakinaga muri shampiyona.

FERWABA kandi yatangaje ko ubu yamaze kumenya abandi bari abakinnyi b’uyu mukino 4 bazize Jenoside yakorewe Abatutsi, n’amafoto ya bo barayafite biyongereye ku bandi 29 bari baramenyekanye mbere.

Ibihembo bikaba bizava mu mafaranga azinjira ku mikino, kugeza ubu ntabwo hazwi ingano nyirizina y’uko bizaba bingana.

Irushanwa ryo Kwibuka abari abakinnyi n’abakunzi ba Basketball bishwe muri Jenoside yakorewe Abatutsi mu 1994 ryaherukaga kuba 2019 aho mu bagabo ryegukanywe na REG yatsinze Patriots ku mukino wa nyuma ni mu gihe mu bagore ryegukanywe na The Hoops.

Mu mpera z’iki cyumweru haratangira irushanwa rya GMT

Ijoro ryo ku wa 17 Mata 2024 ntabwo ryahiriye amakipe yo Bwongereza yari asigaye muri UEFA Champions League, aho Manchester City na Arsenal zasezerewe zitageze muri 1/2.

Arsenal nyuma yo kunganya na Bayern Munich mu mukino ubanza wa 1/2 wabereye mu Bwongereza 2-2, yari yagiye gukina umukino wo Kwishyura mu Budage.

Arsenal nubwo yari yasuye, yatangiye umukino neza irusha Bayern Munich aho mu minota 15, yari iyoboye umukino kuri 69%, Bayern Munich ifite 31%, gusa nta mahirwe afatika yaremye.

Ku munota wa 25, Bayern yari yamaze kwinjira mu mukino neza ari yo iyoboye na 51% kuri 49%ya Arsenal ari nabwo Jamal Musiala yagerageje ishoti inyuma y’urubuga rw’amahina ariko umunyezamu arawufata.

Ku munota wa 29, Martin Oedegaard yagerageje ishoti rikomeye ariko umunyezamu wa Bayern Munich, Nuer awukuramo, ni nako ku munota wa 31 yaremye uburyo bw’igitego ariko Gabriel Martinelli ateye umunyezamu yongera kuwukuramo.

Ku munota wa 40, Declan Rice yahinduye umupira mwiza imbere ariko Kai Havertz ashyizeho umutwe, umunyezamu Manuel Neuer awukuramo. Amakipe yagiye kuruhuka ari ubusa ku busa.

Bayern yagarutse mu gice cya kabiri ishaka igitego ku kabi n’akeza, ku munota wa 47, Leon Goretzka yateye umutwe ukubita umutambiko w’izamu.

Nyuma kugerageza uburyo butandukanye, Bayern Munich yabonye igitego ku munota wa 63 cyatsinzwe na Joshua Kimmich wari wagoye Arsenal, ni ku mupira wari uhinduwe na Raphael Guerreiro.

Arsenal yagerageje kwishyura iki gitego, irema uburyo butandukanye ariko biranga umukino urangira ari 1-0, Arsenal isezererwa ku giteranyo cy’ibitego 3-2.

Bayern Munich yageze muri 1/2 cya Champions League

Undi mukino wabaye wa 1/2, wahuzaga Manchester City yari yakiriye Real Madrid, umukino ubanza bari banganyije 3-3.

Wabonaga Real Madrid ishaka igitego hakiri kare, igerageza amashoti, ku munota wa 11 Eduardo Camavinga yagerageje ishoti rikomeye yatereye inyuma y’urubuga rw’amahina ariko umunyezamu arawufata.

Iri ryakurikiwe n’ishoti ryo ku munota 12 rya Rodrygo yateye ariko umunyezamu awukuramo gusa ntiyawufata neza maze Rodrygo ahita awushyira mu rushundura. Ni ku mupira wari uhinduwe na Vinicius Jr.

Bernardo Silva ku munota wa 16, yahinduye umupira imbere y’izamu ariko Haaland ashyizeho umutwe unyura hejuru y’izamu.

Nyuma yo gukinana neza, Akanji yacomekeye umupira mwiza Kevin De Bruyne ku munota wa 19 ariko ateye mu izamu umunyezamu awukuramo, abakinnyi ba Real bananiwe kuwukuramo usanga Haaland washyizeho umutwe ariko ugakubita igiti cy’izamu.

Muri iyi minota wabonaga Real Madrid yugarijwe cyane ariko ubwugarizi bwa yo n’umunyezamu Andriy Lunin babasha kubyitwaramo neza bahagarika amashoti y’abarimo Jack Grealish, Haaland ndetse na Kevin De Bruyne.

Real Madrid uretse igitego yatsinze nta yandi mahirwe akomeye yabonye mu gice cya mbere. Amakipe yagiye kuruhuka ari 1-0.

Kimwe n’igice cya mbere, Manchester City yashyize igitutu gikomeye kuri Real Madrid ishaka igitego cyo kwishyura, abarimo Grealish na Phil Foden bagerageza amashoti ariko umunyezamu Lunin ababera ibamba.

Byaje gusaba iminota 75 ubwo Jérémy Doku wari winjiye ku munota wa 72 asimbura Jack Grealish yahinduraga umupira imbere y’izamu maze Antonio Rüdger yakuraho ntuveho neza maze Kevin De Bruyne wari wakurikiye ahita awushyira mu rushundura biba bibaye 1-1. Umukino warangiye ari 1-1.

Byari bivuze ko mu mikino yombi ari 4-4, hahise hitabazwa iminota 30 y’inyongera itagize impinduka itanga, amakipe ahita yitabaza penaliti, Real Madrid ikomeza kuri penaliti 4-3.

Ku ruhande rwa Manchester City, Bernardo Silva na Matteo Kovačić nazihushije. Julián Àlvalez, Phil Foden n’umunyezamu Ederso barazinjiza.

Real Madrid; Luka Modric yayihushije, Jude Bellingham, Lucas Vásquez, Nacho Hernández na Antonio Rüdger barazinjiza.

Muri 1/2, Real Madrid izahura na Bayern Munich ni mu gihe Dortmund izahura na Paris Saint-Germain.

Umunyezamu Lunin yatabaye Real Madrid cyane

Rodrygo yashimira igitego yatsinze Manchester City

Byari ibyishimo kuri Real Madrid

Ubwo abayobozi n'abakozi ba Ecobank Rwanda Plc bunamiraga inzirakarengane zazize Jenoside yakorewe Abatutsi mu 1994, Wibabara yasangije abandi ubuhamya bw'uko yarokotse.

Yagaragaje ko Abatutsi bari mu gihugu mbere ya Jenoside yakorewe Abatutsi bari impunzi mu gihugu cyabo kubera kumeneshwa no gushaka kwicwa.

Ati 'Burya rero Abanyarwanda bari muri iki gihugu nabo bari impunzi, bahungaga babimuye hamwe kubera kubatera bakajya ahandi, bakongera bagashinga umuryango bakubaka gutyo gutyo kandi byabaye igihe kinini bisobanuye ko Jenoside yateguwe igihe kirekire.'

Jenoside yabaye batuye mu Karere ka Bugesera, ariko ubwo Abatutsi batangiraga kwicwa bahise bahungira iwabo wa nyina umubyara mu Karere ka Kamonyi ahazwi nko ku Mugina.

Urugendo rwe rwo kwihisha niho rwatangiriye aho yagiye ahishwa mu ngo z'abaturanyi ba nyirarume kugeza ageze i Kabgayi.

Ubwo yari ari mu nzira yo guhunga bava ku Mugina berekeza i Kabgayi yanyuze mu nzira y'inzitane, aho baciye kuri za bariyeri nyinshi bamwe bakicwa ariko we akabasha gukomeza.

Yagaragaje ko yarokotse Interahamwe zari ziyobowe n'uwiyita shitani ubwo bari begereje gushyika mu Karere ka Muhanga ndetse bakaza kurokorwa n'imwe muri izo yabafashije kubona inzira yabagejeje iyo bajya.

Ati 'Iyo bariyeri yo mu Cyakabiri yari iyobowe n'umusirikare witwa shitani, ishusho ye n'ubu njya nyibona nawe yarabyivugiraga ngo ndi shitani…twaricaye ku murongo baradukubita. Baje kutumanura ahari ibyobo bacukuye, hirya hari abantu bahiritaga ariko ibyo byobo ntibabitwiciramo. Baratugaruye uwo shitani n'Interahamwe baradushinyagurira birarangira badutegeka kunyura ku kigo cya gisirikare ngo tubone kugera kuri stade ya Muhanga.'

'Harimo interahamwe imwe, niba ari Imana yari yayohereje simbizi, yaratubwiye ngo nitunyura aho ku basirikare ntabwo dushobora kuharenga atwereka inzira tunyuramo yindi tubona tugeze i Kabgayi.'

Urugamba ntabwo rwari rurangiye kuko naho hahungiraga Abatutsi benshi byatumye Interahamwe zarahateraga zigatwara abantu zikajya kubica ariko ku bw'amahirwe yaraharokokeye.

Yagaragaje ko ikibabaje ari uko hari abantu bakigoreka amateka ya Jenoside yakorewe Abatutsi abandi bakayipfobya.

Ati 'Muri iki gihe hari abantu bagihakana ko yabayeho, hari abayipfobya n'abayigoreka ariko twe nk'abacitse ku icumu nicyo gihango dufitanye n'abayihagaritse bakaturokora tukaba tubasha kuvuga ibyabaye. Byabaye ku manywa y'ihangu tubirebesha amaso yacu.'

Yasabye urubyiruko guharanira kubaka igihugu cyunze ubumwe ndetse akebura ababyeyi badashaka kwigisha abana babo amateka ngo bababwize ukuri kuko bakwiye gusigirwa umurage w'u Rwanda ruzira amacakubiri.

Umuyobozi w'Inama y'Ubutegetsi ya Ecobank Rwanda Plc, Mugisha Richard, yashimye Wibabara wabashije gusangiza abandi ubuhamya, yemeza ko Jenoside yakorewe Abatutsi yashobotse kuko abantu babuze ubumuntu.

Yasabye abakozi ba Ecobank rwanda kurangwa n'umuco wo kuba magirirane mu nshingano zabo bakora, kurangwa n'intekerezo nziza ndetse n'urukundo.

Umuyobozi Mukuru wa Aegis Trust, Alphonse Munyentwali, yagaragaje ko biteye isoni kubona Jenoside yarashobotse ariko agaragaza ko yateguwe igihe kirekire ndetse ashimangira ko kwibuka bifasha mu gukumira.

Yagaragaje ko kuva ku mwaduko w'ubukoloni habaye ibikorwa bigamije gutanya Abanyarwanda no gusenya igihugu.

Ati 'Njyewe mvuga ko habanje kwicwa igihugu kugira ngo abacyo nabo babone bicwe nta kirengera bafite kuko igihugu kirengera abacyo. Abafite igihugu kibarengera ntabwo bakicwa urw'abatutsi bishwe.'

Yagaragaje ko nta wasubiza u Rwanda aho rwavuye aho yaba aturutse hose, asaba gukomeza guharanira ko igihugu kigira ingufu zituma kirinda abacyo binyuze mu bumwe, ubunyarwanda bukaba icyomoro n'igihango Abanyarwanda bafitanye.

Ubwo abakozi ba Ecobank Rwanda basobanurirwaga amateka yagejeje kuri Jenoside

Abakozi n'abayobozi ba Ecobank Rwanda bunamiye abazize Jenoside yakorewe Abatutsi

Abakozi ba Ecobank Rwanda basabwe kurangwa n’urukundo

Abakozi ba Ecobank Rwanda Plc basobanuriwe amateka yagejeje kuri Jenoside

Umuyobozi w'Inama y'Ubutegetsi ya Ecobank Rwanda Plc, Mugisha Richard ashyira indabo ku mva rusange

Umuyobozi w'Inama y'Ubutegetsi ya Ecobank Rwanda Plc, Mugisha Richard yasabye abakozi bayo kurangwa no gushyira hamwe

Wibabara yagaragaje ko kurokoka bitari byoroshye

Ibi byavuzwe mu buhamya bwatanzwe ku wa Gatatu tariki ya 16 Mata 2024, ubwo mu Murenge wa Kimisagara hibukwaga ku nshuro ya 30 Jenoside yakorewe Abatutsi mu 1994.

Bamwe mu Batutsi barokokeye Jenoside muri uyu Murenge wa Kimisagara, bavuze ko habaye ubwicanyi ndengakamere kuko batwikirwaga mu nzu no mu mapine, binagera aho abandi botswa.

Ubu bwicanyi ngo bwari buyobowe n'umugore wayoboraga segiteri ya Kimisagra witwaga Karushara Rose na Gatabazi Bernard wari Perezida wa MRND ndetse n'undi mugore witwaga Nyirantibimenya Donatha wari warashinze bariyeri ku kabari ke.

Umugabo umwe yagize ati 'amateka ya Kimisagara ntasanzwe kuko habereye ubwicanyi ndengakamere kuko Abatutsi bashyirwagwa amabuye mu kanwa bakajyanwa kwicwa abandi amatako yabo agakatwa bakajya kuyotsa kugira ngo basibanganye ibimenyetso.'

Uhagarariye Ibuka mu Murenge wa Kimisagara, Kayiraga Gilbert, nawe yavuze ko muri aka gace habereye ubwicanyi bukabije ndetse bwari buyobowe n'umugore wahayoboraga.

Ati 'Aha twari dufite uwari umuyobozi Karushara Rose niwe wateguraga akanayobora ibikorwa byo gutsemba Abatutsi ndetse akanahabwa raporo y'abamaze kwicwa, uwitwa Gatabazi Bernard yafatanyaga nawe muri ibyo bitero byo kurimbura Abatutsi naho Nyirantibimenya Donatha we yari yarashinze bariyeri ku kabari ke ndetse yari yanaratoje abahungu be kuko nibo bajyanaga kwica abatutsi.'

Yongeyeho ko muri uyu murenge wa Kimisagara interahamwe zishe Abatutsi zigera aho zumva bidahagije zitangira no kubarya.

Ati 'Bishe Abatutsi bagera aho bumva bidahagije batangira kubotsa bakabaryamo brochette, urugero ni nka Vianney, baramwishe babona ko kumwica bidahagije baramwotsa bamuryamo brochette batwikira bantu mu nzu abandi mu mapine.'

Umuyobozi Nshingwabikorwa wungirije w'Akarere, Nshutiraguma Espérance, we yavuze ko ibyabereye Kimisagara biteye agahinda ndetse ababikoze bakwiye kubiryozwa.

Ati 'Ntabwo ngaruka ku mateka ya Kimisagara babivuze byinshi ndetse biteye agahinda kuko hari aho bageraga bakifata, ntekereza ko dukwiriye kumenya amakuru byimbitse kuko icyaha cya jenoside kidasaza kugira ngo uwashyikirijwe ubutabera ahanwe n'uwaba yarahishe azi ko nka nyuma y'imyaka 30 bizaba byaribagiranye nawe akurikiranwe ndetse n'uwaba azi aho imibiri iri ariko akanga kuyigaragaza ahanwe kuko icyo nacyo ni icyaha gihanwa.'

Yaboneyeho gushimira ababaye abarinzi b'igihango bitewe n'ubutwari bagize bakanga gukorana n'umwanzi, ahubwo bagahisha Abatutsi bahigwaga.

Abarokotse Jenoside yakorewe Abatutsi mu Murenge wa Kimisagara, bahamya ko habereye ubwicanyi bukabije kuko hari Abatutsi bagiye bicwa bakaribwa

Ni umuhango witabiriwe n’abantu batandukanye

Umuyobozi Nshingwabikorwa wungirije w’Akarere, Nshutiraguma Espérance n’Umunyamabanga Nshingwabikorwa w’Umurenge wa Kimisagara, Kalisa Jean Sauver bari ku Rwibutso rwa Jenoside rwa Kigali

Hagaragajwe ubwicanyi ndengakamere bwabereye mu Murenge wa Kimisagara muri Jenoside yakorewe Abatutsi mu 1994

East Africa Entertainment Awards niyo nkuru irimo kugarukwaho muri iyi minsi mu myidagaduro bitewe no kuba abanyarwanda bari mu bitabiriye bakanabasha kwegukana ibi bihembo byatangiwe muri Kenya yaba mu byiciro byihariye byahariwe u Rwanda no mu bya East Africa muri rusange.

Muri abo twavuga nka Israel Mbonyi, Muyoboke Alex, Alliah Cool, Marchal Ujeku, The Ben na Kozze.

Ntawahakana ko ari intambwe nziza Abanyarwanda bakomeje gutera, bityo tukaba twifuje  kugaruka kuri bimwe mu byiciro byibanzweho cyane, birimo Best Music Video East Africa cyegukanwe na The Ben abikesha indirimbo yise 'Ni Forever' yagiye hanze mu Ukuboza 2023 igatunganwa mu buryo bw'amajwi na Kozze naho amashusho yayo agakorwa na John Elarts.

Iyi ndirimbo iyingayinga Miliyoni 5 z'inshuro yarebwe kuri YouTube kumva ko ariyo yahize izindi mu buryo bw'amashusho byabaye ikintu cyanyuze abakunda uyu muhanzi.

Iyi ndirimbo ikaba ari nayo bamwe bavuga ko yashingiweho hahembwa Kozze nka 'Audio Producer of Excellence-East Africa' nubwo bisa nko kwirengagiza.

Winjiye ku kuba Kozze yaranyuze kuri Prince Kiiiz bari bahatanya mu cyiciro kimwe, wakwibaza uko byagenze, gusa impamvu wavuga ko zihari.

Uretse ko inkuru z’itangwa ry'ibihembo n'uburyo bikorwamo byasaba iminsi kubisobanura kuko bitangwa hashingiwe ahanini ku byo buri tsinda ritegura ibyo bihembo rigamije.

Gusa ariko hakanarebwa ku bikorwa by'umuntu n'amajwi y’abamushyigikiye niba ako gace ko gutora kari mu mabwiriza agenderwaho.

Ku ngingo irebana no kuba Kozze yaba yaregukanye iki gihembo abikwiye mu cyiciro yari ahanganyemo na Prince Kiiiz na Ayo Rush, ntawavuga ko ataribyo kuko byarabaye.

Bamwe babibonera mu nguni yo kuba yarakoranye na The Ben umaze kubaka izina ryihariye muri Kenya ahanini bitewe n'indirimbo yakoranye na Otile Brown kandi ariyo yatangiwemo ibihembo.

Ariko hakanaza indirimbo yakoranye na Diamond Platnumz mu ntangiriro za 2022 bise 'Why' iri mu zongeye umurindi wa The Ben mu Karere.

Nyamara ariko nubwo ibyo nabyo byarebwaho Kozze amaze kuba umwe mu batunganya umuziki bagutse.

Mu kiganiro InyaRwanda yigeze kugirana na Noopja  mbere y’uko uyu musore atunganya ni Forever, yavuze ko Kozze abantu bakwiye kumwitega.

Kozze wasoreje amasomo ku Nyundo benshi mu bahanzi bakorana na we bamushimira kuba afite ubuhanga bwo gukora injyana zitandukanye kandi mu buryo bufite umurishyo ugiye utandukanye.

Ibi bikaba binyuranye na benshi mu ba Producer bamwe usanga ucyumva indirimbo bitewe no kutagira udushya uhita wumva injya kumera n’iya runaka.

Kugeza ubu amaze gushyira ukuboko ku ndirimbo zitari nkeya, byerekana ko nubwo The Ben yarushijeho gusiga amavuta iyi mpano ariko yari ihari ndetse yanakegukanye ibihembo bidashidikanywaho bitewe n’indirimo yakoze.

Muri izo harimo Demu ya Bob Pro yakoranye na Kevin Kade na Mistaek, One Time ya Shemi, Pyramid ya Kevin Kade yakoranye na Drama T na Kivumbi King.

Hakaza kandi Mesaje ya Okkama, Amayoga ya Kevin Kade, Your Boyfriend ya Davis D, Kurura ya Bushali na Juno Kizigenza, Loyal ya Juno Kizigenza, Kanjenje ya Papa Cyangwe na Chriss Eazy.

Yegukanye igihembo nka Kozze ariko na Country Records ihabwa ikindi byose biri ku rwego rwa East AfricaBenshi mu bahanzi nka Kevin Kade bamaze gukorana inshuro zitari nkeya na Mistaek baramwiyambajeAmaze gukorana na Juno Kizigenza ku mishinga y’indirimbo zitari nkeya Papa Cyangwe na we ari mu bashimye ubuhanga bwa Kozze amwiyambaza mu ndirimbo zitandukanye