Author: webrwanda

Umukobwa witwa Agasaro Diane yongeye guhagurukira umuhanzi Bruce Melodie avuga ko babyaranye amusaba kuzuza inshingano ze agatanga indezo.

Ni ibaruwa yanditswe n’umunyamategeko Agasoro Diane yashatse, Me Turahirwa Theogene aho yavuze ko ari mu nyungu z’umwana we w’umukobwa yabyaye.

Muri iyi baruwa ISIMBI ifitiye kopi, uyu munyamategeko yagaragaje ko uwo mwana yavutse tariki ya 1 Nzeri 2015 akaba yitwa Itahiwacu Keza Blessings.

Yavuze ko yatereye agati mu ryinyo nyina w’umwana akaba ari we ukora inshingano zose.

Ati “kugeza ubu nyina w’umwana ni we wirya akimara kugira ngo umwana abone ibimutunga, imyambaro, amafaranga y’ishuri ndetse no kwivuza.”

Muri iyi baruwa yamwandikiye tariki ya 22 Mata 2024, yamubwiye ko yakwihutira gukemura ikibazo mu nzira y’ubwumvikane yakwanga bakitabaza ubutabera.

Ati “tukaba tugusaba kugusaba kubahiriza inshingano za we mu bwumvikane ku buryo bwihuse bitaba ibyo tukiyambaza inzira y’ubutabera kandi mukaba muzirengera ikiguzi cyose bizatwara kugira ngo ubutabera butangwe.”

Iyi baruwa kandi yandikiwe Bruce Melodie, banageneye kopi inzu ireberera inyungu ze ya 1:55AM.

Mu Guhyingo 2015 ubwo uyu mwana yari amaze 2 avutse, Agasoro Diane yamushyiriye Bruce Melodie agiye kumwaka indezo.

Yamusanze ahari Studio itunganya umuziki ya Super Level ariko undi abimenye ahita ajya kwihisha ngo atabonana n’uwo mukobwa, undi yahise afata umwana amushyira hejuru y’imodoka ya Bruce Melodie.

Igitego umunyezamu wa Mukura VS, Nicholas Sebwato yaraye atsinze igitego cyahesheje ikipe ye inota rimwe ku mukino wa Kiyovu Sports, yabaye umunyezamu wa mbere ubikoze muri shampiyona y’u Rwanda.

Hari mu mukino w’umunsi wa 28 wa shampiyona y’icyiciro cya mbere mu Rwanda umwaka w’imikino wa 2023-24 aho ejo hashize ku wa Kane tariki ya 25 Mata 2024 amakipe yombi yanganyije 1-1.

Ku munota wa 67 ni bwo Kilongozi Bazombwa wa Kiyovu Sports yayitsindiye igitego cya mbere, Mukura VS ikomeza irwana no kukishyura ariko biragorana kugeza mu minota y’inyongera.

Ubwo umukino wari ugeze ku munota wa 4 w’inyongera (90+4′), Mukura VS yabonye koruneri. Umunyezamu Sebwato Nicholas wa Mukura yavuye mu izamu na we ajya gutsinda iyi koruneri.

Iyi koruneri yatewe neza na Muvandimwe Jean Marie Vianney maze isanga aho Sebwato ahagaze ahita atsinda igitego cy’umutwe, umukino urangira ari 1-1.

Ibi byahise bituma uyu munyezamu w’umugande yandika amateka yo kuba ari we munyezamu ubikoze muri shampiyona y’u Rwanda mu mukino hagati (open play).

Undi munyezamu watsinze igitego ni Ndoli Jean Claude wabikoze mu gikombe cy’Amahoro ubwo yakiniraga APR FC batsinda Etoile del’Est 17-0, Ndoli yaje gutsinda igitego cya 15 kuri penaliti.

Yabibwiye Abanyamakuru, ku mugoroba wo kuri uyu wa Kane tariki 24 Mata 2024, bari bamubajije niba koko atazagumayo nk’uko byagenze kuri bamwe mu bahanzi bamubanjirije, bagiye bava i Kigali bagiye mu kazi, bakagenda nka za hene!

Aba banyamakuru nubwo babarizaga abakunzi b’umuhanzi Yverry, ariko ikibazo cyabo cyari gifite ishingiro kuko uyu si we muhanzi wa mbere, yewe bimaze kuba nk’aho bitakiri inkuru kumva ‘umuhanzi runaka wavuye i Kigali yagera muri Leta Zunze Ubumwe za Amerika, Canada n’ahandi, ntagaruke'.

Impungenge z’abibaza niba umuhanzi wagiye i Bwotamasimbi atazagaruka zifite ishingiro!

The Ben na Meddy basa n’abafunguye amarembo y’abahanzi! Ku wa 4 Nyakanga 2010, bombi berekeje muri Leta Zunze Ubumwe za Amerika mu gitaramo cyari cyiswe 'Urugwiro Conference.'

Bagiye bafite impapuro bahawe na Guverinoma y'u Rwanda nk'abagiye mu butumwa bw'akazi ka Leta (Passport de service). Nta gikorwa kindi bari gukora, uretse kuririmba ubundi bakagaruka mu Rwanda mu minsi yari iteganyijwe itarenga 15.

Siko byagenze, kuko aba bahanzi 'batorokeye' muri Amerika. The Ben yagarutse mu Rwanda nyuma y'imyaka itandatu (Mu Kuboza 2016).

Ubwo yari ageze ku kibuga cy'indege, yabajijwe impamvu yatorotse abanza kuzunguza umutwe no kwanga gusubiza iki kibazo, ariko mu magambo yabwiye abanyamakuru ko ari ikibazo bwite kuri we.

Ati 'Ubwo ni ubuzima bwanjye bwite, ntabwo nifuza kubitindaho cyane. Gusa nkunda u Rwanda, kandi nishimiye kuba ndugarutsemo nyuma y'imyaka itandatu, nkaba nsanze hari abantu twakoranye n'abandi bashya dukorana nishimiye kubamenya.' 

The Ben yashimye Guverinoma y'u Rwanda, avuga ko bakosheje ariko kandi basabye imbabazi. Ati 'Ndashimira cyane Leta y'u Rwanda ko ari umubyeyi, yadufashe nk'abana bayo, twarakosheje twanasabye imbabazi.'

Ubwo Meddy yari ageze mu Rwanda nyuma y'imyaka irindwi, ku wa 26 Kanama 2017, yavuze ko yatorotse kubera ko nk'undi mwana wese yashakaga kugerageza ubuzima bushya.

Agira ati 'Urabona iyo umuntu akiri muto, ahora ashakisha amahirwe arenzeho, ngo ubuzima bugende neza. Ni muri urwo rwego nagiye kandi numvaga hari igice cy'inzozi zanjye zigiye kugerwaho.'

Birakwiye ko umuhanzi ufite izina rikomeye i Kigali, yitwa uwatorotse igihugu?

Mu bihugu byateye imbere, hari ubuzima usanga benshi mu bakiri mu nzira y’amajyambere birimo n’u Rwanda barota. Abahanzi n'abo bari muri abo baba barabyirutse bafite izo nzozi zo kugera kure.

Ku wa 14 Gicurasi 2019, abasore n'inkumi 20 bo mu Itorero Inganzo Ngari berekeje muri Leta Zunze Ubumwe za Amerika bitabiriye Iserukiramuco Nyafurika ry'Imbyino rizwi nka Dance Africa Festival ritegurwa n'Ikigo cya Brooklyn Academy of Music.

Mbere yo guhagaruka i Kigali, baganirijwe n'abayobozi barimo Umuyobozi Mukuru w’Urwego rw’Inararibonye, Tito Rutaremera, ndetse barahiriye kuzuza inshingano bahawe n'Igihugu.

Banavuze indahiro igiri iti 'Maze kumva ibyo amategeko agenga urugendo rw'Inganzo Ngari muri Leta Zunze Ubumwe za Amerika, ndahiriye imbere y'Imana ishobora byose n'iri koraniro, ko nzubahiriza amasezerano ngiranye n'itorero, ko nzitwara neza ngendeye ku ndangagaciro zibereye umunyarwanda,'

'Ko ntazakoza isoni itorero muri iki gikorwa harimo no gusubira mu gihugu cyambyaye u Rwanda, nindenga kuri aya masezerano nzakurikiranwe n'amategeko.'

Bakigera muri Amerika, bagombaga gukora ibitaramo bitanu no kwigisha abakiri bato kubyina, ariko byarangiye ababyinnyi 8 batorotse.   

Abatorotse ni: Gasigwa Emmanuel, Hategekimana Ismael, Mukashyaka Clarisse, Nsabimana Aloys, Uwizerwa Albert, Uwitonze Dieudonne, Umuhoza Amissa, Ntwarabashi Salvan na Gasigwa Emmanuel. – Muri aba umwe muri bo niwe wari ufite Pasiporo.

Ubwo yari mu nama ya Rwanda Day yabereye mu Mujyi wa Washington muri Leta Zunze Ubumwe za Amerika, Minisitiri w'Urubyiruko n'Iterambere ry'Ubuhanzi, Dr Utumatwishima Abdllah yabwiye Abanyarwanda batuye muri kiriya gihugu guhaha ubumenyi, bakabwifashisha bateza imbere u Rwanda.

Hari aho yavuze ati 'Hamwe n'ubwenge buremano, ubumenyi bushya, za robots n'ibindi, dukeneye ubumenyi bushya mu rugo. Ariko niba umeze neza hano muri Amerika, turagushishikariza gukomeza kuba indashyikirwa aho uri. Kandi niba uri indashyikirwa, uri gukora neza ukinjiza amafaranga, twoherereze amafaranga mu rugo.'

Kuri iyi ngingo, umuhanzikazi Bwiza wataramiye muri Uganda, yabwiye InyaRwanda ko gutoroka ku muhanzi ahanini biterwa n'uko abantu benshi usanga bifuza kujya hanze, ugasanga rimwe na rimwe n'abagiye 'ntibagaruka'.

Ati 'Rero, umuhanzi yabona uburyo ajyayo yaba mu kazi cyangwa izindi mpamvu bagatangira kuvuga ko atazagaruka. Ikindi, ntekereza ko biterwa n'inzozi z'umuntu, ugushaka kwe cyangwa se aho ashaka kwerekeza ubuzima bwe. Kuko aba ari amahitamo ye.

Ruhumuriza James [King James], yavuze ko inkuru zikurikizwa umuhanzi wagiye gutaramira hanze y'u Rwanda, zituruka ku kuba hari abahanzi bagiye bajya gutaramira mu bihugu by'amahanga, ugasanga bagumyeho.

Ati 'Impamvu iyo umuhanzi avuye hano agiye hanze bavuga ko atazagaruka, muri rusange ni uko byigeze biba. Kandi ntabwo byabaye inshuro imwe. Abantu bakomeza gutekereza ko ari ikintu gishoboka.'    

Ni ikibazo gikomeye gikwiye gushakirwa umuti

King James wamamaye mu ndirimbo zinyuranye zishingiye ku rukundo, avuga ko iki ari ikibazo cyagutse ku buryo hakwiye kurebwa uko cyashyakirwa umurongo.

Ati 'Ni ikibazo cyakwirwaho! Mu by'ukuri hakamenyekana ikibitera, kuko nyine nk'abandi bose, uretse n'abahanzi hari abandi bagenda ntibagaruke. Byanze bikunze, hari impamvu ikwiye kwigwaho, ikabonerwa igisubizo.'

Nduwimana Jean Paul 'Noopja' washinze studio ya Country Records, yumvikanisha ko umuziki wawukorera aho ariho hose ku Isi, kuko usanga 'abenshi baba batahiriza umugozi umwe w'ishema ry'u Rwanda'.

Ariko kandi asanga abari mu myidagaduro bakarebeye hamwe impamvu zitera iki kibazo zigakemuka kuko ntaho bisa abahanzi 'bacu bose bagakoreye umuziki mu Rwanda, kuko umuziki ari urugamba'. Ati 'Ntiwarwana neza urugamba uri kure y'aho urwanira.'

Bwiza yavuze ko abahanzi bajya kuba mu mahanga  nabo baba bari gushyira mu bikorwa inzozi z’abo 

Umunyamakuru wa Isibo FM, DC Clement avuga ko kuba umuhanzi ajya gutaramira mu mahanga bigahuzwa n'uko atazagaruka mu Rwanda, ahanini bituruka ku ngero z'ababanjirije.

Kuri we asanga ari ingaruka zifatiye ku kuba Meddy na The Ben baragiye bagahera muri Leta Zunze Ubumwe za Amerika, bakagaruka nyuma y'igihe.

Yavuze ati 'Kuko niba twari dufite Meddy na The Ben bakomeye muri za 2010/2011 mu Rwanda bazwi barafashe umwanzuro wo kugenda bakagumayo rero, nta cyizere cy'undi wajyayo ngo agumeyo bitungurane.'

Yavuze ko ibi ari byo benshi mu bahanzi bashingiraho, bakabyaza amahirwe babonye yo kujya gutaramira hanze y'igihugu bagahitamo kuguma mu bihugu byateye imbere kugirango 'icyizere cy'imibereho ye kitazahungabana'.

DC Clement avuga ko ibi bimuha ubutumwa butari bwiza kuri we kuko 'niba buri wese uri mu myidagaduro arota kujya hanze ntagaruke, nyamara no mu Rwanda hari ubuzima kandi bishoboka'.

Asanga hakenewe ingando n'amahugurwa ahagije kuri iyi ngingo, kugirango abahanzi badakomeza kumva ko amakiriro yabo ari hanze.

Ati 'Ndetse nanatekereza ko hakwiriye n'amahugurwa cyangwa ingando zihariye zagenerwa abari mu myidagaduro iyo ngingo ikaganirwaho bihagije.'

Uyu musore witegura kurushinga, yumvikanisha ko umuziki w'u Rwanda utaragera ku rwego rw'aho watunga wonyine, kuko uyu munsi umuhanzi ashobora kuba afite indirimbo ikunzwe, yewe akabona n'ibiraka, ariko bwacya mu gitondo akaba umuntu usanzwe.

The Ben yagarutse mu Rwanda nyuma y’imyaka itandatu yitabiriye ibirori byaherekeje umuhango wo ‘Kwita Izina ‘

Umunyamakuru w'Ikigo cy'Igihugu cy'Itangazamakuru (RBA), Akayezu Jean de Dieu agaragaza ko hari impamvu nyinshi zishobora gutuma umuhanzi ufite izina rinini mu Rwanda ahitamo kujya kuba mu bihugu byateye imbere, umuziki akaba yawureka cyangwa se agatangirira ku busa.

Yatanze ingero za bamwe mu bahanzi bagiye bajya hanze y'u Rwanda, ku mpamvu zirenze iz'umuziki, zirimo nko kwiga ariko ntawigeze agaruka ku isoko ry'umuziki w'u Rwanda.

Ati 'Abo bose hari uwagarutse ngo yongere gukora tubibone. Ibi rero biri mu mpamvu zituma iyo abantu babonye umuhanzi agiye batangira gutekereza ko atazagaruka nk'abandi. Bishingiye kuri bakuru babo rero babanjirije.'

Akayezu yavuze ko impamvu ihetse izindi ituma abahanzi bahitamo kuguma mu mahanga, ari uko umuziki w'u Rwanda utaragera ku rwego rw'aho utanga umuhanzi ku rwego rwiza- Ibintu avuga ko bikwiye gushakirwa umuti urambye!

Bitanga ubuhe butumwa ku bari mu myidagaduro?

King James avuga ko ibi bitanga ubutumwa bw'uko hari icyuho mu muziki 'gikwiye gushakirwa igisubizo mu buryo bw'amikoro cyangwa n'ikindi gishobora gutuma umuntu agenda ariko ntagaruke.'

Umunyamakuru wa Goodrich, Stevene Rurangirwa yunga mu rya DC Clement, akavuga ko kuba umuhanzi ajya gutaramira hanze y'u Rwanda bigakurikirwa n'inkuru zivuga ko azagumayo, ahanini bishingira ku ngero za benshi bagiye bavuga ko bazagaruka, ariko amaso agahera mu kirere.

Uyu musore avuga ko ibi bitanga ubutumwa bw'uko uruganda rw'imyidagaduro mu Rwanda 'ntabwo ruriyubaka ku buryo rwatunga abarurimo mu kigero cyo kwihaza'. Asanga hakenewe 'ingufi nyinshi haba mu bikorera ndetse n'inzengo bitwe za Leta mu gukomeza kubaka imyidagaduro'.

Umuhanzi Manzi James [Humble Jizzo] ubarizwa muri Kenya muri iki gihe, yavuze ko iyo umuhanzi agiye kuba mu mahanga, gutangira umuziki bundi bushya bimugora, ahanini bitewe nuko umuziki utaragera ku rwego mpuzamahanga, biri no mu mpamvu atangirira hasi iyo atangiye urugendo rw'umuziki.

Ati 'Kuba ashobora kugenda bigasa naho atangiriye hasi, ni uko ahantu aba agiye umuziki wacu utagera ahantu uri ku rwego mpuzamahanga, ku buryo byorohera umunyamuziki wacu uri hariya, kuba yakorerayo umuziki agakomereza ku izina yari afite. Kubera ko umuziki wacu utazwi cyane, ari umuntu wubatse izina, umuziki wacu ukurikirwa cyane birashoboka ko yahakorera.'

Humble yavuze ko gukorera mu gihugu cy'amahanga atari ibintu byoroha, kuko iyo urebye no mu bindi bihugu abahanzi bagerageza kujya gukorera ahandi bibagora cyane.

Yavuze ko umuhanzi ugiye kuba mu mahanga agorwa cyane no kongera kwisanga ku isoko ry'umuziki w'u Rwanda, kuko kenshi bimusaba kugira umuhagararira.

Anagorwa no kumenyekanisha ibikorwa bye nk'uko byari bisanzwe, kwitabira ibitaramo n'ibindi. Ati 'Iwacu bisaba ko niba abafana bari aho ngaho mu gihugu cyacu, ari naho ushyira imbaraga, uhagaragare, ukore.'

Humble avuga ko ikibazo cy'abahanzi bahitamo kuguma imahanga, gikwiye kurebwa mu indorerwamo y'ishoramari ridahagije mu muziki mu Rwanda. Yibuka ko hari abagiye babigerageza ku byaza amafaranga umuziki ariko 'ugasanga ntibikunze'. 

Meddy yagarutse mu Rwanda yitabiriye igitaramo ‘Beer Fest’ 

King James avuga ko hakwiye gushakwa igisubizo gituma umuhanzi ugiye gutaramira hanze y’u Rwanda agaruka 

Yavuze ko gukora umuziki bihenze cyane, noneho wajya kureba umusaruro mu rwego rw'amafaranga ugasanga birahabanye. Ibi bikanagaragarira mu kuba abajyanama, kompanyi, abashoramari n'abandi batarumva neza uburyo bwo gukorana n'abahanzi ku buryo babyaza amafaranga ibikorwa bye.

Uyu muhanzi anajya kure, akavuga ko abaturage batarumva neza uburyo bwo kumva umuziki ari uko bishyuye, kuko benshi usanga bagifite imyumvire y'uko bumva umuziki ku buntu.

Ati 'Bishobora no kugutera ihungabana, kuko rimwe na rimwe amafaranga yakagutunze, birangira agiye mu bikorwa by'umuziki, ibi rero bituma umuhanzi atangiye gutanga icyizere acika intege. Umuhanzi rero yabona amahirwe yo kujya hanze, rimwe na rimwe akava mu muziki, akiyemeza gushakisha nk'abandi kugirango azavemo umuntu ufite icyo yimariye cyangwa se yifashishije.'

Humble Jizzo asobanura ko kujya hanze y'u Rwanda ugatangira kuhakorera umuziki, atari ikintu cyoroshye ari nayo mpamvu benshi bakora umuziki mu buryo budahozaho.

Yavuze ko impamvu zituma umuhanzi ajya kuba hanze zirenze imwe. Hari impamvu yo kuba umuhanzi yajya hanze agiye kwiga, kuba yagenda kubera ko umukunzi we uba mu mahanga cyangwa se umugore we barushinze n'ibindi.

Ati 'Ntekereza ko bitewe n'imiterere y'akazi mu Rwanda, ibikavamo, ibishorwamo. Kugirango ukomeze gukora ni uko uba ufite aho ukura. Abantu bakunda umuziki, twese twawukuriyemo, ariko uruganda rw'umuziki ruracyiyubaka, kugirango uruganda ruhaze buri wese ntibyoroshye, ari nayo mpamvu ubona abahanzi bakuru bagerageza gukora n'ibindi bikorwa.'

Humble yagiriye inama abahanzi bakiri bato yo kugerageza gushora imari no mu bindi bikorwa bibabyarira inyungu, ariko kandi bagashyira imbaraga mu gukora cyane. Anumvikanisha ko iyo muhanzi mukuru agiye, asiga icyuho mu muziki.

Imibereho y'ibyamamare ntivugwaho rumwe

Inkuru zikunze kugibwaho Impaka ni iz’imibereho y’ibyamamare, byumwihariko iby’ino usanga bivugwa ko bibaho ubuzima butari ubw’ukuri.

Bifashishije imbuga nkoranyambaga no mu biganiro n'itangazamakuru, bagaragaza cyangwa se bumvikanisha ko bahiriwe n'ubuzima. Ariko inyuma y'amarido, ababazi bagaragaza ko bitandukanye kure n'ibyo bareka abafana babo.

Hari umwe mu bahanzi uherutse kwishyuzwa ideni ry'amafaranga Miliyoni 1 Frw arayabura, bigera ubwo hifashishwa inkiko aratsindwa, yemera kwishyura.

Umunyamategeko yifashishije inzego zinyuranye, yashakishije amakuru asanga nta mutungo n'umwe wanditse kuri uwo muhanzi, ndetse no kuri konti ya telefoni nta kintu kiriho.

Yahuye n'iki kibazo mu gihe yari amaze igihe yamamariza sosiyete zikomeye z'ubucuruzi, ndetse agaragara ku byapa binyuranye mu Mujyi wa Kigali.

Hari undi muhanzi wasinye amasezerano muri Label, asaba  'Manager' we kumukodeshereza inzu, kumugurira imyenda n'ibindi.

Kuri Akayezu Jean De Dieu 'abahanzi bacu ntabwo babaho ubuzima bw'ukuri'. Ati 'Kubona umuhanzi ari kugenda mu modoka, kuba aba ahantu heza, biriya bintu hari ibindi bintu byinshi cyane biba bifatiyeho kugirango tubibone inyuma.'  

Akomeza ati 'Ashobora kuba yambaye neza ariko imyenda yambaye ari iyo yakodesheje, ari mu modoka ariko ari iyo yatiye, ashobora kuba aba mu nzu ariko atayishyura mu mafaranga ye… Ntabwo umuziki wacu uratunga abahanzi mu buryo bwa nyabwo.'

Aha niho ashingira avuga ko bamwe mu bahanzi bahitamo kuva mu 'gatwiko katinjiza' akajya mu mahanga gushakisha ubuzima, bikarenga kuririmba.

Bamwe bahuriza ku kugaragaza ko iki ari ikibazo gikomeye, kuko inzego zibishinzwe zikwiye guhuza imbaraga, hakubakwa uruganda rubereye buri wese, aho umuhanzi atunzwe n'ibyo akora. 

‘Noopja’ yavuze abari mu myidagaduro bakwiye kurebera hamwe impamvu bamwe mu bahanzi batagaruka iyo bagiye gutaramira hanze

Yverry yatangaje ko cyaba ari igikombo gikomeye ku gihugu agumye muri Canada

Humble Jizzo yavuze ko umuziki w’u Rwanda utaragera ku rwego rushobora gutunga umuhanzi ‘neza’, kandi ko gutangirira hanze y’igihugu umuziki atari ikintu cyoroshye 

Uwitonze Dieudonne ari mu babyinnyi b’itorero Inganzo Ngari bagumye muri Amerika nyuma yo gutaramiramo 

Ubwo yari ku kibuga cy’indege, Yverry yavuze ko azamara ukwezi kumwe muri Canada

KANDA HANO UREBE IKIGANIRO TWAGIRANYE NA YVERRY MBERE Y’UKO YEREKEZA MURI CANADA

“>

Ni mu mahugurwa y'iminsi ibiri ari kubera ku biro by'Akarere ka Ngoma kuva ku wa 24 kugeza ku wa 25 Mata 2024. Ari gutangwa mu rwego rw'umushinga watewe inkunga n'Ikigo cya Leta gishinzwe ubumenyi n'ikoranabuhanga (NCST), akaba ari guhabwa abahinzi b'inyanya bahagarariye abandi mu turere twa Nyagatare, Gatsibo, Kayonza, Rwamagana, Kirehe na Ngoma.

Dr Ndahimana Didace, umwarimu muri Kaminuza y'u Rwanda mu ishami ry'ubuhinzi n'ubworozi, yavuze ko bateguye aya mahugurwa mu rwego rwo guteza imbere ubuhinzi bw'inyanya no kwita ku musaruro wazo.

Ati 'Nka Kaminuza muri uyu mushinga twibanda ku gice cy'ubushakashatsi, hakabamo n'igice cy'ishoramari kizibandwaho na Afrinet solutions, twagiye dufata rero bamwe mu bahinzi bahagarariye abandi muri buri Karere tukabahugura kugira ngo bazabyigishe bagenzi babo.'

Dr Ndahimana yavuze ko bifuza ko u Rwanda rwakongera ingano y'inyanya zihingwa n'ubwiza bw'umusaruro ku buryo bigabanya amafaranga ashyirwa mu kugura imyanya n'ibizikomokaho hanze y'igihugu.

Yavuze ko bifuza kwereka abahinzi uburyo bakoresha bazihinga neza, uko bazisarura neza bikagabanya wa musaruro wabo ukunze gutakara.

Hategekimana Antoine usanzwe ahinga inyanya mu Karere ka Nyagatare mu Murenge wa Tabagwe, akaba n'umwe mu bahagariye abahinzi b'inyanya, yavuze ko muri aya mahugurwa bigiyemo ibintu byinshi bigamije kongera no kubungabunga umusaruro.

Ati 'umusaruro wacu wajyaga wangirika iyo weze kuko wabaga mwinshi bikarangira upfuye ubusa, ubu rero batweretse ko hari isoko muri Afrinet Solutions Ltd ry'ibyo tuzaba twejeje dukurikije ibyo twahuguweho. Banaduhuguye uko twarwanya ibyonnyi duhinga muri Green house, uko twakoresha ifumbire-mborera zihagije n'ibindi byinshi'.

Karekezi Richard usanzwe ari impuguke mu by'imari n'ishoramari akaba n'umujyanama muri Afrinet, yavuze ko bateguye aya mahugurwa kugira ngo bereke abahinzi uko bakongera umusaruro w'inyanya, uko watunganywa no kubereka uko ibisigazwa by'inyanya byabyazwamo ifumbire y'imborera nziza.

Karekezi yavuze ko Afrinet ifite umushinga wo gukora ibintu bitandukanye mu nyanya. Urwo ruganda ngo ruzakenera toni hafi 20 ku munsi, akaba ariyo mpamvu bari kwigisha abahinzi uko bakongera umusaruro kugira ngo urwo ruganda niruza ruzabashe kubona umusaruro uhagije.

Inyigo yakozwe na USAID mu mushinga wayo wa Feed the Future yagaragaje ko umusaruro w'inyanya iyo uvuye ku muhinzi ukagera ku isoko uba umaze gutakaza 56% by'ubwiza bwawo, akaba ari nayo mpamvu bari kwigisha abahinzi uko bafata neza umusaruro wazo kuva bakizihinga kugeza bazigurishije.

---

Ubwo yari yitabiriye inama yiga ku ikoranabuhanga no guhanga udushya mu kugorora iri kubera muri Turukiya mu mujyi wa Istanbul guhera 22-26 Mata 2024, CG Evariste Murenzi uyobora RCS yasinye amasezerano y'uko u Rwanda ruzakira Inama rusange y'Umuryango uhuza amagereza n'amagororero(ICPA) izaba mu 2025.

Ni amasezerano yasinywe hagati ya Komiseri Mukuru w'Urwego rw'u Rwanda rushinzwe Igorora RCS, CG Evariste Murenzi na Perezida w'Umuryango uhuza amagereza n'amagororero ku Isi, Peter Severin, yemeza ko u Rwanda arirwo ruzakira iyo nama ngarukamwaka ihuriramo abantu baturutse mu bihugu bitandukanye bafite aho bahurira n'inshingano zo gufunga no kugorora.

Inama iri kubera Istanbul iri kurebera hamwe uburyo bwo gukoresha ikoranabuhanga mu kugorora no kurushaho guhanga udushya mu bikorwaremezo byo mu magororero; ikareba kandi n'uburyo imibereho myiza n'iterambere by'abari mu magororero ryarushaho kugenda neza.

Abayiteraniyemo kandi banarebera hamwe uko ikoranabuhanga ryakoreshwa cyane muri ikigihe n'uburyo ibikorwa by'amagororero n'amagereza bya buri munsi bitabangamira ibidukikije.

Uyu Muryango mpuzamahanga ufite inshingano z'amagereza no kugorora (ICPA) washinzwe mu 1998. Ufite intego yo guhuza no gusangira ubumenyi n'imikorere hagati y'ibihugu muri gahunda yo kugorora, hagamijwe guteza imbere umutekano w'abafunze n'abagororwa bari mu magororero atandukanye ku Isi no gutuma barushaho kugira ubuzima bwiza.

Inama ya ICPA ni ngarukamwaka izenguruka ibihugu bitandukanye biri muri uwo muryango, igahuza abasaga 900.

Biteganyijwe ko iyo nama igiye kuba ku nshuro ya 27 izaba ku wa 26 – 31 Ukwakira 2025; aho u Rwanda ruzaba rubaye igihugu cya Kabiri muri Afurika cyakiriye iyo nama nyuma ya Namibia.

---

Ni ikibazo gihangayikishije Akarere cyane kuko iyo ugendeye ku muvuduko wo kubakira abatishoboye Akarere n'abafatanyabikorwa bako bariho usanga ari ibintu bizafata igihe kinini. Bubakira imiryango 120 gusa buri mwaka ibintu byasaba imyaka igera kuri 15 ngo ikibazo gikemuke.

Aha niho Akarere ka Musanze gahera kuvuga ko gakomeje gushakisha abandi bafatanyabikorwa muri iyi gahunda no gukomeza gukora ubuvugizi ku zindi nzego kugira ngo iki kibazo kibonerwe igisubizo.

Umuyobozi w'Akarere ka Musanze wungirije ushinzwe imibereho myiza y'abaturage, Kayiranga Théobard, avuga ko buri mwaka bagerageza kugaragaza bimwe mu bibazo bikibangamiye abaturage n'iki kirimo ariko ko bagiye kurushaho kwegera no gukorana n'abafatanyabikorwa kugira ngo bagabanye uburemere bwacyo.

Yagize ati “Dushaka gukorana n'abafatanyabikorwa nibura tukajya tubagabanya, nibura tukavuga ngo niba hari hoteli ikorera aha n'aha tukayegera tukayisaba ko yadufasha kubakira abo baturage. Bishobora kudufasha.”

Uyu muyobozi yakomeje avuga ko bari no muri gahunda yo gukomeza kwigisha abaturage uburyo bwo kwiteza imbere kuko hari abo bigaragara ko usanga bararangaye cyangwa bagasesagura duke baba bafite bakisanga mu bukene bwo gufashwa.

Ati “Ariko turakomeza no kwigisha abaturage bacu no kwivana mu bukene, kuko hari aho usanga umugabo atandukanye n'abagore batatu cyangwa bane, akagurisha isambu kandi yarigeze inzu akajya gutungira undi mu kintu kimeze nka nyakatsi cyangwa ihema, urwo rero ni urwego abantu bakwiye kurenga ndetse tukanareba niba abo twubakira bazifata neza nk'uko bikwiye. Icyo dusaba abaturage bose ni uko ibyo bafite bakwiye kubiheraho bakiteza imbere.”

Abaturage batuye mu nzu zishaje n'abatagira aho bakinga umusaya, bo bagaragaza ko hari ingaruka nyinshi zirimo uburwayi no kubaho badatekanye, bagasaba ko bafashwa kugira amacumbi adashyira ubuzima bwabo mu kaga.

Barinda Evariste ni umwe muri bo, yagize ati “Kubera ukuntu iyi nzu ari nto, kuryama ntibiba byoroshye ndetse nijoro iyo imvura iguye turara tunyagirwa ibintu byose bikajandama. Nta bushobozi dufite keretse leta cyangwa abagiraneza badufashije kuko akabanza ko turakifitiye.”

Maniraguha Esther nawe yagize ati “Tubayeho nabi kuko iyo mbonye umusiri (guhingira abandi), nibwo bampa 1000Frw nkagihahisha njye n'uyu mwana wanjye tukarya. Iyi nzu ni iy'umuntu yantije kandi nayo irava cyane kuko amabati hagati ntabwo ahuje ndetse na kiriya gikuta cyaratembye cyenda kugwa. Dukeneye ubufasha tukabona inzu.”

Muri izi nzu zigera kuri 1595 harimo 1423 bigaragara ko zishaje zikaba zigomba gusanwa, n'izigera ku 172 zigomba kubakirwa abatagira amacumbi.

---

Iki ni kimwe mu byemezo bikubiye mu Nama y'Abaminisitiri yateranye kuri uyu wa Kane tariki 25 Mata mu 2024. Yayobowe na Perezida Paul Kagame.

Mu bandi bayobozi bahawe imyanya n'iyi Nama y'Abaminisitiri harimo Barbara Akaliza wagizwe Umuyobozi ugushinzwe gukumira ibiza bikomoka ku mikorere yo mu nda y'Isi, mu Kigo cy'Igihugu gishinzwe Mine, Peteroli na Gaz, RMB.

Undi ni Esther Mugire wagizwe Umuyobozi Mukuru muri Minisiteri y'Ubutegetsi bw'Igihugu ushinzwe kugenzura inzego z'ibanze. Muri iyi Minisiteri kandi Boniface Ruterana yagizwe Umuyobozi Mukuru ushinzwe imiyoborere no kwegereza ubuyobozi abaturage, ni mu gihe Godfrey Kayigana yagizwe Umuyobozi Mukuru ushinzwe imibereho myiza y'abaturage n'iterambere.

Urundi rwego rwahawe abayobozi ni Ikigo gishinzwe Guteza Imbere Ibikorwa by'lterambere mu Nzego z'lbanze (LODA). Pascal Gashumba yagizwe Umuyobozi w'Ishami rishinzwe igenamigambi ry'inzego z'ibanze, Maurice Nsabibaruta we agirwa Umuyobozi w'ishami rishinzwe iterambere ry'abaturage no guhuza ibikorwa.

Itangazo ry’Ibyemezo by’Inama y’Abaminisitiri yo ku wa 25 Mata 2024 pic.twitter.com/T48mYmf3jX

— Office of the PM | Rwanda (@PrimatureRwanda) April 25, 2024

---

Ni icyemezo cyafatiwe mu Nama y'Abaminisitiri yateranye kuri uyu wa Kane tariki 25 Mata mu 2024, iyobowe na Perezida Paul Kagame.

Polisi y'u Rwanda ibinyujije ku rubuga nkoranyambaga rwa X yatangaje ko 'hashingiwe ku myanzuro y'inama y'Abaminisitiri yateranye uyu munsi, abantu bazaba bemerewe gukorera uruhushya rwo gutwara ibinyabiziga hakoreshejwe ibinyabizaga bya 'automatique'.

Yakomeje ivuga ko 'Abantu bazaba bahawe uruhushya rwo gutwara ibinyabiziga bya 'automatique' biri mu rwego batsindiye ni byo bazaba bemerewe gutwara. Abazatsindira uruhushya rwo gutwara ibinyabiziga bya 'manuel' bazaba bemerewe gutwara ibinyabiziga bya 'automatique' na 'manuel'.

Iyi myanzuro nitangira gushyirwa mu bikorwa tuzabamenyesha.'

Muri Nyakanga mu 2023 nibwo Guverinoma y'u Rwanda yari yatangaje ko iri mu myiteguro ya nyuma yo gutangira gutanga ibizamini byihariye ku bashaka impushya zo gutwara imodoka za 'automatique'.

Inkuru bifitanye isano: https://igihe.com/amakuru/u-rwanda/article/permis-zihariye-z-imodoka-za-automatique-zizatangira-gutangwa-ryari

---