Author: webrwanda

Guhera tariki 8 Kamena 2024 kugeza uyu munsi ku Cyumweru mu karere ka Huye na Gisagara haberaga irushwana ry'iminsi ibiri ryo kwibuka Alphonse Rutsindura wabaye umwarimu mu ishuri rya Petit Seminaire Virgo Fidelis de Butare.

Uyu mwarimu by'umwihariko yari umutoza w'ikipe ya Volleyball y'iki kigo ndetse akanagira n'uruhare mu iterambere ry'uyu mukino mu Rwanda. Rutsindura yitabye Imana yishwe muri Jenoside yakorewe Abatutsi mu 1994.

Iyi mikino y'uyu mwaka yakinwaga ku nshuro yayo ya 20, amakipe 50 niyo yari yitabiriye, akaba yari agabanyije mu byiciro bitandukanye. Hari harimo amakipe akina mu cyiciro cya mbere mu Rwanda mu bagabo n’abagore, ibigo by'amashuri yisumbuye, icyiciro rusange, abanza ndetse no mu bakanyujijeho mu mukino wa Volleyball. 

Ejo amakipe yakinnye yishakamo agera ku mikino ya nyuma ubundi uyu munsi aba aribwo ikinirwa muri Petit Seminaire Virgo Fidelis de Butare.

Mu cyiciro cy’abagabo, REG niyo yegukanye igikombe cyayo cya mbere cya Memorial Rutsindura 2024 itsinda Gisagara VC, amaseti 3-2. Iyari ifite igiheruka ni Police VC ikaba itaritabiriye.

APR VC niyo yegukanye umwanya wa 3 itsinze Kaminuza y’u Rwanda, Ishami rya Nyarugenge amaseti 3-0.

Mu cyiciro cy’abagore ikipe ya RRA niyo yegukanye igikombe itsinze APR VC amaseti 3-1 (13- 25; 25-16 25-2;25-21). Ikipe ya East African University WVC yegukanye umwanya wa 3 itsinze Wisdom amaseti 3-0.

Mu mashuri yisumbuye ikipe ya GSOB niyo yegukanye igikombe itsinze Petit Séminaire Virgo Fidels amaseti 3-2. Mu cyiciro rusange ( O LEVEL), umwanya wa mbere wegukanywe na GSOB itsinze Petit Seminaire Virgo Fidelis de Butare amaseti 3-2

Mu batarabigize umwuga ASEVIF niyo yegukanye umwanya wa mbere itsinze Relax VC amaseti 3-1.

Umuhanzikazi w’Umunya-Canada Celine Dion, yagarutse ku buryo yiyumvaga ubwo indwara ya “Stiff Person Syndrome” yari imugeze habi, n’uburyo yagize ingaruka zikomeye ku buzima bwe.

Mu kiganiro Celine Dion yagiranye na NBC News yo muri Leta Zunze Ubumwe z’Amerika, yavuze ko yumvaga ameze nk’aho hari umuntu uri kumuniga, ku buryo guhumeka byamugoraga kandi akababara mu mpfundiko no mu mbavu.

Celine Dion yavuze ko iyi ndwara ikimufata yumvaga ameze nkabo bari kumuniga

Uyu muhanzi w’imyaka 57 yagaragaje ko kubera uburyo iyo ndwara kuyikira bigoye, ari kwiga kubana nayo n’uko azakomeza gahunda ze zose ntacyo byishe.

Iyi ndwara ya Stiff Person Syndrome ikaba yaramufashe mu mpera za 2022 bituma ibitaramo yari afite byo kuzenguruka Isi abisubika.

Ubwo yari arembye, umuvandimwe we Claudette niwe wakunze kugenda atanga amakuru ye, aho yigeze no kuvuga ko byashoboka ko Celine atazongera kuririmba, ariko amaze koroherwa yavuze ko azakomeza kuririmba ndetse agasubukura n’ibitaramo bye.

Yavuze ko ari kwiga kubana n'iyi ndwara kuburyo mu gihe cya vuba azagaruka mu muziki

Mu gitondo cyo kuri iki Cyumweru tariki 09 Kamena 2024, ni bwo hakinwe isiganwa rya Kigali International Peace Marathon. Iri siganwa ryakinwaga ku nshuro ya 19, ryitabiriwe n’abantu basaga ibihumbi icumi (10,000) bari bavuye mu bihugu bisaga 34.

Iri siganwa ngarukamwaka, ryakinwe mu byiciro 3 bitandukanye, harimo icyiciro cya Full Marathon kingana n’ibirometero 42, icyiciro cya Half Marathon kingana n’intera ya Kirometero 21, ndetse na Run for peace ingana na Kirometero 10 abantu bakina bishimisha.

Abasiganwa bahagurukiraga kuri BK Arena bagaca Gishushu, kuri MTN, Baho Hospital, KCC Round about, Umubano Hotel, USA Ambassador’s residence bakanyura kuri KBC, bakomereza ku kabindi, bagahinguka primature round about, bakagaruka KBC Rugando, KCC, bagahinguka ku Gishushu, bagera Chez Londo, Zigama CSS, Regina pacis, bakajya kuri Simba ya Kimironko, bakagaruka kuri BK Arena. 

Abantu birutse Full Marathon bazengurutse muri uyu muhanda 2 mu gihe abakinnye Half Marathon bahanyuze inshuro imwe.

Mu basiganwa Full Marathon, Korir Laban Kpngetich ukomoka muri Kenya niwe wevugukanye iri siganwa aho yakoresheje amasaha abiri iminota 16 n’amasegonda 6, akurikirwa na Kiplagat Cornelus Kibet Mengich Moses aza ku mwanya wa 3. Umunyarwanda waje hafi ni Hitimana Noel waje ku mwanya wa 6 ndetse akurikirwa na Nizeyimana Alexis wabaye uwa 7.

Mu bagore, Joan Kipyatich yabaye uwa mbere akoresheje amasaha 2 iminota 33 n’amasegonda 27, Maseret Abebayehu aza ku mwanya wa 2, Florence Chepsoi aza ku mwanya wa gatatu.

Abanyarwanda bari bamaze iminsi batitwara neza gusa gusa kuri iyi nshuro babonye imidari 

Mu cyiciro cy’abirutse half Marathon mu bagabo, Langat Francis yaje ku mwanya wa mbere akoresheje isaha imwe iminota 4 n’amasegonda 5, Langat Leonard Kipkoech aza ku mwanya wa 2 Mutabazi Emmanuel aza ku mwanya wa 3, naho Muhitira Felicien aza ku mwanya wa 5 nk’undi munyarwanda waje hafi.

Mu bagore: Moseti Winfridah Moraa yaje kuba uwa mbere akoresheje isaha imwe iminota 12 n’amasegonda 50, Cheruiyot Vivian Jepkogel aza ku mwanya wa kabiri, Imanizabayo Emeline yaje ku mwanya wa 3 ndetse Uwizeyimana Jeanne Gentille aza ku mwanya wa 4.

Ibihembo ku bitwaye neza

Muri buri cyiciro hahembwe abakinnyi 8 ba mbere, aho muri Full Marathon umukinnyi wa mbere yahawe ibihumbi 20 by’amadorari, uwa 8 ahabwa igihumbi.

Mu basiganwe muri Half Marathon, uwa mbere yahawe ibihumbi 5 by’idorari, mu gihe uwa 8 yahawe amadorari 400.

Minisitiri wa Siporo Aurore Mimosa mu bitabiriye Kigali International Peace Marathon 

Ange Kagame yasiganwe mu birometero 10 

Mu gihe cya Jenoside, Abatutsi bakoraga mu Ruganda rw'Icyayi rwa Gisakura bagerageje kwihisha mu cyayi no mu nzu z'uruganda, abari abayobozi barwo na bamwe mu bayobozi ba Perefegitura ya Cyangungu na Komine Kagano, babasaba kuva aho bihishe babizeza kubarindira umutekano nyamara bahise bashyirwa mu modoka z'uruganda bajyanwa kuri paruwasi bicirwayo.

Mu gikorwa cyo kwibuka aba bakozi kuri uyu wa 8 Kamena 2024, Umuyobozi w'Uruganda rw'Icyayi rwa Gisakura, Kanyesigye Emmanuel yavuze ko kwibuka ari inshingano ya buri wese kugira ngo urumuri rw'icyizere n'ubudaheranwa rutazigera ruzakomeze kumurikira abariho n'abazabakomokaho, bikomeze bibe uruhererekane ibihe byose.

Ati 'Aya mateka yacu nubwo ashaririye ntazigera na rimwe yibagirana. Dukomeze kuyavomamo imbaraga zo gukomeza kubaho neza kugira ngo duheshe ishema abacu, duhora twibuka kandi tubabwire ngo ntabwo muzazima duhari.'

Kanyesigye yavuze ko ubwo Jenoside yakorwaga hari ibihugu byari bifite ububasha n'ubushobozi bwo kuyihagarika, ariko ko bitigeze bigira ubushake bwo kuyihagarika ihagarikwa n'Inkotanyi.

Ati 'Ndashimira ubutwari ntagereranwa bw'ingabo zari iza FPR-Inkotanyi, ziyobowe na Perezida Paul Kagame, dushimira cyane kandi tuzahora dushimira. Bitanze mu buryo budasanzwe, batabara abicwaga, ari nako bahanganye n'umwanzi n'Interahamwe'.

Abatutsi bakoraga mu ruganda rw'icyayi cya Gisakura bahigishijwe imbwa, bicwa umugenda abandi bicirwa mu ishyamba rya Nyungwe ku buryo n'ubu bamwe muri bo imibiri yabo itaraboneka ngo ishyingurwe mu cyubahiro.

Mukarusine Olive, wabaga muri uru ruganda kuko ariho umugabo we yakoraga, avuga ko umugabo we yishwe tariki 13 Mata 1994 amusigira abana bane barimo uwari ufite ukwezi kumwe, agashimira ubuyobozi bw'uruganda ko butahwemye kumuba hafi mu rugendo rutari rworoshye rwo kongera kwiyubaka.

Ubuyobozi bw'uruganda buhamya ko buzakomeza gufasha abarokotse Jenoside yakorewe Abatutsi baba abarukoramo n'abakora hanze yarwo.

Umuyobozi w'Akarere ka Nyamasheke, Mupenzi Narcisse yavuze ko kimwe mu bintu bikomeye Jenoside yasenye ari ubumwe bw'Abanyarwanda, ashima ko Inkontanyi zashyizeho Leta y'ubumwe ikubaka ubumwe bw'Abanyarwanda, ikanasubiza abantu uburenganzira n'ubwisanzure bari barambuwe.

yagaragaje ko urubyiruko rufite umukoro wo gutanga umusanzu mu kurwanya abashaka gusubiza igihugu mu mateka mabi cyanyuzemo.

Ati 'Amateka mabi yabayeho y'ubutegetsi bubi hari urubyiruko rutayazi, kandi ni rwo rwagize amahirwe yo kwiga, rukwiye kuyiga rukayamenya, rukadufasha kurwanya umwanzi ushaka kudusubiza muri ya mateka mabi'.

---

Pst Dr. Rutayisire yari mu kiganiro cyagenewe urubyiruko rusaga 1500 rwo mu turere twose tw'igihugu rwitabiriye Igihango cy'Urungano kuri uyu wa 8 Kamena 2024, hibukwa ku nshuro ya 30 urubyiruko rwazize Jenoside yakorewe Abatutsi.

Yagaragaje ko itorero ry'igihugu ryahozeho mbere y'ubukoloni ryafashaga abana b'Abanyarwanda kwiyumva nk'abana b'igihugu.

Pst Dr. Rutayisire yageze mu mashuri abanza mu 1965, ndetse mu gihe cyose Abatutsi barahagurutswaga, n'Abahutu bagahagurutswa bagamije kubiba urwango mu bana bakiri bato.

Ati 'Hari ubwo abantu bavuga ngo twe ntitwari tuzi icyo twari cyo, abo ni abo muri za 1970. Kuko nk'ubwo twebwe bo muri za 1960 nk'ubwo njye mu 1965 sinari kuyoberwa uwo ndi we twaramaze iminsi twirukanka,twihisha mu 1961, mu 1963 papa bakamwica ntabwo wari kumbwira ngo sinzi uwo ndi we.'

'Twari tubizi kuko twebwe amateka yari yaratwigishije ko hari abahigwa hakaba n'abahiga ukamenya ngo uriya ni umuhutu, uyu ni umututsi kandi n'abana bakabikubwira. Ndibuka ko twajyaga dutaha tuvuye ku ishuri ugasanga ku migwegwe yose, kuva iwacu kugera ku ishuri hari kilometero enye ku migwegwe hose habaga handitseho. Njye na mushiki wanjye unkurikira twari abahanga mu ishuri ugasanga ku migwegwe handitseho ngo ziriya nzoka zo kwa Karasira tuzazica.'

Yavuze ko mu isomo ry'uburere mboneragihugu abigishaga ibisobanuro by'amabara y'ibendera ry'igihugu babihuzaga no kubiba urwango hagati y'Abahutu n'Abatutsi.

Pst Dr. Rutayisire yasobanuye ko mu gihe cyo kuririmba indirimbo yubahiriza igihugu hari igice ataririmbaga kirimo amagambo avuga ngo 'nshimira abarwanashyaka.'

Ati 'Nazunguzaga umunwa ngo batamenya ko ntari kuririmba, ariko nashoboraga nte gushimira abantu bishe data?'

'Gusenyuka k'ubunyarwanda, barabanje bavanaho inkingi zatugiraga Abanyarwanda binjizamo sisiteme ituma tutiyumva mu bunyarwanda, bamwe bakibona mu moko, bamwe bakaba abanyamahanga abandi bakaba abenegihugu, bakabyigisha mu ishuri, bakabishyira mu bikorwa barangiza na politike ikabishimangira.'

Yagaragaje ko mu 1983 yari yarasoje amasomo ya kaminuza ari n'umwarimu muri kaminuza ariko bamwirukanayo bamujyana kwigisha mashuri y'icyiciro rusange (Tronc Commun), ubuyobozi bwayo bugashaka kumuhagararaho ariko icyemezo cyari cyanditseho ko yirukanywe kubera bivuze ku mpamvu za Leta birangira ahavuye.

Yagaragaje ko yaba repubulika ya mbere n'iya kabiri zose zari zaramunzwe n'ivangura n'amacakubiri asaba urubyiruko kwirinda ingengabitekerezo ya jenoside aho iva ikagera.

---