Author: webrwanda

Ibikorwa byo kwiyamamaza birakomeje mu gihe aho byatangiye ku itariki ya 22 Kamena 2024 bikazagera ku musozo ku wa 13 Nyakanga 2024.

Muri iy'inkuru tukaba tugiye kugaruka ku buryo abantu bakomeje kugenda bagaragaza ibyishimo byinshi baterwa no kubona umukandida wa FPR Inkotanyi Paul Kagame usanzwe ari no mu nshingano za Perezida wa Repubulika y'u Rwanda ashyigikiwe n’abo mu muryango we.

Amateka y'uyu muryango ahera mbere gato y'uko hatangira urugamba rwo kubohora igihugu aho Perezida Kagame yashakanye na Madamu Jeannette Kagame hari mu 1989.

Bidatinze Imana yabahaye imfura y'umwana w'umuhungu mu 1990, baza no kwibaruka abandi bana batatu aribo Ange Kagame, Ian Kagame na Brian Kagame.

Aba bana inshuro zose abantu baba bafite amatsiko yo kubabona cyane bari kumwe n'ababyeyi babo ndetse ni kimwe mu bintu bigarukwaho ku mbuga nkoranyambaga n'ibinyamakuru yaba mpuzamahanga n'ibyo mu gihugu.

Bamwe mu bababona amaso ku yandi usanga bagaruka ku buryo babasangana ukwicisha bugufi.

Henshi Perezida Kagame ajya,abana be nabo baba bahari, ibintu bizamura amarangamutima ya benshi.

Duhereye mu ntangiriro zo kwiyamamaza kwa Perezida Kagame,abantu benshi bashimishijwe no kubona Captain Ian Kagame ari mu barinze Se.

Amashusho n'amafoto by'uyu musore wasoreje muri 2022 amasomo ya gisirikare muri Kaminuza ya Royal Military Academy, Sandhurst UK yakomeje guhererekanwa.

Mu busanzwe kandi Capt Ian Kagame asanzwe afite impamyabumenyi y'icyiciro cya Gatatu mu Bukungu yakuye muri Kaminuza ya Williams College yo Leta Zunze Ubumwe za Amerika mu2019.

Ange Kagame n'umugabo we Bertrand Ndengeyingoma bitabiriye ibikorwa byo kwiyamamaza kwa FPR-Inkotanyi,ifoto yabo imwe aba bombi bafatanya ikiganza mu kindi yarahererekanijwe cyane.

Amashusho kandi ya Capt Ian Kagame abaha ikaze abereka aho berekeza ari muyihuse ku mbuga nkoranyambaga, abantu bagaruka ku buryo yahawe ikaze na musaza we ndetse anamucungiye umutekano.

Muri Kanama 2023, Ange Kagame aheruha guhabwa n'Inama y'Abaminisitiri yari iyobowe na Perezida Kagame inshingano zo kuba Umuyobozi wungirije w'Akanama gashinzwe Ingamba na Politiki za Leta mu Biro bya Perezida.

Uyu mubyeyi  w'abana 2 b'abakobwa afite impamyabumenyi y'icyiciro cya Kabiri cya Kaminuza mu birebana na politike yakuye Massachussets n'iyi cyiciro cya Gatatu cya Kaminuza mu Bubanyi n'Amahanga yakuye muri Kaminuza ya Columbia.

Muri iyi minsi kandi Ivan Cyomoro Kagame amaze iminsi agaragara ari kumwe n'ababyeyi hamwe n'abavandimwe, baherekeje Perezida Kagame mu bikorwa byo kwiyamamaza.

Andi mashusho yakirwa na murumuna we Capt Ian Kagame yakomeje guhererekanwa cyane ku mbuga, ayo ari kumwe n'ababyeyi be cyane atambuka yegeranye na Mama wabo, Madamu Jeannette Kagame nayo yakomeje kugenda abantu bayasangira.

Ivan Cyomoro Kagame mu 2020 yahawe inshingano n'Inama y'Abaminisitiri yari iyobowe na Perezida Kagame nk'umwe mu bagize Inama y'Ubuyobozi y'Urwego rw'Igihugu rushinzwe Iterambere [RDB].

Ni umusore w'umuhanga nk’uko bigenda byumvikana mu biganiro bike yabashije gutanga ahanini agaruka ku byerekeranye n'ubukungu n'iterambere.

Yasoreje icyiciro cya Gatatu cya Kaminuza mu Bukungu  aho yize muri Kaminuza ya Southern California muri Leta Zunze Ubumwe za Amerika.

Umuryango wa Perszida Kagame ukomeje kwishimirwa cyane

Amafoto ya Capt Ian Kagame akomeje guhererekanywa ku mbuga

Umunyamisiri Dr. Bahgat Korany Yassin ni inzobere mu kuvura indwara zitandukanye z'abagore, kwita ku babyeyi batwite kugeza babyaye, kuvura indwara zifata imyanya myibarukiro y'abagore n'abagabo, ibijyanye n'imyakura, gufasha ababuze urubyaro hifashishijwe ikoranabuhanga n'ibindi.

Ni umwe mu bize mu bijyanye n'ubuvuzi rusange muri Kaminuza ya Cairo yo mu Misiri, ayikomerezamo mu cyicyiro cya gatatu cya kaminuza mu bijyanye no kwita ku bagore batwite no guhangana n'indwara zifata imyanya myibarukiro, akaba anafite impamyabushobozi yahawe na European Society of Gynecological Endoscopy.

Ni impamyabushobozi yahamyaga ko yasoje amasomo ajyanye no kubaga abagore zimwe mu ndwara zifata imyanya myibarukiro ariko hifashishijwe ikoranabuhanga rifasha mu kutabaga umuntu ahantu hanini.

Muri Baho International Hospital, Dr. Bahgat Korany Yassin azajya afasha abafite ibibazo by'ubugumba kureba ikibazo bafite, abatwita ariko bagahura n'ibibazo bitandukanye, akurikirane abatwite kugeza babyaye, abafite ibibazo bisaba kubagwa abe yabibakorera hifashishijwe iryo koranabuhanga ryo guca ahantu hato ku mubiri, ndetse ni na we uzajya atanga serivisi za IVF ziteganywa gutangizwa vuba.

Uretse gufasha abagore azajya afasha n'abagabo bafite ibibazo by'imyanya myibarukiro bishobora no gutuma bagira ikibazo cy'ubugumba, baba abatarigeze babyara n'ababyigeze ariko bakagira ibibazo nyuma.

Umuhuzabikorwa mu Bitaro bya Baho International Hospital, Umuhoza Nicole yavuze ko izi serivisi batari bazifite ari yo mpamvu bazanya uwo muganga uzahoraho kugira ngo afashe abagana ibi bitaro kubona izo serivisi zitangwa hake.

Ati 'Azafasha kandi no mu guhuza intanga ibizwi nka In Vitro Fertilization, IVF. IVF ni gahunda turi gutegura nyuma yo kubona ko mu Rwanda izo serivisi zitangirwa hake abenshi bakajya kuzishakira hanze. Turi gushaka uko tuzishyiraho, Abaturarwanda bazibonere hafi kuko ni inshingano zacu kwita ku magara y'Abaturarwanda.'

Si ubwa mbere Dr Yassin agiye gutanga izo serivisi, kuko yazitanze henshi nko mu Bitaro bya King Saud Medical City, biherereye i Riyadh muri Arabie Saoudite, azitanga muri Gannah Hospital cyane cyane mu bijyanye na IVF mu myaka irindwi, i Clemont-Ferrand mu Bufaransa, muri Kenya, mu Birwa bya Maldives n'ahandi.

Iyo muganira uba wumva byamugora kubona umubare w'abo yafashije kuko amaze igihe kirenga imyaka 10, afasha ababuze urubyaro, akavuga ko 'ubu abatahiwe ari Abanyarwanda n'abandi banyamahanga bagana Baho International Hospital.'

Dr Yassin ati 'Mu mwaka ushize nasuye Baho International Hospital mbona ni ibitaro bifite icyerekezo gifatika mu buvuzi, bifite ibikoresho bihambaye, bituma numva naza hano, turemeranya ubu nahageze. Uyu munsi turi hano ngo dufashe abantu bafite ibyo bibazo. Nyuma y'uko bikunze muri Kenya n'ahandi, dushaka ko bikunda na hano mu Rwanda.'

Baho International Hospital ni ibitaro bimaze kwandika izina mu gufasha Abaturarwanda n'Abanyamahanga batandukanye, aho mu kwezi yakira abarwayi bari hagati ya 1500 na 6000, imibare bashaka kongera bijyanye n'izo serivisi nshya bari kuzana umunsi ku wundi. Ushaka serivisi batanga yanyura aha +250 782343710/+25078 812 5035

Mu kwezi Ibitaro bya Baho byakira abarwayi bari hagati ya 1500 na 6000

Umunyamisiri Dr. Bahgat Korany Yassin wahawe akazi muri Baho International Hospital yavuze ko amaze imyaka irenga 10 afasha mu kuvura indwara z’abagore

Umuhuzabikorwa mu Bitaro bya Baho International Hospital, Umuhoza Nicole yavuze ko bashaka no gutangiza ishami rifasha ababuze urubyaro kurubona hifashishijwe ikoranabuhanga rya IVF

Umunyamisiri Dr. Bahgat Korany Yassin, wahawe akazi na Baho International Hospital ni inzobere mu bijyanye n’indwara z’abagore ndetse afite uburambe mu bijyanye n’ikoranabuhanga ryo guhuriza hanze y’umuntu intanga rizwi nka IVF

Amafoto: Rusa Willy Prince

Ku wa 29 Kamena 2024 ni bwo NEC yatangaje ko kwiyimura kuri lisiti y'itora byarangiye, bityo buri wese akaba agomba kuzatorera aho yanditse kuri lisiti y'itora.

Mu matora azaba tariki ya 14-16 Nyakanga 2024, Komisiyo y'Igihugu y'Amatora nyuma yo gusanga hari abatazabasha kubona uko batorera aho banditswe, yemeje ibyiciro by'abantu bazemererwa gutorera aho bari.

Muri abo bemerewe kuzatorera aho batanditse, harimo abashinzwe umutekano bari mu kazi, abanyamakuru bakurikirana ibikorwa by'amatora, abashinzwe imirimo y'amatora, abaganga, abakora imirimo y'ubutabazi bari mu kazi ako kanya, abarwayi n'abarwaza ndetse n'abari mu butumwa bw'akazi.

Si abo gusa yatekerejeho kuko harimo kandi, Abahagarariye imitwe ya Politiki, ishyirahamwe ry'imitwe ya Politiki cyangwa umukandida wigenga, indorerezi zitora z'Abanyarwanda, Umunyarwanda uje mu Rwanda avuye mu kindi gihugu mu gihe cy'amatora ariko yariyandikishije ku rutonde rw'itora rwo muri Ambasade y'u Rwanda.

Undi wemerewe gutorera aho ari ni Umunyarwanda wiyandikishije mu gihugu umunsi w'itora ukagera ari hanze y'igihugu nawe yemerewe gutorera aho azaba ari ako kanya.

Amatora azatangira tariki ya 14 Nyakanga ku Banyarwanda bari mu mahanga naho abari mu gihugu bazatora tariki ya 15 Nyakanga na 16 ku byiciro byihariye.

Komisiyo y’igihugu y’amatora yatangaje abemerewe gutorera aho batanditse kuri lisiti y’itora

Ni ibirori byabereye i Kampala biyoborwa na Ambasaderi w'u Rwanda muri Uganda, Col. Joseph Rutabana, byitabirwa n'abarimo Umunyamabanga wa Leta muri Minisiteri y'Ububanyi n'Amahanga ya Uganda, Oriem Henry Okello n'abandi.

Amb Col. Rutabana yavuze ko nubwo u Rwanda rwabonye ubwigenge mu 1962 bisa n'aho ntacyo byamaze kuko bwakurikiwe n'ibikorwa by'ivangura rishingiye ku moko n'ibindi by'ubunyamaswa.

Yababwiye ko byatangiye mu 1959, Abanyarwanda bamwe barameneshwa abandi batoterezwa mu gihugu, ari na ko bicwa umusubizo, kugeza mu myaka irenga 30 yakurikiye ubwo Jenoside yashyirwaga mu bikorwa mu 1994.

Ati 'Ukwibohora kwa nyako ku gihugu cyacu n'abaturage kwabaye ku wa 04 Nyakanga 1994, bijyanye n'uko ingabo zari iza APR zari zimaze guhagarika Jenoside yakorerwaga Abatutsi. Uwo ni wo munsi ufatwa nko kongera kubaho k'u Rwanda.'

Yagaragaje uburyo uko kwibohora kwa nyako kwagizwemo uruhare n'abagabo n'abagore, abasore n'inkumi batikunze cyane bagashyira ubuzima bwabo mu kaga bakabohora Abanyarwanda bakanahagarika iyicwa ry'Abatutsi ryakorwaga mu gihugu hose.

Amb.Col. Rutabana yeretse abitabiriye urugendo rwose rwo kwibohora kuva mu 1990 kugeza ku wa 19 Nyakanga 1994, hashyirwaho Leta y'Ubumwe bw'Abanyarwanda izira ivangura iryo ari ryo ryose, ndetse ishyirwamo amashyaka yose atijanditse muri jenoside.

Yagaragaje uburyo Jenoside igihagarikwa u Rwanda rwari rutangiye urugendo rukomeye rwo kubaka ibyasenywe, kwita ku barokotse Jenoside, guhuza abayikoze n'abayirokotse, gushyingura mu cyubahiro abishwe n'ibindi bikorwa bijyanye no kwimakaza amahoro n'umutekano.

Ibyo byose byagombaga kujyana no kongera kuzahura u Rwanda mu nzego zose, ubukungu, ubuzima, uburezi, imibereho myiza n'ibindi.

Yababwiye ko ibyo byatumye ubu u Rwanda rushyiraho icyerekezo 2050 aho ruzaba ruri mu bihugu bikize, ndetse urebeye ku byo u Rwanda rwagezeho ubona ko icyo cyerekezo kizagerwaho nta kabuza.

Bike muri byinshi byagezweho yaberetse birimo icyizere cyo kubaho ku Banyarwanda cyageze ku myaka 69,6, 'kivuye mu myaka 46,4 mu 1978. Ingo zifite amazi meza zageze kuri 82,3%, abana bajya ku ishuri bari hagati y'imyaka itandatu na 11 ubu bagera kuri 89,4% n'ibindi byinshi.'

Imyaka 30 ishize uyu muyobozi yerekanye ko yaranzwe no kubaka urwego rw'umutekano ruhamye, Abanyarwanda bararindwa ndetse basagurira n'amahanga ku mutekano, aho ubu ingabo na polisi zirenga 5800 zoherejwe mu butumwa butandukanye ku Isi.

Ati 'Uyu munsi u Rwanda ni urwa gatatu ku Isi mu bihugu biri mu butumwa bwo kugarura amahoro mu Isi. Dufite n'ubundi bufatanye hagati y'ibihugu, aho ingabo na polisi byacu bijya kugarura umutekano nko muri Mozambique na Repubulika ya Centrafrique.'

Ni ibikorwa Amb.Col Rutabana yerekanye ko u Rwanda rwagezeho runafashijwe n'ibihugu by'inshuti, anagaruka ku butumwa Perezida Kagame yagarutseho ubwo u Rwanda n'Isi byibukaga ku nshuro ya 30 Jenoside yakorewe Abatutsi.

Aha Umukuru w'Igihugu yagarutse ku ruhare rw'ibihugu by'inshuti, 'nka Uganda yikoreye umutwaro w'ibibazo by'Abanyarwanda ndetse ikanabiveberwa.'

Amb Col. Rutabana yagaragaje uburyo u Rwanda na Uganda bikomeje guha imbaraga umubano wabyo binyuze mu nzego zitandukanye, ndetse yibutsa ko Abanya-Uganda batagomba kwirengangiza gusura u Rwanda ngo barebe uko ruri gutera imbere umunsi ku wundi.

Ibirori byo kwizihiza umunsi wo kwibohora byateguwe n’Abanyarwanda baba muri Uganda byitabiriwe n’abanyamahanga batandukanye

Abanyarwanda baba muri Uganda bizijije imyaka 30 u Rwanda rumaze rwibohoye

Uganda yifatanyije n’Abanyarwanda baba muri iki gihugu kwizihiza isabukuru y’imyaka 30 u Rwanda rumaze rwibihoye

Iyi gahunda izarangira mu 2029, u Rwanda rubura imyaka mike cyane no ngo rugere ku ntego nyamukuru yarwo yo kubarizwa mu bihugu bifite ubukungu bugereranyije (middle income country).

Ibi bigaragaza uburyo urwego rw'ubukungu ruzaba ruteye imbere u Rwanda rukaba rwarigize mu nguni zose, ha handi ntawatinya kuvuga ko nk'ingengo y'imari yose izaba ituruka mu Banyarwanda bivuye kuri 64% rugezeho uyu munsi.

Ubukomere bw'iyi ngingo n'Ishyaka riharanira Demokarasi no kurengera Ibidukikije mu Rwanda, Democratic Green Party of Rwanda, ryabwumvise kare ndetse iyo urebye mu migabo n'imigambi yayo ubona byinshi riteganyiriza uru rwego.

Kuri ubu iri shyaka riri guhatanira umwanya w'Umukuru w'Igihugu mu matora ateganyijwe ku wa 15 Nyakanga 2024, binyuze mu mukandida waryo Dr Frank Habineza, rikagira n'abakandida depite.

Mu mboni zaryo n'ukuri kw'ibihari, ribona ko ubukungu bw'igihugu bwazahajwe cyane n'imbogamizi zirimo nka Covid 19, intambara Ukraine ihanganyemo n'u Burusiya, umutekano muke n'amakimbirane mu karere n'ihindagurika ry'ibihe ridasigaye.

Rigaragaza ko nubwo ibyo bibazo u Rwanda rutabyizaniye hari n'ibindi bihari nyamara bikemuwe ubukungu bwasugira bugasagamba.

Ni ibibazo birimo n'ubwiyongere bw'imisoro mu nzego zitandukanye by'umwihariho uw'inyongeragaciro uri kuri 18%.

Ni yo mpamvu, Green Party igaragaza ko mu myaka itandukanye izakora uko ishoboye kose ngo igabanye imisoro ariko yongere umubare w'abasora badahunga gusoreshwa kuko imisoro itazaba ibavuna.

Iri shyaka ryiyemeje ko rizagabanya TVA ikava kuri 18% ikagera kuri 14% ku buryo u Rwanda ruzaba rusarura umusoro urenga miliyari 2619,2 Frw yakusanyije mu 2023/2024 bitavunye abaturage.

Gahunda yo gutunganya umusaruro w'umutungo kamere mbere y'uko woherezwa mu mahanga iri mu byo DGPR – Green Party yimirije imbere, binyuze mu kongera inganda enye zitunganya nk'amabuye y'agaciro zimaze kugera mu Rwanda.

Ibi bifite ishingiro kuko buriya kohereza amabuye y'agaciro hanze adatunganyijwe u Rwanda ruba ruhombye kabiri.

Nk'ubu zahabu akenshi iba iri kumwe n'andi mabuye nk'Ifeza cyangwa Umuringa, ibishobora gutuma uyijyanye ku isoko idatunganyije abona make, uwo agurishije iyo zahabu akunguka n'ayo mabuye yandi, bikaba no ku yandi mabuye.

Iyo nyungu yose ni yo iri shyaka rishaka ko yaguma mu Rwanda, rikavuga ko rizabizajyanisha no gukomeza ubushakashatsi bugaragaza ubwoko bw'amabuye y'agaciro u Rwanda rufite, ayo bikekwa ko abarirwa miliyari 150$ rukayakuramo akungura u Rwanda n'abakora muri iyo mirimo.

Ibyo biziyongera kuri gahunda yo kubaka inganda 416, kuko Green Party yizera ko muri iyi myaka itanu izaba yarashyize uruganda muri buri murenge.

Serivisi mu Rwanda ni urwego rufatiye runini ubukungu bw'igihugu aho nka 2023 yarangiye rwihariye 44% by'umusaruro mbumbe w'igihugu wanganaga miliyari zirenga ibihumbi 16,3 Frw.

Icyakora Green Party igaragaza ko uyu munsi uru rwego rutabyazwa umusaruro uko bikwiriye bijyanye n'ibibazo by'ubumenyi n'ubushobozi birurimo cyane cyane ku bikorera.

Ibyo byuho Green Party iteganya kubiziba, ibinyujije mu gushyiraho gahunda yo kongerera ubumenyi n'ubushobozi abakozi bo mu nzego z'abikorera, abakora neza bagashimirwa kugira ngo bihe n'abandi umwete.

Iteganya ko kandi izashyiraho politiki yorohereza abashinga inganda zitunganya ibikenerwa mu gihugu hagamijwe kongerera agaciro ibikomoka mu gihugu no hanze yacyo.

Ni ingingo izajyana no kuzamura umusaruro w'imbere mu gihugu, hatezwa imbere ubuhahirane n'amahanga, haherewe ku bihugu bituranye n'u Rwanda mu kugabanya izamuka ry'ibiciro.

Ni ibikorwa bizazamura ubucuruzi bw'ibyoherezwa mu mahanga bikarenga agera kuri miliyoni 1582$ nk'agaciro 2023 yasize buriho.

Muri gahunda yo kuzamura ubucuruzi ku rwego mpuzamahanga hagamijwe kongera ubukungu bw'igihugu, DGPR – Green Party yiyemeje ko izakuraho imisoro ku biribwa byinjira mu gihugu.

Kugeza uyu munsi u Rwanda rugeze ku bushobozi bwo gutanga megawati 406,4 by'umuriro mu gihugu hose, ndetse ubu ingo zingana na 77,1% zifite amashanyarazi.

DGPR – Green Party ibona ko nubwo hagezwe kuri byinshi hari ibibazo bikomeje gutuma iyi gahunda itagenda neza nk'ibiciro bihanitse ku mashanyarazi n'amazi bibangamiye iterambere ry'ubukungu bw'abaturage.

Iti 'Iki kibazo kijyanye n'ibikorwaremezo by'amazi n'umuriro bigezwa ku baturage, ariko ugasanga bidatanga serivisi ku bagenerwabikorwa.'

Kuri ubu biyemeje kongera ibikorwaremezo by'amashanyarazi n'amazi hibandwa cyane ku ngufu zisubira nk'imirasire y'izuba n'ibindi.

Mu kugabanya inyungu ihanitse zitangwa n'amabanki aho zimwe zigera no kuri 18%, DGPR – Green Party yo igaragaza ko niramuka itowe mu myaka itanu iri imbere iyo nyungu izahanandurwa, 12% ikaba inyungu ya nyuma banki yaka ku nguzanyo.

Abanyamuryango ba Green Party aha batangaga ibitekerezo kuri manifesto y’ishyaka ryabo

Abanyamuryango ba Green Party bagize uruhare mu gutunganya manifesto iri shyaka riri kwifashisha mu kwiyamamaza

Perezida wa Green Party, Dr Frank Habineza agaragaza ko natorwa buri murenge azashyiramo uruganda

Ku wa Gatandatu w'icyumweru gishize, tariki 6 Nyakanga 2024, nibwo umukobwa ukomoka muri Indonesia yahigitse bagenzi be maze yegukana ikamba rya Miss Supranational 2024, mu gihe umuhungu ukomoka muri Afurika y'Epfo nawe yegukanaga ikamba rya Mr Supranational 2024.

Andrea Aguilera wa Ecuador wari wambaye ikamba rya Miss Supranational guhera umwaka ushize, niwe wambitse ikamba uwamusimbuye, Harashta Haifa Zahra, mu birori byabereye i Nowy Sącz muri Pologne mu ijoro ryo ku wa Gatandatu.

Harashta Haifa Zahra ukomoka muri Indonesia w’imyaka 20 y’amavuko, niwe mukobwa wa mbere ukomoka muri iki gihugu wegukanye iri kamba, akaba yari yatsindiye guhagararira igihugu cye ku ya 8 Werurwe uyu mwaka.

Uyu mukobwa wabonye izuba ku itariki 9 Nzeri 2003, yakuriye i Bandug mu Burengerazuba bwa Indonesia. Se umubyara, yitwa Ginanjar akaba ari rwiyemezamirimo ukomeye mu mujyi wa Bandug, naho nyina akaba yitwa Yeni Yuliani.

Yatangiye guhatana mu marushanwa y’ubwiza ubwo yigaga mu mashuri yisumbuye mu 2017. Kuri ubu, Harashta ari gushaka impamyabushobozi muri Kaminuza ya National Institute of Technology Bandug (ITENAS), mu bijyanye na ‘Environmental Engineering.’

Zahra, ni umurwanashaka wiyemeje kuvuganira abandi, akaba ari no mu rugendo rwo guhinduka inzobere mu bijyanye no kwita ku bidukikije. Yatangije ubukangurambaga yise ‘Mother of Nature,’ bukaba bwibanda ku kibazo cyo kunyanyagiza imyanda mu mujyi atuyemo. 

Hamwe n’ubu bukangurambaga, Zahra yagizwe Ambasaderi w’Umuryango w’aba-Thailand udaharanira inyungu, ugamije guhindura imitekerereze y’abantu ku bijyanye no kunyanyagiza imyanda ikomoka ku bisigazwa by’ibiribwa mu rwego rwo guhangana n’ingaruka z’imihindagurikire y’ikirere ndetse no kwihaza mu biribwa.

Mu ijoro ryo ku ya 4 Nyakanga, nibwo hatorwaga umusore wahize abandi mu irushanwa rya Mister Supranational. Ibirori by’iri rushanwa ryabaga ku nshuro ya 8, byasize umunya-Afurika y’Epfo witwa Fezile Mkhize yambwitswe ikamba rya Mister Supranational 2024. 

Muri ibi birori, niho Ivan Alvarez Guedes wari wambitswe iri kamba umwaka ushize yaryambikiye Fezile wamusimbuye kuri uyu mwanya. Kimwe na Miss Supranational w’uyu mwaka, Fezile nawe yaciye agahigo ko kuba umunyafurika wa mbere wegukanye iri kamba kuva ryatangira gutangwa. Si ibyo gusa, kuko uyu musore ni nawe mwirabura wa mbere wanditse aya mateka. 

Afurika y’Epfo, ibaye igihugu cya kabiri kigize Miss & Mister Supranational nyuma y’u Buhinde. Mu 2022, nibwo Lalela Mswane yegukanye ikamba rya Miss Supranational ahigitse bagenzi be.

Fezile yahigitse bagenzi be bari bahatanye baturutse mu bihugu 36, harimo Cote d’Ivoire na Guatemala bari bitabiriye ku nshuro ya mbere. Mu buzima busanzwe, Fezile ni umukinnyi wa filime w’icyamamare muri Afurika y’Epfo, akaba umudogiteri, umunyamideli, akaba akora n’ibiganiro bimwe na bimwe kuri Televiziyo.

Sibwo bwa mbere yakwitabira iri rushanwa  kuko no mu 2019 yari yaryitabiriye birangira abaye igisonga cya mbere cya Mister Supranational, aho yanagizwe uhagarariye Umugabane muri iri rushanwa.

Ni umwana wa kabiri mu bana batatu, akaba yarakuriye mu mujyi muto witwa Gamalakhe nyuma y’uko Se yitabye Imana ubwo Fezile yari afite imyaka 4 gusa y’amavuko. Nyina, ni umwarimukazi, wiyemeje kurerana Fezile na barumuna be wenyine kugeza ubu.

Mu 2014, nibwo Fezile yahawe impamyabushobozi mu by’ubuvuzi na Kaminuza ya Cape Town. Nyuma yaho, yaje kuba inzobere mu kubaga imitima, ibi akaba abikorera mu bitaro bya Charlotte Maxeke Academic Hospital biherereye i Johannesburg. Aciye agahigo ko kuba umwirabura wa mbere wegukanye ikamba mu marushanwa yose y’ubwiza y’abagabo.

Zahra wa Indonesia niwe wegukanye ikamba rya Miss Supranational 2024

Zahra yanditse amateka yo kuba umunya-Indonesia wa mbere wegukanye iri kamba 

Fezile ubu ni Dogiteri, inzobere mu kubaga imitima

Yaciye agahigo katigezwe n’undi mwirabura wese, agirwa Mister Supranational 2024

Si ubwa mbere uyu musore w’imyaka 33 y’amavuko yitabiriye iri rushanwa

 
Yahesheje ishema Afurika

INTASHYO

Mucunguzi w'u Rwanda, mwene Kanyarwanda, munyemerere mbaramutse, mu izina ry'ababakunda. Nizeye ko mususurutse, kandi mudahangayitse kuko ibyo twabazanyemo tudateze kubibatamo.

Ganza imyaka ngize ni yo narwo rumawe ruvuye mu makuba yateye bamwe kuyoba, bagatatira igihango, bagasenya umuryango, bakica abavandimwe, Igihugu cyabuze ubumwe. Ganza igihe maze ndiho ni cyo n'u Rwanda rumazeho murutabaye murugobotse, murusukuye murutatse.

Imyaka ishize mvutse ni yo rumaze ruhindutse, amahoro ruyayobotse, ubumwe rubwimitse, mutubohoye, mutuyoboye, dufatanyije tunatuje, none mutugejeje ku ntera ishimishije.

INTANGIRIRO YO GUTABARWA

Muri mirongo icyenda (1990), urwo mukunda u Rwanda rwabavanye muri Amerika muturwanira ishyaka. Mwinjira ishyamba muvugurura ingamba, muyobora urugamba, ntitwaguma guhomba.

Tariki 4 Nyakanga (1994) mutungura amahanga mubohora urwa Gihanga, ababisha barahunga. Muhagarika Jenoside yakorewe Abatutsi mu 1994, mufungura za Ambasade, u Rwanda ruranda, muguma kururinda.

INKOMOKO Y'URUKUNDO N'ICYIZERE

Rumuri rw' ubuzima, twahawe na Rurema, mwatuvanye ahabi twari, mutugeza aheza turi. Urukundo twaberetse, munyemerere mbibutse aho rwakomotse, na bimwe mu biruhatse.

Mu majyepfo mwavukiye, nubwo mutahakuriye ntabwo mwahibagiwe, niyo mpamvu bizihiwe. Abatoya n’abakuru, abakobwa n’abahungu bo mu majyaruguru mwabamaze irungu. Icyateraga ubwoba ab’ iburengerazuba, ntikigiteye impagarara, bararyama bagasinzira.

Abataragiraga aho baba mu burasirazuba, mwaje kubagabira, barahinga bakorora. I Kigali mu murwa, abahoraga bavirwa, baje kubakirwa, baba mu miturirwa.

ISURA NSHYA Y'U RWANDA

Murukiza umwanda, mutumara agahinda, mwirukana amoko, maze duhuza amaboko. Mucyura abari ishyanga, bataha nta gihunga, mwakira n’abanyamahanga bahunga badusanga.

Abitwikiraga ijoro bakatubuza amahoro, mwabahaye isomo mubashyiraho akadomo. Mushyigikira Gacaca imanza nyinshi irazica, muca umuco wo kudahana, mudutoza kubabarirana.

Mwicara mu rugwiro muhuza urugwiro, muba intwararumuri mutubera urumuri. U Rwanda muruha isura ikurura abarusura, bakarara bagasubira, ababishaka bakanatura.

IMIBEREHO MYIZA

Mushyigikira umufasha atwitaho aradufasha abakuru n' abato, aduterera urubuto, ruravomerwa rurera, ruraturera turakura, rusoromerwa ingeri zose mu gihugu hose. Mutwubaka amashuri, mutuvana mu tururi, mutwereka ubutwari bw’abari n’abategarugori.

Mutwubakira imihanda, u Rwanda rugira inganda. Mushyigikira umuganda no kwigira nk' u Rwanda. Mutworohereza kuvurwa, muragaba turakamirwa, munaduha amazi meza n'amashanyarazi.

Mudufasha gucuruza, amafaranga turayinjiza, mudutoza indyo nziza, abana bakura neza. Mwagaruye itorero, ababyiruka mubaha indero, bigishwa indangagaciro ngo babe ingirakamaro. Mwashyigikiye imikino, muteza imbere impano, muzahura umubano hirya no hino.

ISENGESHO

Mubyeyi dukunda, mwadukuye mu gahinda muzahura u Rwanda, rurasubira ruranda. Munyemerere mbasabire ‘Ubuzima bwanyu ni bukomere’, maze twongere tubatore, mwongere mutuyobore.

Mutujye imbere tubakurikire, duhige tunahigure nibucya dusubire, dukomeze dutere imbere. Duhinge tunatere tubagare tunuhire tweze dusarure, twicare dusangire.

ISEZERANO

Ntandaro y'Amahoro, imvugo yanyu ni yo ngiro, mwihesha agaciro mukatubera urugero. Iyi ntsinzi tubyina n’aho igihugu kigana, ni mwebwe tubikesha na Rurema tubakesha.

Natwe uko tungana, kurya mwabonye tubyina, twiteguye kubafasha, tukagera ku bishya. Urukundo mudukunda ni rwo natwe tubakunda.

Umwanditsi: Ganza K. Bertin

Kuri uyu wa Mbere tariki ya 8 Nyakanga 2024, nibwo mu gihugu hose hatangijwe ku mugaragaro ibizamini bya Leta bisoza amashuri abanza y'umwaka wa 2023-2024. Ni ibizamini biri gukorwa n'abanyeshuri 202 189 barimo abakobwa 111 810 n'abahungu 91 189.

Umuvugizi wa RCS, CSP Kubwimana Thérèse, yabwiye IGIHE ko ibi bizamini bizakorwa kandi n'abana 16 bagororerwa mu Igororero ry'abana rya Nyagatare barimo abahungu 15 n'umukobwa umwe.

Yavuze ko kandi muri aba bana barimo abana babiri barangije ibihano ariko bari gukorana n'abandi ibizamini bya Leta.

CSP Kubwimana yavuze ko kandi mu mashuri yisumbuye bafite abana bane bazakora ibizamini bya leta bisoza umwaka wa gatatu w'amashuri yisumbuye, bose bakaba baba bigishirijwe mu Igororero ry'abana rya Nyagatare.

Mu kwezi gushize bamwe mu bana bagororewe muri iri gororero ry'abana rya Nyagatare batanze ubuhamya bw'uburyo kuhagororerwa bakemererwa gukomeza amashuri byafashije bamwe kugororoka neza.

Nkundiyimana Hussein wagororewe muri iri gororero akanakatirwa imyaka 14 azira ibyaha birimo ubugambanyi n'iterabwoba, yavuze ko akigera muri iri gororero yakomeje kwiga anakora ibizamini bya Leta anabitsinda neza.

Nyuma yahawe imbabazi na Perezida wa Repubulika bituma ajya kwiga hanze ndetse anakomeza gutsinda neza ibizamini bya Leta ku buryo ari kwitegura kujya kwiga muri Kaminuza y'u Rwanda muri Nzeri uyu mwaka.

Uretse uyu muhungu hari n'abandi benshi bagiye bahiga imyuga irimo ubudozi, gusudira, ububaji, no kogosha. Iyi myuga ibafasha mu kwiteza imbere iyo barangije ibihano byabo.

Kugeza ubu abana 161 bagororewe mu Igororero ry'abana rya Nyagatare bamaze gukora ibizamini bya Leta, abagera kuri 64 bahawe imbabazi n'Umukuru w'Igihugu.

Abana 16 bagororerwa muri gereza ya Nyagatare batangiye gukora ibizamini bya Leta